STADI ATIKOL 21
ANE 50 Dirava Ena Lalokau Dalana
Bavadavaia Tauna Ba Davaria Dalana
“Hahine namona na daika ese baine davaria? Ia ese herahera nadinadidia namo-hereadia e hereadiamu.”—HER. 31:10.
POINT BADANA
Baita itaiamu edena dala ai Baibul ena hahekau herevadia ese ta be durua dibamu baine adavaia tauna baine davaria, bona kongrigeisin taudia ese singul tadikaka taihu be ede bae durudia toma.
1-2. (a) Singul tadikaka taihu do asie hebamo lalonai mai anina bada ḡaudia be dahaka? (b) “Hebamo” anina be dahaka? (“Hereva Anina” ba itaia.)
OI O uramu ba headava, a? Singul tadikaka bona taihu momo, eregabe bona iahu, na e uramu bae headava. To, do so headava lalonai, namona na emu hetura karana Iehova ida na goada, sibomu emu kara na mai dibamu namonamo, bona namona na oi na heḡereḡere emu ruma bese na moni dalana ai ba naria. a (1 Kor. 7:36) Unu bo kara tomamu neganai oiemu headava maurina na bo moalelaiamu.
2 To, nega haida o uramu bavadavaia tauna ba davaria na auka. (Her. 31:10) Bona ena be bavadavaia tauna ta do davaria bona o uramu ba dibaia namonamo, to reana o daradaramu ia be ede ba hadibaia toma. b Ina atikol ai ita ese baita itaiamu singul Kristen taudia be dahaka bae kara unu amo e ura heniamu tadikakana o taihuna bae hereva henia. Danu, kongrigeisin ai haida ese e uramu bae headava singul Kristen taudia bae durudia daladia baita dibamu.
BAVADAVAIA TAUNA MAORONA BAVABIA HIDI
3. Singul Kristen taudia ese bae lalo henanadai haida be dahaka?
3 Bema o uramu ba headava, namona na bavadavaia tauna ena kara ba diba namonamo guna gabeai ba hebamo. c Unu amo bavadavaia tauna maorona bavabia hidi. To ḡau badana na, bavabia hidi tauna o hahinena na e bapatiso. (1 Kor. 7:39) To basioto e bapatiso dainai, reana ia na oi ese bavadavaia tauna maorona. Una dainai, sibomu ba henanadai: ‘Egu tahua ḡaudia be dahaka? Na uramu baina adavaia tauna enai baina ita karadia haida be dahaka? Lauegu lalohadai be maoro eiava?’
4. Singul taudia haida be dahaka e ḡuriḡurilaimu?
4 Momokani, ta na e uramu baine headava neganai ia ese una na e ḡuriḡurilaiamu. (Fili. 4:6) Oibe, Iehova ese ta na se gwauhamata heniamu daika baine adavaia. To ia ese oi na e lalomu badamu, bona be durumumu bavadavaia tauna ta ba davaria totona. Una dainai emu lalohadai bona hemami na Iehova enai ba gwaurai hedinarai. (Sal. 62:8) Iehova ba noia baine durumu ba haheauka bona aonega baine henimu. (Iak. 1:5) United States ai, singul tadikakana ta ladana John d na e gwa: “Na uramu baina adavaia tauna enai baina ita karadia na Iehova na hamaorolaiamu, bona Iehova na noiamu dala baine kehoa taihu unu bamona ta ida baina hedavari. Danu Iehova na noiamu baine durugu egu kara baina hanamo, unu amo tau namona ai bainala.” Sri Lanka ai, taihu ta ladana Tanya na e gwa: “Lau na bamogu ta do na tahuamu lalonai, lau ese Iehova na noiamu baine durugu unu amo ienai baina tabekau, basina lalomanoka, bona baina moale.” Ena be bamomu ta do asio davaria, to Iehova na e gwauhamata baine durumu bona basine rakatanimu.—Sal. 55:22.
5. Ededia negai Iehova e lalokau heniamu singul Kristen taudia ida ba hedavari totona? (1 Korinto 15:58) (Laulau danu ba itaia.)
5 Baibul ese e hagoadadamu ‘Lohiabada ena ḡaukara lalonai baita goada balaheni.’ (1 Korinto 15:58 ba duahia.) Bema oi na Iehova ihesiai henina karana ai bo bisimu, bona tadikaka bona taihu idauidau bo bamodiamu, oi ese hebamo namona bo moalelaiamu bona Iehova e lalokau heniamu singul Kristen taudia haida ida bo hedavarimu. Bona bema bo hekwarahimu Iehova ba hamoalea, moale korikorina bo davariamu.
