1, 2. (a) Dahaka dainai Kristen memero kekeni ese lauma dikadia e hadarerediamu? (Rau 27 ai laulau ba itaia.) (b) Dahaka baita herevalaimu?

APOSETOLO PAULO ese Kristen taudia na tuari taudia ida e haheḡereḡeredia. Momokani, iseda tuari na lauma taudia ida, dia taunimanima. Bona inaida na momokani e nohomu. Satana bona demoni tuari daladia na mai dibadia namonamo. Una dainai matamanai baita laloamu tuari na auka herea. Bona toana na Kristen memero kekeni na basie kwalimu dibamu. Edena dala ai bae abia dae lauma dikadia na bae hadareredia diba? Momokani, memero kekeni na bae kwalimu diba, bona e kwalimumu! Dahaka dainai? Badina idia na “Lohiabada siahuna ai” goada e abimu. To ḡau ma haida danu e karamu. Idia ese tuari dabuadia e hahedokilaimu. E treinin namonamo tuari taudia heḡereḡeredia, idia ese “Dirava ena tuari dabuadia iboudiai” e hahedokilaimu.​—Efeso 6:10-12 ba duahi.

² Paulo ese una haheitalai e herevalaia neganai, reana Roma tuari taudia ese e hahedokilaiava tuari dabuana e laloa. (Kara 28:16) Mani baita itaia dahaka dainai una haheitalai na maoro. Una baita herevalaia neganai, memero kekeni ese e davari hekwakwanaidia bona lauma tuari dabuadia e hahedokilai ena namo ba lalodia.

3, 4. Edena dala ai Baibul ena hereva momokani na Roma edia tuari beletana heḡereḡerena?

³ Efeso 6:14 ba duahia. Roma edia tuari beletana na auri amo e karaia bona tuari tauna gabana e gimaiava. Una beleta e karaia na tuari tauna kemena ikoulaina dabuana ena metau ihamaraḡina. Danu, beleta haida na mai edia kapu tao ḡaudia aukadia tuari kaiana bona kaia maraḡina ta bae atoa totona. Tuari tauna ese ena beleta na e kwatua auka dainai, tuari ai baine gini goada diba.

⁴ Una heḡereḡerena, Dirava ena Hereva amo ta diba hereva momokanidia ese e gimadamu hahediba hereva koikoidia ese basie hakauda kerere totona. (Ioa. 8:31, 32; 1 Ioa. 4:1) Bona Dirava ena hereva momokanidia baita ura henidiamu neganai, ‘kemeda’ ena auri dabuana baita hahedokilaia dibamu, anina na, Dirava ena kara maoromaoro taravatudia baita badinamu. (Sal. 111:7, 8; 1 Ioa. 5:3) Danu, Dirava ena Hereva amo hereva momokanidia baita lalopararalaidia namonamomu neganai, inaida vairadiai baita gwauraidia hedinarai dibamu.​—1 Pet. 3:15.

5. Dahaka dainai hereva momokani baita gwaurai na namo?

⁵ Baibul ena hereva momokani baita dogoatao aukamu neganai, be durudamu eda mauri ai baita badinaiamu bona nega iboudiai hereva momokani baita gwauraimu. Dahaka dainai asita uramu baita koikoi? Badina koikoi karana na Satana ena tuari ḡauna namona ta. Koikoi herevadia e gwauraimu tauna bona e abi daemu tauna na una kara ese e hakaudia kereremu. (Ioa. 8:44) Una dainai namona na baita ḡaukara goada, koikoi herevadia baita dadarai. (Efe. 4:25) To, una na mai hekwarahina. Abigail, laḡanina 18, na eto: “Nega haida hereva momokani baita gwauraimu na dia ḡau badana, badina baita koikoimu neganai hekwakwanai baita hanai dibamu.” To, dahaka dainai ia na hanaihanai e urava hereva momokani baine gwaurai? Ia na eto: “Hereva momokani na gwauraimu neganai, Iehova matana ai lalogu mamina na ḡoeva. Danu tamagu, sinagu bona bamogu ese egu hereva na bae abi dae diba.” Victoria, laḡanina 23, na eto: “Hereva momokani bo gwauraimu bona emu abidadama ai bo gini tutukamu neganai, haida ese be daḡedaḡe henimumu. To, hanaihanai namo bo davarimu: Emu abidadama be goadamu, bo mamiamu Iehova na oi dekedekemu ai, bona e lalokau henimumu taudia ese be matauraimumu.” Momokani, hanaihanai “koekoemui ai hereva momokani ba ḡeḡea” na namo.

