1-2. Bema ta na e uramu baine bapatiso, dahaka baine kara guna be namo?

 LAḠANI faiv lalodiai, taunimanima milion mai kahana na e bapatiso bona Iehova ena Witnes taudia ai ela. Idia momo na Kristen ginigunadia edia nega ai e nohova tauna, Timoteo ­heḡereḡerena, “maraḡidia” negana amo hereva momokani e hadibalaidia. (2 Tim. 3:​14, 15) Haida be eregabedia ai Iehova e dibaia, bona ma haida be iahudia negana ai Iehova e dibaia. Laḡani haida gunadiai, hahine burukana ta na Iehova ena Witnes taudia ida Baibul e stadilaia bena laḡanina 97 ai e bapatiso.

² Bema oi na Baibul stadi ta eiava tamamu sinamu na Iehova ena Witnes bona hereva momokani ai o bada, oi danu bapatiso iabina lalohadaina o abiamu, eiava? Bema oibe, una na goal namona! To namona na Iehova enai emu mauri ba gwauhamatalaia guna bena gabeai ba bapatiso. Ina atikol ese be hahedinaraiamu edena dala ai unu ba kara toma. Danu, be durumumu dahaka dainai basio gari emu mauri ba gwauhamatalaia bona ba bapatiso.

GWAUHAMATA ANINA BE DAHAKA?

3. Baibul ai, e gwauhamata Iehova bae hesiai henia taudia haida be daidia?

³ Baibul ai, ta ese Iehova enai ena mauri e gwauhamatalaiamu anina na, ia na e uramu ḡaukara helaḡana ta baine karaia. Israel taudia na Iehova ese e abidia hidi taudia. Bona una bese amo haida na ḡaukara idauna ta bae karaia totona e abidia hidiva. Heḡereḡere Aaron kwarana ai, iḡeḡelaina dabuana na ‘gold korona helaḡana’ e atoa. Una gold korona amo taunimanima na e dibava, Aaron na Israel taudia edia hahelaḡa tauna badana. (Lev. 8:9) Nasiri taudia danu Iehova bae hesiai henia gwauhamatana e karaia. Ina hereva “Nasiri” na Heberu  gado herevana nazirʹ amo e hahanaia, ia anina ta na “Ḡau Ta Totona E Abia Hidi Tauna” eiava “Ena Mauri E Gwauhamatalaia Tauna.” Oibe, Iehova ese Nasiri taudia e henidia taravatudia na bae badina.​—Num. 6:​2-8.

4. (a) Iehova enai emu mauri o gwauhamatalaiamu neganai, oiemu ai mai anina bada ḡauna be dahaka? (b) Ta na “sibona bema hedadarai” anina be dahaka? (Laulau danu ba itaia.)

⁴ Iehova enai emu mauri o gwauhamatalaiamu neganai, o hahedinaraiamu oi na Iesu Keriso ena hahediba tauna ta bona emu mauri ibounai lalonai Dirava ena ura ikarana na mai anina bada. Una be ede ba karaia toma? Iesu na e gwa: “Tau ta bema ura lau murigu ai bema raka, ia na sibona bema hedadarai.” (Mat. 16:24) Ina hereva “sibona bema hedadarai” na Greek gado amo baita hahanaiamu neganai, ia anina ma ta na “ta sibona ena ura baine dadaraia.” Ita na Iehova enai eda mauri ta gwauhamatalaia tauda dainai, Iehova ese se moalelaimu karadia baita dadarai. (2 Kor. 5:​14, 15) Anina na “tau-anina ena kara,” heḡereḡere, matabodaḡa karadia baita dadarai. (Gal. 5:​19-​21; 1 Kor. 6:​18) Unu taravatu ese emu mauri e ha-aukaiamu, a? Lasi, badina oi na Iehova o lalokau heniamu bona o abia daemu iena taravatu ibadinadia na mai edia namo. (Sal. 119:97; Isa. 48:​17, 18) Tadikaka ta ladana Nicholas na ini e gwau toma: “Oi ese Iehova ena taravatu be ede o lalodia tomamu, dibura ruma maḡuna ta na heto oi e koumumu emu ura karadia basio kara eiava leona e koudia maḡuna ta na heto oi e gimamumu.”

