1. Iesu ese guba ai baita habou kohudia be ede e herevalai toma?

DIA harihari ḡaudia iboudiai na baita ita diba. Momokani, harihari ḡaudia hereadaedia na asita itamu. Iesu na Ororo Harorona ai e hahedinaraia guba ai e haboumu kohudia ese moni bona taḡa na e hereadiamu. Bena ma eto: “Emui kohu e miamu gabuna ai, lalomui danu unuseni mia.” (Mat. 6:19-21) Ita ese ḡau ta baita laloa badamu neganai, baita uramu una na baita abia. Emu “kohu na guba ai ba habou” dalana na Dirava vairanai lada namona bavabia. Iesu ese e hahedinaraia unu na basie dika o ta ese basine henao dava bada kohudia.

2. (a) Korinto Iharuana 4:17, 18 heḡereḡerena, Paulo ese ita na e hagoadadamu dahaka baita kara? (b) Ina atikol ai be dahaka baita herevalaimu?

² Aposetolo Paulo ese e hagoadadamu “mata-tuna ḡaudia” baita itadia. (2 Korinto 4:17, 18 ba duahi.) Asita itamu dava bada ḡaudia haida na Dirava ena tanobada matamatana ai baita moalelaimu hahenamodia. Ina atikol ai, asita itamu ḡaudia hani bona hari unu ese be durudamu daladia baita herevalaimu, (1) Dirava ida eda hetura karana, (2) Dirava ena harihari ḡauna ḡuriḡuri, (3) Dirava ena lauma helaḡa ena heduru, bona (4) eda haroro ḡaukarana ai Iehova, Iesu bona aneru edia heduru. Bona baita itaiamu edena dalai baita hahedinaraia unu harihari ḡaudia na ta lalodia badamu.

3. Asita itaiamu harihari ḡauna hereadaena be dahaka, bona dahaka dainai una na baine vara diba?

³ Asita itaiamu harihari ḡauna hereadaena na, Iehova Dirava ida eda hetura karana. (Sal. 25:14) Edena dalai Dirava na kara dika taudia baine hetura henidia bona dounu baine helaḡa? Ia na unu baine kara toma diba badina Iesu ena mauri idavalaina  boubouna ese “tanobada ena dika” na e kokia. (Ioa. 1:29) Ena be Iesu na do se mase to Iehova na mai dibana Iesu ese Ia na baine badinaia ela bona mase, unu amo taunimanima baine hamauridia. Una dainai, Dirava na Keriso do se mase ai e mauri taudia e hetura henidia.​—Roma 3:25.

4. Iesu do sema tanobada neganai, ededia abidadama taudia haida na Dirava turana ai ela?

⁴ Iesu do sema tanobada ai neganai, Dirava turana ai ela abidadama taudia haida mani aita herevalaidia. Abraham na abidadama goadana e hahedinaraia tauna. Abraham e mase bena laḡani 1,000 mai kahana muridiai Iehova ese ia na e gwauraia “turagu.” (Isa. 41:8) Anina na ena be Iehova turana ai ela taudia na vada e mase, to Ia ese na dounu e lalodiamu. Abraham danu doini Iehova ese e laloataomu. (Luka 20:37, 38) Abidadama tauna ma ta na Iobu. Guba ai aneru iboudiai e hebou neganai, Iehova ese Iobu e herevalaia. Ia ese e gwauraia “kara maoromaoro tauna; Dirava garina e garimu, bona kara dika amo e raka ohomu.” (Iobu 1:6-8) Daniel na laḡani 80 heḡereḡerena Dirava asie badinaiava taudia edia gabu ai e nohova neganai, Iehova ese ia be ede e laloa toma? Aneru ese nega toi una tau burukana e hamaoroa Dirava ese “e lalokau henimu badamu.” (Dan. 9:23; 10:11, 19) Ta diba momokanimu Iehova na e uramu ia turana e mase taudia na baine hatoredia isi lou.​—Iobu 14:15.

5. Iehova turana ai baitala totona, dahaka baita kara na namo?

⁵ Hari ina negai taunimanima hida ese edia hetura karana Iehova ida na e moalelaiamu? Taunimanima milioni momo. Tanobada heḡeḡemadai tatau, hahine, bona natu na edia kara amo e hahedinaraiamu idia na Dirava turana korikoridia. Iehova na “kara maoromaoro taudia” e hetura henidiamu. (Her. 3:32) Una hetura karana na baine vara diba badina idia ese Iesu ena mauri idavalaina boubouna e abidadama heniamu. Una boubou ḡauna dainai ita na Iehova turana ai baitala diba, eda mauri na ienai baita gwauhamatalaia bona baita bapatiso. Unu baita kara tomamu neganai, ita bona ma haida, eda mauri ta gwauhamatalai bona bapatiso ta abi tauda milioni momo na herea mikamika Tauna ida eda hetura karana baita moalelaiamu.

