1. Iehova ese ia e tomadiho heniamu taudia na e hamaorodiamu dahaka bae kara? (Laulau danu ba itaia.)

 DAIKA enai hahekau bona tauhalo baita abi diba? Una henanadai haerena na mai dibada. Ita ese Iehova Dirava baita ḡuriḡuri henia diba. Iehova ese e hamaorodamu unu baita kara toma. Ia na e uramu baita ḡuriḡuri loulou o ‘ḡuriḡuri basita hadokoa.’ (1 Tes. 5:17) Ia ihereva henina na basita gari bona baita noia eda mauri lalonai baine hakauda. (Her. 3:5, 6) Iehova na hariharibada Diravana, una dainai ia baita ḡuriḡuri henia negana ena hetoa na se atoa.

2. Ina atikol ai be dahaka baita herevalaimu?

² Ita ese Dirava ena harihari ḡauna ḡuriḡuri na ta laloa badamu. To, eda ḡaukara na momo dainai, asi eda nega baita ḡuriḡuri. Danu, nega haida ta hemamimu eda ḡuriḡuri baita hanamo na namo. Ta moalemu badina Baibul ai ita ihagoadada bona ihakauda herevadia momo mimia. Ina atikol ai, ita ese Iesu ena haheitalai baita stadilaiamu, unu amo baita dibamu edena dala ai nega baita ato baita ḡuriḡuri. Danu, baita  ḡuriḡurilai ḡaudia badadia 5 baita herevalaimu, unu amo eda ḡuriḡuri karana baita hanamoa.

3. Ḡuriḡuri karana ai Iesu be dahaka e diba?

³ Iesu na e diba Iehova ese ḡuriḡuri na e laloa badamu. Tanobada do sema neganai, Tamana ese abidadama tataudia bona hahinedia edia ḡuriḡuri e haerelai karana na e itaia. Heḡereḡere, ia na Tamana badinai bona Tamana ese Hana, David, Elia bona abidadama taudia momo edia ḡuriḡuri e haerelaiva. (1 Sam. 1:10, 11, 20; 1 Han. 19:4-6; Sal. 32:5) Una dainai, Iesu ese ena hahediba e hamaorodia mai edia abidadama ida bae ḡuriḡuri loulou.​—Mat. 7:7-11.

4. Iesu ena ḡuriḡuri karana amo dahaka ta dibamu?

⁴ Iesu na Iehova e ḡuriḡuri henia karana amo haheitalai namona e hahedinaraia, ena hahediba ese bae tohotohoa helaoreana. Iena hesiai ḡaukara lalonai, Iesu na e ḡuriḡuri loulou. Iesu na nega e ato baine ḡuriḡuri, badina nega momo e bisiva bona hutuma na ia dekena e maiva. (Mar. 6:31, 45, 46) Ia na daba matana ai e nogava sibona baine ḡuriḡuri totona. (Mar. 1:35) Nega ta, ia na abi hidi badana ta baine karaia dainai hanuaboi ibounai lalonai e ḡuriḡuri. (Luka 6:12, 13) Bona do se mase hanuaboina ai e ḡuriḡuri loulou, badina e ura una nega auka hereana lalonai ena hesiai ḡaukarana baine haḡuḡurua.​—Mat. 26:39, 42, 44.

5. Ta ḡuriḡurimu neganai edena dala ai Iesu baita tohotohoa?

⁵ Iesu ena haheitalai ese e hadibadamu, ena be ta bisimu to nega baita ato baita ḡuriḡuri na namo. Iesu heḡereḡerena, reana daba matadia ai eiava hanuaboi ai baita ḡuriḡuri diba. Unu baita kara tomamu neganai, baita hahedinaraiamu Iehova ena harihari ḡauna ḡuriḡuri na ta laloa badamu. Taihu ta ladana Lynne na ḡuriḡuri karana ena namo e lalopararalaia matama neganai, e abia moalena e laloataomu. Ia na e gwaumu: “Na diba Iehova na nega idauidau ai baina hereva henia diba neganai, una ese e durugu ia na tura namona ta bamona baina laloa, bona na ura egu ḡuriḡuri karana baina hanamoa.” Ita momo na unu ta hemami tomamu. Una dainai, eda ḡuriḡuri lalonai baita gwaurai ḡaudia badadia 5 aita lalodia.

