1-3. Euodia bona Sunutuke bogaraḡidiai hekwakwanai be reana ede e vara toma, bona edena dalai hekwakwanai unu bamodia na basita davari? (Rau 14 ai laulau ba itaia.)

IEHOVA ena hesiai taudia ese Dirava ena buka helaḡana, Baibul, na e laloa badamu. Ita na dia ḡoevadae dainai nega haida Baibul amo sisiba ta abimu. Unu negadiai dahaka baita kara na namo? Kristen ginigunadia edia negai, Euodia bona Sunutuke mani aita lalodia. Unu horoa hahinedia bogaraḡidiai hekwakwanai haida e vara. Dahaka hekwakwanai? Baibul ese na se herevalaidia. To e vara ḡauna na reana ini e vara toma.

² Reana Euodia ese tadikaka bona taihu haida e boiridia ena ruma ai bae aniani bona bae moale hebou. Sunutuke na se boiria, to e kamonai idia na nega namona e abia. Sunutuke na reana ini e gwau toma: ‘Dahaka dainai Euodia ese lau na se boirigu? Lau be na tomamu ia na lau turagu namona.’ Sunutuke na e laloava Euodia ese ia na se laloa badava dainai se boiria. Una dainai ia na moalemoale ta e karaia bona Euodia ese e boiridia tadikaka bona taihu ma e boiridia, a Euodia be se boiria.  Idia bogaraḡidiai e vara hekwakwanaina ese kongrigeisen ena maino na bema hadikaia diba. Baibul ese gabeai e vara ḡauna na se gwauraia, to unu taihu raruosi ese aposetolo Paulo ena amo e abia sisibana na e badinaia.​—Fili. 4:2, 3.

³ Hari ina negai, Iehova ena taunimanima edia kongrigeisen lalodiai hekwakwanai unu bamodia e varamu. To, unu hekwakwanai na baita hamaoromaoromu eiava basita davarimu bema Baibul ai Dirava ena sisiba baita badinamu. Iehova ena Hereva baita laloa badamu neganai, ena hahediba herevadia na baita badinamu.​—Sal. 27:11.

4, 5. Eda hemami baita biagudia totona, Dirava ena sisiba be dahaka?

⁴ Haida ese asie lalodamu eiava asie kara namo henidamu neganai, eda hemami baita biaguamu na auka. Bema haida ese eda kastom, kopida kaladia, eiava toada daidiai basie kara namo henidamu, baita lalohisihisi dibamu. To, eda Kristen tadikaka ese unu be kara henida tomamu neganai, hisihisina na bada herea! Unu baita haheaukalai totona Dirava ena sisiba be dahaka?

⁵ Matama negana amo Iehova ese taunimanima edia mauri na e itaiamu. Eda hemami bona kara na mai dibana. Baita lalohisihisimu eiava baita badumu neganai, baita hereva kereremu o baita kara kereremu bena baita lalohisihisimu. Baibul ena sisiba heḡereḡerena eda badu baita biagua bona basita badu haraḡa na aonega karana! (Hereva Lada-isidia 16:32; Kohelete 7:9 ba duahi.) Una dainai namona na baita hekwarahi basita badu haraḡa to dika baita gwautao. Iehova bona Iesu ese dika igwautaona karana na e laloa badamu. (Mat. 6:14, 15) Oi be dika o gwautaomu bona emu hemami o biagudiamu, eiava?

6. Dahaka dainai eda badu baita biagua na namo?

⁶ Nega momo edia hemami asie biagumu taudia na e badumu. Una dainai, haida na asie uramu idia bae bamodia. Badu tauna ese kongrigeisen ai haida baine hakaudia kerere diba. Reana ia na be uramu ena badu o inai karana na baine hunia, to kudouna ai e abimu lalohadai kereredia na ‘hebou [“kongrigeisen,” NWT] ai bae hedinarai.’ (Her. 26:24-26) Elda taudia ese una tau bae durua bena baine laloparara Dirava ena orea lalonai badu, hemaka, bona inai karadia na asie edia gabu. Iehova ena Hereva ese una na e hahedinaraia ḡoevaḡoevamu. (Lev. 19:17, 18; Roma 3:11-18) Una o abia daemu?

