1. Eden ai, Iehova ese inaida e herevalaia neganai dahaka e hahedinaraia?

ADAM na mai dibana gaigai na asie herevava. Una dainai reana e laloava lauma tauna ta ese gaigai amo Heva e hereva henia. (Gen. 3:1-6) Adam bona Heva na asi dibadia una lauma tauna be daika. To, Adam na abi hidi e kara Tamana lalokauna guba ai, ena ura e dadaraia bona asi dibana tauna e badinaia. (1 Tim. 2:14) Maoromaoro, Iehova ese una inai tauna, Adam bona Heva e koidia tauna, ena kara e hahedinarai matama, bona e gwauhamata una inai tauna na gabeai baine haorea. To danu, Iehova ese e hadibadia, gaigai amo idia e hereva henidia lauma tauna na mai ena siahu, Dirava e lalokau heniamu taudia baine daḡedaḡe henidia.​—Gen. 3:15.

2, 3. Dahaka dainai Mesia do se kau ai inaida sivaraina na taina mo e herevalaia?

² Iehova na mai aonegana ida una gwau-edeede aneruna ladana korikorina na se gwauraia hedinarai. * Bona Dirava ese una inai tauna ladana na se hahedinaraia ela bona laḡani 2,500 heḡereḡerena ai, gwau-edeede karana ginigunana e vara murinai. (Iobu 1:6) Bona, Heberu Revarevadia ai buka toi, 1 Sisiga, Iobu, bona Sekaria, ese ina lada “Satana” e herevalaia, anina na “Gwau-Edeede Tauna.”  Dahaka dainai Mesia do se kau ai inaida sivaraina taina mo e herevalaia?

³ Iehova na se ura Satana na baine hekokoruku dainai Heberu Revarevadia kahana badana ai Satana bona ena ḡaukara na se herevalaidia momo. Iehova ena ura badana na una Revareva kahana badana ai Mesia baine herevalaia, unu amo ena taunimanima ese Mesia bae badinaia. (Luka 24:44; Gal. 3:24) Una e ḡuḡuru bona Mesia e kau neganai, Iehova ese ia bona ena hahediba e ḡaukaralaidia Satana bona ia e badinaia anerudia bae herevalaidia. * Una na maoro, badina Iehova ese Iesu bona ia ida bae lohia horoa taudia baine ḡaukaralaidia Satana bona ia e badinaiamu taudia bae hadareredia totona.​—Roma 16:20; Apok. 17:14; 20:10.

4. Dahaka dainai Diabolo basita gari henia na namo?

⁴ Aposetolo Petro ese Satana Diabolo na e gwauraia “leona,” bona Ioane ese e gwauraia ‘gaigai’ bona “huala badana.” (1 Pet. 5:8; Apok. 12:9) To, Diabolo basita gari henia na namo​—ena siahu na mai hetoana. (Iakobo 4:7 ba duahia.) Ita na Iehova, Iesu, bona kamonai anerudia ese e durudamu. Edia heduru amo inaida baita dadaraia diba. To, namona na ini henanadai badadia toi baita haerelai: Satana ena siahu ena bada be ede bamona? Edena dala ai ia ese ma haida e hakaudia kereremu? Bona ena siahu hetoadia be ede bamona? Ini henanadai baita herevalaimu neganai, baita dibamu ḡaudia danu baita herevalaimu.

5, 6. Dahaka dainai tanobada gavamanidia ese taunimanima edia ura ḡaudia iboudiai na asie havara henidiamu?

⁵ Aneru momo ese Satana ena gwau-edeede karana e durua. Utu-utu do se kau neganai, Satana ese idia haida e koidia taunimanima natudia kekenidia ida bae mahuta hebou totona. Baibul ese laulau dalana ai e hahedinaraia, huala badana ese guba hisiudia toi toi amo ta ta na e veridia ia bae badinaia. (Gen. 6:1-4; Iuda 6; Apok. 12:3, 4) Unu aneru ese Dirava ena ruma bese e dadaraia neganai, idia na Satana ese e biagudia. To, unu gwau-edeede taudia na dia dika mo e havaramu oreana ta. Satana ese Dirava ena Basileia heḡereḡerena ta e haginia, bona sibona ese e lohiaiamu. Guba ai, Satana ese demoni e haboudia, siahu e henidia, bona tanobada lohiadia ai e halaodia.​—Efe. 6:12.

