1, 2. (a) Eda dava bada kohuna be dahaka? (b) Ta lalodia badamu hereva momokanidia be dahaka, bona dahaka dainai? (Rau 3 ai laulau ba itaia.)

OIEMU ai dava bada kohuna be dahaka? Ita na Iehova ta tomadiho heniamu dainai, ia ihetura henina karana na dava bada kohuna ta bamona baita laloa. Bona asita uramu ḡau ta ese baine hadikaia. Danu, Baibul ena hereva momokani ta laloa badamu dainai, una ese e durudamu Iehova turana ai baitala.​—Kol. 1:9, 10.

² Mani eda Hahediba Tauna Hereadaena ese ena Hereva, Baibul, amo e hadibadamu ḡaudia aita lalo! Ladana anina bona ena kara namodia e hadibadamu. Natuna Iesu ena mauri e bouboulaia karana amo ena lalokau ta dibamu. Danu Iehova ese Mesia Basileiana amo baine kara ḡaudia na e hadibadamu. Bona e horodia taudia be ḡuba helarona e henidia, a “mamoe idaudia” be tanobada Paradaisona ai bae noho helarona e henidia. (Ioa. 10:16) Danu mauri dalana maorona e hadibadamu. Unu hereva momokanidia na dava bada  ḡaudia, badina e durudamu Ihavarada Tauna baita raka henia kahi. Bona ta dibamu eda mauri na mai anina.

3. Moni amo hereva momokani baita hoia diba, eiava?

³ Iehova na hariharibada Diravana. Ia ese hereva momokani e tahuamu taudia na ḡau namodia e henidiamu. Iehova ese Natuna lalokauna ena mauri e heni, harihari ḡauna ta na heto. Dirava na se gwaumu moni amo hereva momokani baita hoia. Tau ta ladana Simona na e urava lauma helaḡa baine abia dainai aposetolo Petro moni e henia, to Petro ese e gwau henia, eto: “Emu moni na oi ida ba dika hebou, badina be lalomu e tomu Dirava ena harihari ḡauna na moni amo ba hoia diba.” (Kara 8:18-20) To, “hereva momokani ba hoia” anina be dahaka?

4. Ina stadi ai dahaka baita dibamu?

⁴ Hereva Lada-isidia 23:23 ba duahia. Baibul ena hereva momokani baita diba totona baita ḡaukara goadagoada na namo, anina na mai eda ura ida ḡau haida baita dadarai. Hereva Lada-isidia e torea tauna ese e hahedinaraia, “hereva momokani” baita “hoia” eiava baita abia neganai, namona na basita “hoihoilaia” eiava basita haboioa. Mani hereva momokani baita “hoia” anina bona baita kara ḡaudia aita herevalaia. Una ese be durudamu hereva momokani baita laloa bada bona haida ediai basita “hoihoilaia.” Ina stadi amo baita dibamu, hereva momokani na dava bada ḡauna ta.

5, 6. (a) Edena dala ai hereva momokani na dia moni ai baita hoia? Haheitalai ba gwauraia. (b) Ededia dala haida ai hereva momokani ese e durudamu?

⁵ Ena be ḡau ta na asi davana, to una ḡau iabina totona oi na kara haida bo karamu. Hereva Lada-isidia 23:23 ai Heberu herevana e hahanaia “hoia” anina ma ta na “abia.” Unu hereva ruaosi ese e hahedinaraimu, ta na kara ta baine karaia mai anina bada ḡauna ta baine abia totona. Hereva momokani baita hoia dalana na ini aita haheitalaia toma. Makedi ta ai biku na asi davadia. To, unu biku be sibodia teibolo ai be heatomu? Lasi. Ita na makedi baita laomu unu biku iabidia. Oibe, ena be biku na asi davadia to baita hekwarahi makedi baitala. Una heḡereḡerena, ena be hereva momokani na asi davana, to baita hekwarahi baita abia totona.