7, 8. (a) Iehova ese ena orea tanobada ai be ede e hakaua tomamu? (b) Dirava ena Hereva lalonai hahekau herevadia haida be dahaka, bona dahaka dainai baita badinadia?

⁷ Iehova ese ena orea tanobada ai na “hesiai tauna mai ena kamonai bona mai ena kara maoromaoro” amo e hakauamu bona e ubuamu, Keriso, “ekalesia kwarana” ena hegunalai henunai. (Mat. 24:45-47; Efe. 5:23) Una hesiai tauna na aposetolo edia negai gavanin bodi e kara heḡereḡerena, Dirava ena hereva e abia daemu bona e laloa badamu. (1 Tesalonika 2:13 ba duahia.) Baibul ai ita bae duruda hahekau herevadia haida be dahaka?

⁸ Baibul ese ita e hadibadamu baita hebou hanaihanai. (Heb. 10:24, 25) Bona e hagoadadamu hahediba hereva tamona baita gwauraia. (1 Kor. 1:10) Dia una mo to eda mauri lalonai danu Basileia baita atoa  guna. (Mat. 6:33) Baibul ese eda maduna o hahenamo danu e herevalaia, una na ruma ta ruma ta ai, pablik gabudia ai, bona gabu idauidau ai taunimanima baita haroro henidia. (Mat. 28:19, 20; Kara 5:42; 17:17; 20:20) Dirava ena Hereva ese Kristen elda taudia e hadibadiamu ena orea bae haḡoevaia. (1 Kor. 5:1-5, 13; 1 Tim. 5:19-21) Bona ena orea taudia iboudiai e hamaorodiamu namona na lauma bona tauani dalanai bae ḡoeva.​—2 Kor. 7:1.

9. Iesu ese daika e ḡaukaralaiamu ita baine duruda Dirava ena hereva baita lalopararalaia totona?

⁹ Reana haida na e laloamu idia sibodia ese Baibul anina na bae herevalaia diba. To, Iesu ese “hesiai tauna mai ena kamonai” e abia hidi, lauma aniani baine heni. Laḡani 1919 amo, Iesu Keriso ese una hesiai tauna e ḡaukaralaiamu ia murinai e rakamu taudia baine durudia, Dirava ena Hereva bae lalopararalaia bona ena hahekau herevadia bae badina. Baibul ena hahediba herevadia baita badinamu neganai, kongrigeisen na be ḡoevamu, bona maino bona lalotamona ai be nohomu. Siboda baita henanadai, ‘Lau be Iesu ese hari e ḡaukaralaiamu oreana na badinaiamu, eiava?’

10. Esekiel bukana ese Iehova ena guba oreana be ede e herevalaia toma?

¹⁰ Iehova ena Hereva ese Iena guba oreana e herevalaia. Heḡereḡere, peroveta tauna Esekiel na matahanai ta ai guba kariotana e itaia, una ese Dirava ena guba oreana e laulaulaia. (Ese. 1:4-28) Iehova ese una kariota e haheauamu, bona Ia e uramu gabudia e laomu. Dirava ena guba oreana ese ena orea tanobada ai e hakauamu. Una kariota na e heaumu! Laḡani 10 lalodiai, orea lalonai e vara senisi momo mani a lalo, bona ba helalotao unu na Iehova ese e havaradia. Keriso bona aneru helaḡadia na Iehova ena kariota ida e heaumu, kahirakahira kara dika tanobadana be haoreamu, bena Dirava ena lohia siahuna be abia isimu bona ladana helaḡana be hahelaḡaiamu!

11, 12. Iehova ena orea ese e kara ḡaudia haida be dahaka?

¹¹ Ini dina gabedia ai, Dirava ena orea tanobada ai ese e kara ḡaudia haida mani aita lalodia. Konstraksen. Tadikaka taihu hanred momo na Iehova ena Witnes edia hedkota matamatana Warwick, New York, U.S.A. ai e haginiamu. Worldwide Design/Construction Dipatmen edia hegunalai henunai, tanobada heḡeḡemadai volentia taudia tausen momo ese Kindom Hall matamatadia e haginimu bona brens ofesi e habadadiamu. Ta moalemu badina volentia taudia momo na mai edia ura ida unu ḡaukara idauidau e karamu! Ba helalotao, Iehova ese tanobada heḡeḡemadai Basileia e harorolaiamu taudia na e hanamodiamu, idia na mai manaudia ida  bona davari heḡereḡeredia ai kontribiusen e henimu unu projek bae durudia totona.​—Luka 21:1-4.