⁶ Satana na ena lauma oreana amo taunimanima edia gavamani iboudiai e biagudiamu. Una na ta dibamu, badina Satana ese “tanobada basileiadia idoidiai” na Iesu enai e hahedinarai, bona e hamaoroa: “Lau na ini siahudia bona hairaidia iboudiai baina henimu, badina be lau mo e henigu, bona na ura heniamu tauna do baina henia.” (Luka 4:5, 6) Ena be Satana ese e biagudiamu, to gavamani momo na edia taunimanima daidiai ḡau namodia momo e karamu. Bona lohia taudia ta ta na e uramu bae heduru. To, tanobada gavamanidia eiava lohia taudia ese taunimanima edia ura ḡaudia iboudiai na asie havara henidiamu.​—Sal. 146:3, 4; Apok. 12:12.

7. Edena dala ai Satana ese dia gavamani mo to tomadiho koikoi bona bisnes oreadia danu e ḡaukaralaimu? (Rau 22 ai laulau ba itaia.)

⁷ Satana bona demoni ese dia gavamani mo e ḡaukaralaidiamu to tomadiho koikoi bona bisnes oreadia danu e ḡaukaralaidiamu “tanobada idoinai” bae koia totona. (Apok. 12:9) Satana ese tomadiho koikoi amo Iehova e sivarailaia koikoi. Danu, Diabolo na e uramu taunimanima momo ese Dirava ladana bae laloaboio. (Ier. 23:26, 27) Una dainai, kudou namo taudia​—e laloamu Dirava e tomadiho heniamu taudia​—na e  koidiamu demoni bae tomadiho henidia. (1 Kor. 10:20; 2 Kor. 11:13-15) Danu, Satana ese bisnes oreadia amo koikoi herevadia e halasimu. Heḡereḡere, unu orea ese nega momo taunimanima e hadibadiamu bae moale dalana namona na moni bae tahu bona kohu momo bae habou. (Her. 18:11) Una koikoi herevana e abia daemu taudia na edia mauri lalonai “Taḡa” isiaina e lao henimu, dia Dirava. (Mat. 6:24) Gabeai, kohu bona moni iura henidia karana ese edia lalokau Dirava enai baine hadikaia diba.​—Mat. 13:22; 1 Ioa. 2:15, 16.

8, 9. (a) Adam, Heva, bona gwau-edeede anerudia edia sivarai amo ta dibamu ḡaudia rua be dahaka? (b) Satana ena kara ta dibamu dainai dahaka namo ta davarimu?

⁸ Adam, Heva, bona gwau-edeede anerudia edia sivarai amo mai anina bada ḡaudia rua ta dibamu. Ginigunana na, kaha na rua hona, bona tamona baita abia hidi na namo. Iehova baita badinaia hanaihanai eiava Satana baita badinaia. (Mat. 7:13) Iharuana na, Satana e badinaiamu taudia ese e abiamu moalena na se mia daudaumu. Adam bona Heva na sibodia edia ura heḡereḡerediai abi hidi e kara dahaka be namo bona dahaka be dika, bona demoni na siahu e abi taunimanima edia gavamani bae biagudia. (Gen. 3:22) To, Satana ese e henimu ḡaudia na asi edia namo, hanaihanai dika e havaramu.​—Iobu 21:7-17; Gal. 6:7, 8.

⁹ Satana ena kara ta dibamu dainai dahaka namo ta davarimu? Una ese e durudamu gavamani ediai lalohadai maorona baita abia bona eda haroro ḡaukara ai e hagoadadamu. Ta lalopararamu Iehova na e uramu gavamani baita matauraidia. (1 Pet. 2:17) Bona e uramu taunimanima edia gavamani ese e atomu taravatudia baita badina, bema unu ese iena taravatu na asie utumu. (Roma 13:1-4) To ta dibamu tanobada amo baita gini siri na namo, dia namo politikol oreana ta eiava taunimanima igunalaidia tauna ta baita hanamoa bona ma ta baita hadikaia. (Ioa. 17:15, 16; 18:36) Ta dibamu Satana na e uramu Iehova ladana baine hadikaia, una dainai ita na ta uramu Dirava sivaraina momokanina na ma haida baita hadibalaidia. Ta moalemu badina Dirava ladana ta henemailaia bona una lada ta ḡaukaralaiamu, danu ta dibamu ia ilalokau henina karana amo ta abimu hahenamodia ese moni eiava ḡau ma haida iura henidia karadia na e hereadia.​—Isa. 43:10; 1 Tim. 6:6-10.

