1. Ane abi karana amo dahaka baita kara diba?

ANE e toremu tauna ta na eto: “Ane herevadia bo kamonaimu neganai, bo lalohadaimu. Miusik bo kamonaimu neganai, emu hemami be idaumu. To ane bo abimu neganai, ane herevadia ese kudoumu be hamarereamu.” Ane amo ita ese Tamada Iehova ta hanamoamu bona eda lalokau ienai ta hahedinaraiamu. Una dainai ita siboda eiava kongrigeisen ida ane ta abimu karana na tomadiho ḡoevana kahana badana ta.

2, 3. (a) Haida ese kongrigeisen ida ane abi karana be ede e laloa tomamu? (b) Ededia henanadai baita herevalaimu?

² To, kongrigeisen ida ane bavabi badabada karana be ede o laloa tomamu? Nega haida o hemaraimu, a? Tano haida ai, tatau na e hemaraimu taunimanima vairadiai ane bae abi. Danu bema hegunalai taudia na badi haida dainai ane basie abimu eiava kongrigeisen taudia ane e abimu lalonai ḡaukara ma haida be karamu, una ese kongrigeisen na basine duruamu.​—⁠Sal. 30:12.

³ Bema ta abia daemu ane abi karana na eda tomadiho kahana ta, hebou ai ane e abimu lalonai basita raka oho eiava una kaha basita reaia na namo. Namona na siboda baita henanadai: ‘Hebou gabudiai ane abi karana be ede na laloa tomamu? Edena dala ai egu ane abi karana e kouamu ḡaudia baina hahanaidia  diba? Bona dahaka baina kara diba mai moalegu ida ane baina abi totona?’

4, 5. Idaunega Israel ai tomadiho negadiai ane abi karana be ede e laloa tomava?

⁴ Idaunega amo Iehova e tomadiho heniava taudia na miusik e ḡaukaralaiva Iehova bae hanamoa totona. Idaunega Israel taudia na mai edia abidadama ida Iehova e hesiai heniava neganai, edia tomadiho lalodiai ane abi karana na e laloa badava. Heḡereḡere, King David ese dubu helaḡa ḡaukaradia e heḡaeḡaelai neganai, ia ese Levi taudia 4,000 e abidia hidi miusik amo Dirava bae hanamoa totona. Idia bogaraḡidiai, “Iehova ihanamolaina anedia iabidia e hadibalaidia taudia, iboudiai mai dibadia momo” taudia na 288.​—⁠1 Sis. 23:5; 25:7.

⁵ Dubu helaḡa e hahelaḡaia neganai, miusik e hataiva bona ane e abiva. Baibul na e gwaumu: “Hari kibi-hiriri taudia bona ane-abi taudia edia ḡaukara be Iehova bae imodaia bona bae hanamoa hebou. Bena ane e ladaia isi, mai kibi bona botabota auridia bona hatai-hatai ḡaudia idau-idau reḡedia ida, Iehova ihanamolaina . . . bena . . . Iehova hairaina ese Dirava ena dubu e hahonua.” Una ese Israel taudia edia abidadama na e hagoadaia!​—⁠2 Sis. 5:13, 14; 7:6.

6. Nehemia na Ierusalem ena gavana ai ela neganai, miusik bona ane abi karana be ede e heḡaeḡaelaidia toma?

⁶ Nehemia ese abidadama Israel taudia e gunalaidia Ierusalem maḡuna bae haginia lou neganai, ia ese Levi iduhuna amo ane abi taudia e abidia hidi ane bae abi bona miusik bae hatai totona. Ierusalem maḡuna e hahelaḡaia neganai, e hataiva miusikidia na iboudiai ese e moalelai. Una negai, ane abi taudia edia “orea badadia” na rua. Orea ginigunana na idiba kahana amo ela bona orea iharuana na lauri kahana amo ela bona dubu badina maḡuna ai e hedavari, unu amo edia ane reḡena na dauha ai e nohova taudia ese bae kamonaia diba. (Neh. 12:27, 28, 31, 38, 40, 43) Iehova na e moale badina e itaia ia e tomadiho heniava taudia na mai edia ura ida ane amo ia e hanamoava.

7. Edena dala ai Iesu ese e hahedinaraia Kristen tomadiho ai ane abi karana na mai anina bada?

⁷ Kristen kongrigeisen e haginia neganai, ane abi karana na tomadiho momokani kahana badana ta dainai dounu e laloa badava. Mai anina bada hanuaboina ai, Iesu ese Anibou e karaia murinai, iboudiai na ane e abi.​—⁠Mataio 26:30 ba duahia.