6. Apokalupo 4:10, 11 heḡereḡerena, Iehova na mai ena maoro dahaka baine abi?

⁶ Iehova baita imodaia. Aposetolo Ioane na matahanai ta lalonai e itaia elda 24 na guba ai Iehova e tomadiho henia. Idia ese Dirava e imodaia bona eto ia ese “hairai bona hemataurai bona siahu” baine abi na maoro. (Apokalupo 4:10, 11 ba duahidia.) Kamonai anerudia danu badi momo daidiai Iehova e imodaiamu. Idia na guba ai bona mai dibadia namonamo ia. Ia ese e kara ḡaudia e itamu neganai ena kara namodia e dibamu. Oibe, Iehova ena kara e haerodiamu neganai e imodaiamu.​—Iobu 38:4-7.

7. Dahaka dainai Iehova baita imodaia?

⁷ Ita danu eda ḡuriḡuri lalonai Iehova baita imodaia, baita hamaoroa dahaka dainai ia ta lalokau heniamu bona ta matauraiamu. Baibul o duahiamu bona o stadilaiamu neganai, Iehova ena kara namodia, oi ese o moalelaimu karadia, ba tahudia. (Iobu 37:23; Roma 11:33) Bona unu kara namodia daidiai emu hemami na Iehova ba hamaoroalaia. Danu, Iehova baita imodaia badina ia ese ita bona eda tadikaka taihu na e durudamu. Oibe, ia ese hanaihanai e naridamu bona e gimadamu.​—1 Sam. 1:27; 2:1, 2.

8. Iehova baita tenkiu henia badidia haida be dahaka? (1 Tesalonika 5:18)

⁸ Iehova baita tenkiu henia. Badi momo daidiai eda ḡuriḡuri ai Iehova baita tenkiu henia. (1 Tesalonika 5:18 ba duahia.) Ta davarimu ḡau namodia daidiai ia baita tenkiu henia; badina harihari ḡaudia namodia iboudiai na ia ena amo e maimu. (Iak. 1:17) Heḡereḡere, tanobada hairaina bona e kara ḡaudia idauidau, ta maurimu, eda ruma bese, turada, bona eda helaro daidiai ia baita tenkiu henia. Danu Iehova ta tenkiu heniamu badina ia ida eda hetura karana ta moalelaiamu.

9. Dahaka dainai Iehova enai tenkiu karana baita hahedinaraia na namo?

⁹ Namona na ita ta ta ese nega baita ato Iehova baita tenkiu henia badidia baita lalodia. Hari ina negai, taunimanima momo ese tenkiu karana na asie hahedinaraiamu. Idia na e uramu bae abi ḡaudia mo e lalomu, to tenkiu ihahedinaraina karadia na asie lalomu. Bema edia kara baita tohotohomu, ita na eda ura ḡaudia mo baita ḡuriḡurilaimu. Una basine vara totona, namona na hanaihanai Iehova enai eda tenkiu karana baita hahedinaraia, ita daidai e karamu ḡaudia iboudiai daidiai.​—Luka 6:45.

10. Edena dala ai tenkiu karana ese taihu ta e durua e haheauka? (Laulau danu ba itaia.)

¹⁰ Tenkiu karana ese baine duruda diba metau baita haheaukalaidia. Mani Kyung-sook enai e vara ḡauna aita laloa, iena sivarai na The Watchtower, January 15, 2015 ai bo davariamu. Ia na dokta ese e hadibaia ia baragina ai kensa na bada. Ia na e gwa: “Egu gorere  na laloa momova dainai na lalometau bada. Na mamia lau na ḡau iboudiai na haboio bona na gari dikadika.” Dahaka ese e durua e haheauka? Ia na e gwa hanuaboi iboudiai do se mahuta negana ai, ena ruma atai kahana e laova bona una dina ai e moalelaiva ḡaudia 5 e ḡuriḡurilaiva. Una ese e durua bona e hagoadaia dainai Iehova enai ena lalokau e hahedinaraia. Ia na Iehova ese hahetoho lalodiai ena hesiai taudia e durudiamu karana na e mamia, bona e laloparara eda mauri lalonai baita abimu hahenamodia ese ta davarimu hahetohodia na e hereadia. Kyung-sook heḡereḡerena, badi momo daidiai Iehova baita tenkiu henia, ena be edai hekwakwanai e varamu. Ḡuriḡuri ai Dirava baita tenkiu heniamu neganai, una ese be durudamu baita haheaukamu bona baita moalemu.