10-12. (a) Edena dala ai Satana ese koikoi dalana amo aneru haida e idoadia? (b) Aneru momo e moru karana amo dahaka ta dibamu?

¹⁰ Satana ese dala haida e ḡaukaralaimu taunimanima baine hakaudia kerere totona.  Heḡereḡere, ia ese koikoi daladia e ḡaukaralaimu unu amo ena ura karadia bae kara. Danu e hagaridia tohomu ia bae badinaia totona.

¹¹ Satana ese koikoi karana amo aneru momo e hamorudia dalana mani a laloa. Reana unu aneru na nega daudau lalonai e stadilaidia bena gabeai e koidia ia bae badinaia totona. Unu aneru haida ese ena koikoi dalana e abia dae bona hahine ida e mahuta hebou bena natudia e havara, idia na daḡedaḡe taudia bona taunimanima e biagudiava. (Gen. 6:1-4) Reana Satana ese unu gwau-edeede anerudia e dibaḡanidia na dia mahuta hebou karana mo bae karaia, to e gwauhamata henidia danu siahu baine henidia taunimanima bae lohiadia totona. Ia na e urava Dirava ese e gwauhamatalaia ‘hahine garana’ ena mai baine hadikaia. (Gen. 3:15) Herevana dahaka, to Iehova ese Satana bona gwau-edeede anerudia edia palani iboudiai na Utu-utu amo e haoredia.

¹² Una e vara ḡauna amo dahaka ta dibamu? Basita laloa matabodaḡa bona hekokoroku karadia edia idoa ai na basita morumu. Satana e badinaia anerudia na laḡani momo lalodiai Dirava e hesiai heniava. Ena be Dirava ida e nohova, to idia momo na ura dikadia e abi bona unu ura dikadia na lalodia ai e tubu. Una heḡereḡerena, ita na laḡani momo lalodiai Dirava ena orea tanobada ai ta duruamu. Ena be una orea ḡoevana lalonai ta nohomu, to ura dikadia na laloda ai bae tubu diba. (1 Kor. 10:12) Ḡau badana na hanaihanai kudouda baita sekea, matabodaḡa lalohadaidia baita dadarai, bona hekokoroku karana baita dadaraia.​—Gal. 5:26; Kolose 3:5 ba duahia.

13. Satana ena koikoi dalana ma ta be dahaka, bona edena dala ai baita dadaraia diba?

¹³ Satana ese e ḡaukaralaiamu koikoi dalana ma ta na, babalau karadia. Hari ina negai, ia ese tomadiho koikoi bona moale karadia amo taunimanima lalodia e verimu demoni bae lalodia bada totona. Muvi, elektronik games, bona ḡau ma haida ese babalau imoalelaidia karadia e hahedinaraimu. Edena dala ai una idoa baita dadaraia diba? Basita laloa Dirava ena orea ese moale karadia namodia bona dikadia edia list ta baine henida na namo. Namona na ita ta ta ese laloda mamina baita hadibaia namonamo unu amo Dirava ena taravatu baita badina. (Heb. 5:14) To, abi hidi maorodia baita kara dibamu bema aposetolo Paulo ena sisiba baita badinaia, eto namona na eda lalokau Dirava enai na “momokani.” (Roma 12:9) Siboda baita henanadai: ‘Na abia hidimu moale karana ese e hahedinaraiamu lau be sibogu na hekoimu, a? Bema egu Baibul stiuden eiava lou henia ese na abia hidi moale karana be itaiamu, be laloamu lau be na  harorolaimu herevadia na badinamu, a?’ Ta herevalaimu ḡaudia na eda kara amo baita hahedinaraimu neganai, Satana ena koikoi daladia na baita dadarai dibamu.​—1 Ioa. 3:18.

