1, 2. (a) Iesu ese Dirava ena Taravatu be ede e laloa toma? (b) Edena dalai itorena taudia bona Farisea taudia ese Taravatu na e ḡaukaralaia kerere?

IESU ese Mose ena Taravatu na e ura heniava. Badina una Taravatu na ia ese e laloa badamu Tauna​—⁠Tamana Iehova​—⁠ese e heni. Iesu ese Dirava ena taravatu e ura henia bada karana na Salamo 40:8 ai ini e herevalaia toma: “Egu Dirava e, oiemu ura ikarana na moalelaiamu, oiemu taravatu na lalogu ai e miamu.” Iesu na ena kara bona hereva amo e hamomokania, Dirava ena Taravatu na ḡoevadae, mai edia namo, bona bae ḡuḡuru vaitani.​—⁠Mat. 5:17-19.

² Iesu ese itorena taudia bona Farisea taudia e itadia ia Tamana ena Taravatu e ḡaukaralaia kerereva neganai, e lalohisihisi! Idia ese taravatu maraḡi-maraḡidia iboudiai e badinava dainai, Iesu na e gwa: “Aniani avadia maraḡi-maraḡidia iboudiai karoadia o hagwautamu, karoa ta boubou ḡauna ai o halaoamu.” To, edia kerere be dahaka? Iesu na ma e gwa: “To taravatu ena hereva badadia, hahemaoro bona hebogahisi bona heabidadama, o reamu.” (Mat. 23:23) Iesu na dia Farisea taudia heḡereḡeredia, ia ese una Taravatu badina, bona unu haheḡani ta ta ese Dirava ena kara e hahedinaraia dalana na e lalopararalaia.

3. Ina stadi ai dahaka baita herevalaimu?

 ³ Ita na Kristen tauda dainai, ita na dia Mose ena Taravatu henunai. (Roma 7:6) To, Iehova ese una Taravatu na iena Hereva, Baibul, ai e torea. Badina e uramu, dia una Taravatu maraḡi-maraḡidia iboudiai baita badina, to ena “hereva badadia” eiava ena hahekau herevadia baita lalopararalai bona baita badina. Heḡereḡere, roho mauri hanuadia amo dahaka hahekau herevadia ta dibamu? Vanega stadi ai, ita na heau mauri tauna ese e kara karadia amo ḡau haida ta diba. To, roho mauri hanuadia amo Iehova bona iena kara baita tohotohodia daladia danu ta diba. Una dainai, ina stadi ese ini henanadai toi be haerelaimu: Edena dala ai roho mauri hanuadia ese Iehova ena hebogahisi karana e hahedinaraia? Ia ese mauri e laloamu dalana ai dahaka ta dibamu? Edena dala ai Iena hahemaoro ḡoevaḡoeva karana e hahedinaraiamu? Unu ta herevalaimu neganai, namona na Tamada guba ai e nohomu baita tohotohoa diba daladia ba lalo.​—⁠Efeso 5:1 ba duahia.

4, 5. (a) Edena dala ai roho mauri hanuadia ilao henidia na dia auka, bona dahaka dainai? (b) Una dala amo Iehova enai be dahaka ta dibamu?

⁴ Roho mauri hanuadia 6 ilao henidia na dia auka. Iehova ese Israel taudia e haḡanidia unu hanua na bae haridia Ioridane Sinavaina kahana ruaosi ai. Dahaka dainai? Unu amo baine heau mauri tauna na unu roho mauri hanuadia bainela haraḡa diba. (Num. 35:11-14) Roho mauri hanuadia ilao henidia daladia na lailai bona e karadia namonamo. (Deu. 19:3) Iuda taudia edia buka ta na e gwa, dala badidiai na saini e atodia, unu amo baine heau mauri tauna na hanua maorodia baine heau lao diba. Roho mauri hanuadia mimia dainai, ta baine alaia kava tauna na tano idauna ta basine heau lao, unuseniai tomadiho koikoi baine badinaia garina.

⁵ Mani a laloa: Iehova na e gwa, mai edia ura ida bae ala-ala taudia na bae hamasedia. To, ma e gwa aksiden ai ta e hamasea tauna na bae bogaia hisi bona bae gimaia! Baibul e herevalaia tauna ta na ini e gwau toma: “Ḡau iboudiai na e karadia namonamo bona dia auka. Una na Dirava ena hebogahisi karana.” Iehova na dia hahemaoro tauna aukana bona se uramu ena hesiai taudia na baine hahisidia. To, ia na “hebogahisi-bada Diravana.”​—⁠Efe. 2:4.

