1. Laḡani 2023 ena annual meeting ai dahaka ta diba?

 LAḠANI 2023 ena annual meeting ai, a ta abi daemu hahediba herevadia haida ai lalohadai matamatadia ta diba bona eda haroro ḡaukara ikarana dalana ai announcement namodia haida ta kamonai. Ta dibaia ḡauna ta na, Babulono Badana be hadikaiamu murinai, haida na Iehova ena taunimanima edia kaha ai be ginimu. Danu ta diba November 2023 amo, tadikaka taihu ese edia haroro ḡaukara bae ripotilai dalana na e haidaua. Unu ḡau matamatadia ta diba dainai, o laloamu eda haroro ḡaukara be vada asi anina, a? Lasi!

2. Dahaka dainai dina ta ta ai baita haroro na mai anina bada? (Mareko 13:10)

² Dahaka dainai dina ta ta ai baita haroro na mai anina bada? Badina dokona na kahirakahira. Mani Iesu ese dina gabediai haroro ḡaukara e perovetalaia herevana aita laloa. (Mareko 13:10 ba duahia.) Mataio bukana ai Iesu na e gwa, sivarai namona na tanobada idoinai bae harorolaia “bena dokona vada baine kau.” (Mat. 24:14) Una hereva “dokona” anina na, Satana ena nega oromana dikana baine ore vaitani negana e herevalaiamu.  Iehova ese bae vara ḡaudia ena “dina bona hora” na vada e abia hidi. (Mat. 24:36; 25:13; Apos. 1:7) Dina ta ta nega dokona na e kahirakahiramu. (Roma 13:11) Una dainai, haroro ḡaukara na baita goadalaia.

3. Dahaka dainai ta haroromu?

³ Namona na ita iboudai ese ina henanadai baita laloa: Dahaka dainai sivarai namona ta harorolaiamu? Lalokau dainai. Ta haroromu neganai, ita ese ini dala toi amo lalokau ta hahedinaraiamu, (1) sivarai namona ta ura heniamu, (2) taunimanima ta lalokau henidiamu, bona (3) hereadaena be Iehova ta lalokau heniamu bona ia ladana danu ta ura heniamu. Mani unu point ta ta aita herevalaidia.

SIVARAI NAMONA TA URA HENIAMU DAINAI TA HAROROMU

4. Sivarai namona ta o kamonai neganai, dahaka o kara?

⁴ Mani emu mauri ai sivarai namona ta o kamonaia negana a laloa. Reana emu famli ai beibi ta e vara eiava ḡaukara namona ta o davaria. Una negai oi be dahaka o kara? Oi na mai moalemu ida emu famli bona turamu vairadiai una sivarai namona o gwauraia. Una heḡereḡerena, oi ese Dirava ena Gavamani sivaraina o kamonai neganai, oi be unu o kara toma, a?

5. Baibul amo hereva momokani o diba matama neganai, emu hemami be ede bamona? (Laulau danu ba itadia.)

⁵ Baibul amo hereva momokani o diba matama negana mani ba laloa. Oi na o laloparara Dirava ese oi na e lalokau henimumu, e uramu ia ba tomadiho henia, e gwauhamata hisihisi iboudiai be haorediamu, bona nega matamata ai emu lalokau taudia ida ma bo hedavari loumu—bona gwauhamata ma haida danu. (Mar. 10:​29, 30; Ioa. 5:​28, 29; Roma 8:​38, 39; Apok. 21:​3, 4) Unu hereva momokani o dibadia dainai, o moale bada herea. (Luka 24:32) Bona unu o ura henidia bada dainai, o ura haida ediai ba herevalai!—Ieremia 20:9 ida ba haheḡereḡerea.

6. Ernest bona Rose edia ekspiriens amo dahaka o dibamu?

 ⁶ Mani ekspiriens ta aita laloa. Tadikaka ta ladana Ernest b na laḡanina 10 neganai tamana e mase. Ernest na e gwa: “Na lalova: ‘Ia be guba ela eiava? Eiava ia be vada e mase bona basina itaia loumu?’ Maraḡidia haida na tamadia ida na itadiava neganai, na lalohisihisiva.” Nega momo Ernest na tamana ena gara gabuna e laova, e tui dihova, bona e ḡuriḡuriva: “Dirava please, lau na uramu baina diba lau tamagu be edeseniai.” Laḡani 17 muridiai, Ernest ese Baibul e stadilaia matama. Ia na e moale badina e diba mase taudia na ḡau ta asi dibadia, vaitani idia na mamahuta, bona Baibul na e gwauhamata vaira negai be toreisi loumu. (Koh. 9:​5, 10; Apos. 24:15) Laḡani momo lalodiai, e lalova henanadaidia haeredia na una negai e davari! Ernest na Baibul amo hereva momokani e diba dainai e moale bada herea. Ia adavana Rose danu Baibul e stadilaia bona e diba ḡaudia na e ura henidia. Laḡani 1978 ai idia raruosi e bapatiso. Idia ese e dibadia ḡaudia na edia famili, turadia, bona ma haida ediai e herevalai. Una dainai, Ernest bona Rose ese taunimanima 70 mai kahana e durudia Iehova bae dibaia bona e bapatiso.

