1. Ita momo be dahaka ḡau daidiai ta hekwarahimu?

 OI BE lauma dalana ai tahua ḡauna ta vada o atoa to ihaḡuḡuruna ai o hekwarahimu, a? b Bema oibe, oi na dia sibomu, ma haida ediai danu unu e vara toma. Heḡereḡere, Philip na e ura ena ḡuriḡuri karana baine hanamoa bona baine karaia hanaihanai, to e hekwarahiva nega baine ato baine ḡuriḡuri. Erika ena tahua ḡauna na haroro heboudia ai baine kau haraḡa, to nega momo na e leitiva. Tomáš na e ura Baibul ibounai baine duahia ore. Ia na e gwa: “Lau ese Baibul duahiduahi na asina moalelaiava. Nega toi na tohoa to Levitiko ai dokova.”

2. Dahaka dainai basita lalomanoka bema eda tahua ḡauna ta do asita haḡuḡurua?

² Bema hari oi na mai emu tahua ḡauna ta to do so haḡuḡurua, basio lalomanoka. Badina tahua ḡauna maraḡina ta ihaḡuḡuruna danu nega bada be abiamu bona mai hekwarahina. Emu tahua ḡauna o uramu ba haḡuḡurua ese e hahedinaraiamu oi ese emu hetura karana Iehova ida na o laloa badamu bona o uramu mai kudoumu idoinai ida ia ba hesiai henia. Iehova ese emu hekwarahi na e laloa badamu. Momokani, ia na e uramu oi ba karaia diba ḡauna ba karaia. (Sal. 103:14; Mika 6:8) Una dainai, emu noho dalana heḡereḡerena ai ba haḡuḡurua diba tahua ḡauna ta bavabia hidi. Una o abia hidimu neganai, dahaka ba kara ba haḡuḡurua totona? Mani dala haida aita herevalai.

3. Dahaka dainai eda ura baita habadaia na mai anina bada?

³ Ita ese lauma dalanai ta ato tahua ḡaudia ihaḡuḡurudia urana baita hagoadaia na mai anina bada. Badina una ura be goadamu neganai, baita ḡaukara goadamu eda tahua ḡauna baita haḡuḡuruamu. Una ura na lai ida baita haheḡereḡerea. Lai ese dingi ta e doriamu e lao heniamu gabunai baine kau totona. Bema lai na dounu e toamu, dingi e haheauamu tauna na e uramu bainela gabunai be kaumu. Bona lai be goadamu neganai ia na be kau haraḡamu. Una heḡereḡerena, eda ura be goadamu neganai, eda tahua ḡaudia na baita haḡuḡurudiamu. El Salvador ai, tadikaka David na eto: “Emu ura be goadamu neganai, bo ḡaukara goadagoadamu bona ḡau ta ese basine koumu emu tahua ḡauna ba haḡuḡurua.” Una dainai, dahaka ba kara diba emu ura ba hagoadaia totona?

4. Dirava enai dahaka baita noia? (Filipi 2:13) (Laulau danu ba itaia.)

⁴ Eda ura baita hagoadaia totona baita ḡuriḡuri. Iehova ese ena lauma amo emu ura baine hagoadaia diba, emu tahua ḡauna ba haḡuḡurua totona. (Filipi 2:13 ba duahia.) Nega haida ita na tahua ḡauna ta ta atoamu badina dibada unu baita kara toma na maoro. To reana ihaḡuḡuruna urana na dia goada. Uganda ai, taihu ta ladana Norina enai na unu e vara toma. Iena tahua ḡauna na Baibul stadi ta baine karaia, to ena ura na dia goada badina e mamiava ia na dia heḡereḡere ta baine hadibaia. Dahaka ese e durua? Ia na e gwa: “Dina iboudiai Iehova na noiava baine durugu Baibul stadi ta ikarana urana baina habadaia totona, bena egu ḡuriḡuri heḡereḡerena na ḡaukara goada egu hahediba dalana na hanamoa. Hua haida muridiai, egu ura na e goada, bona Baibul stadi rua na hamatamadia.”

5. Dahaka baita haerodia karana ese eda ura baine hagoadaia?

⁵ Iehova ese oi daimu ai e kara ḡaudia ba haerodia. (Sal. 143:5) Aposetolo Paulo na Iehova ena hebogahisi karana ia enai e haeroa, bona una ese e hagoadaia dainai Iehova ena ḡaukara e goadalaia. (1 Kor. 15:9, 10; 1 Tim. 1:12-14) Una heḡereḡerena, Iehova ese oi daimu ai e kara ḡaudia bo haerodiamu neganai, emu tahua ḡauna ba haḡuḡurua urana na be goadamu. (Sal. 116:12) Honduras ai taihu ta ena tahua ḡauna na baine regula painia. Mani ia e durua ḡauna aita laloa. Ia na eto: “Iehova ese e lalokau henigu bada dalana na haeroa. Ia ese e durugu ena taunimanima na davaridia. Ia ese e lalogu badamu bona e gimagumu. Unu na haerodia neganai, egu lalokau ia enai na e goada bona painia ḡaukara baina karaia urana na e bada.”

