1-2. Ḡuriḡuri karana ai nega haida dahaka ta lalomu?

 NEGA haida o lalomu Iehova ese emu ḡuriḡuri e haerelaimu, a? Bema oibe, dia oi sibomu mo unu o lalo tomamu. Tadikaka taihu momo danu nega aukadia lalodiai unu e lalo tomamu. Bema ita na hekwakwanai haida daidiai ta hisihisimu, ita danu ta lalomu Iehova be ededia dala ai eda ḡuriḡuri e haerelaimu.

² Ina stadi ai baita itaiamu dahaka dainai baita abia dae Iehova ese ena hesiai taudia edia ḡuriḡuri na e haerelaimu. (1 Ioa. 5:15) Ita ese ini henanadai danu baita lalodiamu: Dahaka dainai nega haida ta laloamu toana na Iehova ese iseda ḡuriḡuri na se haerelaidiamu? Hari ina negai Iehova ese ededia dala ai ḡuriḡuri e haerelaimu?

3. Dahaka dainai Iehova na e uramu ia baita ḡuriḡuri henia?

³ Baibul ese e hadibadamu Iehova ese ita na e lalokau henidamu bona e laloda badamu. (Hag. 2:7; 1 Ioa. 4:10) Una dainai, ia na ita e hamaorodamu ḡuriḡuri amo iena heduru baita noia. (1 Pet. 5:6, 7) Ia na e uramu baine duruda ia baita badinaia bona eda hekwakwanai baita haheaukalaidia.

4. Ede ta diba tomamu Iehova ese ena hesiai taudia edia ḡuriḡuri na e haerelaimu? (Laulau ba itaia.)

 ⁴ Baibul ai, Iehova ese ia e tomadiho heniamu taudia edia ḡuriḡuri e haerelai sivaraidia ta duahimu. Sivarai unu bamona ta o laloamu, a? Mani King David sivaraina aita laloa. Iena mauri lalonai inaina na momo, bona nega momo ia ese Iehova ena heduru e noiava. Nega ta, ia na Dirava e noia, eto: “Iehova e, egu ḡuriḡuri a kamonaia, egu noinoi a hakala henia. Emu heabidadama ai bona emu kara maoromaoro ai ba haere henigu.” (Sal. 143:1) David ese Iehova e noia baine hamauria neganai Iehova na e haere. (1 Sam. 19:10, 18-20; 2 Sam. 5:17-25) Una dainai David na e gwa: “Iehova na e boi heniamu taudia iboudiai dekedekediai.” Ita danu iena hereva na ta abia daemu.​—Sal. 145:18.

5. Iehova ese ena hesiai taudia edia ḡuriḡuri be ede e haerelai tomava? (Laulau danu ba itaia.)

⁵ Iehova ese eda ḡuriḡuri na dia hanaihanai ita ta lalomu dalanai se haerelaimu. Aposetolo Paulo enai unu e vara toma. Ia ese Dirava e noia ia e hahisiava “ginigini” bamona hekwakwanaina baine kokia. Nega toi Paulo na una hekwakwanai e ḡuriḡurilaia. Iehova ese ena ḡuriḡuri e haerelai? Oibe, to dia ia e laloa dalanai. Iehova ese iena hekwakwanai na se kokia, to goada e henia mai ena abidadama ida dounu Ia baine hesiai henia.​—2 Kor. 12:7-10.

6. Dahaka dainai nega haida ta laloamu Iehova ese eda ḡuriḡuri na se haerelaimu?

⁶ Ita danu eda ḡuriḡuri na be haerelaimu, to nega haida asita lalomu daladia ai unu be kara tomamu. Iehova na mai dibana edena dala ai ita na baine duruda. Iehova ese eda noinoi bona ta lalohadailaimu ḡaudia mo basine henimu, to unu e hereadiamu ḡaudia danu baine heni diba. (Efe. 3:20) Una dainai, eda ḡuriḡuri haeredia na ita asita lalomu negadia bona daladia ai be henimu.