11. Iesu guba ela murinai, dahaka dainai ena hahediba basie gari na namo?

¹¹ Iehova baita noia, goada baine henida baita haroro. Iesu guba do sela neganai, ena hahediba e hamaorodia, ia sivaraina na “Ierusalem ai bona Iudea idoinai bona Samaria kahana idoinai, ela bona tanobada heḡeḡe-madai” bae harorolaia. (Apos. 1:8; Luka 24:46-48) Se daudau, Iuda tomadiho igunalaina taudia ese aposetolo Petro bona Ioane e ḡuidia, bona Sanhedrin e laohaidia. Idia ese e haḡanidia basie haroro, bona e hagaridia danu. (Apos. 4:18, 21) Petro bona Ioane be dahaka e kara?

12. Aposetolo Edia Kara 4:29, 31 heḡereḡerena, hahediba taudia be dahaka e kara?

¹² Petro bona Ioane ese Iuda tomadiho igunalaina taudia e haere henidia, eto: “Mani ba laloa, umui baia kamonai henimui, Dirava basia kamonai henia, una na Dirava vairanai maoro eiava lasi? Badina be a itava bona a kamonaiva ḡaudia na basia herevalai na dia heḡereḡere.” (Apos. 4:19, 20) Petro bona Ioane na e ruhadia neganai, hahediba taudia na Iehova e ḡuriḡuri henia iena ura bae karaia totona. Eto: “Emu hesiai taumai goada bame henimai, emu hereva baia gwaurai mai goadamai ida.” Iehova ese una ḡuriḡuri na e haerelaia.​—Aposetolo Edia Kara 4:29, 31 ba duahidia.

13. Jin-hyuk ena haheitalai amo dahaka ta dibamu?

¹³ Bema gavamani ese e taravatudamu basita haroro, namona na hahediba taudia baita tohotohodia, dounu baita haroro. Mani Jin-hyuk ena haheitalai aita laloa. Ia na se ura ami ai baine vareai dainai dibura ruma ai e atoa. Dibura ruma ai, ia e henia ḡaukarana na dibura taudia ma haida baine naridia, to e taravatua idia ediai ḡau idaudia bona Baibul na basine herevalaidia. Ia ese Dirava enai goada bona aonega e noi, dala baine hekeho neganai hereva momokani baine harorolaia totona. (Apos. 5:29) Ia na e gwa: “Iehova ese egu ḡuriḡuri na e haerelai, ia ese goada bona aonega e henigu dainai dibura taudia edia iduara ai miniti 5 Baibul stadi momo na hamatama. Bona hanuaboi ai revareva na toreva, unu amo murina dinadia ai dibura taudia baina henidia.” Ita danu baita abia dae Iehova ese be durudamu eda haroro ḡaukara baita haḡuḡuruamu. Jin-hyuk heḡereḡerena, Iehova enai goada bona aonega baita noi diba.

14. Hekwakwanai ta davarimu neganai dahaka ese baine duruda diba? (Salamo 37:3, 5)

¹⁴ Iehova ena heduru baita noia, hekwakwanai baita haheaukalai totona. Ita momo ese gorere, eda hemami e hadikamu ḡaudia, lalokau tauna ta e masemu, ruma bese lalonai e varamu hekwakwanai, eiava hekwakwanai ma haida daidiai ta hisihisimu. Danu pandemic bona tuari daidiai unu hekwakwanai  baita haheaukalaidia na auka. Emu hemami na Iehova enai ba gwauraia hedinarai. Bona e varamu ḡauna na ia ba hamaorolaia, turamu namona ta enai boma gwauraia heḡereḡerena. Namona na ba diba Iehova na oi daimu ai kara ta be karaiamu.​—Salamo 37:3, 5 ba duahidia.

