1. Dirava ena Hereva ese dahaka e hadibadamu?

ITA ese hekwakwanai idauidau na baita hanaidia diba badina Iehova na ita Ihadibada Tauna hereadaena. (Isa. 30:20, 21) Iena Hereva ese e durudamu dainai, “kara namo iboudiai ikaradia ai” baita kwalimu. (2 Ti. 3:17) Baibul ena hahediba herevadia baita badinamu neganai, baita aonegamu, bona una ese “tanobada aonegana” e badinaiamu taudia edia aonega e hereaia.​—1 Ko. 3:19; Sal. 119:97-100.

2. Ina atikol ai dahaka baita herevalaimu?

² Ina stadi ai baita itaiamu, ina tanobada aonegana na siboda eda ura itahuna karana e hahedinaraiamu. Una dainai tanobada taudia edia lalohadai bona kara idadaraidia na mai hekwarahina. Baibul na eto: “Nahuamui ba toho, tau ta ese ena dadidadi damuna ai baine halaomui na garina, taunimanima edia aonega kavakavadia eiava edia lalo-hadai koikoidia eiava sene taudia edia toma-diho karadia ai baine koimui na garina.” (Kol. 2:8) Ina atikol ai, taunimanima ese Satana ena koikoi herevadia rua e abi dae daladia baita herevalaimu. Bona baita itaiamu, dahaka dainai tanobada aonegana na kavakava, bona edena dala ai Dirava ena Hereva amo e maimu aonegana ese tanobada aonegana e hereaia.

3-4. Laḡani 1900 matamana kahanai, United States ai taunimanima ese mahuta hebou karadia be ede e lalodia tomava?

³ Laḡani 1900 matamana kahanai, United States ai, taunimanima momo edia lalohadai mahuta hebou karadia ai na e idau. Guna, momo na e abia daeva headava taudia sibodia mo bae mahuta hebou na maoro bona pablik ai se herevalaiava. To hari momo ese una na asie abia daemu, bona sibodia edia ura daladia e badinamu.

 ⁴ Laḡani 1920 bona 1929 padadiai, Tanobada Tuarina Ginigunana murinai, taunimanima edia lalohadai bona kara na e idau. Toretore hahinena ta na eto: “Muvi, drama, ane, buka bona advatais ai mahuta hebou karadia e herevalaimu eiava e hahedinaraimu.” Unu laḡani lalodiai, taunimanima edia mavaru daladia ese mahuta hebou lalohadaidia e havarava bona dabua staelodia danu dia hemataurai dabuadia. Baibul na e peroveta, dina gabediai taunimanima na “lebulebu karadia bae ura heni bada.”​—2 Ti. 3:4.

5. Laḡani 1960 amo taunimanima ese kara maoromaoro taravatudia asie badinamu dainai dahaka e varamu?

⁵ Laḡani 1960 lalodiai, tau ta bona hahine ta na do se headava to e noho hebouva, tatau bona tatau (o hahine bona hahine) e mahuta hebouva, bona headava momo e dikava. TV, muvi, buka bona ḡau ma haida ai mahuta hebou karadia e hahedinaraiva. Unu ese dahaka e havaramu? Toretore hahinena ta na e gwaumu, taunimanima ese kara maoromaoro taravatudia asie badinamu neganai, lalohisihisi ḡaudia momo e varamu. Heḡereḡere, ruma bese momo e pararamu, tama o sina ese ena bese e rakataniamu, bona haida na e lalometaumu dainai matabodaḡa laulau dikadia (o pornography) itadia karana e manadalaiamu. Matabodaḡa karadia daidiai e varamu goreredia, heḡereḡere AIDS na e bada e laomu. Una ese e hamomokaniamu tanobada aonegana na kavakava.​—2 Pe. 2:19.

6. Edena dala ai taunimanima edia lalohadai mahuta hebou karadiai na Satana ena ura heḡereḡerena?

⁶ Taunimanima edia lalohadai mahuta hebou karadiai na Satana ena ura heḡereḡerena. Satana na e uramu taunimanima ese dala kereredia ai mahuta hebou karadia bae kara, unu amo Dirava ena harihari ḡauna, headava, basie matauraia. (Efe. 2:2) Bema taunimanima na matabodaḡa karadia e karamu, idia ese Iehova ena harihari ḡauna, natu ihavarana karana, na asie laloa badamu. Bona unu e kara tomamu taudia na mauri hanaihanai basie abia dibamu.​—1 Ko. 6:9, 10.

7-8. Dahaka dainai Baibul ena hereva mahuta hebou karana ai na idau, tanobada ena lalohadai amo?

