1, 2. Lauma dalanai ta goadamu neganai, dahaka ta dibamu? Haheitalai ba gwauraia.

NATU ta na ta ese harihari ḡauna e henia. Bena tamana sinana ese e hamaoroa baine gwa, “Tenkiu.” Natu na tamana sinana ese e hamaoroa heḡereḡerena e kara. Una natu e bada neganai, tamana sinana edia hereva anina e lalopararalaia bona haida edia kara namodia e lalo bada. Hari, ia ese tenkiu herevana na mai lalona ibounai ida e gwauraiamu. Dahaka dainai? Badina ia sibona ese haida edia kara namodia e lalodia badamu.

² Una heḡereḡerena, hereva momokani ta diba matama neganai, ta laloparara Iehova ena taravatu baita badinaia na mai anina bada. Lauma dalanai ta goadamu neganai, Iehova ena lalohadai ta diba namonamomu. Heḡereḡere, e moalelaimu karadia, e inai henimu ḡaudia, bona ḡau ma haida. Bema eda kara bona ta abi hidimu ḡaudia na Iehova ena lalohadai heḡereḡerena, ta hahedinaraiamu ita na iena lalohadai ta badinaiamu.

3. Dahaka dainai nega haida Iehova ena lalohadai heḡereḡerena ai ḡau baita haeromu na auka?

³ Ena be Iehova idibana karana na ta moalelaiamu, to ita na dia ḡoevadae tauda dainai nega haida ena lalohadai  heḡereḡerena ai ḡau baita haeromu na auka. Heḡereḡere Iehova ese kara ḡoevadia, kohu bona moni, haroro ḡaukara, rara, eiava ma ḡau haida e lalomu dalana baita lalopararalaia na auka. Dahaka baita kara diba? Edena dala ai baita hekwarahi Iehova ena lalohadai baita abia? Edena dala ai una ese baine duruda hari bona nega vaira ai abi hidi maorodia baita kara?

4. Paulo ena hereva ‘laloda baita hamatamata’ anina be dahaka?

⁴ Roma 12:2 ba duahia. Ina siri ai aposetolo Paulo na Iehova ena lalohadai baita abia dalana e herevalaia. Vanega stadi ai, ta diba ḡauna na ‘ina tanobada oromana basita tohotohoa’ totona, namona na tanobada ena lalohadai bona kara baita dadaraidia. To Paulo na ma eto, namona na ‘laloda baita hamatamata.’ Una anina na, Dirava ena Hereva baita stadilaia, ena lalohadai baita lalopararalaia, baita haero, bona ena lalohadai baita abia.

5. Duahiduahi bona stadi edia idau be dahaka?

⁵ Stadi na dia duahiduahi bona henanadai haeredia baita maka karana mo e herevalaiamu. Ta stadimu neganai, ta duahiamu ḡauna ese Iehova, ena kara, bona lalohadai e herevalaia dalana baita haeroa. Namona na baita laloparara dahaka dainai Dirava ese baita karaia ḡauna ta be e taravatuamu bona ma ta be se taravatuamu. Danu, eda kara bona lalohadai baita haidau daladia baita lalo. Vaia, eda stadi negadia iboudiai unu kaha haida na basita lalomu, to stadi negadia ta ta ai nega baita ato baita duahi ḡaudia baita lalodia dobu.​—Sal. 119:97; 1 Tim. 4:15.

6. Iehova ena Hereva baita laloa dobu neganai, dahaka baine vara diba?

⁶ Hanaihanai Dirava ena Hereva baita laloa dobumu neganai, baita dibamu eiava baita hamomokaniamu, Iehova ena lalohadai iboudiai na ḡoḡoevadae. Iena lalohadai ta dibamu bona ta abia daemu ena lalohadai na maoro. Bena una heḡereḡerena laloda ta haidau eiava ta “hamatamata.” Unu amo Iehova ena lalohadai baita badinaia diba.

7, 8. (a) Iehova ena lalohadai kohu ai be dahaka? (Rau 23 ai laulau ba itadia.) (b) Bema iena lalohadai baita abiamu, dahaka baita laloa badamu?

⁷ Ta lalomu ḡaudia na eda kara amo e hedinaraimu. (Mar. 7:21-23; Iak. 2:17) Ini haheitalai haida amo una baita lalopararalaiamu. Heḡereḡere, Evanelia Bukadia ese e sivaralai ḡaudia amo Iehova ena lalohadai kohu ai ta dibamu. Dirava sibona ese tanobada ai Natuna bae naria taudia e abidia hidi​—idia na dia kohu momo taudia. (Lev. 12:8; Luka 2:24) Iesu e vara neganai, Maria ese “boromakau edia aniani patana ai e kurea, badina be henitao rumana lalonai asi gabuna.” (Luka 2:7) Iehova bema ura neganai, Natuna na noho gabuna namona ta ai bema vara. To, Iehova ena ura badana na, ia itoma diho henina karana e laloa bada ruma besena ese Iesu bae naria.