¹² Edukeisen. Dirava ena hereva e hahedibalaiamu sikulidia mani a lalodia. (Isa. 2:2, 3) Unu sikuli haida na, Painia Ḡaukara Sikuli, Basileia Evanelia Sikuli, Gilead Sikuli, Bethel Taudia Matamatadia Edia Sikuli, Seket Taudia Bona Adavadia Edia Sikuli, Kongrigeisen Elda Taudia Edia Sikuli, Basileia Hesiai Ḡaukara Sikuli, bona Brens Komiti Bona Adavadia Edia Sikuli. Iehova na e ura dikadikamu ena taunimanima baine hadibadia! Dia unu sikuli mo to eda websait, jw.org amo Dirava ena hereva e hahedibalaiamu, unuseniai gado hanred momo ai e hahanai pablikeisen idauidau baita itadia dibamu. Una websait ai na natu, ruma bese idurudia kahadia, bona nius e hahedinaraimu. Haroro ḡaukara bona emu ruma bese ena tomadiho lalonai jw.org o ḡaukaralaiamu, eiava?

13. Iehova ta badinaiamu tauda eda maduna be dahaka?

¹³ Iehova ena orea lalonai ta nohomu na hahenamo ta! Dirava ena taravatu ta diba dainai, eda maduna na kara maorodia baita kara bona Dirava ena lohia siahuna baita abia isi. Ina tanobada e dika e laomu lalonai, namona na ita ese kara dika baita inai henia, Iehova ese e inai heniamu heḡereḡerena. (Sal. 97:10) “Dika e gwauraimu namo bona namo e gwauraimu dika” taudia na basita tohotohodia. (Isa. 5:20) Ita na ta uramu Dirava baita hamoalea dainai, baita ḡaukara goada tauani dalanai, eda kara ai, bona lauma dalanai baita ḡoeva. (1 Kor. 6:9-11) Ita ese Iehova ta lalokau heniamu bona ta badinaiamu dalana na, ena Hereva lalonai e toredia hedinarai taravatudia baita badina. Baita hekwarahi unu taravatu na ruma ai, kongrigeisen ai, ḡaukara gabudia ai, bona sikuli ai, o gabu iboudiai lalodiai baita badinadia. (Her. 15:3) Dirava baita badinaia daladia ma haida aita lalodia.

14. Kristen tama sina be edena dalai bae hahedinaraia idia na Dirava e badinaiamu?

¹⁴ Natu inaridia. Kristen tama sina ese Iehova bae badinaia dalana na, Iena Hereva heḡereḡerena ai natudia bae hadibadia. Dirava e gari heniamu tama sina na natudia inaridia karana ai edia gabu taudia edia lalohadai kereredia ese basie hakaudia na namo. Kristen ruma besena ese tanobada laumana o ena lalohadai na basie badinaia. (Efe. 2:2) Bapatiso Kristen tama ta na ini basine lalo toma, ‘Emai tano ai hahine ese natu e hadibadiamu.’ To Baibul na e gwaumu: “Tama e, natumui . . . [na] Lohiabada ena hahediba herevadia bona ena sisiba herevadia ba ubulaidia.” (Efe. 6:4) Dirava e gari heniamu tama sina na e uramu natudia na Samuel heḡereḡerena bae kara, e tubu daeva lalonai, Iehova ese ia na e bamoava.​—1 Sam. 3:19.

15. Abi hidi badadia do asita kara negadiai edena dalai Iehova baita badinaia?

¹⁵ Abi hidi ta karamu negadiai. Dirava baita badinaia dalana ta na, eda mauri lalonai abi hidi badadia do asita kara neganai, ena Hereva bona ena orea amo heduru baita tahu. Una na mai anina bada, mani ina haheitalai aita laloa. Idau tano ai e nohomu tama sina haida na natudia e siaidiamu edia tano korikori ai varavaradia ese bae naridia, unu amo idia na bae ḡaukara bona moni bae habou. Oibe, una na ta ta ena abi hidi, to namona na baita helalotao ita ta karamu abi hididia daidiai Dirava ese do baine hahemaoro henida. (Roma 14:12 ba  duahia.) Ita siboda bona eda ruma bese daidiai abi hidi badana ta baita karaia guna bena gabeai Baibul ena hereva baita tahua be aonega karana, a? Lasi! Tamada guba ai ena heduru baita tahua na namo, badina siboda eda raka dalana na basita abi hidi diba.​—Ier. 10:23.

