1, 2. Dahaka dainai hahegoada karana na mai anina bada?

CRISTINA, laḡanina 18, na ini e gwau toma: “Tamagu sinagu ida ese na se hagoadagumu, to e gwau henigu hanaihanaimu. Bona edia hereva ese lalogu na e hahisiamu. ^[1] Idia na e gwaumu, lau na ḡaruḡaru, fadifadi, bona basina heaonegamu. Una dainai, nega momo na taiva bona asina hereva henidiava. Na hemamimu egu mauri na asi anina.” Bema hahealo o hahegoada basita abimu mauri na be dikamu!

² To, hahegoada herevadia ese namo baine havaraia. Rubén na eto: “Laḡani momo lalodiai, na hemamiva egu mauri na asi anina. To nega ta, lau na elda ta ida a harorova neganai, ia na e laloparara lau na asina moaleva. Egu hemami na herevalaia neganai, ia na e kamonai namonamo. Bena e hamaorogu lau na ḡaukara namodia na karamu. Bona ia ese Iesu ena hereva e gwauraia​—ita ta ta ese bisini momo ta hereadiamu. Nega momo una siri na laloamu, bona lalogu na e hagoadaiamu. Una elda ena hereva ese lau na e durugu bada.”​—Mat. 10:31.

3. (a) Aposetolo Paulo ese hahealo o hahegoada karana be ede e herevalaia toma? (b) Ina stadi ai dahaka baita herevalaiamu?

³ Basita hoa badina Baibul na e gwaumu, hanaihanai baita hahealo o hahegoada heheni. Aposetolo Paulo ese Heberu  Kristen taudia e tore henidia, eto: “Varavaragu e, nahuamui ba toho, ta ese lalona baine hadaia kerere, asi ena kamonai, bena Mauri Diravana baine rakatania na garina. A daba daba idoidiai ba hahealo heheni, . . . kara dika ena koikoi ese lalomui baine ha-auka na garina.” (Heb. 3:12, 13) Reana o dibamu una sisiba​—hahealo heheni karana​—na mai anina bada badina reana nega ta, ta ese ena hereva amo e hagoadamu. Una dainai mani ini henanadai aita lalodia: Dahaka dainai hahegoada karana na mai anina bada? Iehova, Iesu, bona Paulo ese haida e hagoadadia amo dahaka ta dibamu? Bona edena dala ai haida baita hagoadadia?

4. Daidia ese hahegoada bae abi na namo, to dahaka dainai hari una na asita abia momomu?

⁴ Ita iboudai na hahegoada baita abi na namo. Momokani, ta tubu daemu lalonai hahegoada baita abi na ḡau badana. Tisa tauna, Timothy Evans na eto: “Flaoa ese ranu bae abi heḡereḡerena, natu ese hahegoada bae abi na namo. Unu amo natu na be hemamimu idia na ta lalodia badamu.” To, ita na nega dikadia ai ta nohomu. Taunimanima na sibodia e heura hehenimu, lalokau na e maraḡimu, bona hahegoada na asie abi momomu. (2 Tim. 3:1-5) Tama sina haida ese natudia na asie hanamodiamu badina idia danu tamadia bona sinadia ese asie hagoadadiava. Bosi ese ḡaukara taudia na asie hanamodiamu dainai, momo na e kompleinimu, e gwaumu ḡaukara gabuna ai hahegoada herevana ta asie abiamu.

5. Hahegoada anina be dahaka?

⁵ Hahegoada anina na, ta ese e karaia ḡaukara namona ta dainai baita hanamoa, ma haida edia kara namodia baita herevalaidia, bona “lalo hesiku taudia [“lalomanoka taudia,” NWT]” baita hagoadadia. (1 Tes. 5:14) Grik gado ai ina hereva “hahegoada” e hahanaia neganai, ia anina na “tau ta na ma ta e boiriamu badinai baine gini.” Tadikaka bona taihu ida ta ḡaukara heboumu negadia ai, una na nega namona hahegoada herevana ta baita gwauraia. (Kohelete 4:9, 10 ba duahi.) Nega maorodia ai ma haida ta hadibadiamu dahaka dainai ta lalokau henidiamu bona ta lalodia badamu, a? Una henanadai do asita haerelaia lalonai, namona na ina aonega herevana baita laloa, e gwaumu: “Nega korikorina ai e gwauraiamu herevana be daka namo!”​—Her. 15:23.