Bema Iehova ihesiai henina karana ai bo bisimu, bona tadikaka bona taihu idauidau ida bo hebamomu, reana o uramu ba adavaia tauna bo davariamu (Paragraf 5 ba itaia)
6. Singul Kristen taudia ese bae laloatao ḡauna be dahaka?
6 Ba laloatao ḡauna na ina: Dia namo emu nega bada herea ba haorea o uramu bavadavaia tauna ba tahua totona. (Fili. 1:10) Herevana oi na headava eiava singul, to moale korikorina na Iehova ihetura henina karana amo bo davariamu. (Mat. 5:3) Bona oi do so headava lalonai oi ese nega bada ba ḡaukaralaia diba, emu hesiai ḡaukara ba habadaia totona. (1 Kor. 7:32, 33) Emu nega ba ḡaukaralaia namonamo. United States ai, taihu ta ladana Jessica na kahirakahira laḡanina 40 neganai e headava, ia na e gwa: “Lau na hesiai ḡaukara ai na bisiva, bona una ese e durugu ena be una negai do asina headava to na moaleva.”
NEGA BAVATO TA ENA KARA BA DIBAIA TOTONA
7. Oi ese o ura heniamu tauna enai emu ura do so gwauraia neganai, dahaka dainai ena kara ba dibadia guna na namo? (Hereva Lada-isidia 13:16)
7 Bema o laloamu oi ese tadikaka o taihu namona ta vada o davaria be ede bamona? Oi be maoromaoro ienai emu hemami bo gwauraiamu, a? Baibul na e gwa, laloparara tauna na mai aonegana ida ḡau iboudiai e karamu. (Hereva Lada-isidia 13:16 ba duahia.) Una dainai aonega karana na kongrigeisin heboudia negadiai, eiava moale negadiai, oi ese o ura heniamu tadikaka o taihu ena kara na ba haero namonamo. Netherlands ai, tadikaka ta ladana Aschwin na e gwa: “Emu hemami ta enai na baine goada haraḡa diba, to una hemami na ma baine ore haraḡa diba. Bema nega bo atomu, oi ese o ura heniamu tadikaka o taihu ena kara bo haero namonamomu, oi ese abi hidi maorona bo karaiamu.” Unu bo kara tomamu neganai, reana bo lalopararamu o ura heniamu tauna na dia bavadavaia tauna maorona.
8. Edena dala ai oi ese o ura heniamu tauna ena kara ba haero namonamo diba? (Laulau danu ba itaia.)
8 Edena dala ai oi ese ta ena kara na ba haeroa namonamo diba? Kongrigeisin heboudia ai bona moale negadia ai, oi ese ena lauma dalana, bona haida e kara henidiamu dalana na bo itaiamu. Ia ese e bamodiamu taudia edia kara be ede bamona, bona ia be dahaka e herevalai momomu? (Luka 6:45) Iena tahua ḡaudia be oiemu ida e heḡereḡere, a? Iena kongrigeisin ai ia e dibaia namonamo elda taudia, eiava lo Kristen taudia haida ba nanadaidia diba. (Her. 20:18) Reana ba nanadaidia, ia ese tamana bona sinana be ede e kara henidia tomamu. (Ruta 2:11) Oi ese iena kara o haero namonamomu lalonai, namona na ena hemami ba matauraia. Anina na dia nega iboudiai ena mauri ai e varamu ḡaudia iboudiai ba diba.
O ura heniamu tauna do so noia lalonai, ena kara ba dibadia guna na namo (Paragraf 7-8 ba itadia)
9. Oi ese o ura heniamu tauna do so hereva henia lalonai, dahaka ba lalopararalaia be namo?
9 Oi ese ta ena kara be ede daudauna ba haeroa, bena gabeai oiemu ura ia enai ba gwauraia hedinarai? Bo haraḡamu neganai, reana una tadikaka eiava taihu na be laloamu oi na so lalohadai namonamo bena abi hidi ta o karaia. (Her. 29:20) To, bema basio haraḡamu, reana una tadikaka o taihu na be laloamu oi na o daradaramu abi hidi ta ba karaia. (Koh. 11:4) Ta do so hereva henia neganai, basioto ia na vada bo adavaiamu. To ba laloatao ḡauna na, oi na vada o heḡaeḡae ba headava bona bo adavaiamu tauna na abi hidi maorona.
