1-2. Apokalupo bukana baita stadilaia badina ta be dahaka?

 NEGA ta oi be ta ese e boirimu iena albam ai foto haida o itamu, a? Unu foto ai, oi na asi dibamu taudia momo o itadiamu. To, foto ta na o itaia namonamomu. Dahaka dainai? Badina oi na una foto lalonai. Una foto o itaiamu neganai, o lalo loumu una be edena negai bona edekahai e heabi. Danu una foto ai o itadiamu taudia ladadia bo gwauraimu. Oiemu ai una foto na mai anina bada.

² Apokalupo bukana na una foto heḡereḡerena. Dahaka dainai? Badidia na rua. Badi ginigunana be, Apokalupo bukana na ita ihadibalaida totona e torea. Siri ginigunana na ini e gwau tomamu: “Iesu Keriso ihahedinaraina herevana, Dirava ese e henia, asi vanahana bae vara ḡaudia na ena hesiai taudia baine hamaorolaidia.” (Apok. 1:1) Una dainai, Apokalupo bukana na dia taunimanima iboudiai totodia, to ita, Dirava ena gwauhamata hesiai tauda, ihadibalaida totona e torea. Ita na Dirava ena taunimanima dainai, basita hoa bema ta dibamu ita ese Apokalupo bukana ena peroveta herevadia e ḡuḡurumu karana ta duruamu. Eiava baita gwaumu, ita na “una foto lalonai” na heto.

3-4. Apokalupo bukana ena peroveta herevadia be edena negai bae ḡuḡuru, bona ita be dahaka baita kara na namo?

³ Badi iharuana be, ita e hadibadamu ini peroveta herevadia be edena negai be ḡuḡurumu. Aposetolo Ioane ese una nega e gwauraia, eto: “Lohiabada ena dina ai Lauma ese e rohegu.” (Apok. 1:10) Ioane ese unu hereva na laḡani 96 C.E. heḡereḡerena ai e tore neganai, “Lohiabada ena dina” na do se matama. (Mat. 25:14, 19; Luka 19:12) To Baibul ena peroveta herevana heḡereḡerena, una dina na laḡani 1914 ai e matamaia​—una laḡani ai Iesu na guba ai King dagina e abia. Una laḡani  amo ema bona hari, Apokalupo ena peroveta herevadia​—Dirava ena taunimanima ediai e ḡuḡurumu herevadia​—na vada e ḡuḡuru matama. Oibe, hari ita na “Lohiabada ena dina” lalonai ta nohomu!

⁴ Ita na mai anina bada negana lalonai ta nohomu dainai, Apokalupo 1:3 [NWT] ai e torea sisiba namona baita badinaia na namo, e gwaumu: “Ini peroveta herevadia baine duahi badabada tauna na baine moale, bona ini hereva bae kamonai bona bae badina taudia na bae moale, badina Dirava ena abi hidi negana na kahirakahira.” Oibe, ini peroveta herevadia baita “duahi badabada,” baita “kamonai,” bona baita “badina” na namo. Baita badinadia herevadia haida be dahaka?

5. Edena dalai Apokalupo bukana ese e hahedinaraiamu Iehova ese e abia daemu tomadiho dalana baita badinaia na namo?

⁵ Apokalupo bukana ena karoa ginigunana amo ta diba, Iesu na kongrigeisin lalonai e varamu ḡaudia iboudiai na mai dibana. (Apok. 1:12-16, 20; 2:1) Iesu ese Asia Minor ai kongrigeisin seven e henidia sisibadia ese una e hamomokania. Unu sisiba amo, Iesu ese unu kongrigeisin taudia e durudia Iehova ese e abia daeva tomadiho dalana bae badinaia totona. Bona hari ina negai Dirava ena taunimanima iboudiai ese unu sisiba bae badinadia na namo. Dahaka ta dibamu? Ita Ihakauda Tauna, Keriso Iesu, na mai dibana ita be lauma dalanai ta goadamu eiava lasi. Ia ese ita e hakaudamu bona e gimadamu, bona ia na ḡau iboudiai e itamu. Ia na mai dibana dahaka baita kara be namo unu amo hanaihanai Iehova ena lalonamo baita abia. Iesu be dahaka sisiba e heni bona hari ina negai unu sisiba baita badina na namo?

6. (a) Apokalupo 2:3, 4 ai, Iesu ena sisiba ese e hahedinaraia, Efeso kongrigeisin edia hekwakwanai badana be dahaka? (b) Unu amo ita be dahaka ta dibamu?

