1. Nega ginigunana Baibul ena hereva na ma haida ediai o herevalaia neganai, dahaka e vara?

BAIBUL ena hereva momokani o dibaia matama negana o laloataomu, a? Baibul amo o dibadia hahediba herevadia na o lalopararalaidia ḡoevaḡoeva. O laloava oi o diba hahediba herevadia na ma haida ese be uramu bae kamonaia. Danu, o diba momokani Baibul ena hereva ese idia na be durudiamu hari ina negai bona vaira negai mauri namona bae moalelaia. (Sal. 119:105) Una dainai o diba hereva momokanidia na mai moalemu ida turamu bona varavaramu ediai o herevalaia. To dahaka e vara? Reana o hoa, badina momo ese emu hereva na asie abia dae.

2-3. Iesu ena negai, momo ese ia be ede e laloa tomava?

² Haida ese ta harorolaiamu herevana e dadaraiamu neganai, basita daradara. Iesu ena negai, ena be ia na hoa karadia e karava, bona unu amo e hamomokania ia na Dirava ese e duruava, to taunimanima momo ese ia na e dadaraia. Heḡereḡere, Iesu ese Lasaro e hatorea isi lou neganai, una hoa karana na ia e daḡedaḡe henia taudia ese basie hakoikoia diba. To Iuda tomadiho igunalaina taudia na asie abia daeva Iesu na Mesia. Danu idia na e urava Iesu bona Lasaro bae aladia.​—Ioa. 11:47, 48, 53; 12:9-11.

³ Iesu na mai dibana taunimanima momo na basie abia daemu ia na Mesia. (Ioa. 5:39-44) Ia ese Ioane Bapatiso ena hahediba e hamaorodia, eto: “Hekwakwanai badina egu ai basine davaria tauna hari namo.” (Mat. 11:2, 3, 6) Dahaka dainai momo ese Iesu e dadaraia?

4. Ina atikol ai dahaka baita herevalaimu?

 ⁴ Ina atikol bona atikol gabena ai, aposetolo edia negai momo ese Iesu e dadaraia badidia haida baita herevalaimu. Bona baita itaiamu dahaka dainai hari ina negai momo ese eda haroro herevana e dadaraiamu. Bona mai anina bada ḡauna na, baita dibamu dahaka dainai iseda abidadama baita hagoadaia diba, unu amo Iesu baita badinaia tarikatarika.

5. Dahaka dainai reana haida na e laloava Iesu na dia e perovetalaia Mesiana?

⁵ Momo ese Iesu e dadaraia badina ia e tubu dae gabuna na idau. Ena be dibadia Iesu na hahediba tauna namo hereana ta bona hoa karadia e karava. To idia ediai, Iesu na kapenta tauna ogoḡamina ta natuna mo. Bona ia na Nasaret amo, una hanua na taunimanima ese asie laloa badava hanuana. Natanael, gabeai Iesu ena hahediba ta ai ela tauna, na matamanai e gwa: “Nasaret amo ḡau namona ta bainema a?” (Ioa. 1:46) Reana Natanael ese Iesu e nohova hanuana na se ura heniava. Eiava reana ia na Mika 5:2 ena peroveta herevana e laloava, eto Mesia na Betelehem ai baine vara, dia Nasaret ai.

6. Dahaka ese Iesu ena negai e nohova taudia bema durudia bena bema abia dae Iesu na Mesia?

⁶ Baibul be dahaka e gwaumu? Isaia na e peroveta Iesu inaina ese Mesia “ena uru” na basie laloa. (Isa. 53:8) Ḡau momo na e perovetalaidia. Bema idia ese nega bema ato unu ḡau iboudiai bema stadilai namonamo, bema diba Iesu na Betelehem ai e vara bona ia na King David ena iduhu tauna ta. (Luka 2:4-7) Una dainai Iesu na Mika 5:2 ese e perovetalaia hanuana ai e vara. To hekwakwanai be dahaka? Taunimanima na sivarai ibounai asie tahua namonamo dainai, haraḡa herea Iesu e dadaraia.

