LAḠANI 1910 ela 1919 lalodiai, lau tamagu bona sinagu na Tbilisi, Georgia amo ela Canada, bona farm rumana maraḡina ta ai e nohova, una na Pelly, Saskatchewan, western Canada ai. Lau na laḡani 1928 ai na vara, ai taumai siks amo lau na dokona. Tamagu e mase bena hua siks murinai lau na vara, bona Sinagu na lau beibigu ai e mase. Kakagu Lucy na laḡanina 17 ai e mase. Una murinai, vavagu Nick ese lau bona varabougu e narimai.

Dina ta lau maraḡigu ai, egu ruma bese ese e itagu hosi ta iuna na veriava. Hosi ese baine lahagu garina e gari dainai e lolo heniguva hosi iuna basina veria​—⁠to lau na dounu unu na kara tomava. Lau dorugu na idia na henidia dainai idia e lolova reḡena na asina kamonaiva. Namo be asina bero, to una dina ai egu ruma bese na e diba lau na mu.

Bamomai namona ta ese e hadibamai mu taudia edia sikuli bainala, una dainai Vavagu Nick ese mu taudia edia sikuli Saskatoon, Saskatchewan ai e atogu. Una gabu bona lau na nohomu gabuna na mai padadia, bona lau laḡanigu na 5 dainai na gariva. Egu ruma bese na holidei negadiai mo baina vadivadi henidia diba. Gabeai, lau na saini gado na diba bona maraḡidia ma haida ida a gadara hebouva.

Laḡani 1939 ai, taihugu Marion na Bill Danylchuck e adavaia, bena lau bona taihugu Frances na idia ese e narimai. Idia ese Iehova ena Witnes taudia e hedavari henidia guna. Egu sikuli holidei ai, idia na e ḡaukara goadava Baibul amo e dibava ḡaudia bae hadibalaigu.  Idia ida baina herevahereva na auka, badina saini gado na asi dibadia. To, e itaiava lau na lauma ḡaudia na lalo badava. Lau na na laloparara idia e karava ḡaudia bona Baibul ena hereva na heḡereḡere, una dainai haroro ḡaukara e laova negadiai na bamodiava. Gabeai, na ura baina bapatiso, bona September 5, 1941 ai, Bill ese guri ranuna amo e hahonua daramuna ta lalonai e habapatisogu. Una ranu na paraka herea!

Laḡani 1946 ai, sikuli holidei ai ruma nala neganai, ai na Cleveland, Ohio, U.S.A. ai e heabi hebouhebouna ta ala. Una hebouhebou dinana ginigunana ai, taihugu raruosi ese tok herevadia na noutbuk ai e toreva, unu amo bae durugu program baina badinaia totona. To, dina iharuana ai, na itaia, mu taudia haida nonoho bona ta ese saini gado ai tok e hahanaidiava. Una murinai, lau ese program na moalelaia, badina Baibul ena hereva momokani na lalopararalaia namonamo!

Una negai, Tanobada Tuarina Iharuana na e doko bona bese iheaḡilaidia karana na e bada. Hebouhebou amo na lou neganai, lalogu na hadaia sikuli ai egu abidadama ai baina gini goada. Una dainai fleg asina salutiava bona national anthem asina abiava. Danu, dina badadia imoalelaidia karadia bona dubu edia tomadiho karadia ai asina vareaiva. Sikuli hahedibadia na asie moale dainai e hagariguva bona koikoi herevadia e gwauraiva, lalogu baina haidaua totona. Una kara dainai, turagu momo na e daradarava, to una ese dala e kehoa baina haroro henidia totona. Gabeai turagu haida, Larry Androsoff, Norman Dittrick, bona Emil Schneider na hereva momokani e abia dae, bona hari idia na doini Iehova e hesiai heniamu.

Gabu ma haida na laova negadiai, lau ese mu taudia na haroro henidiava. Heḡereḡere, Montreal ai mu taudia edia moale gabuna ta ai, lau ese Eddie Taeger na haroro henia, ia na mu oreana ta e gunalaiava merona. Ia na Laval, Quebec ai, saini gado kongrigeisen e durua ela bona vanega laḡani ai e mase. Danu lau ese Juan Ardanez na haroro henia, ia na Berea taudia heḡereḡeredia Dirava ena Hereva e tahua namonamova, badina e urava hereva momokani baine diba. (Kara 17:​10, 11) Ia danu hereva momokani e abia dae, elda ta ai ela bona Ottawa, Ontario ai, Iehova e hesiai henia ela bona e mase.

