1. Dahaka dainai haida ediai na auka bae stadi totona?

HARI ina negai, momo na e hekwarahimu mauri iduruna ḡaudia bae abi totona. Eda tadikaka momo na hora momo e ḡaukaramu edia ruma bese edia aniani, dabua bona noho gabudia bae abi totona. A haida be edia ruma amo ḡaukara gabudia baela totona hora momo motuka amo e heaumu. Momo na sibodia bae henari totona ḡaukara metaudia e karamu. Unu tadikaka bona taihu na edia ḡaukara e haoremu muridiai, tauanidia na e hesikumu. Una dainai, ediai na auka bae stadi totona.

2. Oi be edena negai o stadimu?

² To ḡau badana na nega baita ato Dirava ena Hereva bona eda Kristen pablikeisin baita stadilai namonamo. Una na mai anina bada bema ta uramu Iehova baita hetura henia namonamo bona baita mauri hanaihanai! (1 Ti. 4:15) Haida na daba ta ta e noga haraḡamu bae stadi, badina una negai ruma na asi reḡena bona e mahuta namonamo dainai bae lalohadai namonamo diba. A haida be adorahi kahanai, gabu asi reḡena ta ai, miniti haida lalodiai Baibul bona eda pablikeisin e stadilaimu bona e lalodia dobumu.

3-4. Orea ese baita duahi bona baita ita ḡaudia ai dahaka sensi e kara, bona dahaka dainai?

³ Reana bo gwaumu, vaia nega baita ato baita stadi na mai anina bada. To dahaka baita stadilai? Reana bo lalomu, ‘Baita duahi ḡaudia na momo herea, to egu ai na auka iboudiai baina duahi.’ Haida na nega e atomu pablikeisin iboudiai e duahimu bona orea ena vidio iboudiai e itamu, to tadikaka taihu momo na e hekwarahimu unu bae kara toma. Gavanin Bodi na mai dibadia dainai, vanegai sensi haida e kara, e printimu pablikeisin bona Intanet ai e halasimu ḡaudia edia namba e hamaraḡi.

 ⁴ Heḡereḡere, hari Yearbook of Jehovah’s Witnesses na se printiamu, badina ekspiriens namodia momo na jw.org^® bona hua ta ta JW Broadcasting^® ai e halasimu. Pablik Gima Kohorona bona Awake! magasin na laḡani ta lalonai nega toi mo e halasimu. Unu sensi daidiai basitato eda nega bada na siboda eda ura ḡaudia ikaradiai baita haore. Unu sensi e kara badina na, ita ese nega baita ato “mai anidia bada ḡaudia” baita kara. (Flp. 1:10, NW) Mai anidia bada ḡaudia bavato guna daladia bona sibomu emu stadi ese baine durumu daladia mani aita herevalai.

5-6. Ededia pablikeisin baita stadilai namonamo?

⁵ Baita stadilaia guna ḡauna be dahaka? Namona na dina ta ta nega baita ato Dirava ena Hereva baita stadilaia. Wiki ta ta heboudia edia Baibul duahiduahi sediual ai siri haida mo e ato, unu amo ita na mai eda nega ta duahimu siridia baita lalodia dobu bona hereva ma haida baita hetahulai. Iseda ura ḡauna na, dia sediual ai e ato Baibul siridia iboudiai mo baita duahi, to namona na baita duahia herevana ese kudouda baine hamarere, bona Iehova baita raka henia kahi.​—Sal. 19:14.

⁶ Dahaka ḡau ma haida baita stadilai namonamo? Momokani, ita na ta uramu Gima Kohorona magasin, Kongrigeisin Baibul stadi bukana, bona wiki heboudia ai baita herevalaimu kahadia danu baita heḡaeḡaelai. Danu, namona na Gima Kohorona bona Awake! magasin ta ta baita duahi.

7. Bema asi eda nega eda websait ai e halasimu ḡaudia baita duahi o baita ita, dahaka dainai basita lalomanoka?

⁷ Reana bo gwaumu, ‘stadi ḡaudia na momo dainai, jw.org websait bona JW Broadcasting ai e halasimu atikol bona vidio be ede bamona?’ Ina haheitalai mani a laloa: Makedi ai e hoihoilaimu anianidia na momo herea. Oi ese iboudiai basio hoimu, to haida mo bo abi hidimu. Una heḡereḡerena, bema oi na asi emu nega eda websait ai e halasimu ḡaudia iboudiai ba duahi o ba ita, basio lalomanoka. Ba duahi o ba ita diba ḡaudia mo ba stadilai. Mani stadi anina bona stadi baita moalelaia dalana aita herevalaia.

