1. Ierusalem e hadikaia neganai, e vara ḡaudia mani a herevalai.

LAḠANI 607 B.C.E ai, King Nebukadnesara Iharuana ese Babulono tuari orea badana e gunalaia bona Ierusalem e hadikaia. Baibul ese e vara ḡauna na ini e herevalaia tomamu: “[Nebukadnesara] ese edia eregabe taudia na dare amo e aladia mase, edia dubu ena helaḡa gabuna ai. Tauhau eiava hane-ulato, tau badana eiava tau burukana, se bogadia hisi; . . . Dirava ena dubu e doua, bona Ierusalem maḡuna e ḡigia dobi, bona ena ruma badadia iboudiai na lahi amo e dou, bona ena kohu ḡoeva-daedia iboudiai e habuadia tari.”​—2 Sis. 36:17, 19.

2. Iehova be dahaka hahediba herevana e heni, bona Iuda taudia ediai be dahaka baine vara?

² Ierusalem ai e nohova taudia na mai dibadia una hanua na haida ese bae hadikaia. Laḡani momo lalodiai, Dirava ena peroveta taudia ese Iuda taudia na e hadibadia, bema Dirava ena Taravatu bae dadarai, Ia ese Babulono taudia imadia ai baine atodia. Idia momo na bae mase, a bae abidia mauri taudia na Babulono ena iḡui hesiai taudia ai baela. (Ier. 15:2) Babulono ai edia mauri be ede bamona? Babulono ai iḡui hesiai maurina be Kristen taudia ediai danu e vara, eiava? Bema oibe, edena negai?

3. Edena dalai Babulono ena iḡui hesiai maurina na Aigupto ena amo e idau?

³ Peroveta taudia edia hereva na e ḡuḡuru. Iehova ese Ieremia ena amo Babulono baela taudia na e hadibadia bae noho namonamo. Eto: “Ruma ba hagini, bena ba noholai; uma ba kara, bena anidia bavani. A vada na siaimui lao eneseni ai ba noho hanuana ena namo ba tahua, bona Iehova ba ḡuria ia dainai; badina be iena namo ai emui namo ba davaria.” (Ier. 29:5, 7) Babulono ai Dirava ena hereva e badinaia taudia na e noho namonamova. E ḡuidia taudia ese maoro e henidia dina ta ta ḡaukaradia bae kara, bona Babulono ai bae loaloa diba. Idaunega ai, unuseniai na bisnes e karava bona buka gunadia haida ese e hahedinaraiamu, Iuda taudia momo na hoihoi daladia e diba, a haida be ima ḡaukaradia e diba. Iuda taudia haida na taḡa taudia ai ela. Babulono ena iḡui ai e nohova taudia edia mauri bona laḡani hanred momo gunanai Aigupto ena iḡui ai e nohova Israel taudia edia mauri na idau.​—Esodo 2:23-25 ba duahi.

4. Gwau-edeede Iuda taudia bogaraḡidiai daidia danu e hisihisiva, bona dahaka dainai Taravatu bae badinaia na mai hekwarahina?

⁴ Babulono ai e nohova Iuda taudia na tauani dalanai heduru e abi, to lauma dalanai be ede e abi toma? Iehova ena dubu bona boubou patana na vada e hadikadia, bona hahelaḡa taudia na asie ḡaukara namonamova. Unu Iuda taudia bogaraḡidiai haida na Dirava e abidadama henia, to edia bese taudia ida e hisihisi hebouva. Ena be unu e vara toma, to idia na e hekwarahiva Dirava ena Taravatu bae badinaia. Heḡereḡere, Daniel bona bamona tatoiosi, Sadaraka, Mesaka, bona Abedenego na Iuda taudia basie ani anianidia asie ani. Bona mai dibada Daniel na hanaihanai Dirava e ḡuriḡuri heniava. (Dan. 1:8; 6:10) To, idia na tomadiho koikoi taudia edia lohia henunai e nohova dainai, Dirava ena Taravatu bae badinaia na mai hekwarahina.

