1-2. Toretore tauna ta be dahaka e gwa bona ina atikol ai dahaka baita herevalaimu?

HARI ina negai taunimanima milioni momo na e gwaumu Iesu na e abia daemu, to ia e hahedibalai herevadia na asie abi daemu. (2 Tim. 4:3, 4) Toretore tauna ta na e gwa: “Bema hari ina negai Iesu heḡereḡerena tauna ta ese Iesu e gwaurai herevadia bema gwaurai . . . , una tau tama dadaraia, a? . . . Haere na, Oibe.”

² Kristen ginigunadia edia negai momo na Iesu ena hahediba herevadia na e kamonai bona ena hoa karadia na e ita, to ia na asie abidadama heniava. Dahaka dainai? Atikol ginigunana ai, taunimanima ese Iesu e gwaurai herevadia bona e kara karadia daidiai ia e dadaraia badidia foa ta herevalai. Mani ma badi foa aita herevalai. Unu baita herevalaimu amo, baita itaiamu dahaka dainai hari ina negai taunimanima ese Iesu e badinaiamu taudia e dadaraidiamu bona edena dalai ḡau ta ese basine kouda Iehova baita hesiai henia totona.

3. Iesu be dahaka e kara dainai taunimanima ese e dadaraia?

³ Iesu na tanobada ai e nohova neganai, taunimanima idauidau e bamodiava. Taḡa bona dagi bada taudia ida e anianiva, to ena nega bada na ogoḡami taudia ediai e ḡaukaralaia. Danu, momo ese e gwauraidiava “kara dika taudia” e bogadia hisiva. Iesu ese e kara karadia haida daidiai hekokoroku taudia haida ese ia na e dadaraia. Idia ese ena hahediba e nanadaidia, eto:  “Dahaka dainai tax gogo taudia bona kara dika taudia ida o aniani heboumu?” Iesu ese e haere henidia, eto: “Goada taudia na muramura tauna basie tahua, a gorere taudia hari; lau danu dia kara maoromaoro taudia iboiridia asinama, a kara dika taudia bae helalo-kerehai totona nama.”​—Luka 5:29-32.

4. Peroveta tauna Isaia ena hereva heḡereḡerena, dahaka dainai Iuda taudia ese Mesia enai baine vara ḡauna bema diba?

⁴ Baibul be dahaka e gwaumu? Mesia do sema ai, peroveta tauna Isaia ese e hahedinaraia tanobada taudia ese ia na bae dadaraia. Peroveta herevana na e gwaumu: “Taunimanima ese e dadaraia bona e rakatania . . . bena taunimanima ese vairadia na ena amo e huniamu tauna ta na heto e dadaraia bona asita lalo namo henia.” (Isa. 53:3) “Taunimanima” ese Mesia na bae dadaraia, una dainai aposetolo edia negai e nohova Iuda taudia na bema diba Iesu na be dadaraiamu.

5. Hari ina negai taunimanima momo ese Iesu e badinaiamu taudia be ede e lalodia tomamu?

⁵ Hari ina negai hekwakwanai unu bamona e varamu? Oibe. Tomadiho igunalaina taudia momo ese lada bada taudia, taḡa taudia, bona aonega bada taudia na mai moaledia ida edia orea ai e abidia daemu. Danu ena be Iehova ese e inai henimu karadia e karamu, to dounu e abidia daemu. Unu tomadiho e gunalaimu taudia ese Iehova ena hesiai taudia, kara maoromaoro e badinaiamu taudia, na asie lalodia bada badina tanobada taudia ese idia danu se lalodiamu. Paulo na e gwa tanobada ena “hedadarai ḡaudia” na Dirava ese vada e abi hidi. (1 Kor. 1:26-29) Anina na Iehova ese ena hesiai taudia iboudiai na e lalodia badamu.

6. Mataio 11:25, 26 ai, Iesu be dahaka e gwa bona edena dalai ia baita tohotohoa?

⁶ Dahaka baita kara unu amo Iehova ihesiai henina karana basita hadokoa? (Mataio 11:25, 26 ba duahi.) Tanobada taudia ese Dirava ena taunimanima e lalodiamu dalana na basio laloa bada. Ba diba Iehova ese manau taudia mo e ḡaukaralaidiamu iena ura ba karaia totona. (Sal. 138:6) Mani a laloa, tanobada ese asie lalodia badamu bona e laloamu asi aonegadia taudia na Iehova ese e ḡaukaralaidiamu.

