1-2. Haida ese hebamo karana be ede e laloa tomamu?

 MERO ta bona kekeni ta e hebamomu neganai, una na moale negana. Bema oi na ta ida o hebamomu oi na o uramu una nega na ba moalelaia. Guna e hebamo taudia momo ese edia hebamo na e moalelaia. Etiopia ai, taihu ta ladana Tsion a na e gwa: “Egu mauri ai na moalelaia negana ta na adavagu ida a hebamova negana. Una negai, ai na mai anina bada ḡaudia a herevalaiva bona a kiriva. Na moale badina na laloparara lau ese na lalokau heniamu tauna ta na davaria bona ia ese danu e lalokau henigumu.”

² Netherlands ai, tadikaka ta ladana Alessio na e gwa: “Adavagu ida a hebamova neganai ia na dibaiava dainai na moaleva, to una negai hekwakwanai haida danu a davari.” Ina atikol ai, ita na bae vara diba hekwakwanaidia bona Baibul ena hahekau herevadia haida baita herevalaimu, unu ese e hebamomu taudia be durudiamu abi hidi maorodia bae kara. Danu baita itaiamu edena dala ai kongrigeisin taudia ese e hebamomu taudia bae durudia.

HEBAMO BADINA KORIKORINA

3. Hebamo badina korikorina be dahaka? (Hereva Lada-isidia 20:25)

³ Ena be hebamo na mai moalena, to danu ia na mai anina bada negana, badina mero bona kekeni be durudiamu bae headava totona. Edia headava dinana ai, idia na Iehova vairanai be gwauhamatamu edia mauri dinadia iboudiai lalodiai bae helalokau heheni bona bae hemataurai heheni. Gwauhamata ta do asita karaia neganai, baita laloa namonamo na mai anina bada. (Hereva Lada-isidia 20:25 ba duahia.) Headava  gwauhamatana ikarana ai, unu baita kara toma na mai anina bada. Mero bona kekeni e hebamomu badina idia na e uramu bae hediba heheni namonamo bona abi hidi maorona bae karaia. Una abi hidi anina na ina, bae headava eiava edia hebamo bae hadokoa. Bema hebamo ta na baine dika, una ese se hahedinaraiamu idia na kerere ta e karaia. Una hebamo karana ese e durudia abi hidi ta e karaia.

4. Dahaka dainai hebamo karana ai lalohadai maorona baita abia na namo?

⁴ Dahaka dainai hebamo karana ai lalohadai maorona baita abia na mai anina bada? Singul taudia ese lalohadai maorona be abiamu neganai, idia ese basie adavaiamu tauna ida na basie hebamomu. Dia singul taudia ese mo lalohadai maorona bae abia, to ita iboudai ese hebamo badina korikorina baita lalopararalaia na namo. Haida na e laloamu, bema mero ta bona kekeni ta e hebamomu neganai idia na vada bae headava. Lalohadai unu bamona ese singul Kristen taudia e durudiamu eiava? United States ai, singul taihuna ta ladana Melissa na e gwa: “Tadikaka ta bona taihu ta e hebamomu neganai, haida na e lalomu idia na vada be headavamu. Una dainai, ena be e hebamomu taudia haida na mai dibadia idia na basie headavamu, to dounu e hebamomu. A haida be asie uramu bae hebamo. Una ese lalohekwarahi baine havaraia diba.”

BA HEDIBA HEHENI NAMONAMO

5-6. Mero ta bona kekeni ta e hebamomu lalonai, bae laloatao ḡauna be dahaka? (1 Petro 3:4)

⁵ Bema oi na o hebamomu, dahaka ese baine durumu abi hidi ta ba karaia totona? Ba hediba heheni namonamo. Bamomu ena kara haida na do so hebamo lalonai do dibadia. To hari oi na o uramu bamomu “lalonai e miamu ḡaudia eiava kudounai e miamu ḡaudia” ba dibadia namonamo. (1 Petro 3:4 ba duahia.) Unu na iena hetura karana Iehova ida, iena kara korikori, bona ena lalohadai. Taina ruana oi ese ini henanadai haeredia bo dibamu, heḡereḡere: ‘Na hebamo heniamu tauna be adavagu namonai be laomu eiava?’ (Her. 31:​26, 27, 30; Efe. 5:33; 1 Tim. 5:8) ‘Ai be baia helalokau hehenimu bona ta ta emai namo baia lalo badamu, a? Bona ta ta emai dika baia gwau taomu, a?’ b (Roma 3:23) O hediba hehenimu lalonai ina na ba laloatao: Bema ḡau  haida ai na so lalotamonamu, namona na ḡau haida ba haidau diba ba lalotamona totona.