⁶ Apokalupo 2:3, 4 ba duahi. Namona na eda lalokau gunana Iehova enai na basita negea. Iesu ena sisiba Efeso kongrigeisin taudia ediai ese e hahedinaraia, idia na hekwakwanai idauidau lalodiai e haheaukava bona Iehova ena hesiai ḡaukara na asie hesikulaiava. To, idia ese edia lalokau gunana na vada e negea. Una lalokau bae hagoadaia lou na namo​—bema unu basie kara tomamu, Dirava ese edia tomadiho dalana na basine abia daemu. Una heḡereḡerena, hari ina negai baita haheauka mo na dia heḡereḡere. Namona na badi maorodia daidiai baita haheauka. Eda Dirava na dia ita ta karaiamu ḡauna mo e laloamu, to ta karaiamu badina danu e laloamu. Ia ese eda kara badidia na e lalo badamu, bona e uramu Ia ta tomadiho heniamu badina na ta lalokau henia badamu bona ta tenkiu heniamu.​—Her. 16:2; Mar. 12:29, 30.

7. (a) Apokalupo 3:1-3 ena hereva heḡereḡerena, Iesu na e itaia Sadi kongrigeisin edia hekwakwanai be dahaka? (b) Ita be dahaka baita kara be namo?

⁷ Apokalupo 3:1-3 ba duahi. Namona na nega idoinai baita noga bona baita gima. Sadi kongrigeisin taudia edia hekwakwanai na ma idau. Ena be idia na guna lauma dalanai e goadava, to hari idia ese Dirava ena hesiai ḡaukara na vada e hesikulaiamu. Una dainai, Iesu ese e hamaorodia bae “gima.” Ita be dahaka ta dibamu? Momokani, Iehova ese eda ḡaukara na basine laloboiomu. (Heb. 6:10) To, basitato guna Iehova ena hesiai ḡaukara vada ta karaia dainai, hari ia baita hesiai henia na dia ḡau badana. Herevana dahaka e varamu, to namona na nega idoinai “Lohiabada ena ḡaukara” lalodiai basita hesiku to baita bisi, baita noga, bona baita gima ela bona dokona.​—1 Kor. 15:58; Mat. 24:13; Mar. 13:33.

8. Apokalupo 3:15-17 ai, Laodikea tadikakadia e sisiba henidia herevana amo dahaka ta dibamu?

 ⁸ Apokalupo 3:15-17 ba duahi. Namona na mai kudouda idoinai ida eda tomadiho karadia baita goadalai. Iesu ese Laodikea taudia e sisiba henidia neganai edia hekwakwanai ta e hahedinaraia. Idia na edia tomadiho lalodiai e lalo ruava, vaitani edia tomadiho na “dia siahu bona dia keru.” Lauma ḡaudia asie lalo badava dainai, Iesu ese e hamaorodia idia na “dika rohoroho” bona “ihareha.” Idia ese Iehova bae ura henia bada bona ia itomadiho henina karadia bae goadalai na namo. (Apok. 3:19) Ita be dahaka ta dibamu? Namona na eda lauma taḡana eiava Iehova bona ena orea ese e henidamu ḡau namodia iboudiai baita lalodia, badina una ese be durudamu baita goadamu. (Apok. 3:18) Ita na asita uramu ina tanobada dikana lalonai mauri namona itahuna karana be ḡau ginigunana ai baita halaoa, a Dirava itomadiho henina karana be ḡau iharuana ai baita halaoa.

9. Iesu ese Peregamo bona Tuatira kongrigeisin taudia e henidia sisibadia ese e hadibadamu, dahaka baita dadarai be namo?

⁹ Namona na aposteit taudia edia hahediba baita dadaraidia. Iesu ese Peregamo kongrigeisin taudia haida e sisiba henidia badina idia ese kongrigeisin e hapararaiava bona orea idaudia edia hahediba herevadia e badinava. (Apok. 2:14-16) Iesu ese Tuatira kongrigeisin taudia na e hanamodia badina idia ese “Satana ena dobu ḡaudia” e dadarai, bona e hagoadadia hereva momokani bae “kahua tao tarika-tarika.” (Apok. 2:24-26) Unu kongrigeisin ai e manoka taudia na hahediba koikoidia e badinava, bona bae helalo-kerehai na namo. Hari ina negai ita be dahaka baita kara? Namona na Iehova ena lalohadai ida se heḡereḡeremu hahedibadia iboudiai na baita dadaraidia. Aposteit taudia ese “Dirava ibadinana na koukouna mo” e abiamu, to ‘anina be e dadaraiamu.’ (2 Tim. 3:5) Bema Dirava ena Hereva baita stadilaia namonamomu, unu aposteit edia hahediba koikoidia baita lalopararalaimu bona baita dadaraidia dibamu.​—2 Tim. 3:14-17; Iuda 3, 4.

