1, 2. Hanuaboi horana lalonai e haoda murinai, Petro enai be dahaka e vara?

IESU ena hahediba seven na hanuaboi ibounai lalonai Galilea Davarana ai e haodava to gwarume ta asie abia. E toreisi lou tauna Iesu na kone amo idia e itadiava. Bena ia ese e hamaorodia, eto: “Reke na enoeno kahana ai ba torea, gwarume bavabi. Taunabunai idia ese e torea, bena bae veria eto, to asi goadadia, gwarume diaḡau daidiai.”​—Ioa. 21:​1-6.

² Iesu ese edia daba anianina e henidia murinai, ia na Simona Petro e nanadaia: “Oi ese o lalokau henigu badamu a?” Iesu ena hereva anina be dahaka? Petro ese haoda ḡaukarana na e laloa badava. Una dainai Iesu na una henanadai amo e ura baine diba Petro be edena ḡaukara e ura henia badava. Ia ese gwarume bona haoda ḡaukarana e ura henia bada to Iesu bona e hahedibalai ḡaudia be e ura henidia maraḡi, a? Petro ese Iesu e haere henia, eto: “Oibe, Lohiabada e, dibamu na ura henimumu.” (Ioa. 21:15) Petro na ena hereva heḡereḡerena e kara. Una nega amo, ia na hahediba taudia ihalaodia ḡaukarana e goadalaiava, unu amo e hamomokania ia na Keriso e lalokau henia,  bona aposetolo edia negai ia na Kristen kongrigeisen ihagoadana tauna ai ela.

3. Dahaka dainai Kristen taudia bae henahua toho na namo?

³ Iesu ese Petro e hamaoroa herevadia amo dahaka ta dibamu? Namona na baita henahua toho eda lalokau Keriso enai baine keru bona Basileia iduruna ḡaukaradia basita lalo bada na garina. Iesu na mai dibana ina nega oromana ena lalohekwarahi ḡaudia ese ita na baine hametauda diba. Uhe ihadona tauna parabolena ai, Iesu na e gwa haida ese “basileia herevana” bae abia dae bona bae goada matama, to “tanobada ena lalo-haguhi bona kohu iḡahusina” ese una ‘hereva baine habubunia’ diba. (Mat. 13:​19-22; Mar. 4:19) Momokani, bema basita henahua tohomu, dina ta ta ai mauri ena lalohekwarahi ḡaudia ese laloda be veri dibamu bena lauma dalanai baita manokamu. Una dainai, Iesu ese ena hahediba e hadibadia, eto: “Nahuamui ba toho, aniani momo bona kekero muramuradia bona tanobada ena lalo-haguhi ḡaudia ese lalomui bae hametaudia na garina.”​—Luka 21:34.

4. Ede baita diba toma ita na Keriso ta lalokau heniamu eiava lasi? (Rau 22 ai laulau ba itaia.)

⁴ Petro heḡereḡerena, ita ese eda lalokau Keriso enai baita hamomokania totona, e henida ḡaukarana na eda mauri ai baita atoa guna. Edena dalai baita hahedinaraia ita na dounu unu ta kara tomamu? Nega ta ta ai, siboda baita henanadai: ‘Lau be dahaka na ura heni badamu? Lau be dina ta ta ḡaukaradia dainai eiava Dirava ena hesiai ḡaukara dainai na moalemu, a?’ Una baita diba totona, namona na eda mauri ai e varamu ḡaudia toi aita herevalai, unu ḡau basita lalodia namonamomu neganai eda lalokau Keriso enai be kerumu bona lauma ḡaudia basita lalo badamu​—unu na moni ḡaukara, moale karadia, moni bona kohu.

5. Ruma bese kwaradia edia maduna be dahaka?

⁵ Petro ese haoda ḡaukarana na e moalelaiava, bona una ḡaukara amo ena ruma bese e duruava. Hari ina negai, ruma bese kwaradia na mai dibadia edia maduna na edia ruma bese bae naridia. (1 Tim. 5:8) Namona na bae ḡaukara goada una maduna bae huaia namonamo. To ina dina gabedia ai, moni ḡaukara ese nega momo lalohekwarahi e havaraiamu.

6. Ḡaukara gabudia ai dahaka ese lalometau e havaramu?

