ALLEN * na ini e gwau toma: “Matamanai, na daradarava ina kongrigeisen bainama. Asi dibagu bema tura matamatadia ba davaridiamu o haida ese be abigu daemu eiava lasi.” Allen na e ura ena kongrigeisen matamatana ai e nohomu taudia baine dibadia namonamo. Ena gabu amo una kongrigeisen ena daudau na kilomita 1,400 heḡereḡerena.

Bema oi na kongrigeisen idauna ta ola, reana oi danu bo daradaramu eiava bo garimu. Dahaka ese baine durumu diba kongrigeisen matamatana ai ba manada totona? Dahaka ba kara diba bema kongrigeisen matamatana ai ba manada karana na auka? To, bema kongrigeisen ta basio laomu, emu kongrigeisen baema taudia be ede ba kara henidia toma?

Mani ina haheitalai a laloa: Bema au ta na ena gabu amo e raḡaia ohomu bena gabu ma ta ai e hadoamu, ena tubu dalana na be aukamu. Au na tano amo e kokiamu neganai, ia ramuna haida na e utudiamu unu amo gabu ma ta ai bae hadoa diba. Bena gabu matamatana ai e hadoamu neganai, ramuna matamatadia bae tubu na namo. Una heḡereḡerena, kongrigeisen matamatana ta bo laomu neganai be aukamu una kongrigeisen ba manadaia totona. Emu kongrigeisen gunana ai, emu hebamo namodia bona Iehova ihesiai henina karana o moalelaiva, una na vaitani “ramu” momo o ato. Hari kongrigeisen matamatana ai ba moale totona ramu matamatadia bavato na namo. Dahaka ese baine durumu unu ba kara toma? Baibul ena hahekau herevadia ibadinadia karana ese baine durumu. Mani dala haida aita herevalai.

Dirava ena Hereva e duahia hanaihanaimu tauna na “sinavai isena ai e hadoa auna na heto: ena huahua negana ai ia anina do baine dobi, ia rauna danu do basine marai, ḡau idoidiai ia baine kara be anidia do bae vara ḡoevaḡoeva.” ​—⁠Sal. 1:1-3.

Au ta baine tubu namonamo totona ranu baine abi hanaihanai na namo, una heḡereḡerena Kristen tauna na lauma dalanai baine goada totona Dirava ena Hereva baine stadilaia hanaihanai na namo. Una dainai, hanaihanai Baibul ba duahia bona kongrigeisen heboudia baola. Ruma bese ena tomadiho eiava sibomu emu stadi ba karaia hanaihanai. Emu kongrigeisen gunana ai lauma dalanai ba goada totona o karava ḡaudia na kongrigeisen matamatana ai danu ba karadia na namo.

“E dairi-dairimu tauna na bae dairia.” ​—⁠Her. 11:25.

Haroro ḡaukara bo karaia hanaihanaimu neganai emu kongrigeisen matamatana ai bo manada haraḡa dibamu. Kevin, Kristen elda ta, na e gwa: “Lau bona adavagu e durumai ḡauna na, kongrigeisen matamatana ala neganai maoromaoro heduru painia a karaia. Unu amo tadikaka taihu, painia taudia, bona haroro teritori a dibadia haraḡa.” Roger na ena gabu e rakatania bona kilomita 1,600 heḡereḡerena ela ma gabu ta ai e nohova. Ia na e gwa: “Kongrigeisen matamatana ai ba manada dala namona ta na, haroro ḡaukara ba karaia hanaihanai. Danu, elda taudia ba hadibadia oi na o uramu ba heduru, heḡereḡere Kingdom Hall ba haḡoevaia, hebou ena kaha ta ai ba volentia, eiava ma haida na emu motuka amo ba laohaidia hebou gabuna. Tadikaka bona taihu ese unu kara namodia be itamu neganai, be hetura henimu dibamu.”

“Emui lalokau na ba habadaia.”​—⁠2 Kor. 6:13.

Tadikakamui ilalokau henidia karana ba habadaia. Melissa bona ena ruma bese na kongrigeisen matamatana ta ela, bona idia na e ura tura matamatadia bae dibadia. Ia na ini e gwau toma: “ Hebou vairanai bona murinai, ai na tadikaka bona taihu idauidau ida a herevaherevava. Hahenamo herevana ta a gwauraiava neganai una ese dala e kehoava idia ida baia herevahereva namonamo totona.” Danu una ese Melissa bona ena ruma bese e durudia lada matamatadia e diba haraḡa. Bona idia ese edia heabidae karana na e habadaia, una ese edia hebamo karana tura matamatadia ida na e hagoadaia. Melissa na ma eto: “Emai fon namba a henidia bona idia danu edia fon namba e henimai, unu amo kongrigeisen eiava ḡaukara ma haida totona baia hediba heheni diba.”

Bema haida ihereva henidia na o garimu, dala maraḡidia haida ba tohodia diba. Heḡereḡere, ba kiri​—⁠ena be matamanai basio uramu unu ba kara toma. Emu kiri toana dainai haida na be uramu oi bae hereva henimu. Momokani, kiri o “mata diaridia ese tau lalona e hamoaleamu.” (Her. 15:30) Rachel, ena hanua e rakatania bona ma gabu ta ai e nohomu taihuna, na e gwa: “Lau na hemarai momo kekenigu. Egu kongrigeisen matamatana ai nega haida na hekwarahiva tadikaka bona taihu baina hereva henidia. Kingdom Hall ai sibodia e helaimu bona ta ida asie herevaherevamu taudia na rohadiava. Reana idia danu e hemaraimu, lau heḡereḡeregu.” Hebou vairanai bona murinai nega bavato asi dibamu tadikakana o taihuna ta ida ba herevahereva.