5. Iehova ese ena taunimanima be dahaka helaro e henidia, bona dahaka dainai una gwauhamata na idau herea?

⁵ Israel taudia ese dala maorona ai Dirava ma bae toma henia diho diba, eiava? Una negana ai, toana na una na basine vara badina Babulono ena taravatu ai e abidia mauriva taudia na basie ruhadia. To una taravatu ese Iehova Dirava na se koua. Ia na e gwauhamata ena taunimanima na baine ruhadia, bona una na e vara. Dirava ena gwauhamata na nega iboudiai e ḡuḡurumu.​—Isa. 55:11.

6, 7. Dahaka dainai laloparara maorona baita abia na ḡau badana?

⁶ Babulono ai e nohova Iuda taudia ediai e vara ḡaudia be Kristen taudia ediai danu e vara, eiava? Laḡani momo lalodiai, Gima Kohorona ese e hahedinaraia, Dirava ena hesiai taudia na laḡani 1918 ai Babulono ena iḡui hesiai taudia ai ela, bena laḡani 1919 ai e ruhadia. To, ina stadi bona stadi gabena amo baita dibamu, dahaka dainai laloparara maorona baita abia na namo.

⁷ Ina ba laloa: Babulono Badana na tanobada ibounai tomadiho koikoi oreana. Una dainai bema laḡani 1918 lalonai, Dirava ena taunimanima na Babulono ena e iḡui ai dounu nonoho, anina na idia na dounu tomadiho koikoi lalonai. To, e vara ḡaudia ese e hahedinaraiamu, Tanobada Tuarina Ginigunana do se vara neganai, Dirava ena horoa orena taudia na Babulono  Badana amo e heruhava. Momokani, Tanobada Tuarina Ginigunana lalonai, horoa orena taudia na daḡedaḡe e davari, to una na dia Babulono Badana ese e havaraia, a gavamani ese e havaraia. Una dainai, laḡani 1918 ai, Iehova ena taunimanima na Babulono Badana ena iḡui hesiai taudia ai asiela.

8. Aposetolo taudia e mase murinai dahaka e vara? (Rau 21 ai laulau ba itaia.)

⁸ Pentekoste 33 C.E. ai, Iuda taudia bona idau bese taudia momo na lauma helaḡa amo e horodia. Unu Kristen taudia matamatadia na “e abia hidi besena, hahelaḡa taudia herea-daedia, hanua helaḡana, Dirava ena orea” taudia ai ela. (1 Petro 2:9, 10 ba duahi.) Aposetolo taudia ese Dirava ena taunimanima na e gimadia namonamova. To, aposetolo taudia e mase murinai, tatau haida ese “hereva gageva-gagevadia” e gwauraiva “kamonai taudia bae hakaudia kerere” totona. (Kara 20:30; 2 Tes. 2:6-8) Kongrigeisen lalodiai unu tatau momo na heitatao taudia bona gabeai “bishop” ai ela. Dagi oreana ta na e hematamava, ena be Iesu ese murinai e rakava taudia na e hamaorodia, eto: “Iboumui ai na tadikaka.” (Mat. 23:8) Aristotle bona Plato edia hereva e abi daeva dagi bada taudia haida ese tomadiho edia lalohadai koikoidia e hahedibalai matama, to Dirava ena hahediba hereva ḡoevadia na e dadaraidia.