8. Gima Kohorona ta stadilaiamu neganai dahaka baita kara, bona edena dalai una ese be durudamu?

⁸ Stadi anina na o duahiamu herevana ba haeroa namonamo, unu amo mai anina bada ḡauna ta ba dibaia. Stadi na dia o stadilaiamu bukana ba duahia haraḡa-haraḡa, eiava haere mo ba makaia. Heḡereḡere, stadi Gima Kohorona o heḡaeḡaelaiamu neganai, ḡau ginigunana na atikol matamana kahanai “Ina Stadi Anina” ba itaia. Bena hereva kwarana, sinado maraḡidia bona riviu henanadaidia ba duahi bona ba haerodia. Una murinai, atikol ibounai ba duahia namonamo. Paragraf ta ta edia sentens matamadia ba haerodia. Unu amo bo dibamu paragraf ai e herevalaia point badana be dahaka. Atikol o duahiamu lalonai, ba itaia edena dala ai paragraf ta ta ese sinado maraḡidia bona hereva kwarana e duruamu. Asi dibamu herevadia bona so lalopararalaimu point ba toredia diho bena emu stadi negana ma ta ai ba hetahulaidia namonamo.

9. (a) Dahaka dainai bona edena dalai Gima Kohorona ta stadilaiamu neganai Baibul siridia danu baita lalodia? (b) Iosua 1:8 ena hereva heḡereḡerena, siri ta duahimu neganai dahaka danu baita kara?

⁹ Eda kongrigeisin heboudia ai Gima Kohorona ta stadilaiamu neganai, e durudamu Baibul baita lalopararalaia. Una dainai, kongrigeisin ai bae heduahi siridia na ba duahi bona  ba lalohadailai. Ba haeroa siri herevadia ese paragraf ena point badana be ede e durua tomamu. Danu, o duahimu siridia ba lalodia dobu bona emu mauri ai ba badina daladia ba lalo.​—Iosua 1:8 ba duahia.

10. Heberu 5:14 ena hereva heḡereḡerena, dahaka dainai tama sina na ruma bese tomadiho ai nega bae ato natudia ediai stadi bona research ikarana daladia bae hadibadia?

¹⁰ Momokani, tama sina na e uramu wiki ta ta edia Ruma Bese Tomadiho negana na natudia ida bae moalelaia hebou. Namona na tama sina ese ruma bese tomadiho negadiai bae herevalai eiava bae kara ḡaudia na bae palanilai namonamo, nega haida projek haida bae kara hebou diba. Reana tomadiho negana ta ai JW Broadcasting ta bae itaia, eiava spesol projek ta, heḡereḡere Noa ena lagatoi bae karaia hebou. Danu, ḡau badana na natudia ediai stadi ikarana dalana bae hadibadia. Heḡereḡere, kongrigeisin heboudia totodia bae heḡaeḡae daladia bae hadibadia, eiava skuli ai e vara henanadaina o hahetoho ta dainai research bae kara daladia bae hadibadia. (Heberu 5:14 ba duahia.) Bema natu na ruma ai nega bada Baibul topik ta be stadilaiamu, idia na kongrigeisin heboudiai bona hebou badadiai be hakala namonamomu bona be lalopararamu, ena be kaha haida na asi vidiodia. Vaia, stadi negadia edia lata na natu laḡanidia bona edia laloparara heḡereḡerena bavabi hidi diba.

11. Dahaka dainai eda Baibul stiuden ediai sibodia edia stadi bae karaia namonamo dalana baita hadibadia na mai anina bada?

¹¹ Namona na eda Baibul stiuden danu stadi ikarana daladia baita hadibadia. Idia na Baibul e stadilaia matamamu neganai, ta moalemu bema edia stadi bukadia o kongrigeisin hebou totodia haere e makamu. To namona na sibodia ese edia hetahu karana bona bae stadi namonamo daladia baita hadibadia. Unu amo hekwakwanai bae davari neganai, idia na dia maoromaoro kongrigeisin taudia ma haida amo heduru bae tahu, to sibodia ese eda pablikeisin amo heduru hereva namodia bae tahu.

