1. Dahaka dainai ita na mai anina bada negana lalonai ta nohomu?

 ITA NA mai anina bada negana lalonai ta nohomu! Dina ta ta ai, Baibul ena peroveta herevadia na matada ai ta itaiamu e ḡuḡurumu. Heḡereḡere, “not kahana ena king” bona “saut kahana ena king” na tanobada taudia bae lohiadia totona sibodia e hetuari hehenimu. (Dan. 11:​40, NWT) Ta itaiamu, Dirava ena Gavamani sivaraina namona na gabu momo ai vada e harorolaiamu, bona taunimanima milion momo na e kamonaimu. (Isa. 60:22; Mat. 24:14) Bona lauma aniani bada herea na “nega korikori ai” ta abimu.—Mat. 24:​45-47, NWT.

2. Dahaka baita lalopararalaia be namo?

² Iehova ese ita na dounu e durudamu kahirakahira be varamu ḡaudia baita lalopararalai namonamo totona. (Her. 4:18; Dan. 2:28) Una dainai ta dibamu hisihisi bada hereana be hematamamu neganai, Ia ese be durudamu una nega aukana ai baita haheauka bona lalotamona ai baita noho daladia be hadibadamu. To danu baita laloparara, vaira negai be varamu ḡaudia haida na asi dibada. Ina atikol ai, baita itaiamu dahaka dainai guna ta gwauva bae vara ḡaudia haida ai laloparara matamata tame abi. Bena vaira negai be varamu ḡaudia bona Tamada Guba ai ese be karamu ḡaudia ai mai dibada ḡaudia baita herevalaimu.

ITA ASI DIBADA ḠAUDIA

3. Guna ta gwauva Dirava asie abidadama heniava taudia ediai be dahaka be varamu?

³ Guna, ita na ta gwauva hisihisi bada hereana be hematamamu neganai, taunimanima na asi edia sansi Dirava bae abidadama henia totona bona Aramagedono ai basie roho maurimu.  Unu ta gwa toma badina ta lalo Noa ena negai e vara utu-utu badana sivaraina na peroveta herevana ta. Heḡereḡere, ta laloava Iehova ese lagatoi iduarana e koua neganai taunimanima ma ta se vareai heḡereḡerena, hisihisi bada hereana be hematamamu neganai, Iehova asie abidadama henia taudia danu basie roho maurimu.—Mat. 24:​37-39.

4. Dahaka dainai hari na basita gwaumu Noa ena negai e vara ḡauna na iseda negai baine ḡuḡuru peroveta herevana ta?

⁴ Noa ena negai e vara ḡauna be peroveta herevana ta bamona baita laloa, a? Lasi. Dahaka dainai? Badina Baibul ese unu na se herevalaia toma. a Vaia Iesu ese “Noa ena nega” na iena noho negana ida e haheḡereḡerea, to ia na se gwa utu-utu badana na peroveta herevana, eiava una sivarai lalonai e gwaurai taudia bona e vara ḡaudia na bae vara ḡaudia e laulaulaidia, bona se gwa Dirava ese lagatoi iduarana e koua karana na peroveta herevana. To basitato, Noa bona ena negai e vara utu-utu badana sivaraina amo ḡau ta basita dibaiamu. Lasi, una sivarai na dounu mai anina bada.

5. (a) Utu-utu badana do se kau neganai, Noa be dahaka e kara ena abidadama e hahedinaraia? (Heberu 11:7; 1 Petro 3:20) (b) Edena dala ai Noa ena nega bona hari iseda nega ai haroro ḡaukarana na heḡereḡere?

⁵ Iehova ese Noa e hamaoroa Utu-utu badana be havaraiamu neganai, Noa ese lagatoi e karaia karana amo ena abidadama e hahedinaraia. (Heberu 11:7; 1 Petro 3:20 ba duahidia.) Una heḡereḡerena, Dirava  ena Gavamani sivaraina namona e kamonaimu taudia ese e dibamu ḡaudia na bae badina. (Apos. 3:​17-20) Petro ese Noa na e gwauraia “kara maoromaoro iharorolaina tauna.” (2 Pet. 2:5) To atikol 18 ai ta herevalaia heḡereḡerena, ita na asi dibada Noa ese utu-utu badana baine vara sivaraina be taunimanima iboudiai ediai e harorolaia eiava. Hari ita na tanobada heḡeḡemadai ai haroro ḡaukara badana ta karaiamu, bona una ḡaukara na ta goadalaiamu. To dokona do se kau lalonai ita ese tanobada heḡeḡemadai ai taunimanima iboudiai na basita haroro henidia dibamu. Dahaka dainai?

6-7. Dahaka dainai dokona do se kau neganai, sivarai namona na tanobada heḡeḡemadai ai taunimanima iboudiai ediai basita harorolaia dibamu?

