1, 2. (a) Petro ese Iesu e hereva henia neganai, Iesu be dahaka e gwa? (Rau 18 ai laulau ba itaia.) (b) Dahaka dainai Iesu na unu e gwau toma?

IESU ena hahediba na e kamonai herevadia daidiai e hoa. Badina e laloava Iesu ese Israel ena Basileia baine haginia lou, to ia na eto hisihisi baine davari bona baine mase. Aposetolo Petro ese Iesu e hamaoroa: “Lohiabada e, dia unuheto; unu basie karamu toma.” To Iesu ese e gwau henia, eto: “Satana e, murigu kahana aola: o hahekwakwanaigumu; badina be emu lalohadai na dia Dirava ena, to taunimanima edia.”​—Mat. 16:21-23; Kara 1:6.

² Iesu ena hereva amo e hahedinaraia, Dirava ena lalohadai na idau Satana ese e biaguamu tanobadana ena lalohadai amo. (1 Ioa. 5:19) Petro ese ina tanobada ena lalohadai​—ta sibona ena namo e laloa badamu karana​—e hahedinaraia. To Iesu na mai dibana Tamana ena lalohadai na dia unuheto. Mai dibana Dirava na e ura ia na baine heḡaeḡae badina gabeai baine hisihisi bona baine mase. Iesu ese Petro e haere henia karana amo e hahedinaraia ḡoevaḡoeva, ia ese Iehova ena lalohadai e abia dae a tanobada ena be e dadaraia.

3. Dahaka dainai tanobada ena lalohadai baita dadaraia na mai hekwarahina?

 ³ To ita be Dirava ena lalohadai ta badinaiamu eiava tanobada ena? Momokani, ita na Dirava ena taravatu heḡereḡerena ai eda kara ta haidau. To eda lalohadai be ede bamona? Iehova ena lalohadai heḡereḡerena, eiava? Lalohadai maorona baita abia totona, baita hekwarahi na namo. To, ta ese ina tanobada ena lalohadai baine abia na dia auka. Badina ina tanobada ena lalohadai ese taunimanima e veridiamu. (Efe. 2:2) Danu, taunimanima na nega momo sibodia edia namo e lalomu dainai, reana baita uramu una lalohadai baita abia dae. Oibe, tanobada ena lalohadai iabina na haraḡa, a Iehova ena lalohadai iabina be mai hekwarahina.

4. (a) Dahaka baine vara diba bema tanobada ese eda lalohadai baine biagua? (b) Edena dala ai ina stadi ese be durudamu?

⁴ To, bema tanobada ese eda lalohadai baine biagua, siboda eda namo mo baita lalomu, bona baita laloamu ita na mai eda maoro dahaka be maoro bona dahaka be kerere baita abi hidi. (Mar. 7:21, 22) Una dainai, ḡau badana na Dirava ena lalohadai baita abia, dia taunimanima edia. Ina stadi ese be durudamu unu baita kara toma. Be hahedinaraiamu dahaka dainai Iehova ena lalohadai baita badinaia na maoro bona mai ena namo. Danu tanobada ena lalohadai baita dadaraia daladia baita herevalaimu. Stadi gabena ai, ḡau iboudiai lalodiai Iehova ena lalohadai baita abia dalana baita herevalaiamu.

5. Dahaka dainai taunimanima haida na asie uramu ma haida ese edia lalohadai bae hamaoromaoro?

⁵ Taunimanima haida na asie uramu ma haida ese edia lalohadai bae hamaoromaoro. Idia na ini e gwau tomamu: “Lau sibogu egu lalohadai baina badinaia.” Reana edia hereva anina na, sibodia edia abi hidi bae kara, bona unu bae kara toma na dia kerere. Asie uramu haida ese bae biagudia eiava bae doridia ma haida bae tohotohodia. *

6. (a) Iehova ese ita be dahaka e henida? (b) Una ura kwalimu be mai hetoana eiava?