6. Edena dalai baita hahedinaraia eda hetura karana Dirava ida na ta laloa badamu?

⁶ Edena dalai baita hahedinaraia eda hetura karana Dirava ida na ta laloa badamu? Abraham bona Iobu heḡereḡeredia, idia na laḡani handred mai kahana lalodiai Dirava e badinaia, ita danu herevana ina tanobada dikana ai ede daudauna Iehova ta hesiai henia, to dounu Ia baita badinaia. Daniel heḡereḡerena, eda hetura karana Dirava ida baita laloa bada na namo, ena be eda mauri na baita haboioa diba. (Dan. 6:7, 10, 16, 22) Iehova ena heduru dainai hahetoho baita haheaukalai diba, bona eda hetura karana Ia ida na baine goada.​—Flp. 4:13.

7. (a) Hereva Lada-isidia 15:8 heḡereḡerena, Iehova ese iseda ḡuriḡuri be ede e lalodia tomamu? (b) Iehova ese eda ḡuriḡuri be ede e haerelai tomamu?

⁷ Asita itaiamu harihari ḡauna ma ta na, ḡuriḡuri karana. Tura namodia na e uramu edia lalohadai bona hemami bae herevalai hebou. Eda hetura karana Iehova ida be unu bamona, a? Oibe. Iehova na Baibul amo ita e hereva henidamu bona ena hemami bona lalohadai e hahedinaraimu. Ḡuriḡuri amo ia ta hereva heniamu, bona eda hemami bona lalohadai ta gwauraimu. Iehova ese iseda ḡuriḡuri na e hakala henimu. (Hereva Lada-isidia 15:8 ba duahia.) Iehova na  Turada lalokauna dainai, dia eda ḡuriḡuri mo e kamonaimu to e haerelaimu danu. Nega haida eda ḡuriḡuri haeredia na e heni haraḡamu. To, nega haida ḡau ta na ta ḡuriḡurilaia louloumu. Ta diba momokanimu nega korikorina bona dala maorona ai haerena be henimu. Momokani, Dirava ena haere na ita ta laloamu ḡauna amo be idaumu. Heḡereḡere, dia eda hahetoho iboudiai be kokidiamu, to aonega bona goada be henidamu baita “haheaukalaia” totona.​—1 Kor. 10:13.

8. Edena dalai baita hahedinaraia Dirava ena harihari ḡauna, ḡuriḡuri karana na ta laloa badamu?

⁸ Edena dalai baita hahedinaraia Dirava ena harihari ḡauna, ḡuriḡuri karana na ta laloa badamu? Dala ta na, Iehova ena hahekau dalana baita badinaia anina na baita ḡuriḡuri hanaihanai. (1 Tes. 5:17) Iehova ese ita na se doridamu baita ḡuriḡuri. To, e uramu mai emu ura ida Ia ba hereva henia bona ḡuriḡuri ba goadalaia nega idoidiai. (Roma 12:12) Una dainai, ḡuriḡuri karana baita laloa bada dalana na, dina ta ta iboudiai lalodiai baita ḡuriḡuri. Momokani, namona na eda ḡuriḡuri lalodiai Iehova baita tenkiu henia bona baita hanamoa.​—Sal. 145:2, 3.

9. Tadikaka ta ese ḡuriḡuri karana be ede e laloa tomamu, bona oi ese be ede o laloa tomamu?

⁹ Iehova baita hesiai henia daudaumu bona eda ḡuriḡuri e haerelaimu daladia baita itamu neganai, ḡuriḡuri karana na baita laloa badamu. Mani laḡani 47 lalodiai ful-taim hesiai ḡaukara e karaia tadikakana, Chris aita laloa. Ia na e gwa: “Iehova baina ḡuriḡuri henia totona dabadabai na nogamu. Danu dina e daemu gabu e hahairaiamu neganai Iehova na hereva heniamu na namo herea. Una ese lau na e hagoadagumu iena harihari ḡaudia bona ḡuriḡuri karana danu dainai ia na tenkiu heniamu. Bena hanuaboi ai na ḡuriḡurimu muridiai, mai lalogu namona ida na mahutamu.”

10. Dahaka dainai Dirava ena lauma helaḡa ena heduru baita laloa bada?

¹⁰ Dirava ena ḡaukara siahuna na asita itaiamu harihari ḡauna ma ta. Iesu ese ita e hagoadadamu  lauma helaḡa ena heduru totona baita ḡuriḡuri. (Luka 11:9, 13) Iehova ese ena lauma helaḡa amo goada e henidamu, una na “siahu herea-daena.” (2 Kor. 4:7; Apos. 1:8) Dirava ena lauma helaḡa ena heduru amo ta davarimu hahetoho iboudiai baita haheaukalaidia diba.