6. Dahaka ese danu baine duruda eda ura baita hagoadaia?

⁶ Emu tahua ḡauna ihaḡuḡuruna ena namo ba lalodia. Erika, matamanai tame herevalaia  taihuna, ena tahua ḡauna na haroro grup ai baine kau haraḡa. Mani ia e durua ḡauna aita laloa. Ia na e gwa: “Na laloparara haroro ḡaukara ai na leitiva dainai ḡau namodia momo na readiava. To bema baina kau haraḡa neganai, tadikaka bona taihu baina hedavari henidia bona baia hebamo heheni diba. Danu heduru herevadia baina kamonai diba bona unu ese bae durugu egu haroro ḡaukara baina hanamoa bona baina moalelaia.” Erika na baine haroro grup ai baine kau haraḡa ena namo e laloa bada, bona una ese e durua ena tahua ḡauna e haḡuḡurua. Oi be ededia hahenamo ba lalodia diba? Bema oiemu tahua ḡauna na Baibul ba duahia eiava ba ḡuriḡuri, unu ese emu hetura karana Iehova ida baine hagoadaia daladia ba lalo. (Sal. 145:18, 19) Bema oiemu tahua ḡauna na Kristen kara namona ta ba hahedinaraia, una ese emu hetura karana ma haida ida baine hanamoa dalana ba laloa bada. (Kol. 3:14) Namona na emu tahua ḡauna o uramu ba haḡuḡurua badidia idauidau ba toredia diho, bona hanaihanai una list ba sekea. Tomáš, matamanai tame herevalaia tadikakana, na e gwa: “Lau ese tahua ḡauna ta baina haḡuḡurua badidia na lalomu neganai, na ḡaukara goadamu una tahua ḡauna baina haḡuḡurua.”

7. Dahaka ese Julio bona adavana e durudia edia tahua ḡauna e haḡuḡurua?

⁷ Emu tahua ḡauna ihaḡuḡuruna ai bae hagoadamu taudia ba bamodia. (Her. 13:20) Julio bona adavana ese edia hesiai ḡaukara bae habadaia totona e durudia ḡauna mani a laloa. Julio na e gwa: “Ai ese emai tahua ḡauna baia haḡuḡurua totona bae hagoadaimai tura namodia a abidia hidi, bona emai tahua ḡauna na ida a herevalaia. Idia momo na tahua ḡaudia unu bamodia vada e haḡuḡuru, una dainai heduru herevadia momo e henimai. Turamai ese danu e nanadaimaiva emai plen be ede bamona, bona heduru a urava negadia ai e durumaiva.”

8. Dahaka baine vara diba bema tahua ḡauna ihaḡuḡuruna urana na lasi? (Laulau danu ba itaia.)

⁸ Vaia, dina haida ai ita na asita uramu ḡau ta baita karaia. Una anina be eda tahua ḡauna vada basita haḡuḡuru diba, a? Lasi. Ini aita haheitalaia toma: Lai ena goada ese dingi ta baine doria ela bona e lao heniamu gabuna ai baine kau. To, lai ena goada na e idauidaumu, bona dina haida ai, lai na se toamu. Una anina be tari tauna ese dingi vada basine haheaua diba, a? Lasi, baine haheaua diba. Heḡereḡere, dingi haida be mai edia mouta, bona ma haida be mai edia bara o kalo. Dingi itarina tauna ese mouta o bara baine ḡaukaralaia diba dingi baine haheaua ela bona e lao heniamu gabunai baine kau. Ḡau ta baita karaia urana na lai heḡereḡerena. Nega haida, eda tahua ḡauna ihaḡuḡuruna urana na be goadamu, a nega haida be lasi. Una dainai bema ita na ta uramu negadiai mo eda tahua  ḡauna baita haḡuḡurua tohomu, una na basine varamu. Dingi itarina tauna na dala haida e ḡaukaralaimu bainela gabunai baine kau totona, una heḡereḡerena dala haida baita ḡaukaralai diba eda tahua ḡauna baita haḡuḡurua. Ena be una na auka, to eda tahua ḡauna baita haḡuḡuruamu neganai baita moalemu. Baita kara ḡaudia do asita herevalai ai, mani henanadai ta do aita herevalaia.