⁶ Taunimanima momo na moni ḡaukara e tahumu, to moni ḡaukara na dia momo. Bona ḡaukara taudia momo na edia ḡaukara horadia e habadamu, ena be nega haida edia pei na dia bada. Danu, kampani na e uramu moni momo bae kara dainai ḡaukara taudia e doridiamu ḡaukara momo bae kara. Una dainai ḡaukara taudia na e lalometaumu, e hesikumu, bona e gorerediamu. Kampani ena ura asie badinaiamu taudia na e hadokodiamu.

7, 8. (a) Daika baita badinaia na namo? (b) Thailand ai tadikaka ta ese ena ḡaukara amo dahaka mai anina bada ḡauna e dibaia?

⁷ Ita na Kristen tauda dainai, Iehova Dirava sibona mo baita badinaia na namo. (Luka 10:27) Moni ḡaukara ese tauanina dalanai ita e durudamu. Ita na ta ḡaukaramu unu amo tauanida idurulaina ḡaudia ta hoimu bona eda hesiai ḡaukara ta duruamu. To, bema basita henahua tohomu, moni ḡaukara ese eda tomadiho karana baine hadikaia diba. Heḡereḡere, Thailand ai tadikaka ta na ini e gwau toma: “Lau na kompiuta ihanamodia ḡaukarana na moalelaiava, to una ḡaukara ai hora bada na haoreva. Una dainai, asi egu nega tomadiho ḡaukaradia baina kara. Gabeai na laloparara Basileia ḡaudia baina ato guna totona, egu ḡaukara baina haidaua na namo.” Una tadikaka be dahaka e kara?

 ⁸ Ia na e gwa: “Laḡani ta lalonai palani na karaia murinai, lalogu na hadaia dala ai ice cream baina hoiholai. Matamanai, moni abi dalanai na hekwarahiva bona na lalomanoka. Guna a ḡaukara hebouva taudia haida na hedavari henidiava neganai, e kirikirilaiguva bona e nanadaiguva dahaka dainai na laloa ice cream ihoihoilaina karana ese air-condition lalonai kompiuta ikarana ḡaukarana na e hereaia. Iehova na ḡuri­ḡuri henia, bona na noia baine durugu baina haheauka, unu amo hesiai ḡaukara ai nega bada baina ḡaukaralaia. Se daudau, ḡau iboudiai na e heau namonamo. Egu ice cream e hoiva taudia edia ura na diba dainai, ice cream na na kara namonamova. Una dainai dina ta ta ai ice cream na e hoidia oreva. Lau na moni dalanai heḡereḡere, dia guna kompiuta ḡaukarana heḡereḡerena. Na moalemu badina egu ḡaukara gunanai na abiva lalohekwarahidia o lalometaudia na asina abimu. Bona mai anina bada ḡauna na, hari na mamiamu lau na Iehova dekedekenai.”​—Mataio 5:​3, 6 ba duahi.

9. Edena dalai eda moni ḡaukara ai lalohadai maorona baita abia diba?

⁹ Dirava ese eda ḡaukara goada karana na e laloa badamu. Bona ḡaukara goada na mai ahuna. (Her. 12:14) To, ataiai e herevalaia tadikakana heḡereḡerena, moni ḡaukara ai lalohadai maorona baita abia na namo. Iesu na eto: “Umui be iena basileia bona ena kara maoromaoro ba tahu guna, bena unu ḡau [tauani idurulaina ḡaudia] iboudiai danu ma baine henimui.” (Mat. 6:33) To, moni ḡaukara bona hesiai ḡaukara ai lalohadai maorona baita abia totona, namona na siboda baita henanadai: ‘Egu moni ḡaukara be na ura heniamu bona na moalelaiamu, a? Bona hesiai ḡaukara be dina ta ta ḡaukaradia heḡereḡerena na laloamu, eiava?’ Eda moni ḡaukara bona hesiai ḡaukaradia baita haerodia namonamomu karana ese be durudamu, ta ura henia badamu ḡauna baita lalopararalaia totona.

10. Iesu be dahaka mai anina bada ḡauna e hahedibalaia?

¹⁰ Iesu ese tauani bona lauma ḡaudia baita lalodia maoromaoro karana na e hahedinaraia. Nega ta, Iesu na Maria bona Mareta edia ruma ela. Mareta na aniani e heḡaeḡaelaiva, a Maria na Iesu aena badinai e helai bona ena hereva e kamonaiva. Mareta na Maria ese se durua dainai e maumau neganai, Iesu ese Mareta e hamaoroa, eto: “Maria ese ahu namona vada e abia hidi, bona iena amo basine heabi oho.” (Luka 10:​38-42) Iesu ese mai anina ḡauna ta na Mareta e hadibalaia. Tauani ḡaudia ese basie hametauda bona eda lalokau Keriso enai baita hahedinaraia totona, namona na hanaihanai “ahu namona” baita abia hidi, anina na lauma ḡaudia baita lalo bada.

