1, 2. (a) Dahaka dainai momo asie kamonaimu teritoridia ai e haroromu taudia ese e hagoadadamu? (Rau 12 ai laulau ba itaia.) (b) Iesu ese “ena hanua korikori” harorona be ede e herevalaia toma? (Futnout ba itaia.)

PAINIA tadikaka Sergio bona adavana Olinda laḡanidia na 80 heḡereḡerena, bona United States ai e nohomu. Hari, idia aedia na dia gogoada dainai bae raka loa na auka. To, laḡani momo lalodiai, idia na daba 7 oklok e laova taoni, hutuma e lao maiva gabuna ta. Idia na bus stop ta badinai e giniva bona raka hanai taudia ediai eda Baibul pablikeisen e hariharilaiva. Ena be momo na asie urava bae kamonai, to idia na dounu e harorova, bona e itadiava taudia e kiri henidiava. Adorahi ai, metairametaira e raka louva edia ruma. Daba 7 oklok ai, idia na ma e laova e giniva gabuna. Momokani, una tadikaka mai adavana ida ese Basileia sivaraina na e harorolaia goadagoadava, laḡani iboudiai, idia na wiki ta lalonai dina 6 unu e kara tomava.

² Sergio bona Olinda heḡereḡeredia, tanobada heḡeḡemadai abidadama tadikaka bona taihu momo na laḡani momo lalodiai  taunimanima momo asie kamonaimu teritoridia ai e haroromu. Bema emu teritori ai na unu bamona, emu haheauka dainai a hanamomumu. * Iehova ihesiai henina ai o haheaukamu karana ese momo e hagoadadiamu​—mai edia ekspiriens tadikaka bona taihu danu. Mani seket taudia edia hereva aita lalo: “Abidadama tadikaka bona taihu ida na haroromu neganai, edia haheitalai amo goada na abimu.” “Edia abidadama karana ese e durugumu baina haheauka bona egu hesiai ḡaukara ai basina gari.” “Edia haheitalai ese e hagoadagumu.”

3. Ededia henanadai toi baita herevalaimu, bona dahaka dainai?

³ Iesu ese e henida haroro ḡaukarana baita haḡuḡurua totona, namona na ini henanadai toi haeredia baita lalo: Dahaka dainai nega haida ta lalomanokamu? Edena dala ai huahuada bae dobi diba? Dahaka ese baine duruda basita hesiku ela bona huahuada bae dobi?

4. (a) Iuda taudia momo asie kamonaiva dainai Paulo ena hemami be ede bamona? (b) Dahaka dainai Paulo ena hemami na unu bamona?

⁴ Bema oi na o haroromu teritorina ai momo asie kamonaimu dainai o lalomanokamu, aposetolo Paulo enai e vara ḡauna ba laloa. Laḡani 30 heḡereḡerena haroro ḡaukara e karaiava neganai, momo e durudia Keriso ena hahediba ai ela. (Kara 14:21; 2 Kor. 3:2, 3) To, Iuda taudia momo na tomadiho momokani taudia ai asiela. Idia momo ese Paulo na asie kamonai heniava, bona e daḡedaḡe heniava. (Kara 14:19; 17:1, 4, 5, 13) Unu Iuda taudia edia kara dainai Paulo ena hemami be ede bamona? Ia na eto: “Lau na Keriso ladana ai na hereva momokanimu . . . egu lalo-hisihisi na bada herea, daragu danu e dokomu dina iboudiai.” (Roma 9:1-3) Dahaka dainai Paulo ena hemami na unu bamona? Badina haroro ḡaukara na e ura henia dikadikava. Ia na Iuda taudia e lalodia badava dainai e haroro henidiava. To, idia ese Dirava ena hebogahisi karana e dadaraia neganai, Paulo na e lalohisihisi.

5. (a) Dahaka ese e hagoadadamu dekeda taudia baita haroro henidia? (b) Dahaka dainai nega haida ta lalomanokamu?