⁶ To namona na baita diba, bema Iehova ena lalohadai baita abia dae, abi hidi na dounu baita kara dibamu. Korinto Iharuana 3:17 ena hereva heḡereḡerena, “Lohiabada Laumana e nohomu gabudia ai ura kwalimu danu e nohomu.” Ita na mai eda ura kwalimu dainai abi hidi baita kara diba taunimanima ede bamodia ai baitala totona. Reana ta ura henimu ḡaudia bona ta dibamu ḡaudia haida baita abi hidi dibamu. Momokani, Iehova ese ita e karada neganai ura kwalimu e henida, to namona na baita ḡaukaralaia namonamo. (1 Petro 2:16 ba duahia.) Maoro bona kerere iabi hididia karana ai, Iehova na e uramu ena Hereva ai e hahedinaraia lalohadaina ese baine hakauda. Una ese ita be e biaguda aukamu eiava e durudamu?

7, 8. Dahaka dainai Iehova ena lalohadai ibadinana karana ese ita na se biaguda aukamu? Haheitalai ba gwauraia.

⁷ Ini aita haheitalaia toma. Tama sina na e hekwarahimu natudia na kara namodia bae hadibadia. Reana e hadibadiamu bae kara momokani, bae ḡaukara goada, bona ma haida edia namo bae lalo. Una na dia idia e biagudia aukamu karana. To, e haheḡaeḡaediamu taunimanima namodia ai baela. Natu e badamu bona ruma e rakataniamu neganai, sibodia edia abi  hidi bae kara diba. Bema tamadia sinadia edia amo e diba ḡaudia bae badina, abi hidi maorodia bae kara diba. Unu amo hekwakwanai eiava lalohisihisi bae havara ḡaudia bae hanaidia diba.

⁸ Iehova na tama namona ta na heto, e uramu natuna na bae moale. (Isa. 48:17, 18) Una dainai, kara maorodia bona haida ikara namo henidia daladia ai hahekau herevadia e henimu. Ḡau unu bamodia ai Iehova na ita e noidamu ena lalohadai bona ena ura baita badinaia. Una ese ita na se biaguda aukamu, to aonega e henidamu bona e durudamu abi hidi maorodia baita kara. (Sal. 92:5; Her. 2:1-5; Isa. 55:9) Danu, ta karamu abi hididia daidiai baita moalemu bona huahua namodia baita havara diba. (Sal. 1:2, 3) Oibe, Iehova ena lalohadai baita abia na mai ena namo!

9, 10. Edena dala ai Iehova ena lalohadai ese tanobada ena lalohadai na e hereaia?

⁹ Iehova e toma henia dihomu taudia ese iena lalohadai e uramu bae badinaia badina ma ta na, Dirava ena lalohadai ese ina tanobada ena lalohadai na e hereaia. Ina tanobada ese heduru herevadia haida heḡereḡere, dahaka be maoro bona dahaka be kerere, ruma bese bae moale daladia, moni ḡaukara namodia, bona mauri iduruna daladia ma haida e gwauraimu. To momo edia lalohadai na dia Iehova ena heḡereḡerena. Heḡereḡere, idia ese ma haida e hagoadadiamu sibodia edia namo bae tahu, bona e gwaumu matabodaḡa karadia na dia kerere. Danu headava taudia e hamaorodiamu, ḡau asi anidia daidiai bae parara diba eiava edia headava bae hadokoa unu amo bae moale. Una na dia Baibul ena hereva heḡereḡerena. To, hari ina negai tanobada ena lalohadai ese baine duruda diba, a?

¹⁰ Iesu na eto: “Aonega ihamomokanina na natuna edia amo e hedinaraimu.” (Mat. 11:19) Ena be taunimanima edia diba teknoloji ai na e badamu, to moale e kouamu hekwakwanaidia, heḡereḡere tuari, heinai heheni, bona raskol karadia na se haorediamu. Danu matabodaḡa karadia na e abi daemu. Taunimanima momo na e abia daemu una ese ruma bese maurina e hadikaiamu, gorere bona hekwakwanai ma haida e havaramu. To, Dirava ena lalohadai e badinaiamu Kristen taudia ese ruma bese maurina na e moalelaiamu, asie goreredia momomu, bona tanobada heḡeḡemadai tadikakadia ida maino ai e nohomu. (Isa. 2:4; Kara 10:34, 35; 1 Kor. 6:9-11) Una ese e hahedinaraiamu Iehova ena lalohadai ese tanobada ena lalohadai na e hereaia.