6, 7. Dahaka dainai kara maoromaoro na keme auri dabuana ida e haheḡereḡerea?

⁶ Aposetolo edia nega ai, Roma edia tuari tauna ta kemena ai e atoava dabuana na auri amo e karaia. Unu auri na taidia e hagagevadia unu amo kemena ai bae heato namonamo bona leather varodia amo e kwatudia aukava. Tuari tauna paḡana kahadia danu una auri dabuana amo e koua ahuva bona hukudia e atova. Una dabua ese tuari tauna e duruava basine marere momo, bona namona na baine sekea loulou unu amo baine diba unu auri be heheato namonamo eiava. To danu, una keme dabuana ese ia kemena bona tauanina regedia ma haida baine gimadia diba, tuari kaia eiava diba amo basie hadikaia helaoreana.

⁷ Una ese Iehova ena kara maoromaoro taravatudia e laulaulai, unu taravatu ese kudouda bae gimaia diba. (Her. 4:23) Dia namo tuari tauna ese kemena ena auri dabuana gabunai auri manokana amo e karaia dabuana baine atoa, una heḡereḡerena asita uramu Iehova ena taravatu gabudiai siboda eda lalohadai baita badina. Ita na dia heḡereḡere siboda baita hegima totona. (Her. 3:5, 6) Una  dainai, namona na hanaihanai baita heseke kudouda igimana totona Iehova ese e heni auri dabuana be heato namonamo eiava lasi.

8. Dahaka dainai Iehova ena taravatu baita badinadia na namo?

⁸ Nega haida o mamiamu Iehova ena kara maoromaoro taravatudia ese e hametaumumu eiava emu ura kwalimu e kouamu, a? Daniel, laḡanina 21, na eto: “Baibul ena taravatu na badinadiava dainai egu sikuli hahedibadia bona stiuden ese e kirikirilaiguva. Se daudau, egu abidadama e manoka bona na lalometauva.” Edena dala ai e goada lou? Ia na eto: “Gabeai, Iehova ena taravatu ibadinadia karana ena namo na itaia. Bamogu haida na drag e abi matama; ma haida na edia sikuli asie haḡuḡuru. Edia mauri daladia na ita neganai na lalohisihisiva. Iehova ese momokani e gimadamu.” Madison, laḡanina 15, na eto: “Iehova ena taravatu baina badina bona bamogu ese e moalelaiva karadia baina dadarai na mai hekwarahina.” Edena dala ai e haheauka? “Hanaihanai sibogu na lalova lau na Iehova na hesiai heniamu kekenina bona hedibaḡani na Satana ese ihamorugu totona e ḡaukaralaiamu dalana ta. Hahetoho ta na hanaiamu neganai, egu hemami na e namo.”

9-11. (a) Laulau dalana ai Kristen taudia be ededia tamaka e karamu? (b) Dahaka ese baine duruda diba sivarai namona baita harorolaia totona?

⁹ Efeso 6:15 ba duahia. Bema Roma tuari tauna ta na tamaka basine kara, ia na dia heḡereḡere tuari bainela. Ena tamaka e moilaiamu kahana ai leather ḡaudia toi e ato, unu amo baine gini namonamo diba. Una tamaka e karaia dalana ese tuari tauna baine durua baine raka namonamo bona basine dedi.

¹⁰ Roma tuari taudia na tamaka e karava dainai tuari e laova, bona Kristen taudia na laulau dalanai tamaka e karamu dainai maino sivaraina e harorolaiamu. (Isa. 52:7; Roma 10:15) To, dala e hekehomu neganai mai eda lalo goada ida baita hereva na namo. Bo, laḡanina 20, na eto: “A sikuli hebouva taudia iharoro henidia na na gariva. Badina na hemaraiva. Na lalo loumu neganai, asina dibava dahaka dainai unu na hemami tomava. Hari na moalemu badina bamogu na haroro henidiamu.”