14. Satana be edena dala ai ita e hagaridamu, bona edena dala ai baita haheauka diba?

¹⁴ Satana ena koikoi dalana ma ta na, e uramu baine hagarida bena Iehova basita badinaia. Heḡereḡere, ia ese gavamani lalodia e verimu eda haroro ḡaukarana bae taravatua. Eiava ḡaukara gabuna ai o sikuli ai turada lalodia baine veri diba bae hevasehalaida badina Baibul ena taravatu maoromaorodia ta badinamu. (1 Pet. 4:4) Danu, eda ruma bese taudia baine ḡaukaralaidia unu amo bae hamanokada bena hebou basitala. (Mat. 10:36) Edena dala ai baita haheauka diba? Ḡau ginigunana na, namona na baita abia dae unu hahetoho na baita davarimu, badina Satana na ita e tuari henidamu. (Apok. 2:10; 12:17) Ḡau iharuana na, unu hahetoho e varamu badidia baita lalodia na namo​—Satana na e gwaumu namo ta davarimu negadia ai mo Iehova ta hesiai heniamu. Bona e gwaumu, bema hahetoho baita davarimu, Dirava baita dadaraiamu. (Iobu 1:9-11; 2:4, 5) Ḡau ihatoina na, Iehova ena goada ai baita tabekau na namo, unu amo hahetoho baita haheaukalai. Ba helalotao, Ia ese ita na basine rakatanidamu.​—Heb. 13:5.

15. Satana ese baine dorida diba asita uramu baita kara ḡaudia baita kara totona, a? Ba herevalaia.

¹⁵ Satana ese taunimanima na basine doridia diba asie uramu bae kara ḡaudia bae kara totona. (Iak. 1:14) Momo na asie lalopararamu idia na Satana ena ura e badinaiamu. To hereva momokani e dibamu neganai, abi hidi e karamu daika bae hesiai henia totona. (Kara 3:17; 17:30) Bema laloda baita hadaimu Dirava ena ura baita karaiamu, Satana ese Dirava ta badinaiamu karana na basine hadikaia dibamu.​—Iobu 2:3; 27:5.

16, 17. (a) Satana bona demoni be dahaka basie kara diba? (b) Dahaka dainai Iehova baita ḡuriḡuri henia badabada neganai basita gari na namo?

¹⁶ Satana bona demoni ese ḡau ma haida na basie kara diba. Heḡereḡere, Baibul ese se hahedinaraia idia na taunimanima daradia bona kudoudia ai e miamu ḡaudia na mai dibadia. Iehova bona Iesu sibodia mo unu bae kara toma diba. (1 Sam. 16:7; Mar. 2:8) To, bema ta herevamu eiava ḡuriḡuri ta gwaurai badabadamu be ede bamona? Diabolo eiava demoni ese eda ḡuriḡuri bae kamonai bona bae kouda garina baita gari, a? Lasi. Dahaka dainai? Iehova ena hesiai ḡaukara ta karaiamu neganai, Diabolo ese baine itada garina na asita garimu. Una heḡereḡerena, ḡuriḡuri baita gwaurai badabada neganai, Diabolo baine kamonai garina na basita gari. Baibul lalonai Dirava ena hesiai taudia ese ḡuriḡuri e gwaurai badabadava sivaraidia na momo, bona se hahedinaraia idia na Diabolo baine kamonai garina e gari. (1 Han. 8:22, 23; Ioa. 11:41, 42; Kara 4:23, 24) Bema baita ḡaukara goadamu eda hereva bona kara na Dirava ena ura ida bae heḡereḡere, baita diba momokanimu Iehova ese Diabolo na be kouamu basine hadikada totona.​—Salamo 34:7 ba duahia.

¹⁷ Inaida ena kara baita diba na namo, to garina na basita gari. Iehova ena heduru amo, dia ḡoevadae taudia ese Satana bae hadarerea diba. (1 Ioa. 2:14) Bema baita dadaraiamu, eda amo be heaumu. (Iak. 4:7; 1 Pet. 5:9) Satana na e uramu memero kekeni ese ia bae badinaia. Dahaka bae kara diba Diabolo bae laoa ahu totona? Stadi gabena ese una henanadai be herevalaiamu.