1, 2. (a) Dirava ena hesiai taudia be dahaka davana namona e nariamu? (b) Dahaka ese baine duruda davada namona baita laloa bada? (Rau 25 ai laulau ba itaia.)

APOSETOLO PAULO heḡereḡerena, hari ina negai lauma amo e horodia Kristen taudia na “Dirava ese e boiridia dae” davana namona bae abia. (Fili. 3:14) Idia na Iesu Keriso ida guba Basileia lalonai bae lohia bona bae ḡaukara hebou taunimanima na ḡoevadae taudia ai bae halaodia totona. (Apok. 20:6) Dirava ese e boiridia karana na helaro namona! To mamoe ma haida edia helaro na idau. Idia davadia na tanobada ai mauri hanaihanai bae abia​—⁠bona una na helaro namona!​—⁠2 Pet. 3:13.

² Paulo ese Horoa Kristen taudia baine durudia edia abidadama ai bae gini goada bona davadia namona bae abia totona, e hamaorodia: “Atai ḡaudia ba haero.” (Kol. 3:2) Idia ese edia guba helarona bae laloa bada na namo. (Kol. 1:4, 5) Momokani, Iehova ena hesiai taudia na Ia amo bae abi hahenamodia bae lalodia karana ese baine durudia,  davadia namona bae laloa bada totona, herevana edia helaro na guba ai eiava tanobada ai.​—⁠1 Kor. 9:24.

3. Paulo ese Kristen tadikakadia ediai dahaka hekwakwanai e herevalai?

³ Paulo ese Kristen tadikakadia e hadibadia haida ese bae koudia diba davadia namona basie abia totona. Heḡereḡere, ia ese Kolose kongrigeisen e hadibadia, Kristen taudia koikoidia na e urava Dirava ena lalonamo bae abia dainai Mose ena Taravatu e badinaiava, to Keriso na asie abidadama heniava. (Kol. 2:16-18) Danu, Paulo ese e varava hekwakwanaidia haida e herevalai, unu hekwakwanai na hari ina negai danu e varamu, bona bae kouda diba davada namona basita abia totona. Heḡereḡere, matabodaḡa uradia idadaraidia dalana, tadikakada ida hekwakwanai ihamaoromaorodia dalana, bona ruma bese ena hekwakwanai ihahanaidia daladia e herevalai. Hari ina negai iena sisiba na mai anina bada. Una dainai, mani Paulo ese Kolose taudia e tore henidia revarevana ai ena sisiba namodia haida aita herevalai.

4. Dahaka dainai matabodaḡa uradia ese bae kouda diba bena davada namona basita abia?

⁴ Paulo ese tadikakana edia helaro hereadaena e hadibadia murinai, ia na eto: “Taunabunai, tau-animui edia ura dikadia ba hamase: heuda-hanai, kara dika, mata-dika, lalo-heḡani, mata-ḡaniḡani.” (Kol. 3:5) Matabodaḡa uradia na goada herea bona eda lauma dalana bae hadikaia diba. Tadikaka ta na guna matabodaḡa karana ai e moru, to gabeai kongrigeisen e lou henia neganai, ia na e gwa, “matabodaḡa urana na goada herea dainai idadaraina na auka.”