10. Bema oi na o dibamu ta ese e ura henimumu, to oi ese ia be so ura heniamu, dahaka ba kara be namo?
10 Bema o dibamu ta ese e ura henimumu bona e uramu emu kara baine dibadia namonamo, dahaka ba kara diba? Bema oi na so uramu ia ida ba hebamo, namona na emu kara amo ba hahedinaraia. Dia namo e ura henimumu tadikakana o taihuna ba koia, to namona na hereva momokani ba gwaurai.—1 Kor. 10:24; Efe. 4:25.
11. Tano haida ai, haida ese ta baine bamoa eiava baine adavaia tauna e tahuamu. Bema emu gabu ai una e varamu, dahaka ba kara?
11 Tano haida ai, tama sina eiava ma haida na singul taudia ese bae adavadia taudia e tahumu. Bona tano ma haida ai, singul taudia bae hebamo henidia taudia na ruma bese eiava turadia ese e tahumu, bena plen e karamu singul merona bona kekenina bae hedavari totona, unu amo bae itaia idia raruosi be heḡereḡere bae hebamo eiava lasi. Bema haida ese e noimumu ta ena hebamo eiava headava plen-na ba karaia, namona na una mero bona kekeni edia lalohadai ba tahu guna. Bema o laloamu bamona namona ta vada o davaria, namona na oi ese una tadikaka o taihu ena kara ba dibaia namonamo, bona ḡau badana na ba itaia ia be Iehova e lalokau heniamu eiava lasi. Mai anina bada ḡauna na, Iehova ihetura henina karana, badina una ese lada bada, moni, bona edukeisin namona e hereaia. To ba helalotao, namona na singul tadikaka bona taihu ese abi hidi bae karaia, idia be bae headava eiava lasi.—Gal. 6:5.
TA IDA BA HEBAMO DALANA
12. Edena dala ai o ura heniamu tauna ba hadibaia oi na o uramu ba hebamo?
12 Edena dala ai o ura heniamu tauna ba hadibaia oi na o uramu ba hebamo? e Namona na plen ba kara ia ida pablik gabuna ta ai, eiava telefon amo ba herevahereva. Emu hemami ba gwauraia hedinarai bona ba hadibaia oi ese ia o ura heniamu, bona o uramu ba hebamo. (1 Kor. 14:9) O hereva heniamu murinai, namona na nega ba henia baine lalohadailaia totona. (Her. 15:28) To, bema ia na se uramu ba hebamo, namona na ena abi hidi ba matauraia.
13. Bema ta ese oi e ura henimumu, dahaka ba kara be namo? (Kolose 4:6)
13 Bema ta ese oi e ura henimumu, dahaka ba kara be namo? Namona na ba diba una tadikaka eiava taihu ese oi baine hereva henimu na auka, to lalona e hagoadaia oi baine hereva henimu dainai, ba kara namo henia bona ba matauraia. (Kolose 4:6 ba duahia.) Bema o laloamu oi na dia heḡereḡere ia ida ba hebamo, ba hamaoroa na namo. To, emu haere na ba heni haraḡa. (Her. 13:12) Bema oi na so uramu ba hebamo, namona na badina ba gwauraia hedinarai namonamo. Austria ai, tadikaka ta ladana Hans na taihu ta ese e noia neganai, ia ese e haere henia dalana mani aita itaia. Hans na e gwa: “Emai herevahereva lalonai, ia ida basina hebamo badina na hamaoroa hedinarai. Lau na unu na kara toma, badina dia namo baine laloa ai raruosi na vaira negai baia hebamo dibamu. Emai herevahereva murinai, lau na ia enai egu hereva bona kara nahuadia na tohova.” Bema oi danu o uramu ia ida ba hebamo, namona na emu hemami ba gwauraia hedinarai bona emui hebamo lalonai ba kara ḡaudia na ba herevalai namonamo. To kastom bona noho daladia na idauidau dainai, emui herevahereva lalodiai unu danu ba herevalai.
EDENA DALA AI HAIDA ESE SINGUL KRISTEN TAUDIA BAE DURUDIA DIBA?