7. Dahaka dainai reana ta ḡuriḡurilaimu ḡaudia baita haidaudia na namo? Haheitalai ba gwauraia.

⁷ Iehova ena ura ta lalopararalaiamu neganai, ta ḡuriḡurilai ḡaudia baita haidaudia na namo. Martin Poetzinger ena haheitalai aita laloa. Ia na e headava murinai, se daudau Nazi dibura kamepana ai e atoa. Matamanai, ia na Iehova e noia dibura kamepana amo baine lasi, unu amo adavana baine naria bona haroro ḡaukara baine karaia lou. To, wiki rua muridiai, ia na e itaia Iehova na dala ta se kehoa ia baine raka lasi. Una dainai e ḡuriḡuri e gwa: “Iehova, mani emu kara emu ura  lauegu ai na ba hadibagu.” Bena ia na una dibura kamepana ai ma tadikaka haida ese e lalohekwarahilaiva ḡaudia e haeordia. Idia momo na adavadia bona natudia daidiai e lalohekwarahiva. Bena tadikaka Poetzinger na ma e ḡuriḡuri e gwa: “Iehova, egu asainmen matamatana dainai na tenkiu henimumu. Ba durugu tadikakagu baina hagoadadia.” Laḡani 9 lalodiai ia na unu e kara toma!

8. Ta ḡuriḡurimu neganai dahaka baita laloatao na namo?

⁸ Namona na baita helalotao Iehova na mai ena ura bona ena nega heḡereḡerena ai be haḡuḡuruamu. Ia na e uramu hari ita e hahisihisidamu hekwakwanai iboudiai baine haoredia vaitani​—heḡereḡere disasta, gorere, bona mase. Iehova ese ena Basileia amo ena ura baine haḡuḡurua. (Dan. 2:44; Apok. 21:3, 4) To, una nega e nariamu lalonai, ia ese Satana na se kouamu tanobada baine lohiaia. b (Ioa. 12:31; Apok. 12:9) Bema Iehova ese hari ina negai hekwakwanai iboudiai be haorediamu, reana momo na be lalomu Satana ena lohia dalana na namo. Una dainai Iehova ese ena gwauhamata baine haḡuḡurudia negana ta nariamu lalonai, basitato ia ese ita na basine durudamu. Mani Iehova ese ita e durudamu daladia haida aita lalodia.

9. Ta uramu abi hidi baita kara negadiai Iehova ese ita be ede be duruda tomamu?

⁹ Iehova ese aonega e henidamu. Iehova na e gwauhamatamu ia ese aonega baine henida, unu amo abi hidi namodia baita kara. Bema ita baita karaiamu abi hidina na iseda mauri be haidaua vaitanimu, heḡereḡere baita headava eiava lasi, Dirava ena aonega baita abia na mai anina bada. (Iak. 1:5) Mani taihu ta ladana Maria ena ekspiriens aita laloa. c Ia na regula painia ḡaukarana e moalelaiava lalonai tadikaka ta ida e hedavari. Ia na e gwaumu: “Emai hetura karana e namo e laova lalonai, emai ura heni danu e bada. Na diba abi hidi ta baina karaia na namo. Una na nega momo na ḡuriḡurilaia. Na ura Iehova ese baine durugu, to na diba ia ese egu abi hidi na basine karaia.” Una taihu na e mamia Iehova ese iena noinoi, aonega baine henia totona na e haerelaia. Edena dala ai? Ia na iseda pablikeisin ai e hetahu bona atikol haida ai ena henanadai haeredia e davari. Bona sinana, abidadama taihuna ta, ena sisiba e badinadia. Una sisiba ese Maria e durua ena hamami baine haerodia namonamo. Dokonai, ia na abi hidi namona ta e karaia.