5. (a) Emu gwauhamata Iehova enai be ede ba karaia toma? (b) Gwauhamata bona bapatiso edia idau be dahaka? (Laulau danu ba itaia.)

⁵ Emu gwauhamata Iehova enai be ede ba karaia toma? Ḡuriḡuri amo Iehova ba hamaoroa oi na o uramu ia mo ba tomadiho henia, bona emu mauri ibounai lalonai ena ura bavatoa guna. Oi na o gwauhamatamu, ­ Iehova na “mai lalomu idoinai, [emu mauri] idoinai, mai daramu idoinai, [bona] mai goadamu idoinai” ba lalokau henia. (Mar. 12:30) Una gwauhamata na oi bona Iehova padamui ai bo karaiamu ḡauna. To bapatiso be idau, una na taunimanima vairadiai bo hahedinaraiamu oi na gwauhamata ta vada o karaia. Una gwauhamata na helaḡa dainai, namona na ba haḡuḡurua, badina Iehova danu e uramu oi na unu ba kara toma.​—Koh. 5:​4, 5.

DAHAKA DAINAI EMU MAURI BA GWAUHAMATALAIA?

6. Dahaka dainai ta na Iehova enai ena mauri e gwauhamatalaiamu?

⁶ Iehova enai emu mauri o gwauhamatalaia badina ta na Ia o lalokau heniamu. Una lalokau na dia hemami ai mo, to Iehova o dibaia namonamo bona ena ura o lalopararalaia dainai, emu lalokau ia enai na e bada. (Kol. 1:9) Baibul istadilaina karana amo o abia dae (1) Iehova na mauri Diravana, (2) Baibul ai ta duahimu herevadia na Ia amo, bona (3) iena ura baine haḡuḡurua totona, ena orea e ḡaukaralaiamu.

7. Dirava enai ena mauri e gwauhamatalaiamu tauna na dahaka baine kara be namo?

⁷ Iehova enai ena mauri e gwauhamatalaiamu tauna na Baibul ena hahediba hereva badadia na vada mai dibana bona Iena taravatu na e badinamu. Danu e dibadiamu ḡaudia na ma haida e hadibalaidiamu. (Mat. 28:​19, 20) Una ese e hahedinaraiamu ia na Iehova e lalokau henia badamu, bona e uramu Iehova sibona mo baine tomadiho henia. A dibamu oi danu o uramu unu ba kara toma. Bema ta na mai kudouna ibounai ida Iehova e lalokau heniamu, iena mauri na Iehova enai be gwauhamatalaiamu bona be bapatisomu, dia  ena Baibul tisa eiava tamana sinana ihamoaledia daidiai, eiava turana veridia e bapatisomu dainai ia danu e uramu baine bapatiso.

8. Iehova enai emu mauri ba gwauhamatalaia badidia haida be dahaka? (Salamo 116:​12-​14)

⁸ Iehova ese oi daimu ai e kara ḡau namodia momo bo lalo dobumu neganai, oi na bo uramu emu mauri ba gwauhamatalaia emu tenkiu karana ba hahedinaraia totona. (Salamo 116:​12-​14 ba duahidia.) Baibul ese Iehova na e gwauraia “harihari ḡaudia namodia iboudiai bona herahia ḡaudia ḡoeva-daedia iboudiai” ihenidia Diravana. (Iak. 1:17) To unu harihari ḡaudia iboudiai e hereadia hariharina na ia Natuna, Iesu, ena boubou ḡauna. Mani a laloa, una mauri davana ese dala e kehoa oi na Iehova turana ai baola. Danu Iehova ese mauri hanaihanai helarona na oi e henimu. (1 Ioa. 4:​9, 10, 19) Una dainai bema Iehova enai emu mauri bo gwauhamatalaiamu, bo hahedinaraiamu oi ese una lalokau karana hereadaena bona Iehova ese e henimu hahenamodia na o lalodia badamu. (Deu. 16:17; 2 Kor. 5:​15) Emu tenkiu karana ba hahedinaraia daladia ma haida na Mauri Moalelaia Hanaihanai! bukana ena lesen 46 point 4 ai bo itadiamu, bona una lesen ai 3 minit vidiona ta ladana Emu Harihari Gaudia be Dirava Dekenai Oi Henia ba itaia.