9. Bema eda tahua ḡauna ihaḡuḡuruna urana na lasi, siboda baita hedori be namo, a? Ba herevalaia.

⁹ Iehova na e uramu ita na mai eda moale bona ura ida ia baita hesiai henia. (Sal. 100:2; 2 Kor. 9:7) Una dainai ena be eda ura na dia goada to dounu baita hekwarahi eda tahua ḡauna baita haḡuḡurua, a? Aposetolo Paulo ena haheitalai aita laloa. Ia na eto: “Sibogu tau-anigu na tutuamu, na ḡuiamu.” (1 Kor. 9:25-27) Paulo na sibona e hedori kara maorona baine karaia, ena be una baine karaia urana na lasi. Iehova ese Paulo ena hesiai ḡaukara be e abia dae, a? Oibe! Bona Iehova ese ena hekwarahi na e hanamoa.​—2 Tim. 4:7, 8.

10. Ena be tahua ḡauna ta ihaḡuḡuruna urana na lasi, to baita ḡaukara goada ena namo be dahaka?

¹⁰ Ena be tahua ḡauna ta ihaḡuḡuruna urana na lasi, to baita ḡaukara goadamu neganai, Iehova na be moalemu. Ia na e moalemu badina ena be una na dia ita ese ta ura heniamu ḡaukarana, to mai dibana ta karaiamu badina na ia ta lalokau heniamu. Iehova ese Paulo e hanamoa heḡereḡerena, ita danu be hanamodamu. (Sal. 126:5) Bona ita e hanamodamu daladia baita itamu neganai, una ese eda ura na be hagoadaiamu. Poland ai taihu ta ladana Lucyna na e gwa: “Nega haida, na hesikumu negadiai na asina uramu baina haroro. To, na haroromu murinai na mamiamu moalena na harihari ḡauna namo hereana ta.” Una dainai dahaka baita kara diba bema eda tahua ḡauna ihaḡuḡuruna urana na lasi?

11. Edena dala ai Iehova ese baine duruda baita boga-auka?

¹¹ Baita ḡuriḡuri baita boga-auka totona. Boga-auka na ta ese sibona ena hemami bona kara baine biagudia karana. Nega momo una hereva anina na, kara dikana ta basita karaia totona siboda baita hebiagu. To danu, baita boga-auka na namo bema ta uramu kara namona ta baita karaia, eiava ḡaukara ta na auka o ikarana urana na lasi. Ba helalotao, boga-auka na lauma huahuana ta, una dainai Iehova ba noia ena lauma helaḡa amo baine durumu, una mai anina bada karana ba hahedinaraia totona. (Luka 11:13; Gal. 5:22, 23) David, matamanai tame herevalaia tadikakana, na ḡuriḡuri karana ese e durua dalana e herevalaia. Iena ura na sibona ena stadi baine karaia hanaihanai. Ia na eto: “Lau na Iehova na noia baine durugu baina boga-auka. Iena heduru dainai, stadi program namona ta na hamatamaia bona hanaihanai na karaiamu.”

12. Edena dala ai Kohelete 11:4 ese e durudamu eda tahua ḡauna baita haḡuḡurua?

¹² Nega namona na basio naria. Ina tanobada ai, nega namona ta na basita davariamu. Bema nega namona baita nariamu eda tahua ḡauna na basita haḡuḡuruamu. (Kohelete 11:4 ba duahia.) Tadikaka ta ladana Dayniel na e gwa: “Nega namona ta na lasi. Una dainai basita nari to ḡau ta baita karaia na namo.” Uganda ai tadikaka ta ladana Paul ese basita halahe badina ta e herevalaia, eto: “Ḡau ta ta karaiamu neganai, ena be una na auka, to Iehova ese be duruda dibamu.”​—Mal. 3:10.

13. Tahua ḡaudia maraḡidia baita ato edia namo be dahaka?

¹³ Tahua ḡauna maraḡina amo ba matama. Nega haida eda tahua ḡauna baita haḡuḡurua na auka. Bema oiemu ai una e varamu, tahua ḡaudia maraḡidia bavato diba, a? Bema emu tahua ḡauna na, kara namona ta ba  hahedinaraia, dala maraḡidia ai una kara ba hahedinaraia guna. Heḡereḡere, bema emu tahua ḡauna na Baibul ibounai ba duahia, emu sediual ai emu duahiduahi negana ba hakwadoḡia diba. Tomáš, paragraf matamanai tame herevalaia tadikakana, enai na e auka laḡani ta lalonai Baibul baine duahia ore. Ia na e gwa: “Lau na, na laloparara na abia hidi duahiduahi negana na lata herea. Una dainai, na tohoa lou, dina ta ta ai karoa ta kahana baina duahia bona baina laloa dobu. Unu amo egu duahiduahi karana na, na moalelaia.” Tomáš’ ena moale na e bada dainai, ena duahiduahi negana na e halataia. Gabeai, ia ese Baibul ibounai e duahia. c

