SEPTEMBER 1922, Friday daba ai, gabu na siahu bona taunimanima 8,000 na hall ta lalonai e hebou. Seamani ese hahediba herevana amo helai taudia e hadibadia una mai anina hebouna ai bema ta e uramu baine raka lasi bainela diba, to ia na hall lalonai ma basine vareai lou.

“Praise Service”” hebouna ikehona anedia e abi murinai, Tadikaka Joseph F. Rutherford na podium badinai e gini. Helai taudia momo na e urava bae kamonai ia be dahaka be gwauraimu. A haida be siahu dainai e raka loava. Tok heni tauna ese e hadibadia bae helai bona bae kamonai. Tok e hematama neganai, ta na se diba atai kahana ai e lokua dabua badana ta na hetaudae.

Tadikaka Rutherford ena tok sinadona na, “Guba basileia na vada e kahikahi.” Hora ta mai kahana lalonai, ia na mai gao badana ida peroveta taudia gunadia ese Basileia ena mai e harorolaia goadagoadava dalana e herevalaia. Tok dokonai, ia na e henanadai, “O abia daemu Pavapava na mai hairaina ida vada e lohia matama, a?” Helai taudia na mai gao badadia ida eto: “Oibe!”

Tadikaka Rutherford na e eto: “Herea Mikamika Diravana natuna veridia e, haroro ḡaukara ba karaia! A itaia, Pavapava na vada e lohia! Umui na ena hereva igwauraina taumui. Una dainai, ba haroro, ba haroro, ba haroro.”

Una horanai, e heloku dabua badana na e ruhaia, una dabua latanai e hetore herevana bina: “Pavapava bona Basileia Ba Harorolaidia.”

Ray Bopp na eto: “Helai taudia na e hoa.” Anna Gardner na eto: “Taunimanima na imadia e patapata neganai, guhi idogotaona audia na e mareremarere.” Fred Twarosh na eto: “Helai taudia iboudiai na nega tamona e gini tore.” Evangelos Scouffas na eto: “Ai na vaitani siahu goadana ta ese emai helai gabudia amo e verimai isi, bena a gini bona mai moalemai ida iruru matamai e diho.”

Hebouhebou ela taudia momo ese Basileia sivarai namona na vada e harorolaiava. To, una hereva ese e hagoadadia bada. Ethel Bennecoff na e gwa, Bible Student taudia edia “ura bona lalokau na e goada, dia guna heḡereḡerena.” Odessa Tuck, una negai laḡanina na 18, na hebouhebou murinai lalona e hadaia ina boiboi herevana baine badinaia, ‘Daika bainela?’ Ia na eto: “Lau na asi dibagu edeseniai baina haroro, edena dala ai baina haroro, bona dahaka baina harorolaia. To lau dibagu ḡauna tamona na, na urava Isaia baina tohotohoa, ia na eto: ‘Lau o ina, a siagu.’” (Isa. 6:⁠8) Ralph Leffler na eto: “Una moale dinana ai, Basileia iharorolaina ḡaukarana a karaia matama, bona hari ina negai una ḡaukara na tanobada heḡeḡemadai e karaiamu.”

 Una dainai histori lalonai, laḡani 1922 Cedar Point, Ohio ai e heabi hebouhebouna na mai anina bada! George Gangas na eto: “Una hebouhebou ese lau na e durugu, hebouhebou ma ta basina reaia totona.” Ena hereva heḡereḡerena, ia na hebou ta se reaia. Julia Wilcox na eto: “Eda pablikeisen ai laḡani 1922 Cedar Point e herevalaiamu negadia ai, lau na na moalemu. Nega iboudiai na uramu baina gwa, ‘Tenkiu Iehova, badina o durugu una hebou nala.’”

Una heḡereḡerena, ita momo danu ta lao henia hebouhebouna ta na doini ta laloataomu, reana una hebouhebou ese kudouda e hamarerea bona eda Dirava hereadaena bona ena Pavapava ediai, eda ura bona lalokau e hagoadaia. Unu nega baita lalodia loumu neganai, baita gwau dibamu, “Tenkiu Iehova, badina o durugu una hebou nala.”