⁵ Paulo heḡereḡerena, ita na taunimanima ta lalodia badamu dainai ta haroro henidamu. (Mat. 22:39; 1 Kor. 11:1) Dahaka dainai? Edai e vara ḡaudia amo ta dibamu Iehova ihesiai henina karana e abia hidimu taudia na hahenamo momo bae davari. Eda teritori ai taunimanima ta ta baita lalodiamu neganai, siboda baita gwaumu, ‘Bema baita durudiamu, be itaiamu idia na ḡau namodia e reamu!’ Una dainai, dounu baita hagoadadia Iehova bona ena ura taunimanima ediai bae dibaia. Una na vaitani, ta haroro henidiamu taudia ta hamaorodiamu: ‘Ai na harihari ḡauna namona ta a mailaia oiemu. Mani avabia.’ To taunimanima ese una harihari ḡauna asie abia daemu neganai, ta lalohisihisimu. Una ese e hahedinaraiamu, eda abidadama na dia manoka, to haroro ḡaukara na ta ura henia dikadikamu. Una dainai ena be nega haida ta lalomanokamu, to ta haheaukamu. Elena, laḡani 25 mai kahana e painia taihuna ta, na eto: “Haroro ḡaukara na mai hekwarahina. To, asina uramu ḡaukara idauna ta baina karaia.”

6. Edena henanadai baita laloa?

⁶ Dahaka dainai ta abia daemu herevana edeseniai baita haroro, to huahua baita havara diba? Una mai anina bada henanadaina ihaerelaina totona, namona na Iesu ena parabole rua baita lalodia, unu parabole ai e  hahedinaraia ‘huahuada bae dobi’ na namo. (Mat. 13:23) Ginigunana na vine ta e herevalaia.

7. (a) “Imea ireḡuna tauna,” “vine,” bona “rigi” be daidia e laulaulaidia? (b) Ta uramu edena henanadai haerena baita diba?

⁷ Ioane 15:1-5, 8 ba duahi. Iesu ese ena aposetolo e hamaorodia, eto: “Tamagu iheatolaina binai, huahuamui momo bae dobi; unu amo egu hahediba ai baola.” Iesu ese Iehova na e gwauraia “imea ireḡuna tauna,” ia be “vine korikori,” bona ena hahediba be “rigi.” * To, Keriso murinai e rakamu taudia ese bae havara huahuadia be dahaka? Ina parabole ai, Iesu na se gwa unu huahua be dahaka, to mai anina bada ḡauna ta e herevalaia, una ese baine duruda una henanadai haerena baita diba totona.

8. (a) Ina parabole ai, dahaka dainai huahua na dia hahediba taudia matamatadia e herevalaidia? (b) Iehova ena ura be dahaka?

⁸ Iesu ese Tamana e herevalaia neganai, eto: “Asi huahuadia rigidia iboudiai lau lalogu ai ia ese e abi ohomu.” Anina na, Iehova ese ita na ena hesiai taudia ai baine halaoda diba bema huahuada bae dobi. (Mat. 13:23; 21:43) Una dainai, ina parabole ai, Kristen taudia ta ta ese bae havara huahuadia na dia hahediba matamatadia ai ta halaodiamu taudia e herevalaidia. (Mat. 28:19) Bema una na idia e herevalaidia, anina na momo asie kamonaimu teritoridia ai e haroromu Witnes taudia na rigi asi huahuadia na heto, badina haida do asie durudia hahediba taudia ai baela. To, una na lalohadai kererena! Dahaka dainai? Badina taunimanima na basita doridia diba hahediba taudia ai baela totona. Bema Iehova ese ena hesiai taudia na unu baine doridia toma, una na dia iena lalokau dalana heḡereḡerena. Iehova ese ita na e noidamu baita kara diba ḡaudia mo baita kara.​—Deu. 30:11-14.

9. (a) Edena ḡaukara amo huahua baita havara diba? (b) Edena parabole baita herevalaiamu, bona dahaka dainai?

⁹ To, baita havaraia huahuana be dahaka? E hahedinaraia ḡoevaḡoevamu, huahua na ita ta ta ese baita karaia diba ḡaukarana e herevalaia. Edena ḡaukara na ‘mai huahuana’? Dirava ena Basileia sivaraina namona iharorolaina ḡaukarana. * (Mat. 24:14) Iesu ese uhe ihadona tauna parabolena amo una e hahedinaraia. Mani una parabole iharuana aita herevalaia.