10. Filipi 4:13 heḡereḡerena, Iehova be dahaka be karamu ena hesiai taudia baine durudia totona? (Laulau danu ba itaia.)

¹⁰ Iehova ese goada e henidamu baita haheauka.  Iehova ese aposetolo Paulo e durua heḡereḡerena, ita danu goada baine henida diba hekwakwanai baita haheaukalai. (Filipi 4:13 ba duahia.) Mani Iehova ese tadikaka ta ladana Benjamin, na hekwakwanai aukadia lalodiai e durua dalana aita laloa. Kahirakahira ena matamata negana ibounai lalonai, Benjamin na ena ruma bese ida Africa refiuji kamepadia lalodiai e noho. Ia na e gwa: “Lau na Iehova na ḡuriḡuri henia loulou, na noia goada baine henigu ia e hamoalemu ḡaudia baina karaia totona. Iehova ese egu ḡuriḡuri e haerelaia dalana na, ia ese lalomaino e henigu, goada e henigu dounu baina haroro, bona pablikeisin idauidau e henigu lauma dalanai baina goada totona. Danu tadikaka taihu edia ekspiriens na duahi bona bae haheauka totona Iehova ese e durudia dalana na dibaia neganai, unu ese e hagoadagu Iehova baina badinaia.”

11-12. Edena dala ai Iehova ese tadikaka taihu e ḡaukaralaidiamu eda ḡuriḡuri baine haerelai? (Laulau danu ba itaia.)

¹¹ Iehova ese tadikaka taihu e ḡaukaralaidiamu. Iesu na ena mauri do se bouboulaia hanuaboina ai e ḡuriḡuri goadagoada. Ia na se uramu Dirava ladana e hadikaiamu tauna bamona bae laloa dainai, Iehova e noia una baine koua. To Iehova na unu se kara toma, Ia ese Iesu iduruna totona aneru ta e siaia bena e hagoadaia. (Luka 22:42, 43) Iehova ese ita baine hagoadada totona tadikaka ta o taihu ta e ḡaukaralaiamu ita e rini henidamu eiava e vadivadi henidamu. Ita iboudai na dala baita tahu ‘hereva namodia’ amo tadikaka taihu baita hagoadadia.​—Her. 12:25.

¹² Taihu ta ladana Miriam ena ekspiriens aita laloa. Ia adavana na e mase bona wiki haida muridiai, ia na sibona ruma ai dainai, e lalohisihisi bona e lalometau. E tai momova bona e ura ta baine hereva henia. Ia na e gwa: “Lalogu na se goadava ta baina rini henia, una dainai Iehova na ḡuriḡuri henia. Mai taigu ida na ḡuriḡuriva lalonai, egu fon e rini. Una na elda ta bona ia na turamai namona ta.” Miriam na una elda mai adavana ida ese e hagoadaia. Ia na e diba Iehova ese una tadikaka e ḡaukaralaia.

13. Edena dala ai Iehova ese ia asie tomadiho heniamu taudia amo eda ḡuriḡuri e haerelaimu?

 ¹³ Iehova ese ia asie tomadiho heniamu taudia e ḡaukaralaidiamu. (Her. 21:1) Nega haida, Iehova na ia asie tomadiho heniamu taudia amo ena taunimanima edia ḡuriḡuri e haerelaimu. Heḡereḡere, ia ese King Aratasasta e ḡaukaralaia Nehemia ena noinoi ḡauna e heni. Nehemia ena ura na baine lou lao Ierusalem bona hanua baine haginia lou. (Neh. 2:3-6) Hari ina negai danu, Iehova ese ia asie tomadiho heniamu taudia baine ḡaukaralaidia diba, heduru ta uramu negadiai bae duruda totona.