6. Edena dala ai Farisea taudia ese Dirava ena hebogahisi karana asie hahedinaraia?

⁶ To, Farisea taudia na asie urava hebogahisi karana bae hahedinaraia. Heḡereḡere, Iuda taudia edia buka ta na e gwa, bema ta na e karaia kara dikana na baine karaia loulou, iena dika na  nega toi mo bae gwauatao. Iesu ese edia kerere baine hahedinaraia totona, parabole ta ai e hahedinaraia Farisea tauna ta na e ḡuriḡuri, eto: “Dirava e, lau ese na hanamomumu, badina be lau na dia haida heḡereḡeredia, dadidadi taudia, kara gageva-gageva taudia, heuda-hanai taudia; oibe, lau na dia ina tax gogo tauna bamona.” Tax gogo tauna na mai manauna ida Dirava e noia baine bogaia hisi. Dahaka dainai Farisea taudia na asie ura hebogahisi karana bae hahedinaraia? Baibul na e gwa, idia ese “idau taudia e dadaraidia.”​—⁠Luka 18:9-14.

7, 8. (a) Ta ese baine hahisimu neganai, edena dala ai Iehova ba tohotohoa diba? (b) Dahaka dainai dika igwautaona karana ai baita manau na namo?

⁷ Iehova ba tohotohoa, dia Farisea taudia. Hebogahisi karana ba hahedinaraia. (Kolose 3:13 ba duahia.) Una ba karaia dalana ta na, ma haida edia dika ba gwautao. (Luka 17:3, 4) Sibomu ba henanadai: ‘E hahisigu louloumu taudia edia dika baina gwautao diba, a? Lau be na ura dikadikamu e hahisigu tauna ida baia maino, a?’

⁸ Ta ena dika baita gwauatao totona, baita manau na namo. Farisea taudia ese una kara na asie hahedinaraia badina e laloava idia ese ma haida e hereadia. To, ita na Kristen tauda dainai, namona na mai manauda ida baita laloa ma haida ese ita na e hereada, bona edia dika baita gwautao. (Fili. 2:3, NWT) Iehova ba tohotohoa bona ba manau diba, a? Baita manaumu neganai, ma haida edia dika na baita gwautao dibamu. Hebogahisi karana ba hahedinaraia bona basio badu haraḡa.​—⁠Koh. 7:8, 9.

9. Edena dala ai Iehova ese Israel taudia ediai e hahedinaraia taunimanima edia mauri na helaḡa?

⁹ Roho mauri hanuadia ese Israel taudia e gimadia, rara ihahebubuna karana ai basie kerere totona. (Deu. 19:10) Iehova ese mauri na e ura heniamu, bona “asi ena kerere tauna rarana e hahebubuamu” taudia na e inai henidiamu. (Her. 6:16, 17) Ia na hahemaoro ḡoevaḡoeva bona helaḡa Diravana dainai, aksiden ai ta ihamasena karana na se laloa maraḡimu. Momokani, aksiden ai ta e hamasea tauna na bae bogaia hisi diba. To, ia ese e karaia karana na tau badadia vairadiai baine gwauraia hedinarai guna, bona bema bae davaria ia na aksiden ai una e karaia, roho mauri hanuana ai baine noho ela bona hahelaḡa tauna badana baine mase. Una anina na ena mauri ibounai lalonai una hanua ai baine noho. Una ese Israel taudia iboudiai e hadibadia taunimanima edia mauri na helaḡa. Mauri E Heni Tauna bae matauraia totona, ma haida edia mauri ihadikana karadia bae dadarai na namo.

10. Iesu ena hereva heḡereḡerena, edena dala ai Farisea taudia bona itorena taudia ese mauri na asie laloa badava?

¹⁰ Farisea taudia bona itorena taudia na dia Iehova heḡereḡerena, idia ese mauri na asie laloa badava. Edena dala ai? Iesu ese e hamaorodia: “Aonega kina vada o abia oho; umui na asio raka vareai, bona bae raka vareai eto taudia na umui ese o laodia ahu.” (Luka 11:52) Idia ese Dirava ena Hereva anina na bema gwauraia hedinarai namonamo bona haida bema  durudia mauri hanaihanai bae abia totona. To, idia ese taunimanima na “Mauri Biaguna,” Iesu, ena amo e hakaudia siriva, bona dika ilao henina dalana ai e hakaudiava. (Kara 3:15) Farisea taudia bona itorena taudia na sibodia edia namo e lalova bona e hekokorokuva dainai, ma haida edia mauri bona edia namo na asie lalova. Idia na dia hebogahisi taudia!

11. (a) Edena dala ai aposetolo Paulo ese e hahedinaraia mauri na e laloa bada? (b) Dahaka ese baine duruda Paulo heḡereḡerena baita haroro totona?