8. Edena dala ai Kristen taudia ginigunadia na ane abi karana ai haheitalai namona e hahedinaraia?

⁸ Kristen taudia ginigunadia na Dirava ihanamona anedia e abi hebouva karana amo haheitalai namona e hahedinaraia. Ena be nega momo e hebouva rumadia na dia tomadiho rumadia hairaidia heḡereḡeredia, to idia na mai moaledia ida ane amo Iehova e hanamoava. Aposetolo Paulo na Dirava ena hahekau henunai Kristen tadikakadia e haḡanidia: “Salamo ai, ane ai, lauma anedia [“tomadiho anedia,” NWT] ai, ba hahediba heheni bona ba hahealo heheni. Dirava ihanamolaina anedia bavabi mai lalomui ida.” (Kol. 3:16) Eda ane bukana ai e tore anedia na “tomadiho anedia” dainai, mai moaleda ida baita abi na namo. Unu na “hesiai tauna mai ena kamonai bona mai ena kara maoromaoro” ese e halasimu lauma anianina ta.​—⁠Mat. 24:45.

9. (a) Dahaka dainai haida na eda hebou badadia bona maraḡidia ai mai moaledia ida ane na asie abimu? (b) Edena dala ai Iehova ihanamona anedia baita abi, bona daidia ese bae gunalaia na namo? (Rau 3 ai laulau ba itaia.)

⁹ Bema emu gabu ai e nohomu taudia eiava emu ruma bese na ane abi karana asie manadalaia be ede bamona?  Hari ina nega ena teknoloji dainai, ane mai dibadia taudia edia ane ikamonaidia karana na bo moalelaiamu. To, idia gadodia bona oi gadomu bo haheḡereḡerediamu neganai reana bo hemaraimu eiava bo lalohisihisimu. To, dia namo una ese baine koumu Iehova ihanamona anedia basio abi totona. Namona na emu ane bukana bavabia isi vairamu ai, kwaramu bavabia isi, bona mai moalemu ida ane bavabi! (Esr. 3:11; Salamo 147:1 ba duahia.) Hari ina negai, Kingdom Hall momo ai, ane herevadia na TV screen ai e hahedinaraimu, una ese e durudamu ane baita abi badabada totona. Bona hari elda taudia edia Basileia Hesiai Ḡaukara Sikulina ai Basileia anedia danu e abimu. Una ese elda taudia e hagoadadiamu kongrigeisen ai ane abi karana bae gunalaia na namo.

10. Dahaka baita laloatao na namo bema ta garimu dainai ane asita abi badabadamu?

¹⁰ Haida na e garimu dainai ane na asie abi badabadamu. Reana e laloamu gadodia reḡena na dia namo eiava asie uramu haida ese gadodia bae kamonai. To, namona na baita helalotao, ita iboudai na eda hereva ai “ta hekwakwanai louloumu.” (Iak. 3:2) To una ese na se koudamu baita hereva totona. Una dainai, ena be gadoda reḡena na dia namo, to namona na dounu ane amo Iehova baita hanamoa.

11, 12. Ededia dala haida ai eda ane abi karana baita hanamoa diba?

¹¹ Reana ta hemaraimu eiava ta garimu badina asi dibada ane be ede baita abi toma. To, heduru herevadia haida baita badina amo eda ane abi karana na baita hanamoa diba.

¹² Ane bavabi badabada totona, ba hahodi namonamo na namo. Paoa ese golobu ta e hasiahuamu neganai e diarimu heḡereḡerena, hahodi karana ese gado reḡena be hagoadaiamu, bo herevamu eiava  ane bo abimu. O hereva badabadamu heḡereḡerena ai ane bavabi na namo. Iehova ihanamona anedia iabidia karana ai, nega haida Baibul ese Iehova e tomadiho heniamu taudia na e hagoadadiamu ‘mai lolodia’ o moaledia ida ane bae abi totona.​—⁠Sal. 33:1-3.

13. Edena dala ai ane baita abi namonamo diba?

¹³ Ruma bese ena tomadiho ai eiava sibomu neganai, ini dala haida ba tohodia: Ane bukana ai o ura heniamu anena ta bavabia hidi. Ane herevadia ba duahi badabada. Gabeai, hahodi tamona lalonai ane herevadia haida ba gwauraidia badabada. Bena unu hereva na ane amo bavabi badabada. (Isa. 24:14) Unu amo ane bo abi namonamomu. Namona na gari eiava hemarai karana ese basine koumu ane bavabi totona!

14. (a) Edena dala ai ududa baita keho badabada karana ese eda ane abi karana baine durua diba? (Maua ladana “ Emu Ane Abi Karana Ba Hanamoa Dalana” ba itaia.) (b) Ededia heduru herevadia haida ese bae durumu diba gadomu reḡena ba hanamoa?