9. Aposteit oreana be edena dalai Roma Gavamani ese e durua, bona dahaka e vara?

⁹ Laḡani 313 C.E. ai, Roma ena Empra Constantine ese una aposteit oreana na e hamomokania ia na tomadiho ta. Una nega amo, Dubu bona Gavamani na e ḡaukara hebou matama. Heḡereḡere, Constantine na dubu igunalaidia taudia haida ida hebou ta ladana Council of Nicaea e abia murinai, ia ese hahelaḡa tauna ta, Arius, na e lulua lasi badina Arius na se abia dae Iesu na Dirava. Gabeai, Empra Theodosius Ginigunana (379-395 C.E.) ena lohia henunai, Katolik Dubuna, na Roma Basileia ena tomadiho badana ai ela. Histori e stadilaiamu taudia na e gwaumu, laḡani 301 ela 400 C.E. lalodiai, Dirava momokani asi dibadia Roma taudia na sibodia e hegwauraiva “Kristen taudia.” To, hereva momokani na ina, una nega ai aposteit oreana na Roma Basileiana ena tomadiho koikoi oreadia ida e ḡaukara hebou, unu amo Babulono Badana ena orea ai ela. Ena be una na e vara, a horoa kristen taudia haida, uit ida e haheḡereḡeredia taudia, na e hekwarahiva Dirava bae toma henia diho, to e harorova neganai ta se kamonaiva. (Mataio 13:24, 25, 37-39 ba duahi.) Momokani idia na Babulono ena iḡui lalonai e nohova!

10. Laḡani hanred haida muridiai, dahaka dainai kudou namo taudia ese dubu edia hahediba herevadia na e dadaraidia?

¹⁰ Keriso e vara bena laḡani hanred haida muridiai, taunimanima momo na Grik eiava Latin gado ai Baibul e duahiava. Idia ese Dirava ena hahediba herevadia bona dubu edia hahediba herevadia na e haheḡereḡerediava. Idia haida na Baibul ai e duahi ḡaudia amo e diba, dubu edia hahediba herevadia na koikoi dainai e dadaraidia, to edia lalohadai bae herevalai hedinarai neganai bae hamasedia diba.

11. Momo ese Baibul basie duahia totona, dubu igunalaina taudia be dahaka e kara?

¹¹ Gabeai, Grik bona Latin gado na momo ese asie ḡaukaralaiva, bona dubu na  se urava Baibul na momo ese e herevalaiava gadodia ai bae hahanaia. Una dainai, dubu igunalaina taudia bona aonega taudia haida sibodia ese Baibul e duahiava, to idia momo na asi toretore dibadia bona asi duahiduahi dibadia. Dubu edia hahediba asie badinava taudia na e panisidiava. Dirava ese e horodia taudia na hebou ta e urava bae karaia neganai hehuni ai e hebouva. Babulono ai Iuda taudia edia negai e vara bamona, e horodia “hahelaḡa taudia” edia ḡaukara na se heau namonamova. Babulono Badana ese taunimanima na e biagudia auka!

12, 13. Dahaka badi rua daidiai taunimanima na Babulono Badana amo e heruha matama? Mani a herevalaia.

¹² Kristen momokanidia ese dala maorona ai Dirava bae toma henia diho diba, eiava? Oibe! Diari e hedinarai badidia badadia na rua. Badi ginigunana be, laḡani 1450 bamona ai printa masini ta e karaia. West tanodia ai printa masini do asie kara negana ai, Baibul kopedia na ima amo e toreva. Unu Baibul kopedia na dia momo bona davadia na bada. Momo na e gwaumu, toretore mai dibana tauna ta ese Baibul kopena tamona na hua ten lalonai baine torea ore! Danu, toretore tauna ese e ḡaukaralaiva kohudia (vellum eiava parchment) davadia na babada. To, mai ena diba tauna ese printa masini bona pepa e ḡaukaralaiva dainai, dina tamona lalonai rau 1,300 baine printa diba!