¹¹ Edena dala ai itorena taudia bona Farisea taudia edia kara baita dadaraia bona Iehova baita tohotohoa? Mauri baita matauraia bona baita laloa bada na namo. Aposetolo Paulo na sivarai namona e harorolaia karana amo e hahedinaraia mauri na e laloa bada. Una dainai, ia na e gwa: “Lau na taunimanima iboudiai raradia amo name ḡoeva.” (Kara 20:26, 27 ba duahi.) Paulo na dia rara ai baine ḡoeva eiava maduna ta dainai e harorova. To, ia ese taunimanima na e lalokau henidia, bona edia mauri na e laloa bada. (1 Kor. 9:19-23) Namona na ita danu Dirava ena lalohadai heḡereḡerena mauri baita laloa bada. Iehova na e uramu taunimanima iboudiai bae “helalo kerehai.” (2 Pet. 3:9) Oi danu unu o ura tomamu, a? Hebogahisi karana ese be hagoadamumu mai emu ura ida bo haroromu bona unu bo kara tomamu neganai bo moalemu.

12. Dahaka dainai Dirava ena taunimanima ese seifti na bae laloa bada?

¹² Danu seifti daladia baita badinamu neganai, ta hahedinaraiamu mauri na ta laloa badamu Iehova ese e laloamu heḡereḡerena. Motuka ta tarimu, ta ḡaukaramu, ruma ta haginimu, ta hanamomu, eiava tomadiho gabudia ta laomu neganai, seifti na ḡau badana. Eda ḡaukara, moni, eiava nega ta ḡaukaralaimu neganai, seifti bona eda helt baita lalodia bada na namo. Eda hahemaoro ḡoevaḡoeva Diravana na nega iboudiai e kara maoromaoromu, una dainai ta uramu Ia baita tohotohoa. Ḡau badana na elda taudia ese idia sibodia bona ma haida edia seifti bae lalo bada. (Her. 22:3) Bema elda ta ese seifti taravatudia baine hadibamu, iena hereva ba badinaia na namo. (Gal. 6:1) Mauri ba laloa bada Iehova ese e laloamu heḡereḡerena, bena taunimanima edia “rara na umui latamui ai” basine mia.

13, 14. Edena dala ai Israel tau badadia ese Iehova ena hahemaoro ḡoevaḡoeva karana bae tohotohoa diba?

¹³ Iehova ese Israel tau badadia e haḡanidia iena hahemaoro maoromaoro karana bae tohotohoa. Ḡau ginigunana na, e vara ḡauna bae tahua namonamo. Bena, e ala-ala tauna ese una e karaia badina, ena lalohadai, bona ena kara gunadia bae haerodia, unu amo abi hidi bae kara hebogahisi karana bae hahedinaraia eiava lasi. Dirava ena hahemaoro ḡoevaḡoeva karana bae hahedinaraia totona, namona na bae tahua bema e heau mauri tauna ese bamona na “badu ai” e alaia mase eiava lasi. (Numera 35:20-24 ba duahi.) Bema una kara e itaia taudia rarua ese una bae hamomokania, e ala-ala tauna na bae hamasea diba.​—⁠Num. 35:30.

¹⁴ Tau badadia na e vara ḡauna bae diba murinai, kerere tauna ena kara bae tahua namonamo, dia ia e karaia karana mo bae haeroa. Namona na bae lalo maoromaoro, unu amo e vara ḡauna badina bae haeroa namonamo. Mai anina bada ḡauna na, Iehova ena lauma helaḡa bae noia, unu amo baine durudia Iena lalohadai, hebogahisi, bona hahemaoro ḡoevaḡoeva karana bae tohotohoa.​—⁠Eso. 34:6, 7.

15. Edena dala ai Iesu ese kara dika taudia e lalodiava dalana na Farisea taudia edia amo idau?

¹⁵ Farisea taudia na kara dika tauna ena kerere mo e laloa badava. Idia ese Iesu e itaia Mataio ena ruma ai e anianiva neganai, iena hahediba e nanadaidia: “Emui hahediba tauna na dahaka dainai tax gogo taudia bona kara dika taudia ida e aniani heboumu?” Iesu e haere, eto: “Goada taudia na muramura tauna basie tahua, a gorere taudia hari. Aola ina hereva anina ba haeroa: Lau na hebogahisi na uramu, dia boubou ḡauna. Badina be kara maoromaoro taudia iboiridia asinama, a kara dika taudia hari.”  (Mat. 9:9-13) Iesu be kara dika taudia daidiai ekskius herevadia e gwaurai, a? Lasi. To, Iesu na ena hereva amo e hahedinaraia ia na e ura kara dika tauna na baine helalo-kerehai. (Mat. 4:17) To, Iesu na mai dibana unu “tax gogo taudia bona kara dika taudia” haida na e urava edia kara bae haidau. Idia na dia aniani mo dainai Mataio ena ruma ela. To idia momo “na [Iesu] murinai e rakava.” (Mar. 2:15) Farisea taudia ese unu bamona taudia na asie lalodia badava dia Iesu ese e lalodiava heḡereḡerena. Ena be e gwauva idia ese hahemaoro maoromaoro bona hebogahisi Diravana e tomadiho heniava, to idia ese taunimanima na kara dika taudia heḡereḡeredia e lalodiava, idia ediai unu bamona taudia na asi anidia.