10. Iesu ese Peregamo bona Tuatira kongrigeisin e henidia sisibana amo ta dibaiamu ḡauna ma ta be dahaka?

¹⁰ Namona na matabodaḡa karadia iboudiai baita dadaraidia. Peregamo bona Tuatira kongrigeisin taudia na mai edia hekwakwanai ma ta. Iesu ese unu kongrigeisin taudia haida na e gwau henidia badina matabodaḡa karadia e karava. (Apok. 2:14, 20, NWT) Ita be dahaka  ta dibamu? Herevana laḡani momo lalodiai Iehova ena hesiai ḡaukara vada ta karaia bona hari maduna namodia ta huamu, to Dirava ese eda tomadiho na se abia daemu bema matabodaḡa karadia na doini ta karamu. (1 Sam. 15:22; 1 Pet. 2:16) Dirava na e uramu ita ese iena kara maoromaoro taravatudia baita badinadia, ena be tanobada taudia edia kara na e dika e laomu.​—Efe. 6:11-13.

11. Tame diba ḡaudia haida be dahaka? (Maua ladana “ Ta Dibamu Ḡaudia” ba itaia.)

¹¹ Tame diba ḡaudia haida be dahaka? Namona na Iehova ese e abia daemu tomadiho dalana baita badinaia. Bema eda kara kererena ta dainai Dirava ese eda tomadiho na se abia daemu, namona na una kara baita hadokoa haraḡa bona kara maorona baita karaia. (Apok. 2:5, 16; 3:3, 16) To, Iesu ese unu kongrigeisin ediai ḡau ma ta e herevalaia. Una be dahaka?

12. Iesu ese Semurana bona Filadelfia tadikakadia be dahaka e hamaorodia bona una ese ita e durudamu? (Apokalupo 2:10)

¹² Mani Iesu ese Semurana bona Filadelfia kongrigeisin e henidia sisibadia aita lalodia. Ia ese unu kongrigeisin taudia e hamaorodia bae abi hisidia garidia na basie gari, badina edia haheauka daidiai ahudia do bae abi. (Apokalupo 2:10 ba duahia; 3:10) Hari ina negai ita be dahaka ta dibamu? Baita abia dae daḡedaḡe na baita davarimu, to namona na basita gari bona baita haheauka. (Mat. 24:9, 13; 2 Kor. 12:10) Dahaka dainai una na mai anina bada?

13-14. Apokalupo karoa 12 ai e herevalai ḡaudia daidiai, Dirava ena taunimanima ediai be dahaka e vara?

¹³ Apokalupo bukana ese e hadibadamu iseda nega​—“Lohiabada ena dina”​—ai Dirava ena taunimanima na haida ese be daḡedaḡe henidiamu. Apokalupo karoa 12 na e gwa Iesu na Dirava ena Basileia ai king dagina e abia matama neganai, guba ai tuari e vara. Mikael​—hairai e abia tauna Iesu Keriso​—bona ena aneru ese Satana bona ena demoni e tuari henidia. (Apok. 12:7, 8) Bena unu inai taudia na e hadareredia bona e tahodia dobi tanobada ai, bona idia ese tanobada ai taunimanima e hahisidia badamu. (Apok. 12:9, 12) Una dainai Dirava ena taunimanima ediai be dahaka e vara?

¹⁴ Apokalupo bukana ese Satana ena kara e herevalaia. Ia na vada asi ena maoro guba ai baine vareai lou dainai, ia ese horoa orena taudia na e badu henidia, badina unu horoa taudia na tanobada ai “Iesu e gwauraia hedinaraimu” bona idia na gabeai Dirava ena Basileia lalonai be lohiamu taudia. (Apok. 12:17, NWT; 2 Kor. 5:20; Efe. 6:19, 20) Una peroveta herevana be ede e ḡuḡuru toma?

15. Daidia be Apokalupo karoa 11 ai e perovetalaia “witnes taudia raruosi” ese e laulaulaidia, bona idia ediai be dahaka e vara?

 ¹⁵ Satana ese Dirava inaina e ḡaukaralaidiamu horoa orena tadikakadia​—Basileia iharorolaina ḡaukarana e hakauamu taudia​—e daḡedaḡe henidiamu. Unu tadikaka na Apokalupo bukana ai e perovetalaia “witnes taudia raruosi” ese e laulaulaidia, idia na e aladia mase. * (Apok. 11:3, 7-11; NWT) Laḡani 1918 ai, maduna e huava tadikakadia eit na e habadelaidia koikoi, bona dibura ruma ai e atodia laḡani momo bae noho. Taunimanima momo na e laloava, unu horoa taudia edia ḡaukara na vada e doko, una na heḡereḡere e “aladia mase.”