11. Mose be daika ena lalohadai e badinaia, bona dahaka e vara?

¹¹ Baibul negadiai, tomadiho momokani taudia na mai dibadia Iehova ena lalohadai ese tanobada ena lalohadai na e hereaia. Heḡereḡere, ena be Mose na “Aigupto taudia edia aonega idoinai” e hadibalaia, to ia ese Dirava ena “aonega” e tahua. (Kara 7:22; Sal. 90:12) Danu Iehova e noia, eto: “Emu dala boma hadibalaigu.” (Eso. 33:13) Mose na Iehova ena lalohadai e badinaia dainai, Iehova ese e ḡaukaralaia ena ura baine haḡuḡurua bona Baibul ese Mose na e gwauraiamu abidadama tauna.​—Heb. 11:24-27.

12. Paulo na abi hidi e urava baine kara neganai edeseni ai heduru e tahuva?

¹² Aposetolo Paulo na mai aonegana bona gado rua mai dibana. (Kara 5:34; 21:37, 39; 22:2, 3) To, abi hidi e urava baine kara neganai, Baibul ena hahekau herevadia ai heduru e tahuva bona tanobada ena aonega e dadaraia. (Kara 17:2; 1 Korinto  2:6, 7, 13 ba duahi.) Una dainai, Paulo na ena hesiai ḡaukara e moalelaia bona bae mia hanaihanai hahenamodia e lalodiava.​—2 Tim. 4:8.

13. Kristen taudia ta ta edia maduna be dahaka?

¹³ Momokani, Dirava ena lalohadai ese ina tanobada ena lalohadai na e hereaia. Dirava ena lalohadai baita badinaiamu neganai, baita moalemu bona baita kwalimumu. To Iehova ese ita na se doridamu ena lalohadai baita badinaia. “Hesiai tauna mai ena kamonai bona mai ena kara maoromaoro” bona elda taudia ese danu eda lalohadai na se biagumu. (Mat. 24:45; 2 Kor. 1:24) To, Kristen taudia ta ta na mai edia maduna edia lalohadai bae haidau, unu amo Iehova ena lalohadai bae badinaia diba. Edena dala ai unu baita kara toma?

14, 15. (a) Iehova ena lalohadai baita badinaia totona, dahaka baita lalohadailai na namo? (b) Roma 12:2 ena hereva heḡereḡerena, dahaka dainai tanobada ena lalohadai baita dadaraia? Haheitalai ba gwauraia.

¹⁴ Roma 12:2 na e gwaumu: “Ina tanobada oromana na basio tohotohoa; a lalomui ba hamatamata, bae idau vaitani, bena Dirava ena ura, mai namona bona mai hairaina bona mai hereadaena ida, vada ba diba.” Una siri ese e hadibadamu, hereva momokani do asita diba neganai tanobada ena lalohadai ta badinaiava, to hari hereva momokani ta diba dainai eda lalohadai ta haidaua bona Dirava ena lalohadai ta badinaia. Ena be tamada sinada edia mauri dalana bona edai guna e vara ḡaudia ese eda lalohadai e biagumu, to eda lalohadai na baita haidaua diba. Una na baine vara diba bema ta lalomu ḡaudia baita abi hidimu. Iehova ena lalohadai baita haeroamu neganai, baita abia daemu iena lalohadai na maoro. Bena baita uramu ena lalohadai heḡereḡerena ai ḡau baita haero.

¹⁵ To baita helalotao, Iehova ena lalohadai baita badinaia totona, ‘ina tanobada oromana na basita tohotohoa.’ Una anina na Dirava ena lalohadai ida se heḡereḡeremu ḡaudia na baita dadaraidia vaitani. Una baita lalopararalaia totona, mani aniani aita laloa. Ta na basine gorerea totona tauanina baine durua anianidia mo be animu. To bema aniani dikadia danu be animu, namo ta basine varamu. Una heḡereḡerena, bema darada na tanobada ena lalohadai amo baita ubuamu, Iehova ena lalohadai na basita badinaia namonamomu.