11. Baibul ese laḡa-ani bona moale karadia be ede e herevalaidia toma?

¹¹ Ita na ḡaukara momo ta karamu dainai, baita laḡa-ani bona baita moale na namo. Baibul na e gwaumu: “Tau ta ena dala namo-hereana binai: baine aniani, baine inuinu, bona ena hekwarahi baine moalelaia.” (Koh. 2:24) Iesu na mai dibana nega haida baine laḡa-ani na namo. Heḡereḡere, nega ta iena hahediba ida haroro ḡaukara e karaia murinai, e hamaorodia, eto: “Gabu ḡaḡaena ta aitala, laḡada baita ani.”​—Mar. 6:​31, 32.

12. Moale karadia ai dahaka baita laloatao na namo? Haheitalai ba gwauraia.

¹² Momokani, moale karadia na mai anidia bada. To, bema moale karadia baita kara hanaihanaimu,  eda mauri lalonai unu mo baita lalo badamu. Aposetolo edia negai, momo na ini e lalo tomava, “Baitama aniani baitama inuinu hari namo, badina be kerukeru vada baita mase.” (1 Kor. 15:32) Hari ina negai tano momo ai taunimanima edia lalohadai na unu bamona. Heḡereḡere, laḡani haida gunanai Western Europe ai eregabe ta na Kristen heboudia e laova. To ia na moale karadia e ura heni badava dainai Iehova ena taunimanima ibamodia karana e hadokoa. To, gabeai e laloparara moale karadia e lalo badava karana ese hekwakwanai bona lalohisihisi e havarava. Una dainai Baibul e stadilaia lou bona gabeai sivarai namona iharorolaiana pablisana ai ela. E bapatiso murinai, ia na e gwa: “Na lalohisihisilaia ḡauna tamona na, lau na egu nega bada na haorea kava murinai, na laloparara Iehova ihesiai henina karana ese moale korikori e mailaiamu, una ese tanobada ena moale karadia e hereadia.”

13. (a) Moale karadia baita kara hanaihanaimu ena dika be dahaka? Haheitalai a gwauraia. (b) Dahaka ese baine duruda moale karadia baita lalodia namonamo?

¹³ Moale karadia ta karamu badina ta uramu baita moale bona goada baita abi lou. To hora hida lalodiai moale karadia baita kara na namo? Mani ina haheitalai aita laloa: Ita momo na ta uramu nega ta ta ai keke eiava lole baita ani, to ta dibamu unu diḡara ḡaudia baita ani hanaihanaimu neganai tauanidia na be hadikaiamu. Una dainai, ita na tauanida baine durua diba anianidia ta animu. Una heḡereḡerena, bema moale karadia baita kara hanaihanaimu, una ese eda lauma dalana be hadikaiamu. Una basine vara totona, Basileia iduruna ḡaukaradia baita kara hanaihanai na namo. Ede baita diba toma ita ese moale karadia na ta lalodia namonamomu? Wiki ta lalonai, eda hesiai ḡaukaradia, heḡereḡere hebou, haroro ḡaukara, bona siboda eda stadi o ruma bese stadi ai ta ḡaukaralaimu horadia na eda noutbuk ai baita toredia. Bena unu hora na moale karadia heḡereḡere spot gadara, laḡa-ani negadiai ta karamu ḡaudia, televisen, eiava vidio gadaradia ai ta ḡaukaralaimu horadia ida baita haheḡereḡeredia. Unu hora ihaheḡereḡeredia karana amo dahaka baita dibamu? Ḡau haida baita haidau diba, eiava?​—Efeso 5:15, 16 ba duahi.

14. Dahaka ese baine duruda moale karadia baita abi hidi totona?

¹⁴ Taunimanima ta ta bona ruma bese kwaradia ese e ura henimu moale karadia na bae abi hidi diba, to namona na unu moale karadia na Baibul ai Iehova ena hahekau herevadia ida bae heḡereḡere. * Moale karadia na “Dirava ena harihari ḡauna” ta. (Koh. 3:​12, 13) Momokani, ta ese e abia hidimu moale karana na ma ta ena amo idau. (Gal. 6:​4, 5) To, moale karana ta do asita abia hidi neganai, namona na baita laloa namonamo. Iesu na eto: “Emui kohu e miamu gabuna ai, lalomui danu unuseni mia.” (Mat. 6:21) Una dainai, Iesu ilalokau henina karana ese baine duruda eda lalohadai, hereva, bona kara ai Basileia iduruna ḡaukaradia baita lalodia bada, to dina ta ta ai ta karamu ḡaudia basita lalodia bada.​—Fili. 1:​9, 10.