14. Soo Hing ena ekspiriens ese oi be ede e hagoadamu tomamu? (Laulau danu ba itaia.)

¹⁴ Taihu ta Soo Hing na e mamia Iehova ese ia iduruna totona ena dokta e ḡaukaralaia. Una taihu natuna merona na mai ena gorere haida. Bona aksiden badana ta enai e vara dainai, ia bae naria totona taihu adavana ida na moni ḡaukara amo e doko. Una dainai, edia moni na dia heḡereḡere. Soo Hing na e gwa, e mamia baine haheauka na auka. Ena hemami ibounai na Iehova enai e gwauraia hedinarai, bona e noia baine durua. Edia dokta na e ura dala ta baine tahua, taihu bona ena ruma bese baine durudia. Iena heduru dainai idia na gavamani amo heduru e abi bona noho gabuna namona ta e davaria. Una murinai, Soo Hing na e gwa: “Iehova ese e durumai dalana na a itaia. Momokani ia na ‘ḡuriḡuri ikamonaina Diravana.’”​—Sal. 65:2.

15. Dahaka ese taihu ta e durua dainai e laloparara Dirava ese ena ḡuriḡuri na e haerelaidia?

¹⁵ Iehova ese eda ḡuriḡuri na dia dala idau hereadia ai e haerelaidiamu. To ita iduruda dalana ai e haerelaimu unu amo ia baita badinaia hanaihanai. Una dainai Iehova ese emu ḡuriḡuri baine haerelai daladia ba haerodia. Taihu ta ladana Yoko na e mamia Iehova ese ena ḡuriḡuri na se haerelaiva, to gabeai Iehova enai e noinoilai ḡaudia na ena noutbuk ai e tore. Nega taina e daudau murinai, ena noutbuk e itaia lou bona e diba ena ḡuriḡuri momo, e laloboio ḡaudia danu, na Iehova ese e haerelai. Namona na dina ta ta nega baita ato, Iehova ese eda ḡuriḡuri e haerelaimu daladia baita haerodia.​—Sal. 66:19, 20.

16. Eda ḡuriḡuri karana ai abidadama be ede baita hahedinaraia toma? (Heberu 11:6)

¹⁶ Abidadama na dia Iehova ta ḡuriḡuri heniamu  neganai mo baita hahedinaraia, to e haerelaimu dalana ai danu baita abidadama. (Heberu 11:6 ba duahia.) Mani Mike bona adavana Chrissy edia haheitalai aita laloa. Idia na e ura Betele ai bae ḡaukara. Mike na e gwa: “Laḡani momo lalodiai ai ese Betele aplikeisen a hahonua bona Iehova enai a ḡuriḡurilaia loulou, to se boirimai.” Mike bona Chrissy na e abia dae momokani Iehova ese ena hesiai ḡaukara lalonai idia baine ḡaukaralaidia dalana na mai dibana namonamo. Una dainai idia na pablisa dia momo gabudia ai regula painia ḡaukara e goadalaia bona konstraksin ḡaukaradia ai e heduru. Hari idia na seket ḡaukarana e karaiamu. Mike na e gwa: “Iehova na dia hanaihanai ita ese ta lalomu daladia ai eda ḡuriḡuri e haerelaimu, to dala namo hereadia ai e haerelaimu.”

17-18. Salamo 86:6, 7 ese dahaka e hadibadamu?

¹⁷ Salamo 86:6, 7 ba duahidia. Salamo e torea tauna David na e diba momokani Iehova ese ena ḡuriḡuri e kamonai bona e haerelai. Oi danu unu bavabidadama toma. Ina atikol ai tame herevalai haheitalaidia ese e hadibadamu, Iehova ese aonega bona goada na be henidamu baita haheauka totona. Ia ese tadikaka taihu bona ia asie tomadiho heniamu taudia danu baine ḡaukaralaidia diba dala haida ai bae duruda.

¹⁸ Ena be Iehova na dia hanaihanai ita ta lalomu dalanai eda ḡuriḡuri e haerelaimu, to ta dibamu ia ese na be haerelaimu. Ia ese nega korikori ai heduru maorona be henidamu. Una dainai abidadama ai ba ḡuriḡuri, bona bavabia dae Iehova ese hari oi na be narimumu bona tanobada matamatana ai “mauri ḡaudia iboudiai” edia ura ḡaudia na be henimu.​—Sal. 145:16.