16. Dahaka ḡaudia ai baita henahua toho na namo?

¹⁶ Tanobada ena lalohadai be baita koua diba, eiava? Lasi, tanobada na basita rakatania vaitani dibamu. Badina tanobada taudia edia lalohadai na dala idauidau baita kamonaimu eiava baita dibamu. (1 Kor. 5:9, 10) Haroro ḡaukara ai, ta davaridiamu taudia haida na hahediba koikoidia eiava lalohadai kereredia e gwauraimu. Ena be basita koudia dibamu, to edia hereva basita kamonai eiava basita abi dae na namo. Iesu heḡereḡerena, namona na haraḡa herea Satana ena lalohadai koikoidia baita dadaraidia. Danu, namona na hanaihanai baita henahua toho bona tanobada ena lalohadai iboudiai baita dadarai.​—Hereva Lada-isidia 4:23 ba duahia.

17. Ededia dala haida ai tanobada ena lalohadai baita dadaraia diba?

¹⁷ Heḡereḡere, turada baita abidia hidi neganai, nahuada baita toho. Baibul ena sisiba heḡereḡerena, bema Iehova asie tomadiho heniamu taudia baita bamodiamu, edia lalohadai baita badina dibamu. (Her. 13:20; 1 Kor. 15:12, 32, 33)  Danu, moale karadia na baita abi hidi namonamo. Bema evolusen lalohadaidia, daḡedaḡe, eiava matabodaḡa karadia e hahedinaraimu moale karadia baita dadaraimu, “Dirava idibana e laoa ahumu ḡaudia iboudiai” ese eda lalohadai na basie hadikaiamu.​—2 Kor. 10:5.

18, 19. (a) Dala haida ai tanobada ena lalohadai e hedinaraimu neganai, dahaka dainai nahuada baita toho? (b) Ededia henanadai baita lalodia, bona dahaka dainai?

¹⁸ Danu dala haida ai tanobada ena lalohadai e hedinaraimu neganai, namona na baita lalopararalaidia bona baita dadaraidia. Heḡereḡere, nius ese e halasimu herevadia ese ta lalona baine veria diba politikol oreana ta ena lalohadai baine abia dae. Sivarai ma haida ai taunimanima edia palani bona e haḡuḡurumu ḡaudia e herevalaimu. Muvi bona buka haida ese e hahedinaraimu, ta na sibona ena namo bona ena ruma bese edia namo mo baine ato guna, unu amo taunimanima na baeto una na lalohadai namona. Una lalohadai na dia Baibul ena hereva heḡereḡerena, badina Baibul na eto Iehova baita lalokau henia guna neganai, ita bona eda ruma bese na baita moale. (Mat. 22:36-39) Danu, maraḡidia daidiai e halasimu bukadia bona muvidia momo na nanamo, to haida na natu e hadibadiamu matabodaḡa karadia bae abi dae totona.

¹⁹ Basita gwaumu moale karadia iboudiai na kekerere. To, namona na siboda baita henanadai: ‘Ina tanobada ena lalohadai na dala haida ai e halasimu neganai, una be na lalopararalaiamu eiava? Natugu ida TV program eiava duahiduahi ḡaudia haida be hetoadia a atomu eiava? Natugu na durudiamu Iehova ena lalohadai bae abia bona tanobada ena lalohadai bae dadaraia, a?’ Dirava ena lalohadai bona tanobada ena lalohadai edia idau baita lalopararalaimu neganai, “ina tanobada oromana” na basita tohotohoamu.

21. Stadi gabena ai dahaka baita herevalaiamu?

²¹ Ba helalotao, lalohadai na rua: Iehova ena bona Satana ese e biaguamu tanobadana ena. Ita be daika ena lalohadai ta badinaiamu? Haere na, baita abia hidimu tauna ena lalohadai baita badinaiamu. Bema tanobada ena lalohadai baita abia daemu, una ese eda lalohadai be biagua dibamu bena siboda eda namo mo baita lalomu. Una dainai ḡau badana na ta itamu, ta duahimu, ta kamonaimu bona ta lalohadailaimu ḡaudia baita haero namonamo.

²¹ Ina stadi amo tame diba Iehova ena lalohadai baita badinaia totona, namona na tanobada ena lalohadai iboudiai baita dadarai. Danu, Dirava ena hereva baita laloa dobu unu amo ena lalohadai heḡereḡerenai ḡau baita kara. Stadi gabena ese una baita karaia dalana be herevalaiamu.