1-2. Eda noho daladia e idaumu neganai, dahaka dainai Baibul ena hahekau herevadia na mai anidia bada? Mani a herevalaia.

 HEADAVA dinana ai, be headavamu tauna bona hahinena na elda ta ese Baibul amo headava ena tok e henimu neganai e kamonaimu. Idia na una tok ai e henimu hahekau herevadia na da mai dibadia. To hari, idia ediai unu hereva na mai anidia bada. Dahaka dainai? Badina idia raruosi ese unu hahekau herevadia na bae badinadia hebou.

² Kristen tauna ta bona adavana na tama sina ai e laomu neganai danu unu bamona. Laḡani momo lalodiai, idia na natu inaridia karana e herevalai tok idauidau na de kamonai. To hari, idia ediai unu hahekau herevadia na mai anidia bada. Badina idia na natudia ta be havaraiamu bona be nariamu. Una na maduna badana ta! Oibe, eda noho daladia e idaumu neganai, Baibul ai mai dibada namonamo hahekau herevadia na mai anidia bada ita edai. Una badi dainai Iehova e tomadiho heniamu taudia ese Baibul bae duahia, bona Israel pavapavadia heḡereḡeredia, edia “mauri dinadia iboudiai” lalodiai bae lalodia dobu.​—Deu. 17:19.

3. Ina atikol ai dahaka baita herevalaimu?

³ Tama bona sina, natumui ediai Iehova o herevalaiamu karana na hahenamo badana ta. To umui na o uramu natumui ediai dia Dirava mo ba herevalaia. O uramu ba durudia ia bae lalokau henia bada danu. Dahaka ba kara diba unu amo natumui ba hadibadia Iehova bae lalokau henia? Ina atikol ai, ita ese Baibul ena hahekau herevadia hani baita herevalaimu, unu ese umui tama sina be durumuimu. (2 Tim. 3:16) Danu baita  itaiamu edena dalai Kristen tama sina haida na Baibul ena sisiba e badinadia karana ese e durudia.

4. Edena hahekau herevana ta ese tama sina baine durudia natudia na Iehova ilalokau henina karana bae hadibadia? (Iakobo 1:5)

⁴ Hahekau herevana ginigunana: Iehova enai heduru ba tahu. Iehova ba noia aonega baine henimu unu amo natumu ba durudia Ia bae lalokau henia. (Iakobo 1:5 ba duahia.) Dirava na sisiba e henimu Tauna hereadaena. Badi momo daidiai unu ta gwau tomamu. Badi rua be ini: Ginigunana na, Iehova na tama sina edia maduna na mai dibana namonamo. (Sal. 36:9) Bona iharuana na, Ia ese e henimu sisiba namodia na hanaihanai namo e havaramu.​—Isa. 48:17.

5. (a) Iehova ena orea ese tama sina be ede e durudia tomamu? (b) Vidio ai e hahedinaraia heḡereḡerena, Tadikaka Amorim bona adavana ese natudia e naridia dalana amo dahaka o dibamu?

⁵ Iehova ese ena Hereva bona ena orea amo lauma aniani namodia momo herea e henimu, unu ese bae durumui natumu ediai Iehova ilalokau henina karana ba hadibadia totona. (Mat. 24:45) Heḡereḡere, atikol ladana “Help for the Family” kahanai heduru herevadia momo bo davari dibamu, una atikol na laḡani momo lalodiai Awake! magasin ai e halasi bona hari na eda websait ai. Danu, jw.org ai intaviu bona drama vidiodia momo ese tama sina be durudia dibamu, natudia e naridiamu lalonai Iehova ena sisiba bae badinadia. *​—Her. 2:4-6.

