IERUSALEM ai hebou badana ta e karaia. King David ese ena heitatao taudia, kohu ireḡudia taudia bona goada-herea taudia e boiridia. Idia na mai moaledia ida hahediba hereva badana ta e kamonai. Iehova ese David natuna Solomon e haḡania, Dirava korikori itomadiho henina ruma badana ta baine haginia totona. Israel edia king ese Dirava ena lauma ena heduru amo una ruma palanina e karaia bona Solomon e henia. David na eto: “Ḡaukara danu bada herea, badina be ina ruma badana na dia taunimanima edia, a Dirava Iehova ena.”​—1 Sis. 28:1, 2, 6, 11, 12; 29:1.

Bena David na ina henanadai e heni: “Daika na hari ina dina ai mai ura-kwalimuna ida sibona baine heato lasi Iehova enai?” (1 Sis. 29:5) Bema oi na unuseniai noho, dahaka boma kara? Oi ese una ḡaukara badana boma durua, a? Israel taudia na mai moaledia ida kara ta e karaia. Oibe, idia na e moale, badina be edia harihari ḡaudia “vada e heni mai lalo-uradia ida; badina be idia ese mai lalodia idoidiai Iehova vada e henia dudukau.”​—1 Sis. 29:9.

Laḡani hanred momo muridiai, Iehova ese una dubu helaḡa e hereaia ḡauna ta e hadaia. Ia ese lauma dubuna badana e hadaia, una lauma dubuna ai taunimanima na Iesu ena boubou ḡauna dainai Dirava bae tomadiho henia. (Heb. 9:11, 12) Hari ina negai Iehova be edena dala ai taunimanima e durudiamu Ia turana ai baela totona? Eda hahediba ḡaukarana amo e durudiamu. (Mat. 28:19, 20) Una ḡaukara dainai, laḡani ta ta ai Baibul stadi milion momo ta karamu, hahediba taudia tausen momo e bapatisomu, bona kongrigeisen matamatadia hanred momo e ginimu.

Ḡaukara na e badamu dainai, pablikeisen momo e printidiamu, Kingdom Hall e haginimu bona e hanamomu, bona hebouhebou gabudia momo e tahumu o e karamu. Oi o abia daemu sivarai namo ta harorolaiamu na ḡaukara badana bona anina namona baine havaraia, a?​—Mat. 24:14.

Dirava ena taunimanima na Ia bona dekedia taudia e lalokau henidiamu bona Basileia e harorolaia goadagoadamu karana ese e durudiamu dainai, mai ‘ura-kwalimudia ida’ edia kontribiusen na Iehova e heniamu, harihari ḡaudia na heto. Ita eda ‘kohu amo Iehova baita hanamoa’ bona ta itaiamu unu kohu na ḡaukara badana lalonai ta ḡaukaralaidia namonamomu dainai ta moalemu!​—Her. 3:9.