7. Eda ura Baibul ena hereva momokanidia ai e goadamu neganai, dahaka be varamu? (Luka 6:45)

⁷ Baibul amo ta diba ḡaudia ta ura henidia neganai, ita na ta uramu ma haida ediai baita herevalai. (Luka 6:45 ba duahia.) Iseda hemami na Iesu ena hahediba edia heḡereḡerena, idia na e gwa: “A itava bona a kamonaiva ḡaudia na basia herevalai na dia heḡereḡere.” (Apos. 4:20) Ita ese hereva momokani na ta ura henia dikadikamu dainai ta uramu momo ediai baita herevalai.

TAUNIMANIMA TA LALOKAU HENIDIAMU DAINAI TA HAROROMU

8. Dahaka dainai ta uramu ma haida ediai sivarai namona baita harorolaia? (“ Ba Lalokau Henidia—Hahediba Ai Ba Halaodia” mauana ba itaia.) (Laulau danu ba itaia.)

⁸ Iehova bona ia Natuna heḡereḡeredia, ita ese taunimanima ta lalokau henidiamu. (Her. 8:31; Ioa. 3:16) Haida na Dirava asi dibadia bona asi edia helaro dainai ta bogadia hisimu. (Efe. 2:12) Idia na hekwakwanai momo herea e davarimu, bona idia idurudia ḡauna na—Dirava ena Gavamani sivaraina namona. Ta lalokau henidiamu bona ta bogadia hisimu dainai idia ediai sivarai namona ta harorolaiamu. Una sivarai namona dainai be dibamu idia na mai edia helaro, be durudiamu hari ina nega ai edia mauri bae moalelaia, bona “mauri korikori”—mauri hanaihanai —na Dirava ena tanobada matamatana ai bae abia diba.—1 Tim. 6:19.

9. Taunimanima baita hadibadia ḡauna be dahaka? (Esek. 33:​7, 8)

⁹ Taunimanima ta lalokau henidiamu dainai, ta hadibadiamu ina nega oromana dikana na kahirakahira be oremu. (Esekiel 33:​7, 8 ba duahidia.) Oibe, dekeda taudia bona varavarada na ta bogadia hisimu. Idia momo na asi dibadia vaira nega ai “hisi bada-herea bae vara, Dirava ese tanobada e karaia negana amo hisi unuhetomadia asie vara ema bona harihari, gabeai danu unuhetomana ta basine vara lou.” (Mat. 24:21) Ita na ta uramu idia na bae diba hahemaoro dinana ai be dahaka be varamu. Ginigunana, tomadiho koikoi be haorediamu, bena Aramagedono ai tanobada oromana dikana be haoreamu. (Apok. 16:​14, 16; 17:​16, 17; 19:​11, 19, 20) Ta uramu momo ese ta gwauraimu herevadia bae abia dae bona ita ida Iehova baita tomadiho henia hebou. To bema haida na asie uramu bae kamonai, ediai be dahaka be varamu?

10. Dahaka dainai kahirakahira be varamu ḡauna na taunimanima ediai baita harorolaia na mai anina bada?

¹⁰ Atikol 19 ai e hahedinaraia, Babulono Badana be hadikaiamu karana be itaiamu taudia haida na Iehova be abidadama heniamu bona Iehova ese be hamauridiamu. Una dainai, bae vara ḡaudia baita harorolai na mai anina bada. Mani ina a laloa: Hari ta hamaorodiamu ḡauna na reana una negai be laloataomu. (Esekiel 33:33 ida ba haheḡereḡerea.) Reana ta hamaorodia herevana be laloa loumu bona ita ida Iehova baita tomadiho heniamu. Filipi ai dibura ruma igimana tauna na tano e “laga dagu” murinai, Dirava e abidadama henia. Una heḡereḡerena haida na Babulono Badana ihadikana karana be itaiamu neganai, reana idia danu Dirava be abidadama heniamu.—Apos. 16:​25-34.