⁷ Ina tanobada aonegana e badinaiamu taudia na e gwaumu Baibul ena taravatu maoromaorodia na asi anidia. Reana be henanadaimu, ‘Dahaka dainai Dirava ese ita e karada neganai mahuta hebou urana e henida bena ma e hamaorodamu una ura na baita biagua  namonamo?’ Unu e henanadai tomamu, badina be e laloamu bema taunimanima na e uramu ḡau ta bae karaia, bae karaia na namo. To Baibul ena hereva na idau. Baibul na e gwaumu tauanida ena ura dikadia na baita hamase. (Kol. 3:5) Danu, headava na Iehova ese e heni harihari ḡauna ta, bona headava taudia sibodia mo bae mahuta hebou na maoro. (1 Ko. 7:8, 9) Unu amo, tau bona hahine ese mahuta hebou karana bae moalelaia hebou diba, bona matabodaḡa karadia idauidau amo e varamu lalohisihisidia basie davari.

⁸ Baibul ese mahuta hebou karana ai lalohadai maorona e hahedinaraia. Baibul na e gwaumu mahuta hebou karana na headava taudia ese bae moalelaia karana. (Her. 5:18, 19) To, Baibul na e gwaumu: “Iboumui ai ba diba, ta ta adavamui bavabidia mai helaḡamui bona mai hematauraimui ida, dia mata-dika ena ura bodaḡadia daidiai basio abidia, Dirava asi dibadia besedia na heheto.”​—1 Te. 4:4, 5.

9. (a) Laḡani 1900 amo, Iehova ena taunimanima be dahaka ese e durudia Dirava ena taravatu e badinaia? (b) 1 Ioane 2:15, 16 ena sisiba namona be dahaka? (c) Roma 1:24-27 ai, ededia kara mirodia baita dadarai na namo?

⁹ Laḡani 1900 amo, Iehova ena taunimanima ese “lebulebu daladia ai e rakamu, bona mata-dika karadia e ura heni lalo-dikamu” taudia edia lalohadai na asie abi daeva. (Efe. 4:19) A Iehova ena taravatu hari e badinava. May 15, 1926, Watch Tower na eto “tau o hahine ta ena lalohadai bona kara bae ḡoeva na namo, tau o hahine idauna ta e kara heniamu neganai.” Ena be hari taunimanima na tanobada ena lalohadai e badinaiamu, to Iehova ena taunimanima ese Baibul amo e maimu aonegana e badinaiamu. (1 Ioane 2:15, 16 ba duahi.) Ta moalemu badina Dirava ena Hereva na mai dibada! Bona Iehova baita tenkiu henia badina nega korikori ai lauma aniani e henidamu, unu amo baine duruda tanobada aonegana ese basine koida. *​—Roma 1:24-27 ba duahi.

10-11. Baibul ese e hadibadamu dina gabediai be dahaka baine vara?

¹⁰ Baibul ese e hadibadamu dina gabediai taunimanima na “sibodia bae heura heni.” (2 Ti. 3:1, 2) Una dainai asita daradaramu, ina tanobada ese ta sibona ena ura baine laloa bada lalohadaina e hahedinaraiamu. Buka ta na etomu, laḡani 1970 lalodiai “taunimanima ese edia mauri bae moalelaia daladia e herevalai bukadia na momo herea.” Unu buka e duahiva taudia na “sibodia edia kara e moalelaiva bona e laloava e karava ḡaudia na dia kekerere.” Heḡereḡere, buka unu bamona ta na ini e gwau toma: “Sibomu ba helalokau heni badina oi na taunimanima hereana ta ina tanobada ai.” Una buka na ma eto, “ta na e uramu dahaka baine kara na ia sibona ese baine abia hidi, bona e laloamu dahaka be maoro na baine karaia mo.”

¹¹ Nega ta una hereva o kamonaia, a? Satana ese Heva e hamaoroa unu baine kara toma. Ia na eto, “Dirava ida ba heḡereḡere.” (Gen. 3:5) Hari, taunimanima momo na sibodia edia namo e lalomu bona se uramu ta​—Dirava danu​—ese baine hamaorodia dahaka be maoro bona dahaka be kerere. Headava lalonai taunimanima momo ese una lalohadai e hahedinaraiamu.