14. Edena dala ai singul Kristen taudia baita durudia diba?
14 E uramu bae headava singul Kristen taudia be ede baita durudia toma? Dala ta be eda hereva nahuadia baita toho. (Efe. 4:29) Siboda baita henanadai diba: ‘E uramu bae headava singul taudia be na hevasehalaidiamu, a? Singul tadikaka ta bona singul taihu ta e herevaherevamu neganai, lau be haraḡa herea na gwaumu, idia na e heura hehenimu, a?’ (1 Tim. 5:13) Danu, singul Kristen taudia na do se headava dainai, asita uramu idia na bae laloa idia ediai ḡau ta na kerere, eiava asita lalodia badamu. Tadikaka Hans na e gwa: “Tadikaka haida na e gwauva, ‘Oi laḡanimu na da bada, dahaka dainai do so headava?’ Hereva unu bamodia ese singul taudia e hahemaraidiamu, bona hereva unu bamodia dainai idia na be laloamu bae headava haraḡa na namo.” Una dainai dala baita tahu singul Kristen taudia baita hagoadadia!—1 Tes. 5:11.
15. (a) Roma 15:2 heḡereḡerena, bema ta na e uramu baita durua bamona ta baine tahua, baita laloa bada ḡauna be dahaka? (Laulau danu ba itaia.) (b) Vidio ai ededia point namodia haida o davari?
15 Bema ita na ta uramu tadikaka ta ese taihu ta baine adavaia be ede bamona? Baibul na e gwa, ma haida edia hemami baita lalo bada. (Roma 15:2 ba duahia.) Singul taudia momo na asie uramu ita ese bamodia baita tahu, bona ita ese una baita matauraia na namo. (2 Tes. 3:11) Haida na be uramu baita durudia, to ḡau ta do asita karaia lalonai, namona na idia edia amo gwaumaoro baita abi guna. f (Her. 3:27) Singul taudia haida be moale negadiai, e uramu bae adavaia tadikakana o taihuna bae tahua. Germany ai, singul taihu ta ladana Lydia na e gwa: “Reana una tadikaka bona taihu na moale negadiai ba boiridia, bona plen ba kara idia raruosi bae hedavari totona. Una murinai, idia bae hebamo eiava lasi abi hidina, na sibodia ese bae karaia.”
Moale negadia na nega namodia singul Kristen taudia bae hedavari totona (Paragraf 15 ba itaia)
16. Singul Kristen taudia ese bae laloatao ḡauna be dahaka?
16 Ita iboudai—ena be singul o headava—ese mauri namona baita moalelaia diba! (Sal. 128:1) Una dainai bema o uramu ba headava, to bavadavaia tauna ta do so davaria, namona na emu hesiai ḡaukara Iehova enai dounu ba goadalaia. Macao ai, taihu ta ladana Sin Yi na e gwa: “Paradaiso ai, bo adavaiamu tauna ida na bo noho hanaihanaimu, una dainai bema una nega bo haeroamu, bo itaiamu hari emu singul negana na kwadoḡi. Namona na emu singul negana ba moalelaia, bona ba ḡaukaralaia namonamo.” To bema oi na ta ida vada o hebamomu be ede bamona? Atikol gabena ai, emui hebamo karana ai abi hidi namodia ba kara daladia baita herevalaimu.
ANE 3 Dirava Na Lalokau
a Bema o uramu ba diba bema oi na heḡereḡere ba headava eiava lasi, jw.org ai ina atikol ba itaia, “Dating—Part 1: Am I Ready to Date?”
b HEREVA ANINA: Ina atikol bona atikol gabena ai, ita ese “hebamo” karana baita herevalaiamu, una nega lalonai tau bona hahine na bae hediba heheni namonamo unu amo bae diba idia be headava taudia namodia ai baela diba eiava. Tano haida ai, hebamo karana na e gwauraiamu ta e dibaiamu karana eiava loa hebou karana. Tau bona hahine e heura hehenimu neganai, idia na e hebamo matamamu bona e hediba hehenimu lalonai, idia ese abi hidi ta bae karaia, bema bae headava eiava edia hebamo bae hadokoa.
c Laloparara ihaharaḡana totona paragraf ta ta ai, ai ese baine headava tauna eiava tadikaka a ḡaukaralaia. To, taihu ese danu unu hahekau herevadia bae badina diba.
d Lada haida na a haidau.
e Tano haida edia kastom ai, tadikaka ese hebamo karana baine hamatamaia totona, taihu enai ena hemami e gwaurai hedinarai gunamu. To, taihu ese tadikaka enai ena hemami baine gwaurai hedinarai guna danu asi ena kerere. (Ruta 3:1-13) Diba ma haida bavabi totona, October 22, 2004 Awake! ai ina atikol ba itaia, “Young People Ask . . . How Can I Tell Him How I Feel?”
f Baola jw.org bona ina vidio ba itaia, Successful Fighters for the Faith—Single Christians.