IEHOVA TA LALOKAU HENIAMU BONA LADANA TA URA HENIAMU DAINAI TA HAROROMU

11. Edena dala ai ita ese hairai, hemataurai bona siahu na Iehova ta heniamu? (Apokalupo 4:11) (Laulau danu ba itadia.)

¹¹ Ita ese sivarai namona ta harorolaiamu badina badana na, Iehova Dirava ta lalokau heniamu bona ia ladana helaḡana ta ura heniamu. Ita na ta dibamu haroro ḡaukara amo ita ese ta lalokau heniamu Diravana ta imodaiamu. (Apokalupo 4:11 ba duahia.) Ita na mai kudouda idoinai ida ta abia daemu Iehova Dirava na mai ena maoro hairai, hemataurai, bona siahu baine abi. Ita ese hairai bona hemataurai na Iehova ta heniamu bema haida ediai ta hamomokaniamu Iehova na “ḡau iboudiai” ihavaradia Diravana, bona ia dainai  ḡau iboudiai e maurimu. Danu eda siahu Iehova baita henia anina na, eda noho daladia heḡereḡerena haroro ḡaukara ai eda nega, goada, bona kohu baita ḡaukaralai. (Mat. 6:33; Luka 13:24; Kol. 3:23) Oibe, ita na ta ura dikadikamu ta lalokau heniamu Diravana sivaraina baita harorolaia bona Ia ladana bona ena kara na taunimanima baita hadibalaidia. Dahaka dainai?

12. Eda haroro ḡaukara ai Iehova ladana be ede baita hahelaḡaia toma?

¹² Ita ese Iehova ta lalokau heniamu dainai ia ladana ta hahelaḡaiamu. (Mat. 6:9) Ta uramu taunimanima baita hadibadia Satana ese Iehova latanai e gwaurai herevadia na koikoi. (Gen. 3:​1-5; Iobu 2:4; Ioa. 8:44) Ta haroromu neganai, ita na ta uramu Iehova ena kara na kamonai taudia baita hadibadia. Danu ta uramu bae diba iena kara badana na lalokau, ena lohia dalana na maoromaoro, bona kahirakahira iena Gavamani ese taunimanima edia hisihisi iboudiai be haorediamu bena maino bona moale be havaraiamu. (Sal. 37:​10, 11, 29; 1 Ioa. 4:8) Haroro ḡaukara ai unu ta kara tomamu neganai, ita ese Iehova ladana ta hahelaḡaiamu. Bona ta moalemu badina ita na ina lada, Iehova Ena Witnes anina heḡereḡerena ta ḡaukaramu. Edena dala ai?

13. Dahaka dainai ina lada Iehova Ena Witnes ta abia na hahenamo badana? (Isaia 43:​10-12)

¹³ Iehova ese ita na e gwauraidamu iena “hereva ihamomokanidia taudia,” eiava iena witnes taudia. (Isaia 43:​10-12 ba duahidia.) Laḡani haida gunadiai, Gavanin Bodi edia revareva ta ai e gwa: “Ita ta ta eda hahenamo badana ta na e gwauraidamu, Iehova Ena Witnes Taudia.” c Dahaka dainai? Mani haheitalai ta aita laloa. Bema kota ai o uramu ta na emu witnes ai bainela, oi ese bo abia hidimu tauna  na mai dibamu namonamo bona o trastiamu. Una heḡereḡerena, Iehova ese ita na iena Witnes Taudia ai e halaoda badina mai dibana namonamo ita bona e trastidamu. Ia ladana ta huaiamu na hahenamo badana ta, una dainai nega bona gabu idauidau ai ia ladana ta herevalaiamu bona taunimanima ediai ta hahedinaraiamu Satana ese Iehova latanai e gwaurai herevadia na koikoi. Unu ta kara tomamu neganai, ta hamomokaniamu ita na Iehova Ena Witnes Taudia!—Sal. 83:18; Roma 10:​13-15.

BAITA HARORO ELA BONA DOKONA

14. Kahirakahira be varamu ḡaudia be dahaka?

¹⁴ Ita na ta ura dikadikamu kahirakahira bae vara ḡaudia baita ita! Bona hisihisi bada hereana do se vara ai, Iehova ena heduru amo momo ese hereva momokani bae abia dae. Ta moalemu badina una hisihisi bada hereana lalonai, taunimanima haida ese Satana be rakataniamu bona ita ida Iehova baita hanamoa heboumu!—Apos. 13:48.

15-16. Ita ese baita karaia ḡaukarana be dahaka? Bona edena nega ai baine doko?

¹⁵ Una nega ta nariamu lalonai, namona na tanobada heḡeḡemadai ai Dirava ena Gavamani sivaraina baita harorolaia badina una ḡaukara na ma basita karaia loumu. Una ḡaukara ta karaiamu lalonai, taunimanima baita hadibadia ina nega oromana dikana dokona na vada kahirakahira. Una hahemaoro negana baine ginidae neganai, taunimanima na be dibamu ita ese ta harorolaia herevana na Iehova Dirava amo.—Esek. 38:23.

¹⁶ Laloda baita hadai dahaka baita kara? Ita ese sivarai namona ta ura heniamu, taunimanima ta lalokau henidiamu, Iehova ta lalokau heniamu bona ia ladana ta ura heniamu dainai, namona na baita haroro ela bona Iehova baine gwa: “Haroro ḡaukara ba hadokoa!”