16. Laḡani 1919 ai dahaka hoa ḡauna e vara, to Satana be una nega amo ema bona hari dahaka e karamu?

¹⁶ Apokalupo karoa 11 ai peroveta herevana na ma e gwa, unu “witnes taudia raruosi” na nega sisina murinai bae toreisi lou. Unu tadikaka e hadiburadia bena laḡani ta murinai una peroveta herevana na hoa dalanai e ḡuḡuru. Laḡani 1919 matamanai, unu horoa tadikakadia na dibura ruma amo e ruhadia, bona gabeai kota ese edia keis na e koua. Tadikaka na maoromaoro Basileia iharorolaina ḡaukarana e karaia lou. To Satana ese Dirava ena taunimanima idaḡedaḡe henidia karana na se hadokoa. Una nega amo ema bona hari, Satana ese “sinavai” hetomadia daḡedaḡe karadia amo Dirava ena taunimanima iboudiai e hahisidiamu. (Apok. 12:15) Oibe, nega iboudiai baita ‘haheauka bona baita abidadama’ na namo.​—Apok. 13:10.

17. Dirava ena taunimanima ese heduru be ede e abi toma, ena be Satana ese e daḡedaḡe henidiamu?

¹⁷ Apokalupo karoa 12 ai e hahedinaraia, tanobada oreadia haida ese Dirava ena taunimanima bae durudia. Apokalupo bukana na e gwa, “tanobada” ese e kara uduna e haḡaia na heto, bena “sinavai” hetomadia daḡedaḡe karadia e hadonodia. (Apok. 12:16) Una na e vara. Nega haida ai, Satana ena orea haida, heḡereḡere kota, ese Dirava ena taunimanima na e durudia. Nega momo, Iehova ena taunimanima na kota ai e kwalimu, oibe, kota ese taravatu haida e koki. Bena Dirava ena taunimanima be dahaka e kara? Idia na Iehova ese e henidia ḡaukarana e karaia goadagoada. (1 Kor. 16:9) Una ḡaukara be dahaka?

18. Ini dina gabediai eda ḡaukara badana be dahaka?

 ¹⁸ Iesu na e peroveta ena taunimanima ese Dirava ena “Basileia sivaraina namona na tanobada idoinai bae harorolaia, bese iboudiai ihadibalaidia; bena dokona vada baine kau.” (Mat. 24:14) Idia ese una ḡaukara e karaiamu neganai, aneru tamona, eiava aneru oreana ese e durudiamu​—unu aneru na “mia-hanaihanai sivaraina namona na tanobada ai e nohomu taudia ediai e laohai, bese iboudiai, iduhu iboudiai, gado iboudiai, tano iboudiai e harorolai henidia.”​—Apok. 14:6.

19. Iehova e lalokau heniamu taudia ese dahaka sivarai be harorolaiamu?

¹⁹ Dirava ena taunimanima na dia Basileia sivaraina namona mo bae harorolaia. To Apokalupo karoa 8 ela karoa 10 ai e herevalaidia anerudia edia ḡaukara na idia ese bae durua danu. Unu aneru ese Dirava ena Basileia e dadaraiamu taudia ediai be varamu dika idauidau e harorolaimu. Una dainai, Iehova ena Witnes ese hahemaoro herevana ta, “aisi nadi bona lahi” hetomana na e harorolaiamu, e hahedinaraiamu Dirava ese Satana ena tanobada dikana ena orea iboudiai na be hahemaoro henidiamu. (Apok. 8:7, 13; NWT) Namona na taunimanima na bae diba nega na vada kwadoḡi dainai, edia mauri bae haidau bona Iehova ena badu dinana amo bae roho mauri. (Sef. 2:2, 3) To taunimanima na asie uramu una sivarai bae kamonai. Una dainai una sivarai baita harorolaia neganai baita boga auka na namo. Hisihisi badana lalonai, hahemaoro herevana ginigabena ese taunimanima na be habadudia dikadikamu.​—Apok. 16:21.

20. Atikol gabedia ruaosi ai dahaka baita herevalaimu?

²⁰ “Ini peroveta herevadia” baita badinadia na namo, badina Apokalupo bukana ai ta duahimu ḡaudia na ita edai danu e ḡuḡurumu. (Apok. 1:3) To edena dalai daḡedaḡe karadia baita haheaukalai diba bona asi eda gari ida haroro ḡaukara dounu baita karaia? Ini ḡau rua ese ita be hagoadadamu: Ginigunana be, Apokalupo bukana ese Dirava inaina e herevalaidia dalana, bona iharuana be, vaira nega hahenamodia baita abimu bema Dirava baita badinaiamu. Unu na atikol gabedia ruaosi ai baita herevalaimu.