⁶ Mani Iesu ese iseda haroro ḡaukara ena bada e herevalaia dalana aita laloa. Ia na e peroveta sivarai namona na “tanobada idoinai bae harorolaia, bese iboudiai ihadibalaidia.” (Mat. 24:14) Una peroveta herevana na hari iseda nega ai e ḡuḡurumu. Dirava ena Gavamani sivaraina na gado 1,000 mai kahana ai vada e hahanaia, bona jw.org websait dainai tanobada taudia momo ese una sivarai namona na bae duahia diba.

⁷ To, Iesu ese ena hahediba taudia na e hamaorodia, ‘Israel hanuadia basie rakadia hanai ore,’ eiava taunimanima iboudiai na basie haroro henidia diba ela bona ia baine ginidae negana. (Mat. 10:23; 25:​31-33) Iesu ena hereva na hari iseda negai danu be varamu. Taunimanima milion momo na eda haroro ḡaukara e taravatu gabudia ai e nohomu. Danu, beibi 100 momo na miniti ta ta ai e varamu. Ita na ta ḡaukara goadamu “bese iboudiai, iduhu iboudiai, gado iboudiai” taudia ediai sivarai namona baita harorolaia. (Apok. 14:6) To mai dibada ḡauna na, tanobada heḡeḡemadai ai taunimanima ta ta ediai sivarai namona na basita harorolaia dibamu.

8. Iehova ese vaira negai be karaiamu hahemaorona dainai, reana ededia henanadai baita henimu? (Laulau danu ba itadia.)

⁸ Reana baita henanadaimu: Hisihisi bada hereana do se kau ai, sivarai namona do asie kamonai taudia ediai be dahaka be varamu? Iehova bona ia Natuna Iesu—e abia hidi hahemaoro ḡaukarana baine karaia tauna—ese idia be ede be hahemaoro henidia tomamu? (Ioa. 5:​19, 22, 27; Apos. 17:31) Ina stadi ena siri badana amo tame diba Iehova na “se uramu ta baine mase,” to e uramu taunimanima ‘iboudiai bae helalo kerehai.’ (2 Pet. 3:9; 1 Tim. 2:4) Ena be ita na mai dibada Iehova ena lalohadai na unu bamona, to sivarai namona asie kamonai bena e mase taudia be hahemaoro henidiamu dalana na ita edai na se hahedinaraia. Ia ese una baine karaia dalana baine hadibada eiava lasi na ia sibona dibana.

9. Baibul ai Iehova ese dahaka e hadibadamu?

⁹ Baibul ai, Iehova ese baine kara ḡaudia haida na e hadibada. Heḡereḡere, Baibul ese e hadibadamu “asi edia kara maoromaoro taudia” na Iehova ese be hatoredia isi loumu bona nega be henidiamu sivarai namona bae abia dae, bona edia mauri daladia bae haidau. (Apos. 24:15; Luka 23:​42, 43) To, reana ma henanadai haida baita lalomu.

10. Baita lalomu henanadaidia haida be dahaka?

¹⁰ Hisihisi bada hereana lalonai be masemu taudia be mai edia helaro bae toreisi lou, a? Baibul ese e hahedinaraiamu Iehova e inai heniamu taudia na Aramagedono ai Ia bona ena aneru ese be hamasediamu neganai, basie toreisi loumu. (2 Tes. 1:​6-10) To, taunimanima ma haida ediai be dahaka be varamu? Heḡereḡere, hisihisi bada hereana  lalonai gorere, buruka bona eksiden dainai e mase eiava taunimanima ese e aladia taudia be toreisi loumu, eiava? (Koh. 9:11; Sek. 14:13) Idia haida be tanobada matamatana ai “asi edia kara maoromaoro” taudia bogaraḡidiai be toreisi loumu, a? Ita na asi dibada.

ITA MAI DIBADA ḠAUNA

11. Aramagedono ai taunimanima be ede be hahemaoro henidia tomamu?

¹¹ Vaira negai ita mai dibada bae vara ḡaudia haida na ini: Aramagedono ai, Iesu ese taunimanima na Keriso tadikakana e kara henidia dalana heḡereḡerena ai, be hahemaoro henidiamu. (Mat. 25:40) Bona hahemaoro negana ai, bae gwauraidia mamoe taudia ese horoa taudia bona Keriso be durudiamu. Dibada danu hisihisi bada hereana be hematamamu murinai, Keriso tadikakana haida na tanobada ai dounu be nohomu ela bona kahirakahira Aramagedono baine hematama neganai, be daemu guba. Anina na, Keriso tadikakana haida na dounu tanobada ai nonoho dainai, kudou-maoro taudia ese una nega bae ḡaukaralaia diba idia bae durudia. (Mat. 25:​31, 32; Apok. 12:17) Dahaka dainai una na mai anina bada?