5. Hedibaḡani negadiai edena dala ai siboda baita hegima diba?

⁵ Ḡau haida ese bae dibaḡanida diba Iehova ena kara maoromaoro taravatudia basita badina totona, una dainai hanaihanai baita gima na mai anina bada. Heḡereḡere, mero bona kekeni e hetura matamamu neganai, aonega dalana na hetoa bae ato, kopi ai basie dau toho, basie kisi, bona sibodia basie noho na namo. (Her. 22:3) Danu, bema Kristen tauna ta na moni ḡaukara dainai ena hanua baine rakatania bona gabu ma ta bainela, eiava Kristen tauna ta na hahine idauna ta ida bae ḡaukara hebou neganai, hekwakwanai na bae vara diba. (Her. 2:10-12, 16) Bema emu ai una baine vara, namona na ba hahedinaraia oi na Iehova ena Witnes ta, hemataurai karadia ba hahedinarai, bona ba helalotao heḡahusi herevadia na mai edia dika. Danu ta lalohisihisimu eiava ta lalomanokamu neganai baita henahua toho na namo. Badina nega unu bamodia ai, baita uramu ta ese baine laloda bada. Bona baita ura dikadikamu haida ese bae hagoadada dainai, taunimanima idauidau edia heduru baita abi daemu. Bema emu ai una baine vara, namona na Iehova bona iena taunimanima edia heduru ba tahu, unu amo ḡau ta ese basine koumu davamu namona bavabia totona.​—⁠Salamo 34:18; Hereva Lada-isidia 13:20 ba duahi.

6. Moale karadia baita abi hidi neganai, dahaka baita laloatao na namo?

⁶ Matabodaḡa uradia baita hamase totona, matabodaḡa imoalelaina karadia baita dadarai na namo. Hari ina negai, muvi bona miusik momo ai taunimanima edia kara na idaunega Sodoma bona Gomora taudia edia kara heḡereḡeredia. (Iuda 7) Muvi bona miusik e karamu taudia ese e halasimu ḡaudia amo e hahedinaraimu matabodaḡa karadia ese dika na basie havaramu. To namona na siboda baita hegima, bona unu moale karadia dikadia baita dadarai vaitani. Namona na moale karadia maorodia baita abi hidi, unu amo davada namona baita abia diba.​—⁠Her. 4:23.

7. Kristen kongrigeisen ai dahaka hekwakwanai bae vara diba?

⁷ Kristen kongrigeisen lalonai ta nohomu na hahenamo badana. Eda hebou ai Dirava ena Hereva ta stadilaiamu bona ta hahegoada hehenimu karana ese e durudamu, davada namona baita laloa bada totona. To, nega haida kongrigeisen taudia bogaraḡidiai hekwakwanai na e varamu. Bema basita hamaoromaoromu, badu baine vara diba.​—⁠1 Petro 3:8, 9 ba duahi.

8, 9. (a) Ededia kara namodia ese bae duruda davada namona baita abia? (b) Bema Kristen tauna ta ese laloda baine hahisia, dahaka ese baine duruda baita maino totona?

⁸ Dahaka baita kara diba unu amo badu karana ese basine kouda davada namona baita abia totona? Paulo ese Kolose taudia e haḡanidia: “Dirava ena abi-hidi taumui, ena helaḡa taumui, ena lalokau taumui e, ini na ba hahedokilai: hebogahisi, gado namo, manau, manada, haheauka. Ba haheauka heheni. Ta ese bamona baine habadelaia negana ai, emui dika ba hegwau tao heheni; Lohiabada ese emui dika vada e gwau tao; umui danu unu ba kara toma. A unu ḡau iboudiai latadiai, lalokau ba hahedokilaia; ia na ihatamonada ḡauna herea-daena.”​—⁠Kol. 3:12-14.

⁹ Lalokau bona hebogahisi karana ese bae duruda diba dika baita gwautao. Heḡereḡere, bema Kristen ta ena hereva o kara ese laloda baine hahisia, namona na eda hereva o kara amo ma ta ta hahisia negana baita laloa lou. Eda dika e gwautao tadikakadia bona taihudia edia lalokau bona hebogahisi karadia be ta lalodia badamu, a? (Kohelete 7:21, 22 ba duahi.) Ta moalemu badina Keriso ena hebogahisi karana ese tomadiho momokani taudia na e hatamonadiamu. (Kol. 3:15) Ita iboudai ese Dirava tamona ta lalokau heniamu, ta harorolaiamu sivaraina na tamona, bona ta davarimu hekwakwanaidia momo na heḡereḡere. Mai eda lalokau bona hebogahisi ida dika baita gwautaomu neganai, Kristen lalotamona karana baita habadaiamu, bona davada namona baita laloa badamu.

