1-2. Witnes taudia momo be dahaka hekwakwanai e davarimu?

APOSETOLO PAULO ese Timoteo bona Kristen taudia iboudiai e hagoadadia haroro ḡaukara bae goadalaia. (2 Tim. 4:5) Ita iboudai ese Paulo ena sisiba baita badinaia na namo. To nega haida una na auka. Badina tadikaka bona taihu momo na e garimu haroro ḡaukara bae karaia. (2 Tim. 4:2) Heḡereḡere, mani a laloa, eda tadikaka e nohomu tanodia haida ai iseda ḡaukara na e koua eiava e taravatua. Ena be mai dibadia dibura ruma ai bae atodia to dounu e haroromu!

² Iehova ena taunimanima na hekwakwanai idauidau e davarimu dainai bae lalomanoka diba. Heḡereḡere, momo na hora momo lalodiai e ḡaukaramu, tauani dalanai edia ruma bese bae naria totona. Idia na e uramu bae haroro hanaihanai, to wiki dokodiai tauanidia na e hesikumu. Haida na gorere o buruka dainai nega momo asie haroromu. To ma haida be e hemamimu Iehova ese idia na se lalodiamu. Middle East ai e nohomu taihuna ta, Mary * na e gwa: “Na lalomanokamu neganai, na hekwarahimu lalohadai kereredia baina dadaraidia. Bena na lalohisihisimu badina una ese egu nega bona goada e haoreamu dainai, haroro ḡaukara na asina karaiamu.”

3. Ina atikol ai dahaka baita herevalaimu?

³ Herevana dahaka hekwakwanai ta davarimu, to Iehova ese goada be henidamu unu amo eda noho dalana heḡereḡerenai ia baita hesiai henia. Baita herevalaiamu ḡauna ginigunana na, Iehova ese Paulo bona Timoteo be ede e hagoadadia toma, hekwakwanai lalodiai edia hesiai ḡaukara bae haḡuḡurua  totona. Una murinai, Iehova ese ita e durudamu daladia baita herevalaimu.

4. Paulo be dahaka hekwakwanai e davari?

⁴ Paulo na hekwakwanai momo e davari. Ia na inaina ese au amo e dadabaiava, nadi amo e hodoava, bona dibura rumai e atoava neganai, Iehova ena amo goada baine abi na namo. (2 Kor. 11:23-25) Paulo na e gwa nega haida ia na e lalomanokava. (Roma 7:18, 19, 24) Danu, ia e davaria gorerena ta na, ienai “ginigini ta” na heto, bona e ura dikadikava Dirava ese baine kokia.​—2 Kor. 12:7, 8.

5. Ena be Paulo na hekwakwanai e davari, to dahaka e kara?

⁵ Iehova ese Paulo na e hagoadaia ena hesiai ḡaukara baine karaia, ena be hekwakwanai momo e davariva. Paulo ese e kara ḡaudia mani a lalo. Heḡereḡere, ia na Roma ai e hadiburaia neganai, Iuda tomadiho igunalaina taudia bona gavamani taudia vairadiai mai goadana ida sivarai namona e harorolaia. (Apos. 28:17; Fili. 4:21, 22) Danu ia ese gadi taudia momo bona ia e vadivadia taudia iboudiai e haroro henidiava. (Apos. 28:30, 31; Fili. 1:13) Una negai, Dirava ese Paulo e ḡaukaralaia Kristen taudia momokanidia baine hagoadadia revarevadia e tore. Bona Paulo ena haheitalai ese Roma kongrigeisin e hagoadaia dainai, tadikaka na ‘Dirava ena hereva e gwauraia mai goadadia ida, asie gari.’ (Fili. 1:14) Paulo na enai e varava ḡaudia dainai ḡau haida na basine kara diba, to ia ese ena nega na e ḡaukaralaia namonamo, unu amo ‘sivarai namona e haperea rohoroho.’​—Fili. 1:12.