⁶ O hebamomu lalonai dahaka danu ba diba na namo? Emui hemami do se goada lalonai, reana oi na bo uramu mai anina bada ḡaudia haida ba herevalai, heḡereḡere oi bamomu ena tahua ḡauna be dahaka? Ia be gorere haida o moni ena hekwakwanai e haheaukalaimu, a? Eiava guna e vara ḡauna ta ese ena lalohadai, hemami bona kara e haidaudia, a? O hebamo matamamu neganai dia ḡau iboudiai na nega tamona bo herevalaimu. (Ioane 16:12 ida ba haheḡereḡerea.) To, bema o laloamu henanadai haida na maoromaoro basio haerelaimu, namona na ba hadibaia. To nega e laomu lalonai, ia baine diba ḡaudia na ba hamaorolaia unu amo abi hidi maorona baine karaia. Una dainai o herevaherevamu lalonai ba momokani.

7. E hebamomu taudia be ede bae hediba heheni namonamo toma? (Maua ladana “ Bema Bamomu Na Gabu Daudau ai E Nohomu be Ede Bamona?” ba itaia danu.) (Laulau danu ba itadia.)

⁷ Oi be edena dala ai ta lalona ba dibaia namonamo? Dala namona ta na emui herevahereva lalonai, henanadai ba heni bona ba hakala namonamo. (Her. 20:5; Iak. 1:19) Herevahereva negadia namodia na ini, ma haida ida ba aniani hebou, pablik gabudiai ba raka hebou, bona ba haroro hebou. Danu nega bavato turamu haida bona emu femli ida ḡau haida ba kara hebou. Ḡau haida ba palanilai nega idauidau ai bona taunimanima idauidau ida ba kara hebou unu amo bamomu ena kara ba dibadia namonammo. Mani Netherlands ai, tadikaka Aschwin ese e kara ḡaudia aita herevalai. Ia Alicia ida e hebamova negana na ini e herevalaia toma: “Ai na ḡau haida a kara hebou unu amo baia hediba heheni namonamo. Heḡereḡere, a nanadu hebouva eiava ḡaukara haida a kara hebouva. Nega unu bamodiai, emai kara namodia bona emai manoka ḡaudia a dibadia.”

8. E hebamomu taudia be stadi heboumu ena namo be dahaka?

⁸ Danu ba hediba heheni dalana ma ta na, Baibul topik idauidau ba stadilai hebou. Bema o headavamu, namona na nega bavato emui ruma bese stadi ba karaia, unu amo emui headava lalonai Dirava bavatoa guna. (Koh. 4:12) Vaia, umui na o hebamomu dainai tadikaka na do dia ruma bese kwarana, to nega bavato ba stadi hebou. Unu bo kara tomamu  neganai, bamomu ena hetura karana Iehova ida na bo dibaiamu. United States ai, Max bona adavana Laysa ese stadi hebou karana ena namo ta e herevalaia. Max na e gwa: “A hebamo matama neganai, ai ese loa hebou, headava, bona femli maurina e herevalaimu pablikeisin idauidau a stadilai hebou. Unu pablikeisin ese e durumai mai anina bada ḡaudia a herevalai ena be nega haida unu baia herevalai na auka.”

BA LALO ḠAUDIA HAIDA

9. Emui hebamo sivaraina na ta do so hadibaia lalonai dahaka ḡau haida ba lalo be namo?

⁹ Ta ida o hebamomu lalonai daidia ba hadibadia be namo? Una na oi bona bamomu ese bavabia hidi ḡauna. O hebamo matamamu neganai, reana bo uramu taunimanima haida mo bae diba na namo. (Her. 17:27) Unu bo kara tomamu neganai, momo basie henanadaimu bona basie haḡavamuimu disisen ta ba karaia totona. To, bema ta basio hadibaiamu bona sibomui bo loa heboumu, dika na be vara dibamu. Una dainai, aonega karana na sisiba namodia bona heduru bae heni taudia ba hadibadia. (Her. 15:22) Heḡereḡere varavaramu, tura namodia, eiava elda taudia haida ba hadibadia.

