1. Kara dika dainai, Dirava ena hesiai taudia momo edia hemami be ede bamona?

APOSETOLO PAULO na e gwa: “Lau madi, ihabaigu!” (Roma 7:24) Hari ina negai Dirava ena abidadama hesiai taudia momo danu unu e gwau tomamu. Ita na kara dika tauda dainai, eda kara amo Iehova asita hamoaleamu neganai, ta lalohisihisimu. Kara dika badana ta e kara Kristen taudia haida na e laloamu Dirava ese edia dika na basine gwautao diba.

2. (a) Salamo 34:22 ese edena dala ai e hahedinaraiamu Dirava ena hesiai taudia na edia kerere daidiai basie lalohisihisi? (b) Ina stadi ai dahaka baita herevalaimu? (Maua ladana “ Baita Diba Ḡaudia Eiava E Laulaulai Ḡaudia?” ba itaia.)

² To, Baibul ese e hadibadamu Iehova na edia roho mauri gabuna ai e halaoamu taudia na edia kerere daidiai basie lalohisihisi. (Salamo 34:22 ba duahia.) Iehova na emu roho mauri gabuna ai ba halaoa anina be dahaka? Dahaka baita kara na namo unu amo Iehova ese baine bogada hisi bona eda dika baine gwautao? Unu henanadai haeredia baita diba totona, mani idaunega Israel ai e abidia hidi roho mauri hanuadia aita lalodia. Momokani, unu hanua na Taravatu gwauhamatana henunai e abidia hidi, bona una Taravatu gwauhamatana na Pentekoste 33 C.E. ai gwauhamata  matamatana ese gabuna e abia. To, ba helalotao una Taravatu na Iehova ese e heni. Una dainai unu roho mauri hanuadia amo ita ese Iehova ena lalohadai kara dika, kara dika e karamu taudia, bona helalo-kerehai karana ai ta dibamu. Mani unu hanua e abidia hidi badidia bona edia ḡaukara aita herevalaidia guna.

3. Israel taudia ese mai ena ura ida e ala-alava tauna be ede e kara henia tomava?

³ Idaunega Israel ai, Iehova ese ala-ala karana na e taravatua. Mai ena ura ida e ala-alava tauna na mase tauna varavarana ese baine alaia. (Num. 35:19) Una kara amo e hamasea tauna ena mauri davana bae heni. Danu, e ala-ala tauna bae hamasea haraḡa na namo, unu amo Gwauhamata Tanona na baine ḡoeva, badina Iehova na eto: “Ba noholaia tanona basio hamiroa; badina be [taunimanima edia] rara ese tano e hamiroamu.”​—⁠Num. 35:33, 34.

4. Israel ai, aksiden amo ta e hamasea tauna enai be dahaka e varava?

⁴ To, bema tau ta ese aksiden amo ta e hamaseava, Israel taudia ese una tau be ede e kara henia tomava? Ena be aksiden amo ta e hamasea, to ia na dounu mai ena kerere badina asi ena kerere tauna e alaia. (Gen. 9:5) To, ia na mase tauna varavarana edia amo baine heau bona roho mauri hanuadia 6 amo ta baine heau henia diba. Unuseniai, bae gimaia diba. Ia na una roho mauri hanuana ai baine noho ela bona hahelaḡa tauna badana baine mase.​—⁠Num. 35:15, 28.

5. Roho mauri hanuadia e abidia hidi karana ese edena dalai e durudamu Iehova baita dibaia namonamo totona?

⁵ Unu roho mauri hanuadia iabidia hidi karana na dia taunimanima edia lalohadai. Iehova ese Iosua e haḡania: “Israel taudia ba hamaorodia, baoto: Roho-mauri hanuadia bavabidia hidi.” Unu hanua na Iehova ese e gwauraidia hidi. (Ios. 20:1, 2, 7, 8) Iehova na e gwa unu hanua bae abi hidi dainai, reana baita henanadaimu: Una ese edena dala ai e durudamu Iehova ena hebogahisi karana baita lalopararalaia totona? Bona Iehova na eda roho mauri gabuna ai baita halaoa karana amo dahaka ta dibamu?