16. Hahemaoro komiti taudia be dahaka bae diba na namo?

¹⁶ Hari ina negai elda taudia ese Iehova, “kara maoromaoro e ura heniamu” Diravana, bae tohotohoa na namo. (Sal. 37:28) Ḡau ginigunana na, bae hetahu namonamo unu amo bae hamomokania bema ta na momokani kerere e kara eiava lasi. Bema una na e vara momokani, Baibul ena hahekau herevadia heḡereḡerena ai una bae hamaoromaoroa. (Deu. 13:12-14) Elda taudia na hahemaoro komiti e karamu neganai, namona na bae hetahu namonamo bema kara dika badana e karaia Kristen tauna na e helalo-kerehai momokani eiava lasi. Nega momo una bae dibaia na auka. Badina bema ta na e helalo-kerehai, ia na ena lalohadai, kara, bona kudouna ai e miamu ḡaudia amo una be hahedinaraiamu. (Apok. 3:3) Kara dika tauna baine helalo-kerehai na namo bema e uramu bae bogaia hisi. *

17, 18. Edena dala ai elda taudia na bae diba ta na mai kudouna idoinai ida e helalo-kerehai? (Rau 13 ai laulau ba itaia.)

¹⁷ Elda taudia ese taunimanima kudoudia na asie itamu, dia Iehova bona Iesu heḡereḡeredia. Bema oi na elda ta, edena dala ai ba diba ta na mai kudouna idoinai ida e helalo-kerehai? Ḡau ginigunana na, Dirava ba noia aonega bona laloparara baine henimu. (1 Hahe. 3:9) Ḡau iharuana na, Dirava ena Hereva bona hesiai tauna mai ena kamonai ese e halasimu pablikeisen ba stadilai, unu amo “tanobada ena amo lalo-hisihisina” bona “Dirava ena amo lalo-hisihisina” edia idau ba diba, bena helalo-kerehai momokani toana ba lalopararalaia. (2 Kor. 7:10, 11) Baibul ese helalo-kerehai tauna bona se helalo-kerehaimu tauna e herevalaidia dalana ba laloa. Baibul ese edia hemami, lalohadai, bona kara be ede e herevalaidia toma?

¹⁸ Ḡau ihatoina na, kara dika e karaia tauna ba laloa. Ia e tubu dae dalana, kerere e karaia badina, bona iena hekwakwanai ba haerodia. Baibul ese Iesu, Kristen kongrigeisen kwarana, na ini e perovetalaia toma: “Ia na basine hahemaoro, matana e itamu ḡaudia daidiai, bona lalona basine hadaia, taiana e kamonaimu herevadia daidiai; a mai kara maoromaorona ida ia ese ogoḡami taudia baine hahemaoro henidia, bona lalona baine hadaia maoro, tanobada ena manau taudia ediai.” (Isa. 11:3, 4) Umui elda taumui na Iesu ena mamoe ireḡuna taumui dainai, ia ese baine durumui diba, ia e hahemaoromu heḡereḡerenai ba hahemaoro totona. (Mat. 18:18-20) Ta moalemu badina elda taudia ese ita na e laloda badamu, ani? Bona ta moalemu badina idia na e ḡaukara goadamu kongrigeisen ai hebogahisi bona hahemaoro maoromaoro karana bae hahedinaraia totona!

19. Roho mauri hanuadia amo ome diba ḡaudia ai, edena o uramu emu mauri ai ba badinaia?

¹⁹ Mose ena Taravatu ese “aonega bona hereva momokani” e hahedinarai, idia amo Iehova bona iena hahekau hereva maoromaorodia baita dibamu. (Roma 2:20) Heḡereḡere, roho mauri hanuadia ese elda taudia e hadibadiamu bae “hahemaoro ḡoevaḡoeva,” bona ita danu e hadibadamu tadikakada baita “kara namo henidia” bona baita “bogadia hisi.” (Sek. 7:9) Ita na dia Mose ena Taravatu henunai. To, Iehova na se idaumu, bona ia ese hahemaoro maoromaoro bona hebogahisi karana na e lalodia badamu. Ia ta tomadiho heniamu na hahenamo ta badina ita na ia heida-idana ai e karada, iena kara baita tohotohodia diba, bona Ia na eda roho mauri gabuna ai baita halaoa diba!