7. Dahaka dainai Iesu ese Farisea taudia e gwauraidia koikoi taudia, bona idia be dahaka e kara?

⁷ Iesu na mai lalogoadana ida ena negai e nohova tomadiho igunalaina taudia e gwau henidia badina idia ese taunimanima na asie hadibadiava dala maorona ai Iehova bae tomadiho henia. Heḡereḡere, Iesu ese Farisea taudia edia koikoi e gwaurai hedinarai, badina idia ese imadia e huriva dalana be e laloa badava, a tama sina inaridia karana be se laloava. (Mat. 15:1-11) Iesu ena hahediba na iena hereva dainai e hoa. Badina e nanadaia, eto: “Dibamu Farisea taudia ese emu hereva e kamonai bena lalodia e hekwakwanaimu, a?” Ia na e haere eto: “Au iboudiai Tamagu guba ai e nohomu ese se hado na do bae raḡa. Herevadia! Idia na mata-kepulu taudia, ma mata-kepulu taudia e hakaudiamu. Mata-kepulu tauna ese mata-kepulu tauna baine hakaua, raruosi dadaira ai bae moru.” (Mat. 15:12-14) Ena be tomadiho igunalaina taudia na Iesu e gwaurai herevadia daidiai e badu, to una ese ia na se koua hereva momokani baine gwauraia totona.

8. Edena dalai Iesu ese e hahedinaraia tomadiho edia hahediba hereva haida na Dirava ese se abi daemu?

⁸ Iesu na e hahedinaraia tomadiho haida na hahediba hereva koikoidia e hahedibalaiva. Ia na se gwa tomadiho hahediba hereva iboudiai na Dirava ese e abi daemu. To, e gwa hutuma na mase e lao heniamu dala lababanai e rakamu, a mauri gabuna e lao heniamu dala hekahihekahinai e rakamu taudia na dia momo. (Mat. 7:13, 14) E hahedinaraia taunimanima haida na edia  hereva amo e gwaumu Dirava e hesiai heniamu, to karana na se karaiamu. Iesu na eto: “Nahuamui na toho, peroveta taudia koikoidia na garina; e vasimu, oromadia na mamoe na heheto, to lalodia na uda sisiadia heḡereḡeredia. Huahuadia amo ba dibadia.”​—Mat. 7:15-20.

9. Iesu ese e hahedinaraia tomadiho koikoi hahediba hereva haida be dahaka?

⁹ Baibul be dahaka e gwaumu? Baibul na e peroveta Mesia na Iehova ena ruma baine ura henia dikadika. (Sal. 69:9; Ioa. 2:14-17) Una ura dainai Iesu ese tomadiho koikoi edia hahediba herevadia bona karadia e gwaurai hedinarai. Heḡereḡere, Farisea taudia na e laloava mase tauna lauma na e maurimu; a Iesu be e hahedibava mase taudia na mamahuta. (Ioa. 11:11) Sadukea taudia be toreisi lou na asie abia daeva; to Iesu be turana Lasaro e hatoreaisi lou. (Ioa. 11:43, 44; Apos. 23:8) Farisea taudia na e gwauva Dirava ese taunimanima ediai e varamu ḡaudia eiava e karamu ḡaudia na ia ese vada e abi hidi; to Iesu na e gwauva taunimanima sibodia ese abi hidi bae kara Dirava bae hesiai henia eiava lasi.​—Mat. 11:28.

10. Dahaka dainai momo ese eda hahediba herevadia asie abi daemu?

¹⁰ Hari ina negai hekwakwanai unu bamona e varamu? Oibe. Momo na asie uramu bae kamonai badina Baibul amo ta hahedinaraiamu tomadiho edia hahediba hereva haida na koikoi. Tomadiho igunalaina taudia ese edia taunimanima na e hadibadiamu Dirava ese kara dika taudia na hel ai e panisidiamu. Una hahediba hereva koikoina na e ḡaukaralaiamu taunimanima e biagudiamu. Ita ese lalokau Diravana, Iehova ta tomadiho heniamu dainai taunimanima na ta durudiamu bae laloparara una hahediba na koikoi. Danu tomadiho igunalaina taudia na e gwaumu mase tauna laumana na e maurimu. To, ita ese Baibul amo ta hamomokaniamu una hahediba na koikoi, badina bema una na momokani, toreisi lou na da asi anina. Danu tomadiho momo na e gwaumu ita edai e varamu ḡaudia na Dirava ese vada e palanilai, to ita ese taunimanima ta hadibadiamu idia na mai edia ura kwalimu bona abi hidi bae kara diba Dirava bae hesiai henia eiava lasi. Una dainai tomadiho igunalaidia taudia be dahaka e karamu? E badu dikadikamu!

