1. Dahaka dainai Dirava amo e maimu aonegana baita abia na namo? (Hereva Lada-isidia 4:7)

 BEMA oi na abi hidi badana ta o uramu ba karaia, oi na aonega totona bo ḡuriḡurimu, badina mai dibamu unu ba kara toma na namo. (Iak. 1:5) King Solomon na eto: “Aonega na mai anina bada ḡauna, una dainai aonega bavabia, bona bavabi ḡaudia iboudiai amo, namona na laloparara bavabia danu.” (Her. 4:7, NWT) Momokani, Solomon na dia aonega idauna ta e herevalaia. Ia na Iehova Dirava amo e maimu aonegana e herevalaia. (Her. 2:6) To, una aonega ese ita baine duruda diba hari ta davarimu hekwakwanaidia idauidau baita haheaukalai totona, a? Oibe. Bona ina atikol ai una baita herevalaiamu.

2. Aonega taudia ai baitala dalana ta be dahaka?

² Aonega taudia ai baitala dalana ta na, edia aonega dainai taunimanima ese e matauraidiava taudia rarua, edia hahediba herevadia baita stadilai bona baita badina. Ginigunana na, Solomon baita herevalaiamu. Baibul na e gwaumu: “Dirava ese aonega bona lalo-parara bada-herea na Solomon e henia.” (1 Han. 4:29) Iharuana be, Iesu baita herevalaiamu, ia na aonega tauna hereadaena. (Mat. 12:42) Baibul ai Iesu na ini e perovetalaia toma: “Iehova ena Lauma ese baine rohea, aonega bona lalo-parara laumana.”​—Isa. 11:2.

3. Ina atikol ai dahaka baita herevalaimu?

³ Solomon bona Iesu na Dirava ese e henidia aonegana dainai, mai anidia bada ḡaudia ai sisiba namodia e heni. Ina atikol  ai, ita ese ḡau toi baita herevalaimu: Moni, bona moni ḡaukara ai lalohadai maorona baita abia, bona baita lalo maoromaoro na namo.

4. Edena dalai Solomon ena noho dalana na Iesu ena amo idau?

⁴ Solomon na taḡa tauna, bona ruma mai hairaina ta ai e nohova. (1 Han. 10:7, 14, 15) To, Iesu be dia kohu momo tauna, bona asi ena ruma. (Mat. 8:20) To, unu tatau raruosi na kohu ai lalohadai maorona e abia, badina edia aonega na Iehova Dirava ena amo.

5. Solomon ese moni ai dahaka lalohadai maorona e abia?

⁵ Solomon na e gwa, moni na “hegima” ḡauna. (Koh. 7:12) Moni amo ita ese eda mauri iduruna ḡaudia bona reana eda ura ḡaudia haida baita hoi diba. Ena be Solomon na taḡa tauna, to e laloparara mai anidia bada ḡaudia haida ese moni na e hereaia. Heḡereḡere, ia na eto: “Lada namona iabi-hidina ese taḡa badadia iabi-hididia e hereadiamu.” (Her. 22:1) Danu, Solomon na e gwa moni e ura heniamu taudia ese dekediai miadia ḡaudia na basie moalelaimu. (Koh. 5:10, 12) Bona ma e gwa, moni ai na basita tabekau, badina herevana eda moni na bada o maraḡi to be ore haraḡamu.​—Her. 23:4, 5.

6. Iesu ese kohu bona moni ai dahaka lalohadai maorona e abia? (Mataio 6:31-33)

⁶ Iesu ese kohu bona moni ai lalohadai maorona e abia. Ia ese aniani bona inuinu ḡaudia na e moalelaiva. (Luka 19:2, 6, 7) Nega ta, ia ese ranu na wain namo-hereana ai e halaoa​—una na ena hoa karana ginigunana. (Ioa. 2:10, 11) Bona ena mase dinana ai, ia na dava bada dabuana ta e hahedokilaia. (Ioa. 19:23,24) To, Iesu ese ena mauri ai kohu bona moni na ḡau badadia ai se halao. Ia ese ena hahediba e hamaorodia, eto: “Asi tauna ta ese biagu rarua isiaidia baine lao heni diba. . . . Dirava bona Taḡa isiaidia basio lao heni diba.” (Mat. 6:24) Iesu na e gwa, bema Basileia baita tahua gunamu, Iehova ese eda dabu ḡaudia na be henidamu.​—Mataio 6:31-33 ba duahi.