¹¹ Memero kekeni momo na mai dibadia bema sivarai namona iharorolaina totona bae heḡaeḡae namonamo, haroro ai na basie hekwarahi. Dahaka ba kara diba ba heḡaeḡae totona? Julia, laḡanina 16, na eto: “Egu sikuli baegena ai pablikeisen na udava. Bona turagu ese edia lalohadai eiava e abi daeva ḡaudia e herevalaiva neganai na kamonaiva. Bena idia idurudia ḡaudia na lalohadailaiva. Na heḡaeḡaeva neganai, idia baina durudia diba ḡaudia na na herevalaiva.” Makenzie, laḡanina 23, na eto: “Bema emu kara na namo bona bo kamonai namonamomu, turamu edia hekwakwanai na bo lalopararalaimu. Una dainai memero kekeni e herevalaidia pablikeisen iboudiai na duahidiamu. Unu amo turagu baina hadibadia diba Baibul eiava jw.org ai baina durudia diba ḡaudia bae ita.” Unu hereva ese e hahedinaraimu, haroro totona bo heḡaeḡae namonamomu neganai, una na tamaka maorodia o karamu na heto.

12, 13. Satana ena “diba lahidia” haida be dahaka?

¹² Efeso 6:16 ba duahia. Roma tuari tauna ese e huaiava “kesina” na lata bona ia paḡana amo ela tuina e koudiava. Una kesi ese baine gimaia, kaia bona diba ese basine hamasea totona.

¹³ Satana ena “diba lahidia” haida na, Iehova e sivarailaia koikoimu​—etomu Ia ese se lalomu badamu bona se lalokau henimumu. Laḡanina 19 kekenina, Ida, na e laloava  ta ese se laloa badava. Ia na eto: “Nega momo na mamiava Iehova na daudau bona se urava Turagu ai bainela.” Edena dala ai una hemami e hanaia? Ida na eto: “Hebou ese egu abidadama e hagoadaiava. Guna na helaiva bona haere ta asina heniva, badina na laloava basie uramu baina gwauraia herevana bae kamonai. To hari, lau na hebou totona na heḡaeḡaemu bona nega rua eiava toi haere na henimu. Una na auka, to na karaiamu neganai na moalemu. Danu tadikaka bona taihu ese e hagoadagumu. Hanaihanai hebou na laomu badina na dibamu Iehova ese e lalokau henigumu.”

14. Ida sivaraina ese dahaka e hahedinaraiamu?

¹⁴ Ida sivaraina ese mai anina bada hereva momokanina e hahedinaraia: Tuari tauna ese e abia kesina ena bada o lababa na tamona, to eda abidadama kesina na dia unu heto, ia na baine manoka diba eiava baine goada diba. Maduna na ita ta ta edai. (Mat. 14:31; 2 Tes. 1:3) Eda abidadama baita hagoadaia na mai anina bada.

15, 16. Edena dala ai eda helaro na kwara ḡauna ida e haheḡereḡerea?

¹⁵ Efeso 6:17 ba duahia. Roma tuari tauna kwarana ai e atoava kwara ḡauna ese ia kwarana, aiona, bona vairana e gimadiava. Kwara ḡaudia haida na mai imadia unu amo tuari tauna ese imana ai baine dogoatao diba.

¹⁶ Kwara ḡauna ese tuari tauna harana e gimaiamu heḡereḡerena, “hahemauri helarona” ese darada eiava eda lalohadai e gimaiamu. (1 Tes. 5:8; Her. 3:21) Helaro ese e durudamu dainai Dirava ena gwauhamata ta  lalodia badamu bona eda hekwakwanai baita lalodia maoromaoro. (Sal. 27:1, 14; Kara 24:15) To bema ta uramu eda “kwara ḡauna” ese baine gimada, namona na kwarada ai baita atoa, dia imada ai baita dogoatao.

17, 18. (a) Edena dala ai Satana na ita e doridamu eda kwara ḡauna baita kokia? (b) Edena dala ai baita hahedinaraia Satana ena lalo veri karadia ese basie koida diba?