7. Dahaka dainai hari ina negai momo ese Iehova ena taunimanima e dadaraidiamu?

⁷ Hari ina negai hekwakwanai unu bamona e varamu? Oibe. Iehova ena taunimanima momo na dia taḡa taudia eiava dia lada bada taudia. Una dainai taunimanima momo na e laloamu “idia na hahediba gabuna ta asi ela bona asi aonegadia.” (Apos. 4:13) Haida na e laloamu Dirava ena taunimanima ese Baibul na basie hahedibalaia, badina idia na tomadiho ena skuli badadia sela. Ma haida be e gwaumu Iehova ena Witnes na America taudia edia tomadiho ta. To hereva momokanina bina, Iehova ena Witnes taudia momo na dia United States ai e nohomu. To ma haida be e hamaorodiamu Witnes taudia ese Iesu na asie abia daemu. Laḡani momo lalodiai, Iehova ena taunimanima na e gwauraidiamu “komiunist taudia,” “America edia spai,” eiava “gwau-edeede taudia.” Momo na sivarai unu bamodia e kamonaimu o Iehova ena taunimanima edia sivarai momokanina asie dibamu dainai, asie uramu Iehova ena taunimanima ai baela.

8. Aposetolo Edia Kara 17:11 heḡereḡerena, hari ina negai taunimanima be dahaka bae kara Dirava ena hesiai taudia bae dibadia totona?

⁸ Dahaka baita kara eda abidadama baine goada totona? Namona na sivarai momokanina ibounai baita tahua namonamo. Evanelia bukana e torea tauna Luka na unu e kara toma. Ia na e hekwarahiva ‘hereva iboudiai e tahu ḡoevaḡoeva, matamana amo,’ badina e urava ena revareva bae duahi taudia na bae diba, Iesu sivaraina e hadibalaidia herevadia na “momomo-kakani.” (Luka 1:1-4) Idaunegai Berea ai e nohova Iuda taudia na Luka heḡereḡerena. Iesu sivaraina namona e kamonai matama neganai, Heberu Revarevadia ai e hetahulai, unu amo bae diba unu be momokani eiava lasi. (Aposetolo Edia Kara 17:11 ba duahia.) Una heḡereḡerena, hari  ina negai namona na taunimanima ese sivarai momokanidia bae tahu namonamo. Dirava ena taunimanima ese e hadibadia ḡaudia na Baibul ena hereva ida bae haheḡereḡeredia. Danu Iehova ena taunimanima ese hari e karamu ḡaudia bae stadilai na namo. Bema ḡau iboudiai be hetahulai namonamomu, idia ese haida edia lalohadai kereredia na be dadaraimu.

9. Iesu na se ura toa ta guba amo baine hahedinaraia neganai, dahaka e vara?

⁹ Iesu ena negai e nohova taudia haida na iena hahediba herevadia e kamonaiva, to e urava ia na ḡau ma haida danu baine kara. E noiava “toa ta guba amo” baine hahedinaraia, unu amo baine hamomokania ia na Mesia. (Mat. 16:1) Reana idia na Daniel 7:13, 14 ai e duahia herevana dainai, e urava Iesu na unu baine kara toma. To, una nega na dia Iehova ese e abia hidi una peroveta herevana baine ḡuḡuru totona. Iesu ese e hahedibalai ḡaudia na vada heḡereḡere idia ese bae abia dae ia na Mesia. To ia ese toa ta se hahedinaraia neganai idia ese ia na e dadaraia.​—Mat. 16:4.

10. Isaia ese Mesia e perovetalaia herevana be Iesu ese ede e haḡuḡurua toma?

¹⁰ Baibul be dahaka e gwaumu? Isaia ese Mesia na ini e perovetalaia toma: “Ia na basine lolo, gadona basine habadaia, eiava ariara ai ia erena basie kamonai.” (Isa. 42:1, 2) Iesu na mai manauna ida haroro ḡaukara e karaiava. Ia ese dubu badadia se hagini, o dubu edia spesol dabuadia se hahedokilai, o se ura taunimanima ese dagi ladadia bae henia. E kota henia neganai, Iesu na se ura King Herod ihamoalena totona toa ta baine karaia, ena be bae hamasea diba. (Luka 23:8-11) Vaia, Iesu na hoa karadia haida e kara, to ia ese e laloa badava ḡauna na, sivarai namona baine harorolaia. Ena hahediba e hamaorodia, eto: “Egu mai badina bunai.”​—Mar. 1:38.