15. Edena dala ai ḡuriḡuri ese baine duruda diba ‘dika negadia ai baita haheauka’? Haheitalai ta ba gwauraia.

¹⁵ Hanaihanai baita ḡuriḡurimu karana ese be durudamu ‘dika negadia ai baita haheaukamu.’ (Roma 12:12) Iehova na mai dibana ia e tomadiho heniamu taudia be dahaka hekwakwanai e davarimu; ia ese “edia taitai danu e kamonaimu.” (Sal. 145:18, 19) Laḡanina na 29 painia taihuna ta, ladana Kristie ese una na e hamomokania. Ia na gorere badadia haida e davari. Una dainai e lalometau bada. Gabeai, e kamonai ia sinana na gorere badana ta e abia. Kristie na e gwa: “Lau ese Iehova na ḡuriḡuri henia, goada baine henigu dina ta ta ai baina haheauka totona. Na hekwarahi egu tomadiho karadia baina goadalai, una dainai hebou na lao heniva bona sibogu egu stadi na karaiava.” Ia na ma e gwa: “Ḡuriḡuri karana ese e durugu nega aukadia na haheaukalai. Na diba Iehova na hanaihanai lau dekedekegu ai, una ese e durugu na lalogoada. Ena be egu gorere na se ore haraḡa, to Iehova ese egu ḡuriḡuri e haerelai karana ese e durugu na lalomaino.” Namona na baita helalotao, Iehova “ese ia ibadinana taudia hedibaḡani amo baine hamauridia diba.”​—2 Pet. 2:9.

16. Dahaka dainai hedibaḡani baita dadarai totona Iehova ena heduru baita abia na namo?

¹⁶ Iehova ena heduru baita noia, hedibaḡani baita dadarai totona. Ita na dia ḡoevadae dainai, kara dika idadaraina totona hanaihanai baita hekwarahi na namo. Satana na ḡau idauidau e karamu ita baine hamoruda totona. Dala ta na, moale karadia dikadia amo e uramu eda lalohadai baine hadikaia. Unu moale karadia baita lalodiamu ese  laloda be hamirodiamu bona kara dika badadia baita karamu.​—Mar. 7:21-23; Iak. 1:14, 15.

17. Eda ḡuriḡuri heḡereḡerena, dahaka baita kara hedibaḡani baita dadarai? (Laulau danu ba itaia.)

¹⁷ Iehova ena heduru baita abia na namo bema ta uramu hedibaḡani ta baita dadaraia. Iesu ese e hahedibalaia ḡuriḡurina lalonai, ina noinoi herevana danu e gwauraia, eto: “Hedibaḡani ai basio hakaumai vareai, a dika amo ba hamaurimai.” (Mat. 6:13) Iehova na e uramu ita baine duruda, to namona na ita ese iena heduru baita noia. Danu, eda ḡuriḡuri heḡereḡerena baita kara na namo. Baita hekwarahi Satana ena tanobada ena lalohadai kereredia baita dadaraidia. (Sal. 97:10) Baibul baita duahia bona baita stadilaia amo laloda na ḡau namodia amo baita hahonua. Hebou ilao henina bona haroro ḡaukara ese danu laloda na be gimaiamu. Bona Iehova na e gwauhamata baine duruda, unu amo eda goada e hereaiamu hedibaḡanina ta ese basine butuda tao.​—1 Kor. 10:12, 13.

18. Ḡuriḡuri karana be ede baita laloa toma?

¹⁸ Ini nega aukadia lalodiai Iehova baita badinaia totona, namona na ita ta ta ese ḡuriḡuri karana baita laloa bada. Dina ta ta ai nega bavato mai kudoumu idoinai ida ba ḡuriḡuri. Iehova na e uramu eda ḡuriḡuri ai ‘laloda anidia na ia vairanai baita hahedinarai.’ (Sal. 62:8) Iehova ba imodaia e kara ḡaudia iboudiai daidiai. Ia ba noia baine durumu mai emu goada ida ba haroro. Bona ba noia baine durumu hekwakwanai idauidau ba haheaukalai bona hedibaḡani ba dadarai. Namona na ḡau ta eiava taunimanima ta ese basine koumu hanaihanai Iehova ba ḡuriḡuri henia. To, edena dala ai Iehova ese eda ḡuriḡuri e haerelaimu? Atikol gabena ai, una henanadai badana baita herevalaiamu.