14. Ita be koudamu ḡaudia haida be dahaka?

¹⁴ Ena be eda tahua ḡauna baita haḡuḡurua urana na goada eiava baita boga-aukamu, to ḡau haida ese dounu be koudamu. Heḡereḡere, ‘e vara kavamu’ ḡaudia ese eda nega be haoreamu dainai, ita na asi eda nega eda tahua ḡauna baita haḡuḡurua. (Koh. 9:11) Reana hekwakwanai ta dainai baita lalomanokamu o eda goada na be oremu. (Her. 24:10) Danu ita na dia ḡoevadae dainai, kerere baita karamu bona eda tahua ḡauna ihaḡuḡuruna na be aukamu. (Roma 7:23) Eiava baita hesikumu. (Mat. 26:43) Dahaka ese baine duruda ita e koudamu ḡauna baita hanaia?  

15. Dahaka dainai basita hesiku bema ḡau ta ese e koudamu eda tahua ḡauna baita haḡuḡurua? (Salamo 145:14)

¹⁵ Oi e koumumu ḡauna ta dainai basio laloa emu tahua ḡauna na basio haḡuḡuruamu. Baibul na e gwaumu hekwakwanai o metau na baita davari louloumu. To danu e hahedinaraimu, Iehova ena heduru amo eda tahua ḡauna na baita haḡuḡurua diba. (Salamo 145:14 ba duahia.) Philip, matamanai tame herevalaia tadikakana na e gwa: “Nega hida  egu tahua ḡauna asina haḡuḡurua na asina laloa momomu. To na ḡaukara goadamu egu tahua ḡauna baina haḡuḡurua negadia hari na lalo badamu.” David, matamana ai tame herevalaia tadikakana, na e gwa: “Egu ai hekou ḡaudia e varamu neganai, na lalomu una na nega namona Iehova enai egu lalokau baina hahedinaraia.” Oibe, ena be hekou ḡaudia bae vara, to emu tahua ḡauna ihaḡuḡuruna totona bo hekwarahimu neganai, o hahedinaraiamu oi na o uramu Iehova ba hamoalea. Iehova ese emu hekwarahi be itaiamu neganai be moale badamu!

16. E koudamu ḡauna amo dahaka ta dibamu?

¹⁶ Oi e koumumu ḡauna amo diba bavabi. Reana ba lalo, una hekou ḡauna be ede e vara toma bena ba henanadai, ‘Dahaka baina kara ina basine vara lou totona?’ (Her. 27:12) To nega haida, e koudamu ḡaudia daidiai baita laloamu ita na dia heḡereḡere eda tahua ḡauna baita haḡuḡurua. Bema unu o lalo tomamu, namona na emu tahua ḡauna ba lalohadailaia lou, unu amo bo dibamu bema una bo haḡuḡuruamu eiava lasi. d Ena be emu tahua ḡauna na basio haḡuḡuruamu, badina oi emu ai na dia heḡereḡere, Iehova na basine lalohisihisimu.​—2 Kor. 8:12.

17. Dahaka dainai guna ta haḡuḡuru ḡaudia baita lalodia tao?

¹⁷ Guna o haḡuḡuru ḡaudia ba lalodia tao. Baibul na e gwaumu: “Dirava na asi ena kara gageva-gageva; emui ḡaukara . . . basine lalo boio.” (Heb. 6:10) Una dainai oi danu, guna o haḡuḡuru ḡaudia na basio lalo boio. Heḡereḡere emu hetura karana Iehova ida, ma haida ediai Iehova o herevalaia karana, eiava emu bapatiso. Iehova ihesiai henina ai o ato tahua ḡaudia o haḡuḡurudia heḡereḡerena, hari danu emu tahua ḡauna na bo haḡuḡurua dibamu.​—Fili. 3:16.

18. Eda tahua ḡauna ihaḡuḡuruna ai dahaka baita laloatao na namo? (Laulau danu ba itaia.)

¹⁸ Dingi itarina tauna na mai moalena ida e lao heniamu gabunai e kaumu heḡereḡerena, Iehova ena heduru amo emu tahua ḡauna na ba haḡuḡurua diba. To ba helalotao, dingi itarina taudia momo danu edia laolao na e moalelaiamu. Una heḡereḡerena, lauma dalanai o atomu tahua ḡaudia ihaḡuḡuruna ai o ḡaukara goadamu lalonai, Iehova ese oi e durumumu bona e hanamomumu daladia ba lalodia tao, unu amo bo moalemu. (2 Kor. 4:7) Basio hesikumu neganai, hahenamo momo bo abimu.​—Gal. 6:9.