7. Tadikaka ta be edena dalai moni ai lalohadai maorona e abia karana amo namo e davari?

 ⁷ Eda tadikaka bona taihu momo na moni iabina karana ai Dirava ena aonega sisibadia e badinamu dainai namo e davarimu. Mani singul tadikakana ta ladana, Daniel ena haheitalai aita laloa. Ia na e gwa: “Lau matamatagu ai, lalogu na hadaia egu mauri ai Iehova ihesiai henina karana baina atoa guna.” Daniel na ena mauri ai kohu bona moni momo se tahu dainai, ena nega bona diba na tiokratik ḡaukaradia momo ai e ḡaukaralai. Ia na ma eto: “Lau na baina gwa diba, na karaia abia hidina dainai asina lalohisihisi. Momokani, bema egu mauri ai moni na ḡau badana ai nama halaoa, reana moni momo nama abi diba. To, hari na davaridia tura namodia na basinama davaridia diba. Danu bema moni momo iabina karana nama laloa bada, hari Basileia na atoa gunamu karana amo na abiamu moalena, na basinama abia diba. Iehova ese hahenamo momo herea e henigumu, bona unu ese moni na e hereaia.” E hahedinaraia ḡoevaḡoevamu, ita ese namo baita davari dibamu, bema lauma ḡaudia baita lalo badamu, to dia moni.

8. Ede ta diba tomamu Solomon ese ḡaukara ai lalohadai maorona e abia? (Kohelete 5:18, 19)

⁸ Solomon ese eda hekwarahi amo ta abiamu moalena na e gwauraia, “Dirava ena harihari ḡauna.” (Kohelete 5:18, 19 ba duahi.) Ia na e gwa: “Hekwarahi iboudiai na mai ahudia.” (Her. 14:23) Solomon na mai dibana una hereva na momokani. Ia na ḡaukara goada tauna ta! Ia ese ruma e hagini, vine imeadia e hado, uma e kara bona ranu gabudia e ḡei. Danu, hanua haida e hagini. (1 Han. 9:19; Koh. 2:4-6) Una ḡaukara na mai hekwarahina, bona ia ese na e moalelai. To, Solomon na dia unu ḡaukara ai mo moale e davaria. Ia ese Dirava ihesiai henina ḡaukaradia momo e kara danu. Heḡereḡere, ia ese Iehova itomadiho henina totona, dubu helaḡa mai hairaina ihaginina ḡaukarana e naria​—una ḡaukara na laḡani seven lalodiai e karaia! (1 Han. 6:38; 9:1) Solomon na ḡaukara idauidau e kara murinai, e laloparara Dirava ihesiai henina ḡaukarana na mai anina bada. Ia na e gwa: “Ḡaukara dokona binai; hereva iboudiai vada o kamonai. Dirava garina ba gari, bona ena haheḡani ba badinadia.”​—Koh. 12:13.