6. Tama ta ese Iehova ena orea amo e abi hahekau herevadia be ede e lalodia toma?

⁶ Tama sina momo na e gwaumu idia na e moalemu badina Iehova ese ena orea amo idurudia ḡaudia e henimu. Tama ta ladana Joe na e gwa: “Natumai tatoiosi na hereva momokani lalonai a naridiamu na mai hekwarahina. Hanaihanai adavagu ida Iehova ena heduru a noiava. Bona nega momo a mamiava atikol ta o vidio ta na nega korikori ai abiava, una ese e durumai a davaria hekwakwanaina a haheaukalaia. Ai na hanaihanai Iehova ena heduru ai a tabekauva.” Joe bona adavana na e davaria  unu atikol bona vidio idauidau ese natudia na e durudiamu Iehova turana ai baela.

7. Dahaka dainai tama sina na bae hekwarahi haheitalai namona bae hahedinaraia? (Roma 2:21)

⁷ Hahekau herevana iharuana: Haheitalai namona ba hahedinaraia. Natu na nega momo tamadia bona sinadia edia kara e itamu bona e tohotohomu. Vaia, tama sina na dia ḡoḡoevadae. (Roma 3:23) To, namona na tama sina na bae ḡaukara goada haheitalai namona bae hahedinaraia. (Roma 2:21 ba duahia.) Tama ta ese natu e herevalaidia neganai, e gwa: “Idia na ḡau iboudiai e lalotaomu, sponge ese ranu e hadodoamu heḡereḡerena.” Bona ma e gwa: “Idia ese be hamaorodamu bema idia ta hadibadiamu ḡaudia na ita ese asita badinamu.” Una dainai, bema ta uramu natuda ese Iehova bae lalokau henia, namona na ita ese eda lalokau Iehova enai baita hagoadaia bona eda kara amo una baita hahedinaraia.

8-9. Andrew bona Emma edia hereva amo dahaka o dibamu?

⁸ Tama sina na dala momo ai natudia bae hadibadia Iehova bae lalokau henia. Mani laḡanina 17 tadikakana ta ladana Andrew ena hereva aita laloa, ia na e gwa: “Tamagu bona sinagu na hanaihanai ḡuriḡuri karana ena namo e herevalaiava. Hanuaboi iboudiai, Tamagu na lau ida a ḡuriḡuriva, ena be sibogu egu ḡuriḡuri na vada na gwauraia. Tamagu bona sinagu na nega iboudiai e gwauva: ‘Iehova na hanaihanai ba hereva henia diba.’ Una dainai ḡuriḡuri karana na na laloa bada, bona hari egu ai na dia auka Iehova baina ḡuriḡuri henia bona Ia na Tama lalokauna ta heḡereḡerena na laloamu.” Tama bona sina, ba helalotao Iehova o lalokau heniamu karana ese natumui danu be durudiamu Ia bae lalokau henia.

⁹ Mani Emma ena haheitalai danu aita laloa. Ia tamana na haida ediai moni e abitorehai bona ena ruma bese e rakatania neganai, sinana ese unu abitorehai e halou. Emma na e gwa: “Nega momo Sinagu ena moni na se heḡereḡereva, to ia na hanaihanai aiemai ai Iehova ese ena hesiai taudia e naridiava dalana na e herevalaiava. Ena mauri dalana amo na itaiava ia ese una na e abia dae momokani. Sinagu ese e hadibamaiva ḡaudia na e badinava.” Dahaka ta dibamu? Tama bona sina na edia kara amo haheitalai namona bae hahedinaraia, mauri e aukamu negadiai danu.​—Gal. 6:9.

10. Israel tama bona sina momo be ededia nega ai natudia ida e herevaherevava? (Deuteronomi 6:6, 7)

¹⁰ Hahekau herevana ihatoina: Hanaihanai natumu ida ba herevahereva. Iehova ese idaunegai Israel taudia e hadibadia hanaihanai natudia ediai Ia bae herevalaia. (Deuteronomi 6:6, 7 ba duahi.) Unu tama sina na dina ibounai lalonai dala idauidau ai natudia ida bae herevahereva, bona natudia bae durudia mai lalodia idoinai ida Iehova bae lalokau henia. Heḡereḡere, Israel merona ta na reana hora momo lalodiai tamana e duruava e hadohadova eiava e ḡeiḡeiva. Ia taihuna be reana dina ibounai lalonai sinana e duruava e turituriva eiava ruma ḡaukaradia ma haida e karava. Tama bona sina na natudia ida e ḡaukara hebouva neganai, mai anidia bada topik momo e herevalaiva. Heḡereḡere, Iehova ena kara namo bona Ia ese ruma bese e duruava dalana e herevalaiva.