6. Dahaka dainai Diabolo na e uramu baita lalomanoka? Haheitalai ta ba gwauraia.

⁶ Satana Diabolo na e uramu ita na baita lalomanoka, badina ia na mai dibana una ese lauma dalanai bona ma dala haida ai baine hamanokada diba. Hereva Lada-isidia 24:10 na e gwaumu: “Hekwakwanai dinana ai boma manoka-manoka, emu goada na maraḡi-maraḡi.” Satana ese hekwakwanai bona hahebade herevadia e ḡaukaralaidia, kara maoromaoro tauna Iobu lalona baine hamanokaia totona, to se kwalimu. (Iobu 2:3; 22:3; 27:5) Eda ruma bese bona kongrigeisen taudia ihagoadadia karana amo Diabolo ena ḡaukara baita koua diba. Una ese be durudamu eda ruma bona Kingdom Hall ai baita moalemu bona baita goadamu.

7, 8. (a) Ededia sivarai ese e hahedinaraimu Iehova ese hahegoada karana na e laloa badamu? (b) Tama sina ese Iehova ena haheitalai be ede bae tohotohoa toma? (Rau 4 ai laulau ba itaia.)

⁷ Iehova. Salamo e torea tauna na ena ane ai, eto: “Iehova na lalo-hisihisi taudia dekedekediai; dara-doko taudia [“lalomanoka taudia,” NWT] ia ese e hamauridiamu.” (Sal. 34:18) Abidadama peroveta tauna Ieremia,  na e gari bona e lalomanoka neganai, Iehova ese e hagoadaia. (Ier. 1:6-10) Danu, peroveta tauna burukana Daniel e hagoadaia dalana mani a laloa, Dirava ese aneru ta e siaia bona ina hereva “e lalokau henimu badamu” e gwauraia neganai, ia na e lalogoada! (Dan. 10:8, 11, 18, 19) Una heḡereḡerena oi ese pablisa, painia bona tadikaka taihu burukadia o hagoadadiamu, a?

⁸ Dirava na ini na se lalo toma: Ia bona Natuna lalokauna na laḡani momo lalodiai e ḡaukara hebou dainai, Iesu tanobada ai e nohova neganai baine hanamoa eiava hagoadaia na asi anina. To, nega idaudia rua ai, Iesu ese Tamana gadona na guba amo e kamonai, eto: “Lau Natugu binai, egu lalokau; lau ese ia na lalo namo heniamu.” (Mat. 3:17; 17:5) Oibe, Dirava ese Iesu e hanamoa bona e hadibaia ia na ḡaukara namona e karaiava. Iesu na nega rua​—ena haroro ḡaukara e hamatamaia negana ai, bona tanobada ai ena mase e kahikahiva negana ai​—unu hereva e kamonai neganai e lalo goada. Danu, Iesu na do se mase hanuaboina ai e lalohekwarahiva neganai, Iehova ese aneru ta e siaia e hagoadaia. (Luka 22:43) Bema ita na tama sina, namona na Iehova ena haheitalai baita tohotohoa, hanaihanai natuda baita hagoadadia bona ḡaukara namodia e karamu neganai baita hanamodia. Bema skuli ai, dina ta ta lalodiai edia abidadama itohona ḡaudia e davarimu, baita durudia.

9. Iesu ese ena aposetolo taudia e kara henidia dalana amo dahaka ta dibamu?

⁹ Iesu. Ia ese Anibou e hamatamaia hanuaboina ai, e davaria ena aposetolo taudia na e hekokorokuva. Iesu na mai manauna ida idia aedia e huri, to idia na dounu sibodia e hepapahuahuva, idia daika vada e herea; bona Petro na e laloava ia na basine moru diba. (Luka 22:24, 33, 34) To, Iesu ese ena aposetolo taudia na e hanamodia badina ia hahetoho e davariva negadia ai idia na dounu ia e badinaiava. Bona e hamaorodia idia edia ḡaukara ese iena ḡaukara na be hereadiamu, bona e hadibadia Dirava ese idia na e lalokau henidiamu. (Luka 22:28; Ioa. 14:12; 16:27) Reana siboda baita henanadai, ‘Iesu e kara heḡereḡerena, lau ese natugu bona haida edia ḡaukara namodia daidiai na hanamodiamu, to edia kerere be asina lalomu, a?’

10, 11. Edena dala ai aposetolo Paulo ese e hahedinaraia haida ese hahegoada bae abi na namo?