11. Hari inai negai haida edia lalohadai kereredia be dahaka?

¹¹ Hari ina negai hekwakwanai unu bamona e varamu? Oibe. Hari ina negai momo ese dubu  badadia mai hairaidia e hoalaimu, eiava dubu igunalaina taudia mai edia dagi e lalodia badamu, bona Kristen taudia ese asie hamatama ariadia e moalelaimu. To unu dubu e laomu taudia ese Dirava bona ena ura na asie dibaia namonamomu. A eda Kristen heboudia e laomu taudia ese Iehova ena ura bona ia bae badinaia dalana e dibamu. Eda Kingdom Hall na ḡoeva bona dava bada ḡaudia amo se haheradia. Hegunalai taudia na spesol dabuadia asie karamu eiava dagi bada ladadia asie abimu. Ta hahedibalaimu herevadia bona ta abi daemu ḡaudia na Dirava ena Hereva amo. To hari ina negai momo ese eda haroro herevana na asie abia daemu, badina e laloamu eda tomadiho dalana na dia momo ese e abia daemu dalana heḡereḡerena. Bona ta hahedibalaiamu ḡauna na dia idia e uramu bae kamonaia herevana.

12. Heberu 11:1, 6 heḡereḡerena, eda abidadama be ede baita hagoadaia toma?

¹² Dahaka baita kara eda abidadama baine goada totona? Aposetolo Paulo ese Roma Kristen taudia e hamaorodia, eto: “Heabidadama badina be kamonai, bona kamonai badina be Keriso ena hereva.” (Roma 10:17) Una dainai eda abidadama na Baibul istadilaina karana amo baita hagoadaia, dia Baibul ese se gwaurai tomadiho ariadia baita kara, ena be unu aria na taunimanima ese e lalo badamu eiava e moalelaimu. Namona na diba maoromaoro iabina karana amo eda abidadama baita hagoadaia, badina “asi ena abidadama tauna na Dirava ihamoalena asi dibana.” (Heberu 11:1, 6 ba duahi.) Una dainai, basitato guba amo toa ta baita itaia bena baita hamomokania ita na hereva momokani vada ta davaria. Baibul ena hahediba herevadia baita stadilai namonamomu neganai, baita abia daemu ita na hereva momokani vada ta davaria bona basita daradaramu.

13. Dahaka dainai momo ese Iesu e dadaraia?

¹³ Iesu ena negai, Ioane Bapatiso ena hahediba taudia na e daradara badina Iesu ena  hahediba taudia na asie anivaḡa. Iesu ese e hamaorodia ia do maurina ai idia bae anivaḡa na asi anina. (Mat. 9:14-17) To, Farisea taudia bona Iesu inaina ma haida ese e gwau henia badina ia ese edia kastom karadia na se badinava. Bona idia na e badu badina Sabati dinana ai gorere taudia e hanamodiava. (Mar. 3:1-6; Ioa. 9:16) Idia na mai hekokorokudia ida e gwauva Sabati taravatuna e badinaiava; a dubu helaḡa ai be bisnes karadia e karava. Iesu ese una kara dainai e gwau henidia neganai idia na e badu dikadika. (Mat. 21:12, 13, 15) Danu Iesu na Nasaret ena sinagoga ai e harorova neganai, idia na e badu badina Iesu ese Israel ena histori amo e hahedinaraia idia na sibodia edia namo e lalova bona asie abidadamava. (Luka 4:16, 25-30) Momo ese Iesu na e dadaraia badina idia ese e laloava ḡauna na se karaia.​—Mat. 11:16-19.

14. Dahaka dainai Iesu ese Baibul ena hereva e utuva kastom karadia na e dadarai?

¹⁴ Baibul be dahaka e gwaumu? Iehova na peroveta tauna Isaia amo ini e gwau toma: “Badina be ina bese taudia na mai udu-herevadia ida mo e raka henigu kahimu, bona bibinadia amo mo e imodaigumu, a lalodia na dauhai; bona taunimanima edia haheḡani mo e abia dae kavamu dainai, idia ese lau garigu e garimu.” (Isa. 29:13) Una dainai Iesu ese Baibul ena hereva e utuva kastom karadia e dadarai na maoro. Taunimanima edia taravatu bona kastom karadia e badinava taudia ese Iehova bona Mesia na e dadaraia.

15. Dahaka dainai hari ina negai momo ese Iehova ena Witnes na se ura henidiamu?

¹⁵ Hari ina negai hekwakwanai unu bamona e varamu? Oibe. Iehova ena Witnes na Baibul ese se gwaurai ariadia, heḡereḡere birthday bona Christmas lalodiai asie vareaimu neganai momo na e badumu. Danu Iehova ena Witnes na Baibul ese e gwaurai dika bese iabi isina karadia eiava mase neganai e karamu kastom karadia lalodiai asie vareaimu neganai, haida na e badumu. Iehova ena Witnes edia kara se moalelaimu taudia na e laloamu edia tomadiho karana na Dirava ese e abia daemu. To idia ese Dirava na basie hamoalea dibamu bema tanobada ena kastom karadia e abi daemu, a Baibul ena hahediba herevadia be e dadaraimu.​—Mar. 7:7-9.