12. Ta stadimu neganai, eda ura ḡauna badana be dahaka?

¹² Bema oi na stadi so moalelaiamu tauna ta, reana bo laloamu stadi dalana ba manadalaia na auka. To bo karaia dibamu. O stadi matamamu neganai, reana emu stadi negana ba hakwadoḡia bena taina ruana ba halataia diba. Namona na o stadimu badina ba laloa.  Momokani, mai anina bada ḡauna na, ita na ta uramu Iehova baita hetura henia namonamo. Baita haḡuḡurua haraḡa ḡauna ta na, ta ese e henimu henanadaina baita haerelaia, eiava ta davaria hekwakwanaina ta ihanaina dalana baita hetahulaia.

13. (a) Matamata tauna ta be dahaka baine kara diba ena abidadama baine herevalaia totona? (b) Kolose 4:6 ena hereva be ede ba badinaia toma?

¹³ Haheitalai na ina: Reana oi na o skulimu merona o kekenina. Bona emu classmate iboudiai ese edia vara dinadia e moalelaimu. Oi na o uramu una kara ai so vareaimu badina na Baibul amo ba hadibadia, to reana o garimu. Una anina na stadi projek ta ba karaia. Emu stadi ai ini badi rua ba lalodia: (1) Sibomu ese bavabia dae momokani Dirava ese vara dinadia imoalelaidia karana na se abia daemu. (2) Haida ediai hereva momokani ba herevalaia daladia ba hanamo. (Mat. 14:6-11; 1 Pet. 3:15) Reana sibomu ba henanadai, ‘Dahaka dainai egu classmate ese edia vara dinadia e moalelaimu?’ Eda pablikeisin amo una ba hetahulaia namonamo. Bo mamiamu emu abidadama iherevalaina na dia auka. Taunimanima momo na edia vara dinadia e moalelaimu, badina haida danu unu e kara tomamu. Bema point ta o rua o davarimu, e nanadaimu tauna enai ba herevalaia diba, unu amo hereva momokani e uramu baine diba tauna ta bo durua dibamu.​—Kolose 4:6 ba duahia.

14-16. (a) Baibul bukana ta ba dibaia namonamo totona dahaka ba kara diba? (b) E hetore Baibul siridia ese edena dalai bae durumu Amos bukana ba lalopararalaia namonamo? (Maua ladana “Baibul ese E Herevalaidia Taudia Ba Dibadia Namonamo” ba itaia.)

¹⁴ Bema kongrigeisin hebouna ta ai, ita na peroveta tauna ta ese e torea Baibul bukana ta baita herevalaiamu, bona reana una tau na asi dibamu namonamo. Ba karaia ḡauna ginigunana na, una peroveta tauna ese e torea sivaraina ba dibaia namonamo. Edena dala ai unu ba kara toma?

¹⁵ Ḡau ginigunana na, sibomu ba henanadai: ‘Ina buka e torea tauna be tau ede bamona? Ia be daika, edeseni ai e noho, ena ḡaukara be dahaka?’ Buka e torea tauna baita dibaia namonamomu neganai, e tore herevadia bona e ḡaukaralai haheitalaidia baita lalopararalaimu. Baibul o duahiamu neganai, e torea tauna ena kara e hahedinarai herevadia ba itadia.

¹⁶ Ḡau iharuana na, Baibul bukana ta e torea negana ba diba. Una ba karaia totona New World Translation of the Holy Scriptures ena rau 1662 ela 1663 ai “Table of the Books of the Bible” ba itaia. Danu, rau 1744 ela 1747 ena Appendix A6 ai peroveta taudia bona king e noho negadia ba ita. O stadilaiamu Baibul bukana na peroveta herevadia e herevalai dainai, namona na ba hetahu, una negai taunimanima edia mauri be ede bamona. Dirava ese e siaia peroveta tauna be e urava taunimanima baine durudia dahaka lalohadai eiava kara bae hamaoromaoro? Iena negai e nohova taudia ma haida be daidia? Unu ba diba totona Baibul bukadia ma haida ba itadia. Heḡereḡere, peroveta tauna Amos ena negai e vara ḡaudia ba diba namonamo totona, Amos 1:1 ena haheḡereḡere siridia (o marginal reference) ai 2 Hanua Pavapavadia bona 2 Sisiga ba duahi. Bona Amos ena negai e nohova peroveta tauna Hosea ese e torea bukana danu ba itaia. Bema unu Baibul bukadia bo duahimu, Amos ena negai e vara ḡaudia bo lalopararalai namonamomu.​—2 Ha. 14:25-28; 2 Si. 26:1-15; Hos. 1:1-11; Amo. 1:1.