6, 7. (a) Tau badadia ese aksiden amo ta e hamasea tauna be ede e kara henia tomava? (Rau 8 ai laulau ba itaia.) (b) Dahaka dainai e heau mauri tauna ese tau badadia baine hereva henidia na namo?

⁶ Aksiden amo ta e alaia murinai e heau mauri tauna na hanua ikoukouna ai baine gini bona e vara ḡauna na “tau-badadia vairadiai” “baine gwauraia hedinarai.” Bena idia ese bae abia dae. (Ios. 20:4) Dina haida muridiai, ia na bae siaia lou ala-ala e vara hanuana ena tau badadia dekedia, bona idia ese bae hahemaoro henia. (Numera 35:24, 25 ba duahi.) Bema tau badadia ese bae davaria una ala-ala karana na aksiden ai e vara, idia ese e heau mauri tauna na bae siaia lou roho mauri hanuana.

⁷ Dahaka dainai e heau mauri tauna ese tau badadia baine hereva henidia? Una dala amo Israel taudia na bae ḡoeva bona aksiden amo ta e hamasea tauna na Iehova ese baine bogaia hisi diba. Baibul mai dibana namonamo tauna ta na e gwa, bema e heau mauri tauna ese tau badadia basine hereva henidia, ia na “dika baine davari diba.” Ma e gwa: “Una tau bae hamasea na sibona ena kerere, badina Dirava ese e gwauraia dalana na se badinaia.” Aksiden amo ta e hamasea tauna iduruna dalana na mia, to namona na ia ese una heduru dalana baine tahua bona baine abia dae. Bema ia na Iehova ese e abi hidi roho mauri hanuana ta basinela, e hamasea tauna varavarana ese baine hamasea diba.

8, 9. Dahaka dainai kara dika badana e karaia Kristen tauna na elda edia amo heduru baine abi na namo?

 ⁸ Hari ina negai, kara dika badana e karaia Kristen tauna ese elda taudia edia amo heduru baine abi na namo. Dahaka dainai una na mai anina bada? Ḡau ginigunana na, Iehova ese elda taudia e abidia hidi, iena Hereva heḡereḡerena ai kerere badadia bae hamaoromaoro totona. (Iak. 5:14-16) Ḡau iharuana na, elda taudia ese e helalo-kerehai tauna bae durua Dirava ena lalonamo baine abia bona e karaia kara dikana na ma basine kara lou. (Gal. 6:1; Heb. 12:11) Ḡau ihatoina na, elda taudia e abidia hidimu bona e hadibadiamu, unu amo e helalo-kerehaimu taudia bae durudia basie lalohisihisi totona. Iehova ese unu elda taudia na e gwauraidia “lai-gubana ilao-ahuna gabuna heḡereḡerena.” (Isa. 32:1, 2) Una ese Dirava ena hebogahisi karana e hahedinaraiamu.

⁹ Dirava ena hesiai taudia momo na elda taudia edia amo heduru e abimu neganai, namo e davarimu. Heḡereḡere, tadikaka ta ladana Daniel na kara dika badana ta e karaia, bona hua momo lalodiai se urava elda taudia baine hadibadia. Ia na eto: “Nega na vada e daudau dainai, na laloava elda taudia ese na basie durugu dibamu. To, nega momo na gariva, badina hari be ta ese na karaia kererena be dibamu. Bona Iehova na ḡuriḡuri heniava neganai, nega momo egu kara kererena dainai na sori heniava.” Gabeai, Daniel na elda taudia edia amo heduru e tahu. Una nega e laloa lou neganai, ini e gwau toma: “Matamanai, na gariva elda taudia baina hereva henidia. To gabeai, egu kerere na gwauraia hedinarai neganai egu hemami na e namo, vaitani ta ese maduna metauna ta egu amo bema kokia na heto. Hari, na mamiamu Iehova na baina ḡuriḡuri henia diba bona ḡau ta ese basine kougu.” Daniel lalona mamina na e ḡoeva, bona vanegai mo ia na hesiai tauna ai ela.