11. Iesu ena hereva Ioane 8:45-47 ai heḡereḡerena, Dirava be e uramu iena taunimanima be dahaka bae kara?

 ¹¹ Dahaka baita kara unu amo Iehova ihesiai henina karana basita hadokoa? Bema ita na hereva momokani ta ura heniamu, namona na Dirava ena hereva baita abia dae bona baita badinaia. (Ioane 8:45-47 ba duahi.) Ita na dia Satana Diabolo heḡereḡerena, badina ita na ta uramu hereva momokani baita badinaia tarika-tarika. Namona na ita ta abi daemu hereva momokanidia na ḡau ta ese basine hadikaia. (Ioa. 8:44) Dirava na e uramu ena taunimanima na “dika ba lalo nege” bona “namo enai bae tao,” Iesu e kara heḡereḡerena.​—Roma 12:9; Heb. 1:9.

12. Dahaka dainai Iuda taudia ese Iesu hisihisi auna ai e mase karana na se abia dae?

¹² Iuda taudia ese Iesu e dadaraia badina ma ta be dahaka? Paulo na eto: “Ai ese Keriso e hasatauroa na a harorolaiamu, una na hekwakwanai ḡauna Iuda taudia ediai.” (1 Kor. 1:23) Dahaka dainai Iuda taudia ese Iesu hisihisi auna ai e mase karana na se abia dae? Idia ediai, Iesu hisihisi auna ai e mase karana ese e hahedinaraia ia na kara dika tauna, dia Mesia.​—Deu. 21:22, 23.

13. Iesu e dadaraia taudia be se ura dahaka bae abia dae?

¹³ Iesu e dadaraia Iuda taudia haida na se urava bae abia dae Iesu na asi ena kerere, taunimanima ese e habadelaia koikoi, bona asi badinai e hahemaoro henia. Iesu e hakotaia taudia ese hahemaoro maoromaoro na asie laloa bada. Iuda edia suprim kot ai, judge iboudiai na e hebou Iesu e kota henia, idia ese kota ena taravatu na asie badinaia. (Luka 22:54; Ioa. 18:24) Unu judge ese Iesu e habadelaia herevadia e kamonai neganai, maoromaoro e hahemaoro henia, bona idia ese “hahebade koikoi taudia e tahudia” Iesu ialana badina bae davaria totona. To una se vara neganai, hahelaḡa tauna badana na dala e tahu Iesu ese hereva kererena ta baine gwauraia totona. Idia ese taravatu na e utua. (Mat. 26:59; Mar. 14:55-64) Bona Iesu mase amo e toreisi lou murinai, unu judge koikoidia ese iena gara e gimaiava Roma tuari  taudia na “moni diaḡau e henidia” bona e hamaorodia sivarai koikoina bae halasia baeto, “hahediba na hanuaboi ema mahutamai ai eme henaoa.”​—Mat. 28:11-15.

14. Baibul ese Mesia ena mase be ede e perovetalaia toma?

¹⁴ Baibul be dahaka e gwaumu? Ena be luda taudia momo na e laloava Mesia na basine mase, to Baibul na e peroveta eto: “Ia ese maurina e bubua nege mase enai, bona kerere taudia ida e duahia hebou; ḡau tamona, ia ese hutuma edia kara dika e huahaidia, bona kerere taudia daidiai e noinoi.” (Isa. 53:12) Una dainai Iesu na kara dika tauna heḡereḡerena e hamasea neganai, Iuda taudia e daradara na asi badina.

15. Ededia hahebade herevadia daidiai haida ese Iehova ena Witnes na e dadaraidiamu?

¹⁵ Hari ina negai hekwakwanai unu bamona e varamu? Oibe! Iesu na dala koikoina ai e hahemaoro henia, bona hari ina negai Iehova ena Witnes na unu e kara henidia tomamu. Haheitalai haida bini: United States ai, laḡani 1930 bona 1950 lalodiai Dirava itomadiho henina karana dainai e kota henida loulouva. Judge haida ese e hahedinaraiava ita na e inai henidava. Quebec Canada ai, dubu bona gavamani na e ḡaukara hebouva iseda ḡaukara bae koua totona. Pablisa momo na Dirava ena Basileia na dekedia taudia ediai e herevalaiava dainai e hadiburadiava. Germany ai, Nazi gavamanina ese eregabe tadikaka goadadia momo e hamasedia. Vanega laḡanidiai, iseda tadikaka momo Russia ai na e kota henidia bona dibura ruma ai e atodia badina ma haida ida Baibul e herevalaiava. Idia ese una kara na e gwauraiamu “gavamani igwau-edeede henina karana.” Danu New World Translation of the Holy Scriptures Russia gado ai na e taravatua bona e gwaumu e tore herevadia na koikoi badina Iehova ladana e ḡaukaralaia.