9. Edena dalai Iesu ese ḡaukara ai lalohadai maorona e abia?

⁹ Iesu na ḡaukara goada tauna. Tanobada ai, ia na eregabenai kapenta ḡaukarana e karaiava. (Mar. 6:3) Ia tamana bona sinana na e moaleva badina edia ruma bese badana inarina karana ai ia ese e durudiava. Iesu na tau ḡoevadaena bona ḡaukara namodia momo baine kara diba, una dainai reana taunimanima momo ese ia e karava ḡaudia na e ura heni badava! Iesu ese ena ḡaukara na e moalelaiva. Ena be ena ḡaukara na e goadalaiva, to ia na nega iboudiai Iehova ihesiai henina totona nega e atova. (Ioa. 7:15) Gabeai, ful-taim hesiai ḡaukara e karaia neganai, ena kamonai taudia e hadibadia eto: “Basio ḡaukara e oremu anianina iabina, a baine mia ela bona mauri hanaihanai anianina iabina ba ḡaukara.” (Ioa. 6:27) Bona Ororo Harorona ai, Iesu na eto: “Emui kohu na guba ai ba habou.”​—Mat. 6:20.

10. Haida na moni ḡaukara ai dahaka hahetoho bae davari diba?

¹⁰ Dirava ena amo e maimu aonegana ese be durudamu, eda moni ḡaukara ai lalohadai maorona baita abiamu. Ita na Kristen tauda dainai, Baibul ese e hadibadamu baita ‘ḡaukara goada bona ḡaukara namona’ baita karaia.  (Efe. 4:28, NWT) Nega momo eda bosi na ita be itadamu mai momokanida ida ta ḡaukaramu bona ta ḡaukara goadagoadamu, bona reana be hamaorodamu eda ḡaukara daladia na e ura henimu. Una dainai, hora momo baita ḡaukaramu, badina baita uramu eda bosi ese Iehova ena Witnes taudia edia kara namodia bae diba. To gabeai, reana baita lalopararamu ita na asi eda nega eda ruma bese madunadia baita hua bona tiokratik ḡaukaradia ma haida baita kara. Namona na ḡau haida baita haidau, unu amo ita na eda nega mai anidia bada ḡaudia baita kara.

11. Tadikaka ta ese moni ḡaukara ai lalohadai maorona iabina karana be ede e dibaia toma?

¹¹ Eregabe tadikakana ta ladana, William na moni ḡaukara ai lalohadai maorona iabina karana ena namo e dibaia. Ia na guna elda tadikaka ta enai e ḡaukarava, bona una tadikaka na ini e herevalaia toma: “Ia na haheitalai namona badina ena ḡaukara ai lalohadai maorona e abiava. Ia na e ḡaukara goadava, bona ena ḡaukara namona dainai kastoma ese e matauraiava. To, adorahi ai, ena ḡaukara e oreva neganai, ia na ena nega bona goada e ḡaukaralaiva ena ruma bese e durudiava bona ena tomadiho karadia e karava. Una dainai, ia na nega iboudiai e moaleva!” *

12. Edena dalai Solomon na e lalo maoromaoro, to gabeai dahaka e vara?

¹² Solomon na Iehova itomadiho henina karana e goadalaiava neganai, ia na e lalo maoromaoro. Ia eregabena ai, mai manauna ida e gwa, ena diba na dia heḡereḡere bona Iehova ena heduru e noia. (1 Han. 3:7-9) Solomon e lohia matama neganai, ia ese hekokoroku karana ena dika na e lalopararalaia. Ia na e gwa: “Heaḡi ese hahebuatari dalana e lailaiamu; hekokoroku ese moru dalana e lailaiamu.” (Her. 16:18) To gabeai, Solomon na sibona ese e gwauraia sisibana na se badinaia. Ena lohia laḡanidia haida lalodiai, ia na e hekokoroku bona Dirava ena taravatu  na se badinaia. Heḡereḡere, taravatu ta na e gwa, Heberu pavapavana ta ese “adavana danu basine hahohodia, idia ese lalona bae ania na garina.” (Deu. 17:17) Solomon ese una taravatu na se badinaia bona ia ese hahine 700 e adavadia bona hesiai hahinedia 300 e adavadia, idia momo na dirava koikoidia e tomadiho henidiava! (1 Han. 11:1-3) Reana Solomon na e lalova “dika ta na basine varamu.” To gabeai, ia na Iehova se badinaia dainai, dika e davari.​—1 Han. 11:9-13.