10. Aksiden amo ta e hamasea tauna na bae bogaia hisi totona dahaka baine kara na namo?

¹⁰ Aksiden amo ta e hamasea tauna na bae bogaia hisi totona kara ta baine karaia na namo. Ia na roho mauri hanua kahikahina ta baine heau henia. ( Iosua 20:4 ba duahia.) E heau mauri tauna na baine mauri totona, unu roho mauri hanuana ta bainela haraḡa na namo bona unuseniai baine noho! Una anina na ia ese ḡau haida baine dadarai. Iena moni ḡaukara bona ruma namona baine rakatani, bona basine loaloa ela bona hahelaḡa tauna badana baine mase. * (Num. 35:25) To unu baine kara toma na mai ena namo. Bema una roho mauri hanuana baine rakatania, ena kara amo be hahedinaraiamu e karaia ala-ala karana na se laloa badamu, bona ena mauri baine haboioa diba.

11. E helalo-kerehai Kristen tauna be dahaka baine kara unu amo baine hahedinaraia Dirava ena hebogahisi karana na e laloa badamu?

¹¹ Hari ina negai danu, e helalo-kerehaimu taudia na Dirava ese baine bogadia hisi totona, kara ta bae karaia haraḡa na namo. Namona na kara dika badadia bona kerere maraḡidia, dika bada bae havara diba ḡaudia, baita dadaraidia vaitani. Aposetolo Paulo ese Korinto ai helalo-kerehai Kristen taudia edia kara na ini e herevalaia toma: “Dirava ena amo lalo-hisihisina dainai nahuamui o toho ani? lalomui o hamaoromaoro ani? lalomui e hekwarahi ani? o gari ani? o helaro ani? o haheauka ani? dika davana o heni ani?” (2 Kor. 7:10, 11) Ta hekwarahimu kara dika baita dadaraidia karana amo Iehova enai ta hahedinaraiamu, eda kerere ena dika na ta laloamu bona Iena hebogahisi na ta laloa badamu.

12. Kristen tauna be dahaka baine kara Dirava ese dounu baine bogaia hisi totona?

¹² Kristen tauna be dahaka baine kara Dirava ese dounu baine bogaia hisi totona? Bema e ura henimu ḡaudia haida ese bae hamorua diba, baine dadaraidia na namo. (Mat. 18:8, 9) Heḡereḡere, bema turamu haida ese bae dorimu Iehova se moalelaiamu ḡauna ta ba karaia, idia dounu bo bamodiamu, a? Bema oi na o hekwarahimu emu inuinu karana ba biagua, inuinu kekero ena hedibaḡani o dadaraiamu, a? Bema oi na o hekwarahimu matabodaḡa uradia ba dadarai, unu ura e havaramu muvi, websait, bona moale karadia o dadaraimu, a? Ba helalotao, Iehova baita badinaia totona iena taravatu iutuna karadia baita dadarai na namo. Asita uramu eda kara ta dainai Iehova ese baine dadaraida. To, ta uramu Iehova ena “mia-hanaihanai” lalokauna lalonai baita noho.​—⁠Isa. 54:7, 8.

13. Dahaka dainai e heau mauri tauna na roho mauri hanuana ai basine gari bona baine moale? Mani a herevalaia.

¹³ Heau mauri tauna na roho mauri hanuana ai baine vareai neganai, dika ta basine davaria diba. Iehova ese unu roho mauri hanuadia na ini e herevalaidia toma: “Unuseni ai . . . ba roho mauri.” (Ios. 20:2, 3) Iehova na se gwa ala-ala tauna na ena kerere dainai bae hahemaoro henia lou, bona mase tauna varavarana na una hanua ai basine vareai ia baine hamasea totona. Heau mauri tauna na bae hamasea garina na basine gari. Badina una hanua ai, ia na Iehova ese baine gimaia. Una hanua na dia dibura rumana. Una hanua ai, ia na baine ḡaukara diba, ma haida baine durudia, bona mai mainona ida Iehova baine hesiai henia. Oibe, mauri namona baine moalelaia diba!