6. Korinto Iharuana 12:9, 10 heḡereḡerena, dahaka ese Paulo e durua ena haroro ḡaukara e haḡuḡurua?

⁶ Paulo na e diba Dirava ese goada e henia dainai, ena hesiai ḡaukara e haḡuḡurua. Ia na e gwa, ena “manoka-manoka ai” Dirava ena siahu ese e hagoadaia. (2 Korinto 12:9, 10 ba duahi.) Iehova ese ena lauma helaḡa amo Paulo na goada e henia dainai, ena haroro ḡaukara e haḡuḡurua​—herevana inaina ese e daḡedaḡe henia, e hadiburaia, bona hekwakwanai ma haida e davari.

7. Timoteo na ena haroro ḡaukara baine haḡuḡurua totona, ededia hekwakwanai e hanaidia?

⁷ Timoteo, Paulo e bamoava eregabena danu, ena haroro ḡaukara baine karaia namonamo totona, Dirava ena goada ai baine tabekau na namo. Timoteo ese Paulo  na ena misinari laolaodiai e bamoava. Danu Paulo ese e siaiava kongrigeisin baine vadivadidia bona baine hagoadadia totona. (1 Kor. 4:17) Reana Timoteo na e mamiava ia na dia heḡereḡere. Una dainai Paulo ese e hamaoroa, eto: “Ta basine dadaraimu oi na eregabe mo dainai.” (1 Tim. 4:12) Danu, una negai Timoteo na e gorerea loulouva. (1 Tim. 5:23) To, Timoteo na e diba Iehova ena lauma helaḡa ese goada be heniamu, sivarai namona baine harorolaia bona tadikakana baine durudia.​—2 Tim. 1:7.

8. Hari ina negai Iehova be edena dalai ena taunimanima e hagoadadiamu?

⁸ Hari ina negai, Iehova ese ena taunimanima na “siahu herea-daena” e henidiamu, unu amo ia bae hesiai henia goadagoada diba. (2 Kor. 4:7) Iehova ese e hagoadadamu bona e durudamu ia baita badinaia daladia foa mani aita herevalai. Ḡaudia bini: Ḡuriḡuri, Baibul, tadikaka bona taihu, bona iseda haroro ḡaukara.

9. Edena dalai ḡuriḡuri karana ese ita be durudamu?

⁹ Ḡuriḡuri karana amo goada ta abimu. Efeso 6:18 ai, Paulo ese ita e hagoadadamu “nega idoinai” Dirava baita ḡuriḡuri henia. Unu amo Dirava ese be hagoadadamu. Bolivia ai, Jonnie na hekwakwanai haida e davari neganai, Iehova ena heduru e mamia. Ia adavana bona tamana sinana na nega tamonai e goreredia. Jonnie enai na auka idia tatoiosi nega tamonai baine naridia. Ia sinana e mase, bona ia adavana bona tamana edia gorere na se namo haraḡa. Jonnie na una nega aukana e laloa lou neganai, e gwa, “Na lalohekwarahi bada neganai, e durugu ḡauna na egu ḡuriḡuri ai egu hemami na Iehova enai na gwaurai hedinarai.” Iehova ese Jonnie na goada e henia baine haheauka totona. Bolivia ai, elda ta ladana Ronald, na e kamonai sinana na cancer gorerena e abia. Hua ta murinai sinana na e mase. To dahaka ese Ronald e durua dainai e haheauka? Ia na gwa: “Iehova na ḡuriḡuri heniamu neganai egu hemami ibounai ienai na gwaurai hedinaraimu. Na dibamu ia ese lau na e lalopararalaigu namonamomu.” Nega haida, eda hekwakwanai baita haheaukalaimu na auka, eiava asi dibada ḡuriḡuri ai dahaka baita gwaurai. To Iehova ese e noidamu ia baita ḡuriḡuri henia, ena be eda lalohadai bona hemami baita gwaurai hedinarai na auka.​—Roma 8:26, 27.

10. Heberu 4:12 heḡereḡerena, dahaka dainai Baibul baita duahia bona ta duahimu ḡaudia baita lalo dobu na mai anina bada?