⁸ Iesu e vara sivaraina amo Iehova ena lalohadai kohu ai ta dibamu. Tama sina haida na e uramu natudia na kohu namodia bae habou, ena be mai dibadia una ese natudia edia hetura karana Dirava ida na baine hadikaia diba. To Iehova ese ia baita hetura henia karana  na e laloa badamu. Iehova ena lalohadai o abia daemu, eiava? Emu kara ese dahaka e hahedinaraiamu?​—Heberu 13:5 ba duahia.

9, 10. Edena dala ai haida ihahekwakwanaidia karana ai Iehova ena lalohadai baita abia?

⁹ Danu, Dirava ena lalohadai haida ihahekwakwanaidia karana ai mani aita laloa. Iesu na eto: “Ini e abiabiraigumu memero-memerodia ta baine hahekwakwanaia tauna na huro badana ta aiona ai bema mataia, davara ai bema negea dobi, bema namo.” (Mar. 9:42) Unu na hereva aukadia! Iesu na Tamana ena kara e tohotohodia ḡoevaḡoeva dainai, baita gwau dibamu Iehova na se moalemu bema ta na ena kara amo Iesu e badinaiamu tauna ta e hahekwakwanaiamu.​—Ioa. 14:9.

¹⁰ Eda lalohadai be Iehova bona Iesu edia lalohadai heḡereḡerena, eiava? Eda kara amo una ta hahedinaraiamu, eiava? Heḡereḡere, reana ta ura heniamu dabuana eiava eda heḡoeva dalana ese kongrigeisen ai haida edia hemami baine hadikaia diba, eiava ura dikadia baine havara diba. Tadikakada ta lalokau henidiamu dainai, siboda eda namo na basita lalomu.​—1 Tim. 2:9, 10.

11, 12. Dirava ena lalohadai bona siboda baita hebiagu karana ese edena dala ai baine duruda kara dika baita inai henia?

¹¹ Baita laloa ḡauna ma ta na, Iehova ese kara dikadia na e inai henimu. (Isa. 61:8) Momokani, ia na mai dibana ita na dia ḡoevadae dainai, kara maorodia baita karamu na auka, to e haḡanidamu kara dikadia baita inai heni. (Salamo 97:10 ba duahi.) Bema Iehova ese kara dikadia e inai henimu badidia baita lalodia dobumu, be durudamu iena lalohadai baita badinaia bona kara dikadia baita dadarai.

¹² Kara dika inai henina karana ai Iehova ena lalohadai baita dibamu neganai, kara kereredia ma haida baita lalopararalaimu, ena be Baibul ese unu na se herevalai. Heḡereḡere, lap dancing * na matabodaḡa mavaruna ta bona hari ina negai e bada e laomu. Haida na una mavaru lalonai e vareaimu badina e laloamu idia na dia mahuta hebou karana e karaiamu. To, o laloamu una lalohadai be kara dika e inai heniamu Diravana ena lalohadai, a? Namona na siboda baita hebiagu bona Iehova ese e inai henimu kara dikadia iboudiai baita dadarai.​—Roma 12:9.

13. Dahaka dainai Iehova ena lalohadai baita diba guna na namo?

¹³ Ta stadimu neganai, bae vara hekwakwanaidia ai Iehova ena lalohadai baita diba na mai anina bada. Unu amo hekwakwanai bae vara neganai, basita daradaramu dahaka abi hidi baita kara. (Her. 22:3) Mani Baibul ese e herevalaidia taudia haida edia sivarai aita lalo.

14. Iosef ese Potifara adavana e dadaraia karana amo dahaka ta dibamu?

¹⁴ Iosef na Potifara adavana ese lalona e ania neganai, ia ese haraḡa herea e dadaraia, unu amo e hahedinarai ia na Iehova ena lalohadai, headava taudia bae hebadina heheni karana, e laloa. (Genese 39:8, 9 ba duahi.) Danu, ia  ese Potifara adavana e hamaoroa, eto: “Ina kerere badana baina karaia, Dirava vairanai baina kara havara, be edeheto?” Una hereva amo e hahedinaraia ia na Dirava ena lalohadai e badinaia. Ita be ede bamona? Bema ta ḡaukara heboumu tauna ta na heḡahusi karana ta baine hahedinarai, dahaka baita kara? Eiava emu mobael fon ai matabodaḡa herevana eiava laulauna ta baine hedinarai, dahaka ba kara? * Bema hekwakwanai do se vara ai Iehova ena lalohadai bona baita kara ḡaudia baita lalodia gunamu, hekwakwanai be varamu neganai baita hanaidia dibamu.