¹⁰ Aposetolo Paulo. Paulo na ena revareva lalodiai Kristen tadikakadia e hanamodia. Ia na idia haida ida laḡani momo lalodiai e loaloa una dainai edia manoka ḡaudia na e diba, to ia ese edia kara namodia e herevalai. Heḡereḡere, Paulo ese Timoteo na ini e gwauraia toma: “Egu lalokau merona mai momokanina ida, Lohiabada lalonai.” Ia na e diba momokani Timoteo ese Kristen taudia haida baine durudia diba. (1 Kor. 4:17; Fili. 2:19, 20) Aposetolo Paulo ese Korinto kongrigeisen ediai Tito na e hanamoa, eto: “Lau bamogu, raruosi a ḡaukara heboumu umui daimui ai.” (2 Kor. 8:23) Timoteo bona Tito na e diba Paulo ese unu e lalodia toma neganai, idia na e lalogoada.

¹¹ Paulo bona Banaba na guna daḡedaḡe e davari gabudia e lou lao neganai, edia mauri na asie laloa. Heḡereḡere, ena be idia na Lustera ai daḡedaḡe e davari, to ma e lou una hanua ai hahediba taudia matamatadia e hagoadadia bae gini goada totona. (Kara 14:19-22) Efeso ai, Paulo na hutuma ese e badu henia. Kara 20:1, 2 na eto: “Heloḡo-heloḡo e doko murinai, Paulo ese Iesu ibadinana taudia e haboudia, e hahealo henidia, e hatonidia; bena e rakatanidia, Makedonia ela. Unu gabu e rakadia  hanai, hereva hoho ai e hahealo henidia; bena Akaia ela.” Paulo ese haida ihagoadadia karana na e laloa bada.

12. Edena dalai eda hebou karana ese baine duruda baita hahealo o hahegoada heheni totona?

¹² Tamada guba ai na e uramu baita hebou hanaihanai, badina ta na baita hahealo o baita hahegoada heheni. (Heberu 10:24, 25 ba duahi.) Iesu ena hahediba ginigunadia heḡereḡeredia, hebou amo diba bona hahegoada baita abi. (1 Kor. 14:31) Cristina, paragraf 1 ai e herevalaia taihuna, na e gwaumu: “Hebou ai tadikaka taihu edia lalokau bona hahegoada karadia na na moalelaimu. Nega haida mai lalometaugu ida Kingdom Hall na laomu. To taihu haida na dekegu e maimu, e rosigumu, bona e gwaumu lau na mai hairaigu. Bona e hamaorogumu idia ese e lalokau henigumu bona lauma dalanai na goadamu dainai e moalemu. Edia hahegoada karana ese egu hemami na e hanamoamu!” Iboudai “baita hahealo” o baita hahegoada heheni neganai, baita goadamu!​—Roma 1:11, 12.

13. Dahaka dainai Dirava ena hesiai taudia goadadia na hahegoada bae abi na namo?

¹³ Dirava ena hesiai taudia goadadia danu hahegoada bae abi na namo. Mani Iosua a laloa. Ia na laḡani momo lalodiai Dirava e hesiai henia goadagoada. To, Iehova ese Mose e hamaoroa Iosua baine hagoadaia, eto: “Iosua ba haḡania bona ba hagoadaia, bona lalona ba ha-aukaia; badina be ia ese ina bese taudia baine hakaudia hanai, Ioridane sinavaina unukahana ai; bena oi ese matamu amo ba itaia tanona na ia ese baine henidia, edia tano.” (Deu. 3:27, 28) Iosua na maduna badana ta e huaia, ia ese Israel taudia baine hakaudia ela bona Gwauhamata Tanona bae abia. Gabeai ia na hahetoho haida e davari bona tuari oreana ta ese e hadarerea. (Ios. 7:1-9) Una dainai, Iosua na hahegoada baine abi na namo. Namona na ita ese elda bona seket taudia baita hagoadadia, badina e ḡaukara goadamu Dirava ena mamoe bae naridia totona. (1 Tesalonika 5:12, 13 ba duahi.) Seket tauna ta na eto: “Nega haida tadikaka ese tenkiu revarevadia e henimaimu, e gwaumu idia ese emai vadivadi karana na e moalelaia. Unu revareva na a balahenimu bona a lalomanokamu negadiai a duahimu. Unu ese e hagoadamaimu.”