10, 11. (a) Dahaka dainai mama karana na mai ena dika? (b) Edena dala ai mama karana baita dadaraia bena davada namona baita abia diba?

¹⁰ Baibul sivaraidia haida ese e hahedinaraimu, mama karana ese baine kouda diba davada namona basita abia totona. Heḡereḡere, Kain na e mama dainai tadina Abel e alaia. Kora, Datan, bona Abiram ese Mose e mama henia bona e dadaraia. Danu, King Saulo ese David ena kwalimu karana e itaia neganai e mama bona e ura baine alaia. Una dainai, Baibul na e gwaumu: “Vaḡeḡe bona heiri-heiri e miamu gabuna ai, heloḡo-heloḡo bona kara dika idoinai e miamu.”​—⁠Iak. 3:16.

¹¹ Bema lalokau bona hebogahisi karana baita hahedinarai, basita mama dibamu. Dirava ena Hereva na e gwaumu: “Lalokau na e haheauka taritarimu; lalokau na mai ena heabidae; asi ena hebore [“se mamamu,” NWT].” (1 Kor. 13:4) Kudouda ai mama karana baita dadaraia totona, namona na baita hekwarahi Dirava ena lalohadai heḡereḡerena ai ḡau baita haero, bona eda tadikaka taihu baita lalodia na vaitani tauani tamona na heto. Una ese be durudamu edia hemami baita lalo bada totona. Baibul na e gwaumu, bema “reḡe ta bae hanamoa, reḡe iboudiai na ia ida bae moale hebou.” (1 Kor. 12:16-18, 26) Una dainai, bema haida na hahenamo e abimu neganai, basita mama henidia, to baita moale. Mani King Saulo natuna Ionatan ena haheitalai aita laloa. Iehova ese David pavapava ai e halaoa neganai, Ionatan na se mama. To, ia ese David e hagoadaia. (1 Sam. 23:16-18) Namona na Ionatan ena lalokau bona hebogahisi karana baita tohotohoa, ani?

12. Ruma bese ese edena sisiba Baibul ai bae badinaia neganai davana namona bae abia diba?

¹² Baibul ena hahekau herevadia ibadinadia karana ese ruma bese lalonai maino bona moale baine havaraia bona dava namona bae abia diba. Paulo ese Kolose ai Kristen ruma besedia be dahaka sisiba namona e henidia? Ia na eto: “Hahine e, adavamui ba kamonai henidia; una na maoro, Lohiabada lalonai. Tatau e, adavamui ba lalokau henidia; basio lalo dika henidia. Memero kekeni e, ḡau iboudiai lalodiai tamamui sinamui eredia ba kamonai, bena Lohiabada ese baine lalo namo henimui. Tama e, natumui basio turia riki henidia, lalodia bae hesiku na garina.” (Kol. 3:18-21) Tatau, hahine, bona natu ese Paulo ena sisiba bae badinaia neganai, namo bae davaria diba.

13. Edena dala ai Kristen taihu ese adavana baine durua diba?

¹³ Bema oi na taihu ta bona adavamu​—⁠dia witnes tauna​—⁠ese e kara auka henimumu, dahaka ba kara diba? Hepapahuahu karana amo hekwakwanai ba hamaoromaoro diba, a? Ena be ia ese emu ura ḡaudia baine kara, to emu kara dainai hereva momokani be abia daemu, a? Reana lasi. To bema adavamu ena kwara dagina bo matauraiamu,  ruma bese lalonai maino be miamu, Iehova bo hanamoamu, bona reana adavamu na tomadiho momokanina be abia dae dibamu; bena umui raruosi ese davamui namona bavabia diba.​—⁠1 Petro 3:1, 2 ba duahi.