¹⁷ Edena dala ai Satana na ita e doridamu eda kwara ḡauna baita kokia? Iesu e kara henia dalana mani aita laloa. Satana na mai dibana Iesu ese baine abia hahenamona na gabeai taunimanima baine lohiadia. To Iesu na do baine nari ela bona Iehova ese e abia hidi negana. Una do se vara lalonai, ia na baine hisihisi bona baine mase. Una dainai Satana na Iesu ese baine abia haraḡa hahenamona ta e hahedinaraia. Satana na eto bema Iesu ese nega tamona mo baine tomadiho henia, maoromaoro ḡau iboudiai baine lohiadia diba. (Luka 4:5-7) Una heḡereḡerena, Satana na mai dibana Iehova ese nega matamatana ai ḡau namodia momo be henidamu. To, una nega do se vara lalonai, ita na hisihisi baita davarimu. Una dainai, Satana na lalo veri ḡaudia idauidau amo e dibaḡanidamu eda mauri baita moalelaia totona. Ia na e uramu moni bona kohu itahudia karana baita atoa guna, bona Basileia itahuna karana be gabeai.​—Mat. 6:31-33.

¹⁸ Kristen memero kekeni momo ese koikoi karana na e dadaraiamu, Kiana, laḡanina 20 kekenina, danu unu e kara toma. Ia na eto: “Na dibamu Dirava ena Basileia sibona ese eda hekwakwanai iboudiai baine haoredia.” Edena dala ai una helaro ese ena lalohadai bona kara e durua? Ia na eto: “Paradaiso helarona ese e durugu moni ḡaukara ai lalohadai maorona baina abia totona. Asina uramu egu diba bona nega bada na moni ḡaukara namona ta itahuna ai baina haorea kava. To, egu nega bona goada na lauma ḡaudia itahudia karana ai na ḡaukaralaimu.”

19, 20. Edena dala ai Dirava ena Hereva iḡaukaralaina ai eda diba baita habadaia?

¹⁹ Paulo ese ena revareva e torea negana ai, Roma tuari taudia ese e ḡaukaralaiava kaiana ena lata na 50 sentimita bona tuari ai e ḡaukaralaiava. Roma tuari taudia ese una tuari kaiana na e ḡaukaralaia namonamova badina be e treinini hanaihanaiva.

²⁰ Paulo ese Dirava ena Hereva na tuari kaiana ta ida e haheḡereḡerea. To, eda abidadama ta herevalaiamu eiava eda lalohadai ta hamaoromaoromu neganai, namona na una Hereva baita ḡaukaralaia namonamo. (2 Kor. 10:4, 5; 2 Tim. 2:15) Edena dala ai emu diba ba habadaia diba? Sebastian, laḡanina 21 merona, na eto: “Egu Baibul duahiduahi ai karoa iboudiai amo siri ta ta na pepa ta ai na torediamu. Na ura henimu siridia edia lista ta na karaiamu. Una dala amo, Iehova ena lalohadai na lalopararalaiamu.” Daniel, matamanai e herevalaia merona, na eto: “Baibul duahiduahi na karaiamu neganai, haroro ḡaukara ai taunimanima baine durudia siridia na abi hidimu. Na davaria taunimanima na be kamonaimu bema be itaiamu Baibul o laloa badamu bona o ḡaukara goadamu ba durudia totona.”

21. Dahaka dainai Satana bona demoni garidia basita gari na namo?

²¹ Ina atikol ai e herevalaidia memerodia bona kekenidia ese e hahedinaraiamu, Satana bona demoni garidia basita gari na namo. Ena be mai edia siahu, to edia siahu ese Dirava ena siahu na se hereaia. Bona idia na basie noho daudaumu. Kahirakahira, Keriso ena Laḡani 1,000 Lohiana ai, idia na be ḡuidiamu unu amo ḡau ta basie karaia diba, bona una murinai be haorediamu. (Apok. 20:1-3, 7-10) Inaida, iena koikoi karadia, bona ena ura na mai dibada. Iehova ena heduru amo baita laoa ahu eiava baita dadaraia diba!