16. Hahine ta na natuna e vara neganai dahaka abi hidi e kara, bona dahaka ese e durua abi hidi maorona e karaia?

¹⁶ Idau tano ai e nohova hahinena ta na mero ta e havaraia, bona e urava una mero na baine siaia tubuna ese ena hanua korikori ai bae ha naria. To una negai, ia na Iehova ena Witnes ta ese Baibul amo e stadi heniava. Ia na lauma dalanai e goada bona e laloparara ena maduna na natuna baine durua Iehova baine toma henia diho. (Sal. 127:3; Her. 22:6) Una hahine na Baibul ena hereva heḡereḡerena ena lalohekwarahi na Iehova enai e ḡuriḡurilaia. (Sal. 62:7, 8) Dia una mo, to ia e stadi heniava taihuna bona kongrigeisen taudia ma haida danu e hereva henidia. Ena be varavarana bona turana ese e doriava natuna na baine siaia tubuna dekedia, to ia na e diba una na dia maoro. Kongrigeisen ese una hahine bona natuna e durudia dalana na hahine adavana ese e itaia neganai e hoa, una dainai ia danu e stadi bona adavana bona natuna ida hebou e laova. O laloamu una hahine be e diba Iehova ese ena ḡuriḡuri e haerelaia, a? Oibe.

17. Baibul stadi taudia baita durudia totona ededia hahekau herevadia baita badina?

¹⁷ Hahekau herevadia baita badina. Dirava baita badinaia dalana ta na, ena orea amo ta abimu hahekau herevadia baita badina. Heḡereḡere, Baibul stadi taudia baita durudia totona e heni herevadia mani aita lalodia. Baibul Ena Hahediba Maorodia be Dahaka? bukana amo ta ta stadi heniamu neganai, stadi ta ta muridiai miniti haida lalodiai orea ena dala baita hadibaia. Una baita karaia dalana na, Kingdom Hall ai be Dahaka E Karamu? vidiona, bona ina buklet, Ina Negai Iehova Ena Ura E Karaiamu Taudia Be Daidia? baita ḡaukaralaidia. Baibul Ena Hahediba bukana baita haorea neganai, “Dirava Ena Lalokau Lalonai Do Umui Noho” bukana baita stadilaia, ena be ia na vada e bapatiso. Orea ese unu hahekau herevadia e henimu, unu amo hahediba matamatadia edia “abidadama” na baine “goada.” (Kol. 2:7, NWT) Oi ese unu hahekau herevadia o badinamu?

18, 19. Iehova baita tenkiu henia badidia haida be dahaka?

¹⁸ Badi momo daidiai Iehova baita tenkiu henia na namo! Ita na ia dainai ta maurimu, ta mareremu bona ta nohomu. (Kara 17:27, 28) Ia ese harihari ḡauna hereadaena ta e henida, una na Baibul. Ta abia daemu ia na Dirava ena hereva, Tesalonika Kristen taudia ese e abia dae heḡereḡerena.​—1 Tes. 2:13.

¹⁹ Baibul ese e duruda dainai Iehova ta raka henia kahi bona Ia danu ita e raka henida kahi. (Iak. 4:8) Tamada guba ai ese e henida hahenamona na ena orea ai ta nohomu. Unu hahenamo na ta moalelaidiamu! Salamo e torea tauna na ane ai ini e gwau toma: “Iehova ba hanamoa, badina be ia na namo; ena hebogahisi na e hesiriu hanaihanaimu.” (Sal. 136:1) Salamo 136 lalonai ina hereva “ena hebogahisi na e hesiriu hanaihanaimu,” na nega 26 e hedinarai. Iehova bona ena orea baita badinadiamu neganai, una hereva na edai be momokanimu badina baita mauri hanaihanaimu!