15. Heberu memerodia tatoi heḡereḡeredia, edena dala ai Iehova baita badinaia?

¹⁵ Danu Heberu memerodia tatoi Sadaraka, Mesaka, bona Abedenego edia sivarai aita laloa. King Nebukadnesara ese e haḡanidia golo kaivakuku bae tomadiho henia neganai, idia ese una haheḡani na se badinaia bona edia haere amo e hahedinaraia lalodia vada e hadai Iehova bae abidadama henia. (Eso. 20:4, 5; Dan. 3:4-6, 12, 16-18) Bema bosi ese baine noimu tomadiho koikoi ese e abia daemu ariana ta totona moni ai ba heduru, dahaka ba kara? Dia namo ba nari ela bona hekwakwanai baine vara bena heduru ba tahu, to namona na hari Iehova ena lalohadai ba tahua. Bena hekwakwanai unu bamodia bae vara neganai, emu ai na dia auka kara maorona ba karaia eiava haere maorona ba heni, Heberu memerodia e kara heḡereḡerena.

16. Medikol dalanai heduru ta uramu baita abi neganai edena dala ai Dirava ena lalohadai baita tahua guna?

¹⁶ Medikol dalanai heduru ta uramu baita abi neganai, Dirava ena lalohadai baita laloa dobu karana ese baine duruda Ia baita badinaia. Mai dibada rara bona rara kahadia badadia 4 iabidia karana na baita dadaraia, to rara iduruna muramuradia ai ta na Iehova ena lalohadai e hahedinaraimu hahekau herevadia Baibul ai baine lalodia bona una heḡereḡerena sibona abi hidi baine kara  diba. (Kara 15:28, 29) Hospele ai eiava hisihisi bada baita mamiamu neganai una na dia nega maorona abi hidi baita kara. To hari na nega namona emu hetahu karana ba karaia, ba karaia abi hidina na emu medikol pepana, heḡereḡere Durable Power of Attorney for Health Care ai ba torea hedinarai, bona emu dokta ba hereva henia. *

17-19. Dahaka dainai ḡau idauidau ai Iehova ena lalohadai baita diba na mai anina bada? Haheitalai ta ba gwauraia.

¹⁷ Petro ese Iesu e hamaoroa, “Lohiabada e, dia unuheto; unu basie karamu toma” neganai Iesu ena haere mani aita laloa. Iesu ese Dirava ena ura na e laloa, dia una mo, to Buka helaḡa ai ena mauri bona tanobada ai baine mase peroveta herevadia e lalodia. Una ese e hagoadaia Dirava baine badinaia, bona mai ena ura ida ena mauri e heni ita daidai.​—Mataio 16:21-23 ba duahi.

¹⁸ Hari ina negai, Dirava na e uramu ena taunimanima na ia turana ai baela bona haroro ḡaukara bae goadalaia. (Mat. 6:33; 28:19, 20; Iak. 4:8) Iesu enai e vara heḡereḡerena, haida na eda hesiai ḡaukara be koua tohomu. Heḡereḡere, dahaka ba kara diba bema emu bosi na e uramu dagi ta baine henimu bona pei baine habadaia, to una dagi dainai asi emu nega ba haroro eiava hebou baola? Eiava dahaka ba kara diba bema sikuli gabuna ai emu hahediba ese bae hadibamu, gabu daudau sikulina ta baola emu diba ba habadaia totona? Bema emu ai una baine vara, namona na ba ḡuriḡurilaia, emu ruma bese bona elda taudia ida ba herevalaia, bena abi hidi ba kara. Namona na hari Iehova ena lalohadai ba tahua bona ba badinaia. Bena, vaira nega ai hahetoho unu bamodia bae vara neganai, bo hanaidiamu na dia auka, badina lalomu vada o hadaia Dirava ena hesiai ḡaukara bavatoa guna.

¹⁹ Hekwakwanai haida na e vara haraḡamu. Momokani, unu hekwakwanai iboudiai daidiai baita heḡaeḡae na auka. To bema siboda eda stadi ai Iehova ena lalohadai baita haerodia, hekwakwanai bae vara neganai ta stadilai ḡaudia baita lalo loumu bona baita badinamu. Una dainai, namona na Iehova ena lalohadai baita haeroa, unu amo hari bona nega vaira ai ena lalohadai heḡereḡerena ai abi hidi baita kara.

20, 21. (a) Dahaka dainai tanobada matamatana ai eda ura kwalimu na baita ḡaukaralaiamu? (b) Hari edena dala ai eda mauri baita moalelaia diba?

²⁰ Ita na mai eda ura ida tanobada matamatana ta nariamu. Ta uramu tanobada paradaisona ai baita mauri hanaihanai. Dirava ena Basileia henunai, taunimanima na ina nega oromana ai e varamu hisihisidia basie davarimu. Danu, taunimanima na dounu edia ura kwalimu be ḡaukaralaiamu. Ta ta na edia ura heḡereḡerena ai abi hidi be karamu.

²¹ To, eda ura kwalimu na mai hetoana. Manau taudia na dounu Iehova ena taravatu bona lalohadai heḡereḡerena ai abi hidi be karamu. Unu amo idia na be moalemu bona maino ai be nohomu. (Sal. 37:11) To una do se vara ai, hari eda mauri na baita moalelaia dibamu bema Iehova ena lalohadai baita badinaiamu.