¹⁰ Baibul amo goada ta abimu. Paulo na goada bona tauhalo baine abi totona Buka Helaḡa e duahiava, una heḡereḡerena ita danu unu baita kara toma. (Roma 15:4) Dirava ena Hereva baita duahiamu bona baita laloa dobumu neganai, Iehova ese ena lauma helaḡa amo be durudamu, unu amo Baibul ese ita baine duruda dalana baita lalopararalaia namonamomu. (Heberu 4:12 ba duahia.) Matamanai tame herevalaia tadikakana, Ronald na e gwa: “Na moalemu badina hanuaboi ta ta ai na hekwarahimu Baibul ena karoa ta baina duahia totona. Iehova ena kara namodia bona ena hesiai taudia e naridiamu dalana na lalodia dobumu. Una ese e hagoadagumu.”

11. Baibul ese e lalometauva taihuna ta be ede e hagoadaia toma?

¹¹ Dirava ena Hereva baita laloa dobumu neganai, una ese be durudamu eda hekwakwanai baita lalodia maoromaoromu. Baibul ese vabu ta e durua dalana mani a laloa. Elda ta ese e hamaoroa Iobu bukana be duahiamu  neganai ḡau namodia momo be dibamu. Una buka e duahia neganai, matamanai na e lalo Iobu ena lalohadai na kerere. Ia lalonai eto: “Iobu! Emu hekwakwanai mo asio laloa!” To gabeai e laloparara ena lalohadai na Iobu ida heḡereḡere. Una ese e durua ena lalohadai e haidaua bona e hagoadaia adavana ena mase lalohisihisina e haheaukalaia.

12. Iehova ese tadikaka bona taihu amo ita be ede e hagoadada tomamu?

¹² Tadikaka bona taihu amo goada ta abimu. Iehova ese tadikaka bona taihu amo danu ita e hagoadadamu. Paulo na e ura dikadikava tadikakana ida bae “hahealo heheni.” (Roma 1:11, 12) Matamanai tame herevalai taihuna, Mary na tadikaka bona taihu edia hebamo e moalelaia. Ia na eto: “Iehova ese tadikaka bona taihu e ḡaukaralaidiava, ena be idia na asi dibadia egu hekwakwanai be dahaka. Idia ese hahegoada herevadia e gwauraiva eiava kadi ai hahegoada herevadia e toreva bona e siai heniguva, una ese lau na e hagoadagu. Danu una ese lau e durugu hekwakwanai unu bamodia e davari taihudia baina hereva henidia, bona idia e kara ḡaudia amo diba baina abi. Bona elda taudia ese nega iboudiai e hadibaguva kongrigeisin ai tadikaka bona taihu ese lau na e lalokau henigumu.”

13. Kongrigeisin heboudia ai edena dalai baita hahegoada heheni?

¹³ Kongrigeisin heboudia na gabu namona baita hahegoada heheni. Hebou o laomu neganai, ma haida ba hadibadia o lalodia badamu bona edia ḡaukara namona dainai ba tenkiu henidia. Heḡereḡere, elda ta ladana Peter ese taihu ta, adavana dia hereva momokani ai, na hebou do se matama neganai e hamaoroa, eto: “Hebou ai ame itamumu neganai, una ese ai na e hagoadamaimu. Hanaihanai natumu iboudiai siks o mailaidiamu bona o haheḡaeḡaediamu haere bae heni totona.” Una sina na mai mata ranuna ida e gwa: “Tenkiu, emu hereva ese lau na eme hagoadagu.”

14. Haroro ḡaukara ese ita be ede e duruda tomamu?

¹⁴ Haroro ḡaukara amo goada ta abimu. Ita ese Baibul ena hereva momokanidia na ma haida ediai ta herevalaiamu neganai, ta moalemu, ena be idia na e kamonaimu eiava lasi. (Her. 11:25) Taihu ta ladana Stacy na haroro ḡaukara ese e hagoadaia. Ena ruma bese tauna ta na orea amo e atoa siri neganai, ia na e lalohisihisi bona sibona e henanadai, ‘Lau be ḡau ma haida nama kara egu ruma bese taudia nama durudia, a?’ Stacy ese una hekwakwanai na e laloa loulouva. Dahaka ese e durua una e haheaukalaia? Haroro ḡaukara! Haroro ḡaukara e karaiava neganai teritori ai baine durudia taudia e lalodiava. Ia na e gwa: “Una negai, Iehova ese Baibul stadi ta e henigu bona una stadi na lauma dalanai e goadava. Una ese lau na e hagoadagu. Momokani, haroro ḡaukara ese lau na e durugu bada.”