14. Kristen tadikaka be dahaka baine kara na namo bema adavana ese basine matauraia?

¹⁴ Bema oi na tadikaka ta bona adavamu​—⁠dia witnes hahinena​—⁠ese se matauraimumu, dahaka ba kara diba? Bema bo lolo heniamu badina o uramu ba hahedinaraia oi na ia biaguna, oi be matauraimumu, a? Lasi! Dirava na e uramu emu kwara dagina na mai emu lalokau ida ba ḡaukaralaia, Iesu e kara heḡereḡerena. (Efe. 5:23) Iesu ese ena kongrigeisen lalonai ena kwara dagina na mai ena lalokau bona haheauka ida e ḡaukaralaia. (Luka 9:46-48) Tau ese Iesu ena haheitalai baine tohotohoa neganai, adavana baine durua diba tomadiho momokanina baine abia dae.

15. Edena dala ai Kristen tauna ese baine hahedinaraia adavana na e lalokau heniamu?

¹⁵ Baibul ese tatau e hamaorodia: “Adavamui ba lalokau henidia; basio lalo dika henidia.” (Kol. 3:19) Tau namona ese adavana ena lalohadai baine kamonai bona baine hadibaia ena hereva na e lalodia badamu, unu amo adavana na e matauraiamu. (1 Pet. 3:7) Ena be tau na dia nega iboudiai hahine be noimu ḡaudia be karamu, to herevahereva hebou karana ese be duruamu abi hidi maorodia baine kara. (Her. 15:22) Tau namona ese adavana na basine doriamu ia baine matauraia, to kara namodia be hahedinaraimu adavana ese baine matauraia totona. Adavana bona natuna e lalokau henidiamu tauna na ena ruma bese ida Iehova be hesiai heniamu mai moaledia ida bona mauri hanaihanai ahuna bae abia diba.

16, 17. Edena dala ai matamata taumui ese tamamui sinamui basio badu henidia?

¹⁶ Bema oi na matamata taumu, bona o mamiamu emu Kristen tama sina ese e lalomu kereremu bona taravatu momo e atomu, dahaka ba kara na namo? Bo lalohisihisimu neganai bo daradaramu Iehova ihesiai henina karana be mauri dalana namona eiava lasi. To bema emu lalohisihisi dainai Iehova ihesiai henina karana bo rakataniamu, gabeai bo lalopararamu tamamu sinamu​—⁠Dirava garina e garimu taudia​—⁠bona emu kongrigeisen ese oi na e lalomu badamu.

¹⁷ Bema tamamu sinamu ese asie matahakani henimu, bo laloamu idia be oi se lalomu badamu, a? (Heb. 12:8) To reana tamamu sinamu ese e matahakani henimumu dalana na so moalelaiamu. Dia namo edia matahakani dalana ba lalohisihisilaia, to namona na edia kara badina ba lalopararalaia toho. Namona na ba manau bona basio badu haraḡa. Baibul na e gwaumu: “Se hereva momomu tauna na mai aonegana; se badu-haraḡamu tauna na mai ena lalo-parara.” (Her. 17:27) Namona na ba ḡaukara goada lo tauna ai baola bona sisiba bavabi dae, sisiba e henimumu dalana basio lalohekwarahilaia to e durumumu dalana ba laloa. (Her. 1:8) Tamamu sinamu ese Iehova e lalokau heniamu na hahenamo ta. Idia na be ura dikadikamu bae durumu mauri hanaihanai ahuna bavabia totona.

18. Dahaka dainai lalomu ba hadaia davamu namona ba laloa bada totona?

¹⁸ Vaira negai baita abiamu davana​—⁠ena be guba ai lauma maurina eiava tanobada paradaisona ai mauri hanaihanai​—⁠baita laloamu na hahenamo hereadaena. Una helaro namona na baine vara momokani, badina una na ḡau iboudiai Ihavarada Tauna ena gwauhamata. Dirava ese tanobada Paradaisona na ini e herevalaia toma: “Tanobada na Iehova idiba-maorona ai baine honu.” (Isa. 11:9) Una negai tanobada ai bae mauri taudia iboudiai na Dirava ese baine hadibadia. Una na ta uramu baita abia davana namona. Una dainai, Iehova ena gwauhamata ba laloa bada, bona ḡau ta ese basine koumu davamu namona bavabia totona!