16. Ioane Ginigunana 4:1 ese e hahedinaraia heḡereḡerena, dahaka dainai Iehova ena taunimanima e sivarailaidia koikoi herevadia ese basie hakauda kerere?

¹⁶ Dahaka baita kara unu amo Iehova ihesiai henina karana basita hadokoa? Sivarai momokanidia baita diba namonamo. Iesu na ena Ororo Haroronai, kamonai taudia e hadibadia haida ese idia na bae ‘gwau dika henidia’ koikoi. (Mat. 5:11) Unu koikoi herevadia na Satana ena amo e maimu. Ia ese inaida e ḡaukaralaidiamu hereva momokani e ura heniamu taudia bae habadelaidia koikoi. (Apok. 12:9, 10) Namona na edia koikoi herevadia baita dadarai. Asita uramu unu hereva koikoidia ese bae hagarida bona eda abidadama bae hamanokaia.​—1 Ioane 4:1 ba duahia.

17. Dahaka dainai Iesu do se mase ai e vara ḡaudia daidiai taunimanima haida ese e dadaraia?

¹⁷ Iesu do se mase ai, iena aposetolo tauna ta ese taona e tore. A ma aposetolo ta be nega toi Iesu e ḡorea, bona ia do se mase hanuaboina ai ena aposetolo taudia iboudiai ese e rakatania. (Mat. 26:14-16, 47, 56, 75) Iesu na se hoa badina ia na vada e peroveta una na baine vara. (Ioa. 6:64; 13:21, 26, 38; 16:32) Unu e vara neganai, haida na readia bema lalo, ‘Bema Iesu ena aposetolo na unu e kara toma, lau na asina uramu idia baina bamodia!’

18. Iesu do se mase ai, ededia peroveta herevadia haida e ḡuḡuru?

¹⁸ Baibul be dahaka e gwaumu? Laḡani hanred gunadiai, Iesu do sema tanobada neganai Iehova na ena hereva amo e hahedinaraia Mesia na siliva moni 30 amo taona bae tore. (Sek. 11:12, 13) Iesu na turana namona ta ese taona baine tore. (Sal. 41:9) Peroveta tauna Sekaria na e gwa: “Mamoe ireḡudia tauna ba rahua mase, bena mamoe na bae karoho rohoroho.” (Sek. 13:7) Kudou-maoro taudia na Iesu enai e vara ḡaudia daidiai se daradara, to Iesu enai  unu peroveta herevadia e ḡuḡuru karana ese edia abidadama na e hagoadaia.

19. Kudou-maoro taudia be dahaka e lalopararalaiamu?

¹⁹ Hari ina negai hekwakwanai unu bamona e varamu? Oibe. Hari iseda negai, Witnes taudia haida na hereva momokani e rakatania, aposteit ai ela, bona ma haida e hakaudia kereremu. Idia ese nius, TV, radio, bona intanet amo Iehova ena Witnes na e sivarailaidia koikoimu. To kudou-maoro taudia na unu sivarai ese se hakaudia kereremu. Idia na dibadia Baibul na e peroveta unu na bae vara.​—Mat. 24:24; 2 Pet. 2:18-22.

20. Edena dalai hereva momokani e rakatania taudia ese basie hakauda kerere? (2 Timoteo 4:4, 5)

²⁰ Dahaka baita kara unu amo Iehova ihesiai henina karana basita hadokoa? Namona na hanaihanai Baibul baita stadilaia, baita ḡuriḡuri, bona Iehova ese e henida ḡaukarana ai baita bisi, unu amo eda abidadama baita hagoadaia. (2 Timoteo 4:4, 5 ba duahi.) Bema baita abidadamamu, sivarai koikoidia ese ita na basie hagaridamu. (Isa. 28:16) Bema Iehova, iena Hereva, bona tadikakada baita lalokau henidiamu, una ese be durudamu hereva momokani e rakatania taudia ese basie hakauda kereremu.

21. Ena be momo ese eda haroro herevana e dadaraiamu, to dahaka baita diba be namo?

²¹ Aposetolo edia negai, momo na Iesu e dadaraia, to ma momo ese ia na e abia dae. Idia haida na Iuda edia Sanhedrin tauna ta bona “hahelaḡa taudia hutuma.” (Apos. 6:7; Mat. 27:57-60; Mar. 15:43) Una heḡereḡerena hari ina negai, taunimanima milioni momo na e uramu Iesu bae badinaia. Dahaka dainai? Badina idia ese Baibul ena hereva momokanidia na e dibamu bona e ura henimu. Baibul na e gwaumu: “Emu taravatu e ura heniamu taudia na maino badana e abiamu, ḡau ta ese basine hahekwakwanaidia diba.”​—Sal. 119:165.