¹³ Badi iharuana na, laḡani 1501 ela 1600 lalodiai tatau haida ese Dirava ena Hereva na taunimanima edia gado korikori ai e hahanai. Idia momo na una ḡaukara e karaiava, ena be edia mauri na bae haboio diba. Dubu taudia na e badu. Badina Dirava garina  e gariva tauna o hahinena ese ena gado ai Baibul baine duahia neganai, henanadai ini bamodia baine gwaurai diba: ‘Baibul lalonai pegatori herevana be ede kaha ai e herevalaia? Baibul be e gwaumu pris davadia baita heni funeral tok bae karaia totona, eiava? Bona pope bona cardinal be e herevalaidia, a?’ Dubu taudia edia lalohadai ai una na idia ihadikadia ḡauna ta. Dubu igunalaina taudia na taunimanima edia henanadai daidiai e badu! Una dainai e hekwarahiva taunimanima na bae koudia. Dubu ena hahediba herevadia e dadaraiva taudia na e hahemaoro henidiava, unu hahediba herevadia haida na Aristotle bona Plato​—Iesu do se vara ai e nohova taudia rarua​—edia lalohadai koikoidia. Dubu ese ta ihamasena herevana e gwauraiava, a gavamani ese una hereva e badinaiava. Unu amo idia na e urava taunimanima bae koudia Baibul basie duahia bona dubu ena maoro o kerere na basie tahua. Edia ura ḡauna na e vara. To, haida na se gari bona Babulono Badana e dadaraia. Idia ese Dirava ena Hereva taina e dibaia, bona e urava diba ma haida bae abi! Una nega amo tomadiho koikoi amo bae heruha nege negana e matama.

14. (a) Laḡani 1870 lalodiai, haida be dahaka e kara Baibul ena hereva momokani bae lalopararalaia namonamo totona? (b) Tadikaka Russell ese hereva momokani e tahua dalana mani a herevalaia.

¹⁴ Baibul ena hereva momokani e urava bae dibaia taudia momo na dubu ese se biagudia aukava tanodia e laova. Idia na e urava Baibul bae duahia, bae stadilaia bona bae herevalaia, to asie urava haida ese bae hamaorodia dahaka bae kara. Unu bamona tanona ta na United States, laḡani 1870 lalodiai, unuseniai Charles Taze Russell mai bamona ida ese Baibul e stadilaia matama. Matamanai, Tadikaka Russell na e urava baine diba edena tomadiho be hereva momokani e hahedibalaiava. Ia ese Baibul ena hereva bona tomadiho idauidau, dia Kristen tomadihodia danu, edia hahediba herevadia na e haheḡereḡeredia. Bena e laloparara unu tomadiho ta ese Dirava ena Hereva na se badinaia ḡuḡuru. Nega ta tadikaka Russel na dubu igunalaina taudia haida e hereva henidia, badina e urava ia mai bamona ida ese Baibul ai e davari hereva momokanidia na idia ese bae abi dae bena edia kongrigeisen taudia bae hadibalaidia. Dubu igunalaina taudia na asie ura. Baibul Stiuden taudia ese ina na e dibaia: Tomadiho koikoi ida na basie ḡaukara hebou diba.​—2 Korinto 6:14 ba duahia.

15. (a) Kristen taudia be edena nega ai Babulono Badana ena iḡui ai e noho? (b) Stadi gabena ese ededia henanadai be haerelaimu?

¹⁵ Ina stadi ai tame diba, aposetolo oredia e mase murinai Kristen momokanidia na Babulono ena iḡui ai e noho. To, henanadai haida e vara: Dahaka ese danu e hamomokaniamu laḡani 1914 do lasi neganai, horoa taudia na Babulono Badana ena iḡui amo e heruhava? Tanobada Tuarina Ginigunana lalonai Iehova e hesiai heniava taudia be haroro ḡaukara asie goadalaia dainai Iehova ena lalonamo e haboioa, a? Bona una nega ai eda tadikaka taihu haida be tanobada amo asie gini siri dainai Iehova na se moale, a? Danu, bema Kristen taudia na laḡani 200 C.E. amo tomadiho koikoi enai iḡui ai e noho, edena negai e ruhadia? Unu na henanadai namodia, bona stadi gabena ese be haerelaidiamu.