17-18. Paragraf ai e hetore haheitalai eiava sibomu emu haheitalai ta amo ba hahedinaraia, edena dalai sivarai ma haida ba tahu namonamo karana amo emu stadi ba moalelaia?

¹⁷ Baibul ta duahiamu neganai, namona na baita hahedinaraia ita na ta ura dikadikamu diba ma haida baita abi. Heḡereḡere, oi na Sekaria karoa 12 o duahiamu, una karoa ese Mesia ena mase e perovetalaia. (Sek. 12:10) New World Translation of the Holy Scriptures ai Sekaria 12:12 o duahiamu neganai, una siri na e gwaumu “Natan iduhuna” na Mesia ena mase dainai bae taitai. Una hereva ba haeroa namonamo, bena sibomu ba henanadai: ‘Natan bona Mesia edia hevaravara be ede bamona? Edeseni ai hereva ma haida baina tahu?’ Reana hetahu ma haida ba kara diba. Marginal reference ai 2 Samuel 5:13, 14 ba itaia, unuseni ai bo dibamu Natan na King David natuna ta. Marginal reference iharuana ai Luka 3:23, bona 31 ese e hahedinaraiamu, Iesu na Natan ena bese amo. Natan na Maria tubuna ta. (Mauri Bona Hesiai Ḡaukara Hebou Pepana Ena Referens June 2018, rau 6 ai, “Iosef tamana be daika?” ba itaia.) Emu hetahu karana amo una bo dibaiamu neganai, bo hoamu! Badina oi mai dibamu ḡauna na, Iesu na e perovatalaia ia na David ena iduhu amo baine vara. (Mat. 22:42) To David natuna memerodia na 20 mai kahana. Una dainai, Sekaria ese e hahedinaraia, Natan iduhuna na Iesu ena mase dainai e taitai.

¹⁸ Haheitalai ma ta mani aita laloa. Luka karoa 1 ai e hahedinaraia, aneru Gabriel na Maria e vadivadia bona e hadibaia ia na mero ta baine havaraia, eto: “Ia na baine hereadae, Herea Mikamika Natuna bae gwauraia; Lohiabada Dirava ese tamana David ena terona na baine henia; Iakobo ena iduhu baine halohiaia hanaihanai.” (Luk. 1:32, 33) Reana ita  na Gabriel ena hereva matamana baita laloamu, eto, Iesu na bae gwauraia “Herea Mikamika Natuna.” To Gabriel na ma e peroveta, eto, Iesu na Lohia tauna ai bainela. Una dainai, reana baita lalomu, ‘Maria ese Gabriel ena hereva be ede e lalodia toma? Iena hereva anina be Iesu ese King Herod eiava iena bese tauna ta gabuna baine abia, a? Bema Iesu na king ai bema lao, Maria na kwini dagina bema abia, bona ena bese na king edia rumai bema noho.’ To Baibul ese na se hahedinaraia Maria na Gabriel enai unu hereva e gwaurai. Danu, ia na Basileia ai dagi iabina totona se noinoi. A Iesu ena hahediba rarua hari unu e kara toma. (Mat. 20:20-23) Una ese e hadibadamu, Maria na manau herea hahinena!

19-20. Iakobo 1:22-25 bona 4:8 ese e herevalaia heḡereḡerena, baita stadi badina badana be dahaka?

¹⁹ Namona na baita helalotao, Dirava ena Hereva bona Kristen pablikeisin ta stadilaimu badina badana na, ta uramu eda hetura karana Iehova ida baine goada. Danu, ta uramu baita diba ita be taunimanima ede bamodia bona dahaka baita kara Dirava baita hamoalea totona. (Iakobo 1:22-25; 4:8 ba duahi.) Eda stadi negadia ta ta ai, Iehova baita noia iena lauma helaḡa amo baine duruda. Namona na baita noia ta stadilaiamu herevana ese baine duruda bona eda mauri ai baita haidau ḡaudia baita lalopararalai.

²⁰ Namona na ita na salamo itorena tauna ese e herevalaia hesiai tauna heḡereḡerena: “Iehova ena taravatu ia ese e moalelaiamu, ena taravatu e laloa boimu, e laloa ranimu. . . . Ḡau idoidiai ia baine kara be anidia do bae vara ḡoevaḡoeva.”​—Sal. 1:2, 3.