10. Edena dala ai emu hebamo karana baine ḡoeva? (Hereva Lada-isidia 22:3)

¹⁰ Edena dala ai emu hebamo karana baine ḡoeva? Emui hemami be goadamu neganai, emui heura heheni danu be goadamu. Dahaka ese baine durumu diba emu kara ai ba ḡoeva totona? (1 Kor. 6:18) Mata bodaḡa herevadia basio gwaurai, sibomui basio loa hebou, bona basio inu kekero. (Efe. 5:3) Unu kara ese mahuta hebou urana baine habadaia diba bona kara maorona ikarana danu be aukamu. Aonega dalana na ba hemataurai heheni daladia bona Iehova ena taravatu ibadinadia daladia na hanaihanai ba herevalai. (Hereva Lada-isidia 22:3 ba duahia.) Dawit bona Almaz na Ethiopia amo bona mani idia e durudia ḡauna ta aita laloa. Idia na e gwa: “Ai na pablik gabudiai a loava eiava turamai ese e bamomaiva. To bema ruma ai eiava motuka ai, ta na hanaihanai ai ida, unu amo hedibaḡani lalodiai basia vareai.”

11. Bema e hebamomu taudia na e uramu lalokau karadia bae hahedinarai, dahaka ḡau haida bae lalo na namo?

¹¹ E hebamomu taudia ese lalokau karadia bae hahedinarai heheni diba, a? Oibe, to dala maorodia ai edia lalokau karadia bae hahedinarai na namo. To bema mahuta hebou urana be goadamu, una ese lalohadai maorodia na be hadikamu. (Sol. 1:2; 2:6) Bona haraḡa herea miro karadia bae kara diba. (Her. 6:27) Una dainai o hebamo matamamu neganai, Baibul ena hahekau herevadia heḡereḡeredia ai, lalokau karadia ba hahedinaraia daladia ba herevalai. c (1 Tes. 4:​3-7) E hebamomu taudia na ini henanadai bae lalo diba: ‘Ai raruosi padamai ai a hahedinaraiamu lalokauna be emai gabu taudia ese be ede e laloa tomamu? Bona una ese ta ta emai ai mahuta hebou urana be havaraiamu, a?’

12. Bema e hebamomu taudia na ḡau haida ai se lalotamonamu, dahaka bae laloa be namo?

¹² Hekwakwanai be ede ba hamaoromaorodia toma? Bema hekwakwanai e vara louloumu, anina be umui be dia heḡereḡere ba headava, a? Lasi. Nega haida headava taudia na asie lalotamonamu. Headava lalonai bema tau bona hahine na bae hemataurai heheni, bona ta ta edia ura ḡaudia bae dadarai unu amo bae lalo tamona, edia headava  na baine goada diba. Una dainai hari hekwakwanai o hamaoromaoromu dalana ese be hahedinaraiamu, emu headava be be namomu eiava lasi. E hebamomu taudia ese ini henanadai bae lalodia diba: ‘Mai lalonamo bona mai hemataurai ida hekwakwanai baita herevalaia diba, a? Ita be mai eda ura ida eda kerere ta gwaurai hedinaraimu bona ta hekwarahimu ḡau haida baita haidaudia, a? Ita be sori herevana ta gwauraia haraḡamu bona ta hegwautao hehenimu, a?’ (Efe. 4:​31, 32) Bema hebamo lalonai o heai hanaihanaimu, headava murinai una na dounu baine vara diba. Bema o dibamu o hebamo heniamu tauna na dia taunimanima maorona, taumui raruosi ese una hebamo karana ba hadokoa na namo. d

13. Dahaka ese e hebamomu taudia bae durudia bena bae laloparara ede daudauna bae hebamo?

¹³ O laloamu ede daudauna ba hebamo? Nega momo disisen ta kara haraḡamu neganai anidia na se ḡuḡurumu. (Her. 21:5) Una dainai emui hebamo negana na baine daudau, unu amo ba hediba heheni namonamo. To, emui hebamo negana na basio halataia kava. Baibul danu e gwaumu: “Helaro mai halahena ese lalohisihisi e havaraiamu.” (Her. 13:12) Bema bo loa hebou hanaihanaimu, emui ai na be aukamu mahuta hebou urana ba dadaraia. (1 Kor. 7:9) Una dainai bema umui na do hebamo daudau, sibomu ba henanadai diba, ‘Lau ese turagu be doini baina dibaia, unu amo abi hidi maorona baina karaia, a?’