OI DO HEḠAEḠAE EMU MAURI BA GWAUHAMATALAIA BONA BA BAPATISO?

9. Dahaka dainai ta basita doria Iehova enai ena mauri baine gwauhamatalaia?

⁹ Reana bo laloamu oi na dia heḡereḡere emu mauri ba gwauhamatalaia bona ba bapatiso. Reana oi na doini emu mauri ai sensi haida o karamu unu amo Iehova ena taravatu ba badinadia, eiava o uramu doini emu abidadama ba hagoadaia. (Kol. 2:​6, 7) Stiuden ta ena goada lauma dalana ai na idau ma ta ena amo, bona matamata taudia haida be e bapatiso haraḡamu haida be gabeai e bapatisomu. Namona na lauma dalanai oi sibomu ese ba hanamo ḡaudia na ba kara emu goada heḡereḡerenai, bona ma ta ida sibomu na basio haheḡere­ḡere.​—Gal. 6:​4, 5.

10. Bema o dibamu oi na do dia heḡereḡere emu mauri ba gwauhamatalaia bona ba bapatiso, dahaka ba kara diba? (Ina maua, “ Hereva Momokani Lalonai E Badamu Memero Kekeni Edia,” danu ba itaia.)

¹⁰ Ena be o dibamu oi na do dia heḡereḡere Iehova enai emu mauri ba gwauhamatalaia, namona na emu goal ai ba halaoa. Iehova ba noia baine durumu emu mauri ai ḡau haida ba haidau diba. (Fili. 2:​13; 3:​16) Namona na bavabia dae Ia ese emu ḡuriḡuri na be kamonaiamu bona be durumumu.​—1 Ioa. 5:​14.

HAIDA E DARADARAMU BADINA

11. Edena dala ai Iehova ese ita be durudamu ia baita badinaia?

¹¹ Ena be haida na da heḡereḡere edia mauri bae gwauhamatalaia bona bae bapatiso, to e daradaramu. Reana e laloamu, be bapatisomu murinai, kara dika badana ta be karaiamu bena orea amo be atoa sirimu. Bema oi na unu o lalo tomamu, namona na ba diba Iehova ese be durumumu dala maorona ai “ba raka, [bona] kara iboudiai ia ba hamoalea.” (Kol. 1:​10) Ia ese hanaihanai goada be henimumu kara maorona ba karaia totona. Una na baita abia dae badina idaunega amo ema bona hari ia ese momo vada e durudia kara maorona bae karaia. (1 Kor. 10:13) Iehova ese Kristen taudia e durudiamu dainai kongrigeisin amo e atodia sirimu taudia na dia momo. Iehova ese ena taunimanima na e durudia ia bae ­badinaia.

12. Dahaka ese be durudamu kara dika badana ta ikarana ena hedibaḡani baita dadaraia?

¹² Ita na dia ḡoevadae dainai, kara dika ikarana hedibaḡanidia na be varamu. (Iak. 1:​14)  To, una hedibaḡani ba dadaraia eiava lasi abi hidina na oi ese bo karaiamu. Badina emu abi hidi dainai be varamu metauna na oi sibomu ese bo huaiamu. Haida na e gwaumu, edia hemami bona kara bae biagu na auka. To una na dia momokani. Ita ta ta ese eda hemami bona kara na baita biagudia diba. Una dainai, hedibaḡani ta o davariamu neganai, lalomu ba hadaia una hedibaḡani ba dadaraia. Oi bae durumu ḡaudia haida bini: Dina ta ta ai Iehova ba ḡuriḡuri henia. Nega bavato sibomu Baibul ba stadilaia. Kristen heboudia ba lao heni. Bona o dibamu ḡaudia na ma haida ba hadibadia. Unu dala idauidau ese goada be henimumu emu gwauhamata ba badinaia. Bona basio helaloboio, Iehova ese oi na be durumumu.​—Gal. 5:​16.