14. E helalo-kerehai tauna ese dahaka baine abia dae diba?

¹⁴ Dirava ena taunimanima haida na kerere badadia e kara, to e helalo-kerehai murinai, e laloava Iehova ese edia kerere na se lalo boio, vaitani edia kerere ese e “ḡuidia.” Bema emu hemami na unu bamona, namona na bavabia dae  Iehova na mai ena hebogahisi dainai emu dika e gwaudia taomu! Matamanai tame herevalaia tadikakana, Daniel enai una na e vara. Elda taudia ese e durua bona lalomamina ḡoevana e abia murinai, ia na e gwa: “Una hekwakwanai e hamaoromaoroa murinai, egu kerere na ma asina lalohekwarahilaia. Una kerere na vada na laloa boio. Iehova na e gwa, e hametaumumu ḡaudia na baine abidia oho. Bona ma basio itadia lou.” Kerere tauna na roho mauri hanuana ai e vareaiva neganai, ia na mase tauna varavarana ese baine alaia garina na se gariva. Una heḡereḡerena, Iehova ese eda dika e gwautaomu neganai, dia namo baita laloa ia ese una kerere na dounu e laloamu eiava una kerere dainai baine hahemaoro henida.​—⁠Salamo 103:8-12 ba duahi.

15, 16. Iesu na Mauri Davana Ihenina Tauna bona Hahelaḡa Tauna Badana dainai, edena dala ai e hagoadamumu Dirava ena hebogahisi karana bavabia dae totona?

¹⁵ Momokani, Israel taudia ese Iehova ena hebogahisi karana e abia dae heḡereḡerena, ita ese danu baita abia dae. Paulo na Iehova se badinaia neganai e lalohisihisi, to gabeai ia na eto: “Dirava na imodaiamu, Iesu Keriso bagunai.” (Roma 7:25) Oibe, ena be Paulo na e hekwarahi ena kara dika baine dadarai bona kerere gunadia amo e helalo-kerehai, to ia na e diba momokani Dirava ese Iesu ena amo ena dika na e gwautao. Iesu na Mauri idavalaina boubouna e heni dainai, ita ese lalomamina ḡoevana bona lalomaino baita abi diba. (Heb. 9:13, 14) Ia na eda Hahelaḡa Tauna Badana dainai, “ia na mai goadana, ia bagunai Diravana e raka henia kahimu taudia baine hamauridia ḡuḡuru, badina be e noho hanaihanaimu, bona ita daidai e noinoi hanaihanaimu.” (Heb. 7:24, 25) Bema hahelaḡa tauna badana ese Israel taudia e hadibadiava edia dika na bae hegwautao, namona na baita abia dae Hahelaḡa Tauna Badana, Iesu, ese ita na “baine bogada hisi, bona harihari-bada, eda dabu negadia ai baine kahada hariharina, baita abia.”​—⁠Heb. 4:15, 16.

¹⁶ Iehova na eda roho mauri gabuna ai baita halaoa totona, Iesu ena boubou ḡauna baita abidadama henia na namo. Mauri idavalaina boubouna ese taunimanima momo baine durudia karana baita abia dae mo na dia heḡereḡere. To, namona na bavabia dae una boubou ḡauna ese oi na baine durumu diba. (Gal. 2:20, 21) Bavabia dae, mauri idavalaina boubou amo emu dika na bae hegwautao diba. Danu bavabia dae, una boubou ḡauna ese mauri hanaihanai helarona baine henimu. Iesu ena boubou ḡauna na Iehova ena harihari ḡauna oi e henimu.

17. Dahaka dainai o uramu Iehova na emu roho mauri gabuna ai ba halaoa?

¹⁷ Roho mauri hanuadia ese Iehova ena hebogahisi karana e hahedinaraia. Dirava ese roho mauri hanuadia e abidia hidi karana amo e hahedinaraia mauri na helaḡa, danu elda taudia ese bae duruda dalana, helalo-kerehai momokani toana, bona Iehova ese dika e gwautaomu karana baita abia dae vaitani badina e hahedinaraia. Oi ese Iehova be emu roho mauri gabuna ai o halaoamu, a? Unu ba kara toma na namo! (Sal. 91:1, 2) Stadi gabena ai, roho mauri hanuadia ese bae duruda Iehova ena hahemaoro maoromaoro bona hebogahisi karadia baita tohotoho daladia baita herevalaimu.