15. Mary ena hereva amo dahaka o dibamu?

¹⁵ Haida na edia noho dalana dainai e hemamimu haroro ḡaukara na basie habadaia dibamu. Bema oi na unu o hemami tomamu, ba helalotao Iehova ese emu hekwarahi na e laloa badamu. Mani Mary ena haheitalai aita laloa lou. Idau tano ta ela neganai, e mamiava ia na ḡau momo na se karava. Ia na e gwa, “Nega momo, haroro ḡaukara ai hereva kwadoḡidia mo na gwauraiva, Baibul sirina ta na duahiava, eiava pepapepa ta na heniva.” Una gado e herevalaia namonamova taudia e lalodia neganai, e mamia ia na dia heḡereḡere. To, gabeai ena lalohadai e haidaua. Ia na e laloparara ena be una gado na asi dibana namonamo to Iehova ese dounu baine ḡaukaralaia diba. Ia na e gwa, “Baibul ena  hereva ilalopararalaina na haraḡa bona taunimanima edia mauri baine haidaua diba.”

16. Buruka eiava gorere dainai rumai mo e nohomu taudia be dahaka ese baine hagoadadia diba?

¹⁶ Ena be ita na buruka eiava gorere dainai rumai mo ta nohomu, to haroro ḡaukara baita karaia urana na Iehova ese e itaiamu bona e laloa badamu. Ia ese dala baine kehoa diba ita e naridamu taudia eiava dokta bona nesi baita haroro henidia totona. Bema hari ta karamu ḡaudia na guna ta karava ḡaudia ida baita haheḡereḡerediamu neganai, baita lalomanokamu. To bema Iehova ese hari e durudamu dalana baita lalopararalaiamu, una ese be hagoadadamu mai moaleda ida hekwakwanai baita haheaukalaimu.

17. Kohelete 11:6 heḡereḡerena, dahaka dainai haroro ḡaukara baita goadalaia, herevana haida na asie kamonaimu?

¹⁷ Ita na asi dibada ta hado hereva momokani uhedia amo edena be baine tubu. (Kohelete 11:6 ba duahia.) Haheitalai ta na, taihu Barbara, ia laḡanina na 80 heḡereḡerena, ia na hanaihanai telefon eiava revareva amo e haroromu. Iena revareva ta lalonai, The Watchtower, March 1, 2014, ena atikol ladana “What God Has Done for You” e udaia. Ia na asi dibana ena revareva ta na orea amo e atodia siri tauna ta adavana ida e siai henidia. Idia ese una magasin na e duahia loulouva. Tau na e mamia Iehova na vaitani ia e hereva heniava. Una tau adavana ida na laḡani 27 mai kahana lalodiai orea e rakatania, to gabeai hebou ela matama bona se daudau orea ai e vareai lou. Una ese Barbara na e hagoadaia badina e itaia revareva tamona amo anina namona e vara!

18. Dahaka baita kara Dirava ese baine hagoadada totona?

¹⁸ Iehova na dala idauidau ai ita e hagoadadamu. Heḡereḡere ḡuriḡuri, Baibul, tadikaka taihu, bona haroro ḡaukara. Unu dala baita ḡaukaralaimu neganai, baita hahedinaraiamu ita na ta abidadamamu Ia ese be duruda dibamu. Namona na hanaihanai Tamada guba ai baita abidadama henia, badina ia na e uramu “ena siahu” na ia e badinaiamu taudia ediai baine hahedinaraia.​—2 Sis. 16:9.