Laḡani 1950 ai, lau na Vancouver nala. Ena be mu taudia iharoro henidia karana na moalelaiava, to e herevamu hahinena ta ladana Chris Spicer na dala ai na haroro henia, una nega na asina laloa boiomu. Ia na e ura hua ta ta ai magasin baine abi bona e urava adavana Gary baina hedavari henia. Una dainai edia ruma nala, bona a herevahereva daudau herea, to emai herevahereva na  pepa ai a toreva. Una negai mo a hedavari to murinai na ma asia hedavari lou ela bona laḡani haida muridiai, hebouhebou ta Toronto, Ontario ai, a hedavari. Gary na una dina ai baine bapatiso. Una ekspiriens namona amo na diba, baita haroro hanaihanai na namo badina asi dibada edeseniai bona edena negai hereva momokani anina baine vara.

Gabeai, lau na na lou Saskatoon. Unuseniai sina ta na hedavari henia bona e noigu natuna hekapadia, mu kekenidia Jean bona Joan Rothenberger, ida Baibul baia stadilaia. Idia na guna na laova sikulina ai e sikuliva. Se daudau, unu kekeni raruosi ese e dibava ḡaudia na turadia e hadibadiava. Gabeai, edia klas taudia 5 na Iehova ena Witnes ai ela. Idia ta na Eunice Colin. Ia na guna mu taudia edia sikuli ai na sikuliva neganai a hedavari. Una negai, ia ese lole ta e henigu bona e hamaorogu turana ai bainala. Gabeai, ia na lau adavagu ai ela!

Eunice sinana na e diba ia na Baibul e stadilaiava neganai, sikuli edia principal e hadibaia Eunice lalona baine ania stadi baine hadokoa totona. Principal ese ena stadi bukadia danu e abi. To, Eunice na lalona e hadaia Iehova baine badinaia totona. Ia na e ura baine bapatiso neganai, tamana sinana ese e hamaoroa: “Bema Iehova ena Witnes ta ai bo laomu, emai ruma na bo rakataniamu!” Eunice na laḡanina 17 ai, edia ruma e rakatania bona Witnes ruma besena ta ese e naria. Ia na dounu e stadiva bona gabeai e bapatiso. Laḡani 1960 ai a headava neganai, Eunice tamana bona sinana na emai headava na sema. To, laḡani haida muridiai, idia ese emai abidadama karana bona natumai a hadibadiava dalana na e matauraia.

Lau bona adavagu na mu, to natumai 7 na e herevamu. Ena be una na auka, to saini gado a hadibadiava, unu amo baia herevahereva diba bona hereva momokani baia hadibadia. Kongrigeisen ai tadikaka taihu ese e durumai bada. Heḡereḡere, tama ta ese nouti ta e torea bona e hadibamai, natumai ta na Kingdom Hall ai hereva dikadia e gwauraiva. Ai ese una horana ai una na a hamaoromaoroa. Natugu memerodia hani​—James, Jerry, Nicholas, bona Steven​—na edia ruma bese ida Iehova e hesiai heniamu. Idia haniosi na elda taudia. Danu, Nicholas bona adavana Deborah na Britain brens ai saini gado ihahanaina ḡaukarana e karaiamu, a Steven bona adavana, Shannan na United States brens ai saini gado ihahanaina ḡaukarana e karaiamu.

Emai headava laḡanidia 40 ena anniversary do asia karaia neganai, Eunice na kensa gorere ai e mase. Una nega aukana lalonai, ia lalona na goada. Toreisi lou helarona ese ena abidadama na e hagoadaia. Na ura dikadikamu una negai ia baina itaia lou.

February 2012 ai, lau na na moru bona koekoegu e kwaidu, bona heduru baina abi na namo. Una dainai natugu merona ta bona adavana dekediai na nohomu. Ai na Calgary Saini-Gado kongrigeisen a duruamu, bona unuseniai lau na dounu elda ḡaukarana na karaiamu. Ina na egu nega ginigunana, saini gado kongrigeisen ta na duruamu. Mani a laloa, laḡani 1946 amo lau na English kongrigeisen na duruava. To lauma dalanai be ede na goada toma? Iehova na ena gwauhamata heḡereḡerena, ihareha na e naridiamu. (Sal. 10:14) Na moalemu badina momo na lau idurugu totona, nouti e toreva, saini gado e dibava, bona tok iboudiai na saini gado ai e hahanaiva.

Momokani, nega haida na lalohisihisiva bona na hesikuva badina hebou ai e gwauraiva herevadia na asina lalopararalaiva, eiava na hemamiva tadikaka ese mu taudia na asie lalodia badava. To, unu negadia ai, lau na Petro ese Iesu e hamaoroa herevana na laloa lou, eto: “Lohiabada e, ai be daika dekena baiala? Mauri hanaihanai herevadia na oiemu ai.” (Ioa. 6:​66-68) Mu tadikaka taihu momo heḡereḡeredia, lau na na haheauka. Na diba Iehova bona ena orea baina badinadia na namo, bona una dala amo hahenamo momo na davari. Hari lau na saini gado ai lauma aniani momo na abimu, bona hebou badadia bona maraḡidia ai American Sign Language (ASL) gado amo ma haida na hereva henidiamu. Na moalemu badina Iehova, eda Dirava badana, na hesiai heniamu.