11. Edena dalai lauma helaḡa ese e durudamu?

¹¹ Lauma helaḡa ese baine duruda diba Dirava ena hesiai ḡaukara idauidau baita kara totona. Bona eda diba baine habadaia. Baine duruda danu eda Kristen madunadia idauidau baita hua diba. Ta dibamu Dirava ena hesiai ḡaukara ai ta haḡuḡurumu ḡaudia na dia eda goada amo ta karamu, to Dirava ena lauma helaḡa ena heduru amo.

12. Salamo 139:23, 24 heḡereḡerena, lauma helaḡa ena heduru baita ḡuriḡurilaia amo dahaka baita kara diba?

¹² Dirava ena lauma helaḡa ena heduru ta laloa badamu dalana ma ta na, baita ḡuriḡurilaia unu amo baine duruda kudoudai e miamu lalohadai bona ura dikadia baita dibadia totona. (Salamo 139:23, 24 ba duahi.) Bema unu baita kara tomamu, Iehova ese ena lauma helaḡa amo be durudamu. Bona bema kudouda ai lalohadai eiava ura dikana ta mia, namona na Dirava baita noia ena lauma helaḡa amo goada baine henida, una ura o lalohadai dikana baita dadaraia totona. Bema unu baita kara tomamu, Iehova na be dibamu ḡau ta ese Ia na basine kouamu iena lauma helaḡa amo baine duruda totona.​—Efe. 4:30.

13. Edena dalai lauma helaḡa ena heduru baita laloa bada?

¹³ Hari ina negai lauma helaḡa ena heduru amo e varamu ḡau namodia baita lalomu neganai, lauma helaḡa ena heduru na baita laloa badamu. Iesu na guba do sela neganai, ena hahediba taudia e hamaorodia eto: “Lauma Helaḡa ese baine rohemui, bena siahu bavabia, bona lau igwaurai-hedinaraigu taumui ai baola, . . . ela bona tanobada heḡeḡe-madai.” (Apos. 1:8) Hari ina negai una hereva na e ḡuḡurumu. Lauma helaḡa ena heduru amo tanobada heḡeḡemadai taunimanima 8 milioni mai kahana na Iehova e toma henia dihomu. Ita na Dirava ena taunimanima dainai, mai lalotamonada ida tadikaka oreana  lalonai bona lauma helaḡa ese e durudamu kara namodia baita hahedinarai, heḡereḡere lalokau, moale, maino, haheauka, hebogahisi, kara maoromaoro, hereva ibadinana, manau, boga-auka. Unu na ‘lauma huahuadia.’ (Gal. 5:22, 23) Momokani, lauma helaḡa na Dirava ena harihari ḡauna ta.

14. Haroro ḡaukarana ta karaiamu neganai, daidia ese e durudamu?

¹⁴ Ita ese asita itaiamu harihari ḡauna ma ta na, ita na Iehova bona iena guba oreana ida ta “ḡaukara heboumu.” (2 Kor. 6:1) Haroro ḡaukarana ta karaiamu neganai, ita na Iehova, Iesu, bona aneru ida ta ḡaukara heboumu. Paulo na ia bona ia ida e ḡaukara hebouva taudia na e gwauraidia: “Dirava ida a ḡaukara heboumu.” (1 Kor. 3:9) Kristen haroro ḡaukarana baita karaiamu neganai, ita na Iesu ida ta ḡaukara heboumu. Mani a laloa, ena hahediba taudia e haḡanidia eto, “baola, bese iboudiai hahediba ai ba halaodia,” murinai ma eto, “lau na . . . umui ida ta nohomu.” (Mat. 28:19, 20) Edena dalai aneru ida ta ḡaukara heboumu? “Mia-hanaihanai sivaraina namona na tanobada ai e nohomu taudia ediai” ta harorolaiamu neganai, aneru ese e hakaudamu na hahenamo ta.​—Apok. 14:6.