Danu, wiki matamadia ai na bo moalemu badina tura matamatadia o hedavari henidia. To nega be laomu lalonai una moale mamina na taina ruana be ore be laomu. Una baine vara neganai, namona na dounu ba ḡaukara goada tura matamatadia ba bamodia totona.

Au haida na gabu matamatana ai e hadodiamu neganai, ramudia na metairametaira e auka e laomu. Una heḡereḡerena, haida na kongrigeisen matamatana e laomu neganai, metairametaira una kongrigeisen taudia be manadadiamu. Bema oi na vanegai kongrigeisen matamatana ta ola, to dounu o hekwarahimu ba manada totona, Baibul ai ini hahekau herevadia ba badina karana ese bae durumu diba:

“Kara namo ikarana na basita hesikulaia; badina be bema ita basita manoka, bena nega namona ai huahuada baita abi.”​—⁠Gal. 6:9.

Nega bada bavato unu amo ba manada, ena be matamanai o laloava una na auka. Heḡereḡere, Gilead sikuli ela misinari taudia momo na edia asainmen tanodia ai laḡani momo muridiai edia tano korikori e lou laomu. Una dainai idau tanodia ai e nohomu tadikakadia ida edia hebamo karana na e goadamu bona unu tano edia noho dalana e manadalaiamu.

Alejandro, gabu idauidau ela tadikakana, na e diba kongrigeisen idauna ai ba manada na mai hekwarahina. Ia na ini e gwau toma: “Emai noho gabuna a rakatania murinai, adavagu na e gwa, ‘Turagu iboudiai na kongrigeisen gunana ai!’” Alejandro ese adavana e hadibaia una hereva na laḡani rua gunanai e gwauraia. To unu laḡani ruaosi lalodiai, adavana ese ma haida na turana namodia ai e halaodia.

“Basioto, ‘Dahaka dainai nega gunadia ese ina nega e hereaia?’ Badina dia aonega amo so henanadaimu.”​—⁠Koh. 7:10.

Emu kongrigeisen matamatana na gunana ida basio haheḡereḡerea. Heḡereḡere, reana bo lalomu emu kongrigeisen matamatana ai tadikaka bona taihu haida na asie hereva momomu, a haida be e hereva momomu taudia. To namona na edia kara namodia mo ba lalodia bada, bema o uramu idia ese danu emu kara namodia bae lalodia bada. Kongrigeisen matamatana ela taudia haida na  sibodia ini e henanadai tomamu, ‘Lau be “iseda orea taudia” iboudiai na lalokau henidiamu, eiava?’​—⁠1 Pet. 2:17.

“Ba noinoi, do baine henimui.”​—⁠Luka 11:9.

Dirava ena heduru ba noia. David, elda tauna ta, na e gwa: “Sibomu ese basio haheaukalaia. Iehova ena heduru amo ḡau momo baita kara diba. Emu hekwakwanai na ba ḡuriḡurilai!” Rachel, matamanai ta herevalaia taihuna, danu ini e gwau toma: “Bema lau bona adavagu na a mamiamu ai na kongrigeisen amo a daudaumu, Iehova enai una a ḡuriḡurilaiamu, a gwaumu, ‘Mani ba hadibamai bema ai na emai kara haida daidiai haida ese asie hetura henimaimu.’ Una murinai nega bada a atomu tadikaka bona taihu ida baia hebamo totona.”

Tama sina e, bema natumui na e hekwarahimu kongrigeisen matamatana ai bae manada totona, namona na nega bavato idia ida una ba ḡuriḡurilaia. Bona dala ba kara tura matamatadia ida bae hebamo namonamo totona.

Dahaka ba kara diba emu kongrigeisen e mai matamamu taudia ba durudia? Ba ḡaukara goada ba hetura henidia totona. Kongrigeisen matamatana ai o uramu haida ese bae kara namo henimu heḡereḡerena, namona na emu kongrigeisen e maimu taudia danu ba kara namo henidia. (Mat. 7:12) Emu ruma bese ena tomadiho ai bae helai vareai eiava JW Broadcasting ba itaia hebou diba. Eiava ba boiridia oi ida ba haroro hebou totona. Bema idia ida bo aniani heboumu, una heabidae karana na basie laloaboiomu. Idia ba durudia daladia ma haida be dahaka?

Carlos na e gwa: “Emai kongrigeisen matamatana ala neganai, taihu ta ese dava maraḡi stoadia haida e hadibamai. Una ese ai na e durumai.” Idau tanodia amo e maimu taudia na be moalemu, bema keru, siahu o medu negadiai bae hahedokilai dabua maorodia bo hadibalaidiamu. Idia ba durudia edia haroro ḡaukara bae karaia namonamo totona, emu hanua taudia edia mauri dalana bona edia tomadiho ai e abi daemu ḡaudia ba herevalai.

Allen, paragraf matamanai e herevalaia tadikakana, na ena kongrigeisen matamatana ai laḡani ta mai kahana vada e noho. Ia na eto: “Matamanai na hekwarahiva tadikaka bona taihu baina dibadia totona. To hari idia na egu ruma bese na heto, bona na moalemu.” Allen na e diba kongrigeisen matamatana ela neganai, turana na se haboiodia. To, ia ese tura matamatadia e davaridia, bona idia na ia turana ai baela ela bona hanaihanai.