14. Dahaka ese e hahedinaraiamu sisiba ta henimu neganai, hahenamo bona hahegoada herevadia baita heni na namo?

¹⁴ Kristen elda bona tama sina na e dibamu hahenamo bona hahegoada herevadia daidiai, ta na dounu Baibul ena sisiba be badinaiamu. Korinto taudia ese Paulo ena sisiba e badinaia neganai, Paulo ese e hanamodia, reana una ese idia na e hagoadadia hanaihanai kara maoromaoro bae badinaia.  (2 Kor. 7:8-11) Andreas, natuna na rarua, na ini e gwau toma: “Hahegoada karana ese natu e durudiamu lauma dalanai bae goada bona bae moale. Ta o hagoadaiamu neganai, o duruamu o heni sisibana na baine badinaia. Ena be natumai na mai dibadia kara maorona be dahaka, to hanaihanai a hagoadadiamu karana ese e durudiamu una kara maorona ikarana ai bae manada.”

15. Haida be ede baita hagoadadia toma?

¹⁵ Baita hahedinaraia tadikaka taihu edia ḡaukara bona kara namodia na ta lalodiamu. (2 Sis. 16:9; Iobu 1:8) Iehova bona Iesu ese Basileia ḡaukarana ta duruamu karana na e laloa badamu, ena be eda noho daladia heḡereḡeredia ai ta henimu ḡaudia bona eda goada na mai hetoadia. (Luka 21:1-4; 2 Korinto 8:12 ba duahi.) Heḡereḡere, tadikaka taihu burukadia haida na e hekwarahimu hebou baema bona bae haroro. Namona na idia baita hanamodia bona baita hagoadadia.

16. Dahaka dainai dala e hekehomu negadiai haida baita hagoadadia?

¹⁶ Dala e hekehomu negadiai haida baita hagoadadia. Bema ta itaiamu ta baita hanamoa na namo, baita karaia. Paulo bona Banaba na Antioka, Pisidia tanona, ela neganai e vara ḡauna aita laloa. Dubu biagudia edia gwaukau taudia ese e hamaorodia, eto: “Varavaramai e, bema mai emui hahealo herevadia taunimanima edia, mani a gwaurai.” Bena Paulo ese hereva namona ta e heni. (Kara 13:13-16, 42-44) Bema ita ese hahegoada herevana ta baita heni diba, baita gwauraia na namo. Bema taunimanima baita hagoadadia hanaihanaimu, idia ese danu be hagoadadamu.​—Luka 6:38.

17. Edena dala ai ta baita hanamoa?

¹⁷ Mai momokanida ida baita hereva bona hereva maorodia baita gwaurai. Haida baita hagoadadia bona baita hanamodia na namo, to Iesu ese Tuatira ai Kristen taudia e hamaorodia herevana ese e hahedinaraiamu hereva maorodia baita gwaurai na namo herea. (Apokalupo 2:18, 19 ba duahi.) Heḡereḡere, bema ita na tama sina, natuda ese lauma dalanai e goadalaiamu ḡauna ta dainai baita hanamodia. Reana singul sina ta baita hamaoroa ena be hekwakwanai e davarimu, to natuna e naridiamu dalana ese ita na e durudamu. Hahenamo herevadia bona hahegoada unu bamodia ese ta na baine durua!

18, 19. Hahegoada bae abi na namo taudia be ede baita hagoadadia toma?

¹⁸ Iehova ese ita na basine hamaorodamu daika baita hagoadaia, Mose e hamaoroa Iosua baine hagoadaia heḡereḡerena. To, Dirava na e moalemu bema ita ese tadikaka taihu bona haida ta hagoadadiamu. (Her. 19:17; Heb. 12:12) Heḡereḡere, ita ese pablik tok e henimu tadikakana baita hamaoroa, edena dalai ena tok ese e hagoadada eiava e duruda siri ta anina ta lalopararalaia. Taihu ta ese pablik tok e heni tadikakana ta e tore henia neganai, eto: “Ena be miniti haida mo ta herevahereva, to oi ese egu lalometau na o itaia bona o hagoadagu. Na uramu ba diba emu hereva dalana namona, platfom ai bona o hereva henigu neganai, na diba una na Iehova ena harihari ḡauna.”

¹⁹ Lauma dalanai haida ihagoadadia daladia momo baita davarimu, bema Paulo ena sisiba baita badinaiamu, e gwaumu: “Ba hahealo heheni, ba hahegoada heheni, ina harihari o karamu heḡereḡerena.” (1 Tes. 5:11) Bema ‘daba daba idoidiai baita hahealo hehenimu,’ Iehova na baita hamoaleamu.