15. Edena dalai Baibul ai haheitalai ta ese e hahedinaraiamu Iehova ese iseda haroro ḡaukarana e duruamu?

¹⁵ Iehova ena guba oreana amo e ḡuḡuru ḡaudia haida be dahaka? Basileia sivaraina ta harorolaiamu neganai, kudou maoro taudia ese e kamonaiamu bona e abia daemu. (Mat. 13:18, 23) Daika ese hereva momokani uhena e hatubuamu bona anina na e momomu? Iesu ese e hahedinaraia Tamana “ese baine veria mai tauna mo” na iena hahediba tauna ai bainela diba. (Ioa. 6:44) Baibul ese haheitalai ta e herevalaia. Filipi hanuana murimurinai Paulo ese hahine haida e haroro henidia negana mani a laloa. Baibul ese hahine ta ladana, Ludia na ini e herevalaia toma: “Lohiabada ese lalona e hapararaia, bena ia ese Paulo e hakala henia.” (Apos. 16:13-15) Ludia heḡereḡerena, taunimanima milioni momo na Iehova ese e durudia Ia bae hetura henia totona.

16. Haroro ḡaukarana ai e varamu ḡau namodia daidiai, daika baita hanamoa na namo?

¹⁶ Haroro ḡaukarana ai anina namona e varamu neganai, daika baita hanamoa na namo? Paulo ese Korinto kongrigeisin taudia e tore henidia herevana lalonai una henanadai e haerelaia, eto: “Lau ese na hadoa; Apolo ese e dairia; a Dirava ese anina e havaraia. Benaini, ihadona tauna bona idairina tauna be herevadia; Dirava sibona ese anina e havaraiamu.” (1 Kor. 3:6, 7) Paulo heḡereḡerena, haroro ḡaukara ai e varamu ḡau namodia daidiai hanaihanai Iehova baita hanamoa.

17. Edena dalai ita na Dirava, Keriso, bona aneru ida ta ḡaukara heboumu?

¹⁷ Edena dalai baita hahedinaraia Dirava, Keriso, bona aneru ida ta “ḡaukara heboumu” karana na ta laloa badamu? Baita hekwarahi ḡau iboudiai baita kara sivarai namona na ma haida baita hadibalaidia. Unu baita kara toma daladia na momo, heḡereḡere pablik gabudiai bona ruma-ta-ruma-ta ai danu haroro ḡaukarana baita karaia. (Apos. 20:20) Momo na gabu bona nega idauidau ai haroro ḡaukarana e moalelaiamu. Asi dibadia tauna ta e hedavari heniamu neganai, e hanamoamu bona dala e tahumu ia ida bae herevahereva totona. Bema e davariamu tauna na e uramu baine kamonai, idia na mai aonegadia ida Basileia sivarai namona na una tau enai e herevalaiamu.

18-19. (a) Kamonai taudia be ede baita durudia toma? (b) Ekspiriens ta amo Iehova ese Baibul stiuden ta e durua dalana ba herevalaia.

¹⁸ Ita na Dirava ida ta ḡaukara heboumu dainai, hereva momokani uhena baita hadoa  bona baita dairia. Bema kamonai tauna ta na e uramu baita lou henia, baita hekwarahi baita lou henia eiava ta baita noia ia baine lou henia, unu amo Baibul stadi bae hamatamaia. Ta itaiamu Iehova ese Baibul stiuden e duruamu ena mauri baine haidaua neganai, ita na ta moalemu.

¹⁹ South Africa ai e nohomu babalau tauna Raphalalani ena haheitalai mani aita laloa. Ena Baibul stadi amo e dibava ḡaudia e ura heniva bona e moalelaiva. Baibul ena taravatu mase taudia ihereva henidia karana ai e dibaia neganai, enai na e auka una baine abia dae totona. (Deu. 18:10-12) To, ia na e hekwarahi Dirava ese ena lalohadai baine haidaua totona. Gabeai, babalau karana na e dadaraia vaitani ena be una na ena moni ḡaukara. Hari Raphalalani laḡanina na 60, ia na ini e gwau tomamu: “Lau na Iehova ena Witnes taudia daidiai na moalemu badina dala momo ai e durugu heḡereḡere moni ḡaukara ta idavarina totona. Bada hereana na, Iehova na tenkiu heniamu badina e durugu egu mauri na haidaua bona hari lau na bapatiso Witnes ta bona haroro ḡaukarana na karaiamu.”

20. Lalomu ba hadaia dahaka ba kara totona?

²⁰ Ina atikol ai, asita itamu harihari ḡaudia hani tame herevalai. Unu iboudiai amo hereadaena na, Iehova na ita Turada ai ta halaoa na hahenamo badana. Una ese e durudamu ini asita itamu harihari ḡaudia, heḡereḡere Ia baita hereva henia diba ḡuriḡuri amo, lauma helaḡa ena heduru baita abia diba, bona eda haroro ḡaukara ai guba oreana ida baita ḡaukara hebou amo namo baita abi diba. Laloda baita hadai asita ita dibamu ḡaudia na baita lalodia bada. Bona nega iboudiai Iehova baita tenkiu henia badina ia na Tura namo hereana.