15, 16. (a) Edena dalai kohu momo itahuna karana ese Kristen tauna ta baine tarapua diba? (b) Kohu itahuna karana ai Iesu ena sisiba be dahaka?

¹⁵ Hari ina negai, momo ese dabua matamatadia, mobael fon o kompiuta, bona ma ḡau haida e ura heni badamu. Una dainai, namona na Kristen taudia ta ta na hanaihanai edia ura ḡaudia bae haerodia namonamo,  sibodia bae henanadai: ‘Lau be kohu na lalo badamu dainai egu nega bada na haoreamu motuka eiava dabua ­matamatadia na tahumu bona na lalohadailaimu, to kongrigeisen heboudia totona asina heḡaeḡaemu, a? Dina ta ta ḡaukaradia na karamu dainai asi egu nega baina ḡuriḡuri bona Baibul baina duahia, a?’ Bema ita na ta dibamu kohu momo iura henina karana ese Keriso ilalokau henina karana e kouamu, namona na Iesu ena hereva baita laloa, eto: “Nahuamui ba toho, kohu iura-henina ena lalo-ani garina.” (Luka 12:15) Dahaka dainai Iesu ese una mai anina bada herevana e gwauraia?

¹⁶ Iesu na eto, “asi tauna ta ese biagu rua isiaidia baine lao heni diba.” Bena ma eto: “Dirava bona taḡa isiaidia basio lao heni diba.” Badina unu “biagu” rua na basita hesiai henidia hebou diba. Iesu na e gwa: “Ta baine inai henia, ta baine lalokau henia; eiava ta baine badinaia, ta baine dadaraia.” (Mat. 6:24) Ita na dia ḡoevadae tauda dainai, namona na baita hekwarahi “tau-anina ena ura,” bona kohu itahuna karadia baita dadarai.​—Efe. 2:3.

17. (a) Dahaka dainai tauani ḡaudia e lalo badamu taudia ese kohu momo itahuna karana bae laloa maoromaoro na auka? (b) Dahaka ese baine duruda kohu momo iura henina karana baita dadaraia?

¹⁷ Tauani ḡaudia e lalo badamu taudia ese kohu momo itahuna karana bae laloa maoromaoro na auka. Dahaka dainai? Badina lauma ḡaudia na asie lalo badamu. (1 Korinto 2:14 ba duahia.) Kohu momo itahuna karana ese edia haerohaero karana e kouamu neganai, maoro bona kerere toadia na asie dibamu. (Heb. 5:​11-14; NWT) Una dainai, haida na e ura dikadikamu kohu momo bae abi, bona una ura na basie koua diba. (Koh. 5:10) To, kohu momo ilalona karana baine koua ḡauna ta na, Dirava ena Hereva, Baibul, baita duahia hanaihanai. (1 Pet. 2:2) Iesu na Dirava ena hereva momokani e laloa dobu karana ese e durua hedibaḡani e dadarai, ita danu Baibul ena hahekau herevadia ibadinadia karana ese baine duruda kohu momo iura henina karana baita dadaraia. (Mat. 4:​8-10) Unu baita kara tomamu neganai, baita hahedinaraiamu ita na Iesu ta lalokau henia badamu, dia kohu.

18. Lalomu ba hadaia dahaka ba kara na namo?

¹⁸ Iesu ese Petro e nanadaia: “Oi ese o lalokau henigu badamu a?” Una henanadai amo Petro e hadibaia ena mauri lalonai lauma ḡaudia baine ato guna na namo. Petro ladana anina na “Nadi Ta,” bona ia na una lada anina heḡereḡerena, Dirava e hesiai henia goadagoadava. (Kara 4:​5-20) Hari ina negai, ita danu laloda baita hadai Keriso ilalokau henina karana baita hagoadaia, bona eda moni ḡaukara, moale karadia, bona kohu itahuna karadia baita lalodia namonamo. Namona na ta abi hidimu ḡaudia ese bae hahedinarai eda lalohadai na Petro ena heḡereḡerena, ia ese Iesu e hamaoroa: “Lohiabada e, dibamu na ura henimumu.”