13. Iesu ena manau karana baita laloa dobumu karana amo dahaka baita dibamu?

¹³ Iesu na e lalo maoromaoro bona e manau. Tanobada do sema neganai, ia na Iehova ena hesiai ḡaukara ai ḡau namodia momo e kara. Iesu amo, Dirava ese “ḡau iboudiai guba ai bona tanobada ai” e kara. (Kol. 1:16) Iesu e bapatiso neganai, ia ese Tamana ida e nohova neganai e karava ḡaudia e lalodia lou. (Mat. 3:16; Ioa. 17:5) To, unu e lalo lou neganai, ia na se hekokoroku. Danu, ena kara amo se hahedinaraia ia ese ma haida na e hereadia. Ena hahediba e hamaorodia, ia tanobada ema badina na, “dia haida ese ia isiaina bae lao heni totona, a ia hari idia isiaidia baine lao heni, bona ena mauri baine henia, hutuma baine hamauridia helaoreana.” (Mat. 20:28) Danu, mai manauna ida e gwa, ia sibona na ḡau ta ikarana asi dibana. (Ioa. 5:19) Iesu ese manau karana e hahedinaraia! Ia na haheitalai namona e hahedinaraia ita ese baita tohotohoa totona.

14. Lalohadai maorona iabina karana ai Iesu amo dahaka ta dibamu?

¹⁴ Iesu ese ia murinai e raka taudia e hadibadia, lalohadai maorona bae abia na namo. Nega ta, Iesu ese e hamaorodia: “Umui na kwaramui huidia iboudiai vada e duahi vaitani.” (Mat. 10:30) Una hereva ese ita na be hagoadada dibamu, bema siboda lalohadai kereredia baita abimu. Namona na baita diba Tamada guba ai ese ita na e laloda badamu. Bema baita laloamu ita na dia heḡereḡere Iehova itomadiho henina taudia ai baitala bona iena tanobada matamatana ai mauri na basita abiamu, ita ese Iehova ena hahemaoro karana na ta daradaralaiamu.

15. (a) Gima Kohorona ta ena hereva heḡereḡerena, edena lalohadai maorona baita abia na namo? (b) Rau 24 laulauna heḡereḡerena, bema siboda baita helalo badamu, ededia hahenamo baita reamu?

 ¹⁵ Laḡani 15 mai kahana gunanai, Gima Kohorona ta ese e hahedinaraia, lalohadai maorona baita abia na namo: “Momokani, ita na asita uramu siboda eda namo baita lalo bada bena baita hekokoroku; to danu asita uramu baita laloa ita na ḡau ta lasi o asi anida bena baita lalohisihisi. To, namona na lalohadai maorona baita abia, eda goada bona manoka ḡaudia baita lalopararalai. Kristen hahinena ta na e gwa: ‘Lau na dia taunimanima dikana, to danu lau na dia ḡoevadae. Ḡau haida be ba karadia namonamo dibamu bona ḡau haida na basina karadia namonamomu, bona ita iboudai na unu bamona.’” * Una ese e hadibadamu lalohadai maorona baita abia na namo, ani?

16. Dahaka dainai Iehova ese ita ihakauda sisibadia namodia e heni?

¹⁶ Iehova na ena Hereva amo ita ihakauda sisibadia namodia e henimu. Ia ese e lalokau henidamu, bona e uramu baita moale. (Isa. 48:17, 18) Aonega dalana na eda mauri ai Iehova ena ura baita atoa guna, badina una ese moale korikori be henida dibamu. Unu baita kara tomamu neganai, moni bona moni ḡaukara e lalo badamu, bona sibodia e helalo badamu taudia ese e davarimu hekwakwanaidia na baita hanaidia dibamu. Namona na ita ta ta ese laloda baita hadai baita aonega bona Iehova kudouna baita hamoalea!​—Her. 23:15.