10. (a) Parabole ai, uit nadinadidia bona tano ese dahaka e laulaulai? (b) Uit auna ese dahaka e havara?

¹⁰ Luka 8:5-8, 11-15 ba duahi. Uhe ihadona tauna parabolena ai, uit nadinadidia na “Dirava ena hereva,” eiava Basileia sivaraina. Tano ese taunimanima kudoudia e laulaulaia. Tano namona ai e moru uit nadinadidia na ramudia e hekara, bona e tubu, eiava uit auna ai ela. Bena, “anidia na sinahu sinahu.” To uit auna ese huahua ede bamodia baine havara? Ia be uit audia maraḡidia baine havara, a? Lasi, to uhe matamatadia baine havara, bena unu uhe na bae tubu bona uit audia ai baela. Ina parabole ai, uhe tamona ese huahua sinahu e havara. Edena dala ai una ese eda haroro ḡaukara e herevalaia?

11. (a) Edena dala ai uhe ihadona tauna parabolena ese eda haroro ḡaukara e herevalaia? (b) Edena dala ai Basileia uhena matamatana baita havaraia diba?

¹¹ Laḡani momo ḡunadia ai Witnes taudia haida eiava Kristen tama sina ese Basileia sivaraina e hadibalaida neganai, una na vaitani tano namona ai uhe e hadoa. Idia na e moale badina e itaia ita ese Basileia sivaraina  ta abia dae. Iesu ena parabole ai uhe na tano namona ai e moru heḡereḡerena, ita ese sivarai namona ta abia dae bona ta badinaia. Una dainai, Basileia sivaraina o uhena na vaitani ramuna e hekara bona e tubu, uit auna ta ai ela bena huahuana e dobi. Danu, uit auna ese e havaraiamu huahuana na dia uit au maraḡidia, to uhe matamatadia, una heḡereḡerena ita ese ta havaraiamu huahuana na dia hahediba taudia matamatadia, to Basileia uhena matamatana. * Edena dala ai Basileia uhena matamatana baita havaraia diba? Dina ta ta ai, Basileia sivaraina ta harorolaiamu neganai, vaitani kudouda ai e hadoa uhena na ma haida kudoudia ai ta hadoamu. (Luka 6:45; 8:1) Una dainai, ina parabole ese e hadibadamu Basileia sivaraina ta harorolaia hanaihanaimu neganai huahuada na e dobimu.

12. (a) Vine bona uhe ihadona tauna edia parabole amo dahaka ta dibamu? (b) Una ese oi be ede e durumu tomamu?

¹² Iesu ese vine bona uhe ihadona tauna edia parabole amo dahaka e hadibadamu? E hadibadamu, dia eda teritori ai taunimanima bae kamonai neganai, huahuada bae dobi. Lasi, to eda haroro goadagoada karana amo una baine vara diba. Paulo na eto: “Ta ta davadia bae abi, edia hekwarahi heḡereḡerena.” (1 Kor. 3:8) Davada na eda hekwarahi amo baita abi diba, dia eda hekwarahi ese e havaraiamu huahuana amo. Matilda, laḡani 20 lalonai e painia taihuna, na eto: “Na moalemu badina na dibamu Iehova ese eda hekwarahi na e hanamoamu.”

13, 14. Roma 10:1, 2 ena hereva heḡereḡerena, dahaka dainai Paulo na se hesiku Basileia sivaraina asie abia dae taudia ediai?

¹³ Dahaka ese baine duruda basita hesiku ela bona huahuada bae dobi? Mani Paulo aita laloa, Iuda taudia ese Basileia sivaraina se abia dae neganai ia na e lalomanoka. To, ia na se hesiku idia iharoro henidia ai. Roma Kristen taudia e tore henidia neganai, ena lalohadai unu Iuda taudia ediai e gwauraia, eto: “Lalogu ena ura, bona egu Dirava enai  danu, be Israel taudia do bae mauri. Lau dibagu idia ese Dirava e ura heniamu; ḡau tamona, lalodia asie pararamu.” (Roma 10:1, 2) Dahaka dainai Paulo ese ena haroro ḡaukara na se hadokoa?