12-13. Haida na “Babulono Badana” be hadikaiamu karana be itaiamu neganai, idia be dahaka be gwaumu? (Laulau danu ba itadia.)

¹² Hisihisi bada hereana be hematamamu murinai, haida ese “Babulono Badana” be hadikaiamu karana be itaiamu neganai be gwaumu, ‘Laḡani momo lalodiai Iehova ena Witnes na e gwa ina na be varamu.’ Unu be varamu ḡaudia be itamu taudia haida ese Iehova be abidadama heniamu, eiava?—Apok. 17:5; Esek. 33:33.

¹³ Bema una be varamu una na Mose ena negai Aigupto ai e vara ḡauna heḡereḡerena. Ba helalotao, Israel taudia na Aigupto amo e raka lasi neganai, “orea idau-idau taudia hutuma” danu idia e bamodia. (Eso. 12:38) Idia haida na Mose ese Hisihisi Ten hahediba herevana e gwauraia bona e ḡuḡuru karana e itaia neganai, edia abidadama na e goada. Una heḡereḡerena Babulono Badana be  hadikaiamu murinai, haida na reana abidadama taudia ai be laomu, to ita ese una baita lalohisihisilaia, a? Lasi! Ita na ta uramu Tamada guba ai e nohomu ena kara baita tohotohoa, ia na ‘hebogahisi bona harihari-bada Diravana. Badu ai e halahemu; hebogahisi ai bona uraheni ai e haraḡamu.’ b—Eso. 34:6.

14-15. Ena be ta na be masemu, eiava be maurimu, to vaira negai ia be mauri hanaihanaimu, a? Ba herevalaia. (Salamo 33:​4, 5)

¹⁴ Nega haida tadikaka eiava taihu haida na varavaradia bona murimuri taudia e herevalaidiamu neganai, e gwaumu: “Hisihisi bada hereana do se vara ai e mase be namo, badina vaira nega ai na be toreisi loumu.” Idia na varavaradia e lalodia badamu dainai unu e hereva tomamu. To, ta baine mase negana ese na se hahedinaraiamu ia baine mauri hanaihanaimu eiava lasi. Iehova na Hahemaoro Tauna ḡoevadaena—iena abi hidi iboudiai na mamaoro-mamaoro. (Salamo 33:​4, 5 ba duahi.) Ta diba momokanimu “tanobada idoinai ihahemaoro-henina Diravana” ese kara maorona be karaiamu.—Gen. 18:25.

¹⁵ Danu taunimanima ta na dia e nohomu gabuna dainai baine mauri hanaihanai eiava lasi. Iehova ese taunimanima milion momo na e nohomu gabudia ai sivarai namona asie kamonaia dainai, basine gwauraidiamu “nanigosi” bamona taudia. (Mat. 25:46) Tanobada  idoinai ihahemaoro-henina Diravana ese taunimanima unu bamodia na e lalodia badamu. Ita na asi dibada hisihisi bada hereana lalonai, Iehova ese be varamu ḡaudia be ede be biagudia tomamu. To, reana unu taunimanima haida na, una negai be itamu ḡaudia daidiai Iehova be dibaiamu, bona Iehova ese ladana be hahelaḡaiamu neganai, idia na iena kahai be ginimu.—Esek. 38:16.

16. Iehova ena amo dahaka ta dibamu? (Laulau danu ba itaia.)

¹⁶ Baibul istadilaina karana amo ta dibamu Iehova ese taunimanima edia mauri na e laloa badamu. Ia ese Natuna ena mauri e heni unu amo ita iboudai ese mauri hanaihanai baita abia. (Ioa. 3:16) Ita iboudai ese Iehova ena lalokau na ta mamia. (Isa. 49:15) Ia na mai dibana ita ta ta ladada. Ia ese ita na e dibada ḡoevaḡoeva dainai, ena be baita masemu to dounu be hatoreda isi loumu, badina eda kara bona eda lalohadai iboudiai na e lalotaomu! (Mat. 10:​29-31) Momokani, ta abia dae momokanimu Tamada lalokauna ese taunimanima ta ta na be hahemaoro henidia ḡoevaḡoevamu, badina ia na aonega, kara maoromaoro, bona hebogahisi Diravana.—Iak. 2:13.

17. Atikol gabena ai dahaka baita herevalaimu?

¹⁷ Ini laloparara matamatadia dainai, ta dibamu eda haroro ḡaukara na mai anina bada. Dahaka dainai unu ta gwau tomamu? Bona dahaka ese e durudamu dainai sivarai namona ta harorolaia goadagoadamu? Atikol gabena ese ini henanadai be haerelaidiamu.