12. Taunimanima momo ese headava be ede e laloa tomamu?

¹² Baibul ese tau bona hahine e hadibadiamu, bae hemataurai heheni bona edia headava gwauhamatana bae badinaia. Danu, e hagoadadiamu bae hebadina heheni namonamo.  Baibul na eto: “Tau ese tamana sinana baine rakatanidia, adavana baine badinaia, raruosi na anidia tamona ai baela.” (Gen. 2:24) To, tanobada aonegana e badinaiamu taudia edia lalohadai na idau, idia na e gwaumu tau eiava hahine na sibona ena ura mo baine laloa. Divos e herevalaia bukana ta na e gwaumu: “Tano haida ai, tau bona hahine e headavamu neganai, taunimanima vairadiai e hegwauhamata hehenimu edia mauri dinadia iboudiai lalodiai bae hebadina heheni. To momo ese una gwauhamata na e haidauamu e gwaumu, edia headava lalonai bae hebadina heheni bema dounu e helalokau hehenimu.” Momo na e laloamu headava na basine mia hanaihanai ḡauna, una dainai ruma bese momo e pararamu bona momo na una kara dainai e lalohisihisimu. Una ese e hahedinaraiamu, tanobada taudia ese headava e laloamu dalana na kavakava.

13. Dahaka dainai Iehova ese hekokoroku taudia na e inai henidiamu?

¹³ Baibul na e gwaumu: “Hekokoroku taudia iboudiai na Iehova ese e inai henidia badamu.” (Her. 16:5) Dahaka dainai Iehova ese hekokoroku taudia e inai henidiamu? Badina ta na, sibodia e helalokau henimu taudia na Satana e tohotohoamu. Mani a laloa, Satana na e laloava Iesu​—Dirava ese ia amo ḡau iboudiai e kara​—na ia vairanai baine goru diho bona baine toma henia diho. (Mat. 4:8, 9; Kol. 1:15, 16) Sibodia edia namo e lalomu taudia edia kara ese e hamomokaniamu, tanobada aonegana na kavakava Dirava vairanai.

14. Roma 12:3 ena hereva ese edena dalai e durudamu dala maorona ai siboda baita helalokau heni?

¹⁴ Baibul ese e durudamu dala maorona ai siboda baita helalokau heni. E hahedinaraiamu siboda baita helalokau heni karana na dia kerere. Iesu na eto: “Dekemu tauna ba lalokau henia, sibomu o helalokaumu heḡereḡerena.” Anina na ḡau haida baita kara na namo siboda baita henari totona. (Mat. 19:19) To, Baibul na se gwaumu ita ese ma haida baita hereadia.  Baibul na eto: “Ḡau ta basio karaia heiri-heiri dainai eiava hekokoruku dainai; a ta ta sibomui ba hahemanau, bamomui ba imodaidia.”​—Flp. 2:3; Roma 12:3 ba duahia.

15. Dahaka dainai siboda baita helalokau heni karana ai Baibul ena sisiba baita badinaia na namo?

¹⁵ Hari inai negai, e skuli namonamo taudia momo na e tomamu Baibul ena sisiba na kavakava. Idia na e gwaumu bema sibomu bo hahemanaumu o haida bo lalodiamu, oi na asi goadamu bona ikoimu na haraḡa. To, Satana ena tanobada ese ta sibona ena namo baine laloa lalohadaina e hagoadaiamu dainai dahaka e varamu? Sibodia edia namo e lalomu taudia be e moalemu, a? Edia ruma bese maurina e moalelaiamu eiava? Idia be mai turadia? Edia hetura karana Dirava ida be goada, a? O laloamu edena be huahua namona e havaraiamu​—tanobada aonegana ibadinana karana eiava Dirava ena aonega ibadinana karana?

16-17. Dahaka dainai baita moale?

¹⁶ Taunimanima ese tanobada aonegana e badinaiamu neganai, una na vaitani turist ta na gabu ta bainela to asi dibana dainai, turist ma ta e nanadaiamu, to ia danu gabu asi dibana. Iesu ese ena negai sibodia e hegwauraiva aonega taudia na ini e herevalaidia toma: “Idia na mata-kepulu taudia, ma mata-kepulu taudia e hakaudiamu. Mata-kepulu tauna ese mata-kepulu tauna baine hakaua, raruosi dadaira ai bae moru.” (Mat. 15:14) Momokani, Dirava vairanai tanobada aonegana na kavakava.

¹⁷ Baibul ena sisiba na hanaihanai “mai siahudia taunimanima ihadibadia, bona ihahelalo-kerehaidia, bona isisiba-henidia, bona kara maoromaoro ai ihakaulaidia.” (2 Ti. 3:16) Ta moalemu badina Iehova ese ena orea amo e gimadamu, tanobada aonegana ese basine koida totona. (Efe. 4:14) Ia ese e henidamu lauma anianidia amo goada ta abimu Iena taravatu baita badina totona. Iehova ese Baibul amo aonega namona e henidamu na hahenamo namona ta!