11. Kristen tama bona sina be edena negai natudia ida bae herevahereva?

¹¹ Hari ina negai, mauri na idau, dia guna heḡereḡerena. Tano momo ai, tama bona sina na dina ibounai lalonai natudia ida na asie hebamomu. Reana tama bona sina na ḡaukara gabunai, bona natudia be reana skuli ai. Una dainai, namona na tama bona sina na nega bae ato natudia ida bae herevahereva. (Efe. 5: 15, 16; Fili. 1:10) Ruma bese ena tomadiho na nega namona una bae karaia. Matamata tadikakana ta ladana, Alexander na e gwa: “Tamagu na hanaihanai dala e karava ruma bese ena tomadiho baia karaia totona, bona se urava ḡau ta ese emai tomadiho karana baine koua. Stadi muridiai, ai na mai anidia bada ḡaudia a herevalaiva.”

12. Ruma bese ena tomadiho lalonai ruma bese kwarana be dahaka baine laloatao be namo?

¹² Bema oi na ruma bese kwarana, dahaka ba kara diba unu amo natumu ese ruma bese ena tomadiho bae moalelaia? Namona na natumu ida eda pablikeisin matamatana, Enjoy Life Forever! ba stadilaia. Una buka istadilaina karana ese dala be kehoamu natumu ida ba herevahereva namonamo totona. Oi na o uramu natumu na basie gari to edia hemami bona lalohekwarahi ḡaudia na oiemu ai bae herevalai, una dainai ruma bese ena tomadiho totona o atoa negana na basio ḡaukaralaia idia ba sisiba henidia o ba gwau henidia. Bona basio badu bema natumu ese e gwauraiamu ḡauna ta na dia Baibul ena hahekau herevana heḡereḡerena. To, ba moale badina idia na mai momokanidia ida edia hemami e gwaurai hedinaraimu, bona ba hagoadadia unu bae kara toma. Natumu edia hemami korikori bo lalopararalaiamu neganai, bo durudia namonamo dibamu.

13. Tama bona sina be ededia dala ma haida ai natudia bae durudia Iehova turana ai baela?

¹³ Tama bona sina, namona na dala ba tahu dina ibounai lalonai natumui ba durudia Iehova turana ai baela. Basio nari ela bona Baibul stadi negana ta ai idia ediai eda Dirava lalokauna ba herevalaia. Mani sina ta ladana Lisa ena hereva aita laloa, ia na e gwa: “Ai na Iehova ese e kara ḡaudia amo natumai a durudiava Ia bae dibaia. Heḡereḡere, emai sisia ese e karaiava karana ta ese natumai e hakiridiava neganai, una a ḡaukaralaiava idia a hadibadiava Ihavarada Tauna na moale Diravana bona mauri na e laloa badamu, bona ia na e uramu ita danu baita moale.”

14. Dahaka dainai tama sina ese natudia bae durudia turadia bae abidia hidi namonamo? (Hereva Lada-isidia 13:20)

¹⁴ Hahekau herevana ihahanina: Natumu ba durudia tura namodia bae abidia  hidi. Dirava ena Hereva ese e hahedinaraia ḡoevaḡoevamu, turada ese eda kara bae hanamoa eiava bae hadikaia diba. (Hereva Lada-isidia 13:20 ba duahia.) Tama bona sina, natumui turadia be mai dibamui, a? Idia do hedavari henidia eiava o hebamo henidiamu, a? Dahaka ba kara diba unu amo natumu ba durudia Iehova e lalokau heniamu taudia bae bamodia? (1 Kor. 15:33) Natumui ba durudia abi hidi maorodia bae kara totona, lauma dalanai e goadamu taudia ba boiridia emu ruma bese ida ba moale hebou.​—Sal. 119:63.