¹⁴ Ḡau ginigunana na, Paulo ese Iuda taudia dounu e haroro henidiava badina e herevalaia. Ia na ‘lalona ena ura’ ese e hagoadaia. Ia na e urava Iuda taudia haida ese hahemauri bae abia. (Roma 11:13, 14) Ḡau iharuana na, Paulo ese ena noinoi “Dirava enai” e herevalaia. Ia ese Dirava e noia unu Iuda taudia ta ta baine durudia Basileia sivaraina bae abia dae totona. Ḡau ihatoina na, Paulo na eto: “Idia ese Dirava e ura heniamu.” Ia ese taunimanima edia kara namodia e ita. Bema idia ese Dirava bae ura henia dikadika, Keriso ena hahediba taudia goadadia ai baela diba, Paulo heḡereḡerena.

15. Edena dala ai Paulo baita tohotohoa diba? Haheitalai haida ba herevalai.

¹⁵ Edena dala ai Paulo baita tohotohoa diba? Ginigunana na, baita ḡaukara goada mai eda ura ida “mauri hanaihanai bae abia” kudou namo taudia baita tahudia. Iharuana na, Iehova baita noia kudou maoro taudia baine durudia totona. (Kara 13:48; 16:14) Silvana, laḡani 30 heḡereḡerena e painia taihuna ta, na eto: “Egu teritori ai ruma ta do asi nala neganai, Iehova na ḡuriḡuri heniamu, na noiamu baine durugu lalohadai maorona baina abia.” Danu, Dirava baita noia ena aneru ese baine hakauda, kudou namo taudia baita davaridia. (Mat. 10:11-13; Apok. 14:6) Robert, laḡani 30 mai kahana e painia tadikakana ta, na eto: “Aneru ida ḡaukara hebou karana na mai moalena, badina idia na mai dibadia ruma taudia edia mauri ai be dahaka e varamu.” Ihatoina na, taunimanima edia kara namodia baita ita. Carl na elda ta bona laḡani 50 gunanai e bapatiso. Ia na eto: “Ta ena kara maraḡina ta, heḡereḡere reana e kirimu, se badumu, eiava mai momokanina ida henanadai ta e henimu karana amo na dibamu ia na e uramu baine kamonai.” Oibe, Paulo heḡereḡerena, basita hesiku ela bona huahuada bae dobi.

16, 17. (a) Kohelete 11:6 ena hereva amo dahaka ta dibamu? (b) Edena dala ai eda haroro ḡaukara ese ita e itadamu taudia baine durudia?

¹⁶ Bema ta harorolaiamu Basileia sivaraina ese taunimanima kudoudia na se hamareremu, basita laloa eda ḡaukara na asi anina. (Kohelete 11:6 ba duahia.) Ena be taunimanima momo na asie kamonaimu, to eda kara na e itamu. Eda heḡoeva daladia, eda kara namodia, bona moale toana e itaiamu. Gabeai, eda kara ese haida baine durudia bena bae laloparara ita e laloda kereremu karana na dia maoro. Sergio bona Olinda, paragraf matamanai e herevalaidia taudia, ediai una na e vara.

¹⁷ Sergio na eto: “Emai gorere dainai, nega taina daudau asi ala vaevae a giniva gabuna. Gabeai a lou lao neganai, raka hanai taudia na e henanadaiva, ‘Umui nanamo? A misimuimu.’” Olinda na mai kirina ida eto: “Basi e tariva taudia danu imadia e davedaveva bona haida ese e boi henimaiva, ‘Ḡaukara namona o karaiamu!’ Magasin danu e noiva.” Bona una tadikaka adavana ida na e hoa, badina tau ta na ela edia witnessing cart badina bena flaoa e henidia, bona edia ḡaukara namona dainai e tenkiu henidia.

18. Dahaka dainai lalomu o hadaiamu ‘basio hesiku ela bona huahuamu baine dobi’?

¹⁸ Momokani, Basileia uhena ihadona ai ‘basita hesiku’ neganai, “bese iboudiai” baita haroro henidia diba. (Mat. 24:14) Mai anina bada ḡauna na, baita moale dikadikamu badina ta dibamu Iehova ese e lalonamo henidamu; ia ese “asie hesikumu ela bona huahuadia e dobimu” taudia na e lalokau henidiamu!