16. Salamo 119:97, 113, 163-165 heḡereḡerena, dahaka baita kara bona dahaka baita dadarai be namo?

¹⁶ Dahaka baita kara eda abidadama baine goada totona? Namona na Iehova ena taravatu bona hahekau herevadia baita ura henidia bada. (Salamo 119:97, 113, 163-165 ba duahi.) Iehova baita lalokau heniamu neganai, ia e inai henimu kastom karadia baita dadaraimu. Bona ḡau ta eiava tau ta ese iseda lalokau Iehova enai na basine hadikaia diba.

17. Iesu ena negai momo be e urava Mesia be dahaka baine kara?

¹⁷ Iesu ena negai, haida na e urava gavamani lalonai sensi bae vara haraḡa. E urava Mesia ese idia na Roma ena lohia dikana amo baine ruhadia. To e ura Iesu na edia king ai bae halaoa neganai, ia na se ura. (Ioa. 6:14, 15) Hahelaḡa taudia bona ma haida na e gari, hari be Iesu ese gavamani be haidauamu bena Roma taudia na mai badudia ida be laomu, unu hahelaḡa taudia e henidia dagina be kokiamu. Idia ese politikol karadia e lalo badava dainai Iuda taudia momo ese Iesu e dadaraia.

18. Momo ese ededia peroveta herevadia Mesia enai na e dadarai?

¹⁸ Baibul be dahaka e gwaumu? Ena be peroveta herevadia momo na e gwa Mesia na tuari ai baine kwalimu, to peroveta herevadia ma haida ese e hahedinaraimu ia na eda dika dainai do baine mase guna. (Isa. 53:9, 12)  To dahaka dainai Iuda taudia ese Mesia na asie abia dae? Badina edia negai unu peroveta herevadia ese edia hekwakwanai ihanamodia haraḡa karana na se herevalaia, una dainai idia ese unu peroveta herevadia na e dadarai.​—Ioa. 6:26, 27.

19. Dahaka dainai hari ina negai momo ese eda haroro herevana se abia daemu?

¹⁹ Hari ina negai hekwakwanai unu bamona e varamu? Oibe. Momo na ita e dadaraidamu badina politikol lalodiai asita vareaimu. Idia na e uramu election lalodiai baita vouti. To, ta dibamu Iehova matanai, bema tanobada tauna ta baita abia hidi ita baine lohiada, ita na Iehova ta dadaraiamu. (1 Sam. 8:4-7) Danu taunimanima na e laloamu skul bona hospital baita hagini na namo, bona ḡau haida baita kara kominiti baita durua. Bona haroro ḡaukara ta karaiamu neganai, se uramu bae kamonai, badina e laloamu tanobada ena hekwakwanai ihanamona karana na asita laloa badamu.

20. Mataio 7:21-23 ai Iesu ena hereva heḡereḡerena, dahaka baita laloa bada be namo?

²⁰ Dahaka baita kara eda abidadama baine goada totona? (Mataio 7:21-23 ba duahi.) Baita laloa bada ḡauna na, Iesu ese e haḡanida ḡaukarana baita karaia. (Mat. 28:19, 20) Ina tanobada ena politikol bona hekwakwanai ihanamodia karana na basita lalohekwarahilaidia. Momokani, taunimanima na ta lalokau henidiamu bona edia hekwakwanai danu ta lalomu, to ta dibamu dekeda taudia baita durudia dalana namona na, Dirava ena Basileia baita hadibalaidia bona baita durudia Iehova turana ai baela.

21. Laloda baita hadai dahaka baita kara na namo?

²¹ Ina atikol ai, ita ese aposetolo edia negai momo ese Iesu e dadaraia bona hari ina negai Iesu murinai e rakamu taudia e dadaraidia badidia foa tame herevalai. To ita be unu badi mo baita dadarai eiava? Lasi. Atikol gabena ai, ita ese ma badi foa baita herevalaimu. Namona na laloda baita hadai Iesu baita badinaia tarikatarika bona eda abidadama baita hagoadaia!