15. Tama bona sina be dahaka bae kara diba natudia bae durudia tura namodia bae bamodia?

¹⁵ Mani tama ta ladana Tony enai e vara ḡauna aita laloa. Ia bona adavana ese natudia e durudia tura namodia e davari dalana na, ini herevalaia toma: “Laḡani momo lalodiai, lau bona adavagu ese tadikaka taihu​—laḡanidia idauidau bona edia mauri daladia idauidau​—na a boiridiava emai ruma e maiva. Idia ida a aniani hebouva bona emai ruma bese ena tomadiho ai e helai vareaiva. Una na Iehova e lalokau heniamu bona mai moaledia ida ia e hesiai heniamu taudia idibadia dalana namo hereana ta. Ai ese seket taudia, misinari bona ma haida na a abidia daeva emai ruma ai bae noho. Edia ekspiriens, hesiai ḡaukara e goadalaiva bona sibodia edia ura e dadaraiva karana ese natumai na e hagoadadia bada bona e durudia Iehova bae hetura henia totona.” Tama bona sina, lalomui ba hadai natumui ba durudia tura namodia bae bamodia.

16. Dahaka ba kara bema natumu ta baine gwa ia na se uramu Iehova baine hesiai henia?

¹⁶ Ena be oi na o hekwarahi natumu o durudia, to bema natumu ta na baine gwa ia na se uramu Iehova baine hesiai henia be ede bamona? Basioto emu maduna na so huaia namonamo. Iehova ese ita iboudai​—oi natumu danu​—na ura kwalimu e henida, unu amo abi hidi baita kara Dirava baita hesiai henia eiava lasi. Bema natumu na abi hidi e karaia Iehova baine rakatania, namona na basio hesiku to bavabia dae ia na nega ta ma be loumu. Boio merona parabolena ba laloatao. (Luka 15:11-19, 22-24) Una mero na kara dikadia momo e kara, to dokonai, tamana e lou henia. Reana haida na be gwaumu: “Una na parabole mo. To mauri korikori ai baine vara  diba, a?” Oibe! Eregabe tauna ta ladana Elie enai una na e vara.

17. Elie ena ekspiriens ese oi be ede e hagoadamu tomamu?

¹⁷ Elie ese tamana bona sinana na ini e herevalaidia toma: “Idia na e hekwarahi lau e durugu Iehova baina lalokau henia bona ena Hereva, Baibul baina ura henia. To, laḡanigu 15 heḡereḡerena ai, lau na na gwau-edeede matama.” Elie na mauri daladia rua e badinava, bona ena be tamana sinana na e hekwarahiva lauma dalanai bae durua to ia na se kamonaiva. Ruma e rakatania murinai, kara kereredia e karava. To, nega haida ia na turana ta ida Baibul e herevalaiava. Elie na e gwa: “Turagu enai Iehova na herevalaiava negadiai, lau ese Iehova na laloava. Taina ruana, kudougu ai Baibul ena hereva momokani uhedia​—tamagu bona sinagu ese e hekwarahi e hado ḡaudia​—na e tubu matama.” Gabeai, Elie na hereva momokani e lou henia. * Mani a laloa, ia tamana bona sinana na e moale bada, badina e hekwarahi natudia na maraḡinai Iehova ilalokau henina karana e hadibaia!​—2 Tim. 3:14, 15.

18. Tama sina haida na e hekwarahimu natudia na Iehova ilalokau henina karana e hadibadiamu dainai, idia be ede o lalodia tomamu?

¹⁸ Tama bona sina, Dirava ese umui na hahenamo namona ta e henimui, una na natumui ba durudia Iehova bae tomadiho henia. (Sal. 78:4-6) Una na ḡaukara badana, bona a hanamomuimu badina o ḡaukara goadamu natumui ba durudia! Bema bo hekwarahimu natumui bo durudiamu Iehova bae lalokau henia bona ena matahakani bona sisiba bae badinadia, bo diba momokanimu Tamada lalokauna guba ai, na be moalemu.​—Efe. 6:4.