HAIDA ESE E HEBAMOMU TAUDIA BE EDE BAE DURUDIA TOMA?

14. Ededia dala ai haida ese e hebamomu taudia bae durudia diba? (Laulau danu ba itaia.)

¹⁴ Bema mai dibada taudia rarua na e hebamomu, edena dala ai baita durudia diba? Baita boiridia ita ida bae aniani hebou, eda ruma bese tomadiho ai bae helai vareai, eiava moale karadia baita kara hebou. (Roma 12:13) Nega unu bamodia ai idia na bae hediba heheni namonamo diba. Ba durudia daladia ma haida na reana idia ida ba loaloa hebou, motuka amo gabu haida baola, eiava ba boiridia emui ruma ai ba herevahereva diba. Unu amo idia na sibodia basie noho. (Gal. 6:10) Matamanai tame herevalaia taihuna, Alicia na haida ese ia bona Aschwin e durudia dalana e laloa lou neganai, e gwa: “Tadikaka taihu haida ese e hamaoromai, bema a urava baia herevahereva, edia ruma  baiala bona unuseniai baia herevahereva diba, ai ese una na a moalelaia.” Bema e hebamomu taudia ese bae noimu idia ba bamodia, ba laloa una na idia idurudia dalana namona. To bema o lalopararamu idia na e uramu bae herevahereva, nega ba henidia to sibodia na basio rakatanidia.—Fili. 2:4.

15. Dahaka ma baita kara e hebamomu taudia baita durudia totona? (Hereva Lada-isidia 12:18)

¹⁵ E hebamomu taudia baita durudia dalana ma ta na, eda hereva nahuadia baita toho. Anina na nega haida basita hereva na namo. (Hereva Lada-isidia 12:18 ba duahia.) Heḡereḡere, ita na ta uramu mero ta bona kekeni ta e hebamomu sivaraina na ma haida baita hamaorodia, to e hebamomu taudia be reana e uramu sibodia ese ma haida bae hadibadia. Namona na e hebamomu taudia na basita maumauraidia eiava edia abi hidi daidia basita gwau henidia. (Her. 20:19; Roma 14:10; 1 Tes. 4:11) Danu, dia namo eda hereva o henanadai amo e hebamomu taudia baita doridia bae headava totona. Taihu ta ladana Elise na adavana ida e gwa: “Haida ese e nanadaimaiva emai headava planidia be dahaka neganai, emai hemami na se namova badina do asia herevalaidia.”

16. Bema e hebamomu taudia rarua na edia hebamo e hadokoamu, ita be dahaka baita kara?

¹⁶ Bema e hebamomu taudia na e uramu edia hebamo na bae hadokoa be ede bamona? Dia namo edia hebamo e hadokoa badidia baita henanadailai, eiava ta enai basita tao. (1 Pet. 4:15) Taihu ta ladana Lea na e gwa: “Haida ese emai hebamo e dika badina e herevalaiava sivaraina na kamonai neganai na lalo hisihisi bada.” Matamanai tame herevalaia bamona, bema e hebamomu taudia rarua na edia hebamo e hadokoamu, basita laloa idia na abi hidi kererena e karaia. To, edia hebamo karana amo idia na e lalopararamu basie headava na namo bona una na abi hidi maorona. Una abi hidi dainai lalodia na be hisihisimu bona ta ta be hemamimu ia na sibona. Una dainai dala baita tahu baita durudia.—Her. 17:17.

17. E hebamomu taudia be dounu dahaka bae kara?

¹⁷ Ina atikol ai tame herevalaia bamona, ena be hebamo lalonai hekwakwanai na be varamu, to una nega na dounu bo moalelaia dibamu. Jessica na e hebamova negana e laloa lou neganai, e gwa: “Momokani hebamo karana na mai hekwarahina. To, lau na moalemu badina una nega lalonai ai raruosi ese emai nega bona goada na a ḡaukaralai namonamo baia hediba heheni totona.” Bema hari oi na ta ida o hebamomu, namona na dounu ba hekwarahi ia ba dibaia namonamo. Unu bo kara tomamu neganai, emui hebamo negana na bo moalelaiamu bona abi hidi maorona bo karaiamu.