13. Iosef ena haheitalai amo dahaka ta dibamu?

¹³ Bema oi na o heḡaeḡae namonamo, hedibaḡani be varamu neganai oi na basio daradaramu. Baibul ai unu e kara toma taudia sivaraidia na momo. Heḡereḡere, Iosef na Potifara adavana ese e ḡahusiava. To Iosef na se daradara dahaka baine kara. Baibul na e gwaumu ia na maoromaoro e dadaraia, bona eto: “Ina kerere badana baina karaia, Dirava vairanai baina kara havara, be edeheto?” (Gen. 39:​8-​10) Unu amo ta dibamu, Iosef na Potifara adavana ese do se dibaḡania neganai, ia na vada mai dibana dahaka baine kara. Una dainai hedibaḡani e vara neganai, Iehova vairanai kara maorona e karaia.

14. Edena dala ai hedibaḡani baita dadarai?

¹⁴ Edena dala ai Iosef ba tohotohoa? Hedibaḡani do se vara ai namona na oi ese ba karaia ḡauna ba laloa. Namona na Iehova ese e inai henimu karadia na maoromaoro ba dadarai, bona basio lalohadailai loulou. (Sal. 97:10; 119:165) Unu amo hedibaḡani ai na basio morumu, badina oi na vada mai dibamu dahaka ba gwaurai bona dahaka ba kara.

15. Edena dala ai ta ese baine hahedinaraia ia na Iehova “e tahuamu”? (Heberu 11:6)

¹⁵ Reana oi na mai dibamu ina na hereva momokani bona o uramu mai lalomu idoinai ida Iehova ba hesiai henia, to dounu o laloamu oi na do dia heḡereḡere emu mauri ba gwauhamatalaia bona ba bapatiso. King David ena haheitalai ba tohotohoa. Iehova ba noia: “Dirava e, ba tahugu, lalogu na ba diba; ba tohogu, egu lalo-hadai ba dibadia. Ba itaia, dala dikana ta lalogu ai e miamu eiava;  bona mia hanaihanai dalana ai ba hakaugu.” (Sal. 139:​23, 24) Iehova ese mai momokanidia ida ia “e tahuamu” taudia na be hanamodiamu. Bema oi na o uramu Iehova enai emu mauri ba gwauhamatalaia bona ba bapatiso, oi na o hahedinaraiamu ia o tahuamu.​—­Heberu 11:6 ba duahia.

IEHOVA BA RAKA HENIA KAHI

16-17. Iehova ese hereva momokani ai e bada taudia be ede e veridia mai tomamu? (Ioane 6:​44)

¹⁶ Iesu na e gwa ena hahediba na Iehova ese e veridia mai taudia. (Ioane 6:​44 ba duahia.) Mani a laloa, Iehova sibona ese oi baine verimu mai, una na hahenamo ta, ani? Iehova ese e veria maimu tauna enai na ḡau namona ta e itaiamu. Iehova enai ia ese e boiria tauna na “dava bada kohuna” ta na heto. (Deu. 7:​6, NWT) Iehova ese oi danu unu e lalomu tomamu.

¹⁷ To, bema oi na hereva momokani ai o bada merona o kekenina, reana o laloamu oi ese Iehova o hesiai heniamu badina tamamu bona sinamu na Witnes taudia. Namona na Baibul ena hereva ba laloa, e gwaumu: ­“Dirava ba raka henia kahi, bena ia ese danu baine raka [henimu] kahi.” (Iak. 4:8; 1 Sis. 28:9) Bema oi na Iehova bo raka henia kahi gunamu, Ia ese danu oi be raka henimu kahimu. Iehova na emu ruma bese bona oi danu e lalomui badamu. Ia ese taunimanima ta ta​—hereva momokani ai e bada taudia danu​—e veridia maimu. Una dainai ta ese Iehova e raka henia kahimu neganai, Iakobo 4:8 ena hereva na e gwaumu, ia ese danu e raka henia kahimu.​—2 Tesalonika 2:​13 ba haheḡere­ḡerea.

18. Atikol gabena ai dahaka baita herevalaimu? (Salamo 40:8)

¹⁸ Iehova enai emu mauri o gwauhamatalaiamu bona o bapatisomu neganai, oi na Iesu o tohotohoamu. Ia na mai ena ura ida sibona e heni Tamana ena ura iboudiai baine kara totona. (Salamo 40:8 ba duahia; Heb. 10:7) Atikol gabena ai, bapatiso murinai Iehova ba hesiai henia goadagoada daladia baita herevalaimu.