¹⁴ Ane bavabi namonamo totona, udumu na taina ba kehoa badabada. Bema o mamiamu gadomu reḡena na dia namo eiava ena tiuni na taina atai hereai, dahaka ba kara na namo? Heduru herevadia haida na Tiokratik Haroro Sikuli amo Heduru Oi Abia bukana ena rau 184 ai, maua ladana “Hekwakwanai Haida Hanaia Daladia” ai ba ita diba.

15. (a) Laḡani 2016 ena laḡani ta ta hebouna ai, dahaka hahediba herevana e halasia? (b) Dahaka dainai ane buka matamatana e karaia?

¹⁵ Laḡani 2016 ai, Watch Tower Bible and Tract Society of Pennsylvania ese laḡani ta ta ai e karaiamu hebouna ai, momo na e moale dikadika badina Tadikaka Stephen Lett,  Gavanin Bodi tauna ta, ese ina hahediba herevana e gwauraia, ane bukana matamatana, “Sing Out Joyfully” to Jehovah, na kahirakahira eda kongrigeisen heboudiai ai baita ḡaukaralaiamu. Tadikaka Lett na e gwa, ane bukana matamatana e karaia badina ta na ane herevadia na New World Translation of the Holy Scriptures Baibul matamatana ena hereva ida bae heḡereḡere. Anina na ane herevadia haida na e koki eiava e haidau, badina New World Translation Baibul matamatana ai unu hereva na e kokidia eiava e haidau. Danu, ane matamatadia haida na eda haroro ḡaukara bona mauri idavalaina boubouna baita laloa bada karana e herevalaia. Danu, ane abi karana na eda tomadiho kahana badana ta dainai, Gavanin Bodi na e ura ane bukana namo hereana ta bae karaia, bona toana na New World Translation Baibul matamatana heḡereḡerena.

16, 17. Ane bukana matamatana ai dahaka ḡau haida e haidau?

¹⁶ Ane bukana matamatana, “Sing Out Joyfully” to Jehovah, iḡaukaralaina baine haraḡa totona, ane na edia sinado heḡereḡeredia ai e ato. Heḡereḡere, ane ginigunadia 12 ese Iehova e herevalaia, bona ma ane 8 na Iesu bona mauri idavalaina boubouna e herevalaidia. Danu, pablik tok anedia o uramu bavabi hidi neganai, una ane bukana ena indeks ese baine durumu diba.

¹⁷ Mai kudouda idoinai ida ane baita abi totona, ane herevadia haida na e haidau, unu amo hereva anidia bae hedinarai namonamo, bona asita ḡaukaralai momomu herevadia na e koki eiava e haidau. Heḡereḡere, ane sinadona “Kudoumu Ba Gimaia” na e haidaua bona “Kudouda Baita Gimaia” e atoa. Dahaka dainai? Eda hebou maraḡidia bona badadia ai kamonai taudia, memero kekeni, bona taihu na momo, bona una ane gunana e abiamu neganai, una na vaitani ma haida e hamaorodiamu dahaka bae kara. Una dainai ane sinadona bona herevadia na e haidau.

18. Dahaka dainai eda ane buka matamatana anedia baita manadalai na namo? (futnout ba itaia.)

¹⁸ Ane bukana matamatana, “Sing Out Joyfully” to Jehovah, lalonai ane momo na ḡuriḡuri herevadia. Unu ane amo emu hemami na Iehova enai ba gwaurai hedinarai diba. Ane ma haida ese be durudamu tadikakada ida “baita hahealo heheni, lalokau bona kara namodia” baita hahedinarai. (Heb. 10:24) Momokani, ita na ta uramu ane miusikidia bona herevadia baita manadalai. Baine duruda ḡauna ta na, jw.org ai e ato anedia (vocal renditions) baita kamonai. Emu ruma ai unu ane bo praktislaimu neganai, ane na mai moalemu ida bo abimu.

19. Edena dala ai kongrigeisen taudia iboudiai ese Iehova bae tomadiho henia diba?

¹⁹ Ba helalotao ane abi karana na eda tomadiho kahana badana ta. Una dala amo eda lalokau Iehova enai ta hahedinaraiamu bona ta uramu baita hanamoa. (Isaia 12:5 ba duahia.) Mai moalemu ida ane bo abimu neganai, ma haida danu bo hagoadadiamu ane bae abi totona. Momokani, kongrigeisen taudia iboudiai​—⁠memero kekeni, burukadia, bona kamonai taudia​—⁠na una dala amo Iehova bae tomadiho henia diba. Una dainai ane o abimu neganai basio gari o basio hemarai. To, salamo itorena tauna ena haheḡani ba badinaia, e gwaumu: “Ane avabia, Iehova ena.”​—⁠Sal. 96:1.