⁶ Isaia 55:1-3 ba duahi. Iehova na Isaia amo hereva momokani baita hoia anina ma ta e herevalaia. Ini siri ese Iehova ena hereva na ranu, rata bona vine ranuna ida e haheḡereḡeredia. Ranu mase tauna na ranu parakana e inuamu bona e moalemu heḡereḡerena, hereva momokani e dibamu tauna na e moalemu. Danu, rata ese natu e duruamu baine tubu namonamo, una heḡereḡerena Iehova ena hereva ese e durudamu lauma dalanai baita tubu namonamo totona. Ma danu, Iehova ena hereva na vine ranuna na heto. Edena dala ai? Baibul na e gwaumu vine ranuna ese taunimanima lalodia e hamoalediamu. (Sal. 104:15) Una dainai, Iehova ese e hadibada ‘vine ranuna baita hoia’ anina na, ena taravatu baita badina neganai baita moale. (Sal. 19:8) Una haheitalai amo ta dibamu, Baibul ena hereva momokani idibana bona ibadinana na mai ena namo. Baita gwau dibamu, ita na ta hekwarahimu hereva momokani baita abia. To hereva momokani baita abia totona baita kara ḡaudia 5 aita herevalai.

7, 8. (a) Dahaka dainai nega baita ato hereva momokani baita dibaia? (b) Kekeni ta be dahaka e kara hereva momokani baine dibaia totona?

⁷ Nega. Hereva momokani e dibamu taudia ediai nega na mai anina bada. Nega baita ato Basileia sivaraina baita kamonai, Baibul bona pablikeisen baita duahi, siboda eda stadi baita kara, kongrigeisen heboudia totodia baita heḡaeḡae bona baitala. Namona na nega baita “ḡaukaralaia namonamo,” bona asi anidia ḡaudia ai nega na basita haore kava. (Efeso 5:15, 16 ba duahi.) Baibul ena hereva badadia baita diba ena daudau be ede bamona? Taunimanima edia laloparara na idauidau, haida edia laloparara be haraḡa a haida be metairametaira e lalopararamu. Iehova ena aonega, kara, bona ena ḡaukara idibadia na asi hetoana. (Roma 11:33) Gima Kohorona ginigunana ta ese hereva momokani na “flaoafloa mai hairaina” ta ida e haḡereḡerea, bona ini e gwau toma: “Flaoa tamona mo bavabia na dia heḡereḡere. Oi na flaoa momo ba tahu bona ba gogo.” Reana siboda baita henanadai, ‘Iehova ena kara be mai dibagu namonamo, eiava?’ Nega vaira ai danu, Iehova ena amo ḡau momo na dounu baita dibamu. To hari, ḡau badana na eda nega baita ḡaukaralaia namonamo hereva momokani baita dibaia namonamo. Kekeni ta ena sivarai mani aita herevalaia.

⁸ Japan kekenina Mariko, na New York, U.S.A. ela baine sikuli. * Ia na dubu ta e laova, una dubu na Japan ai laḡani 1950 lalodiai e hematama. Nega ta, painia taihuna ta ese ruma-ta-ruma-ta haroro ḡaukara ai e davaria. Hereva momokani e dibaia neganai e moale dikadika, una dainai painia taihuna e noia wiki ta ta lalodiai nega rua bae stadi. Ena be ena sikuli ḡaukaradia na momo bona pat-taim moni ḡaukara e karava, to ia na maoromaoro kongrigeisen heboudia ela. Danu moale karadia haida e dadarai unu amo nega e ḡaukaralaia namonamo hereva momokani baine dibaia totona. Una ese e durua lauma dalanai baine goada. Laḡani ta lalonai e bapatiso, bena hua siks muridiai, painia ḡaukara e hamatamaia. Laḡani 2006 amo ema bona hari ia na doini e painiamu.

9, 10. (a) Hereva momokani dainai moni bona kohu be ede baita lalodia toma? (b) Kekeni ta be dahaka e dadarai bona iena hemami be ede bamona?

⁹ Moni bona kohu. Hereva momokani baita hoia totona, reana eda moni ḡaukara namona ta baita rakataniamu. Haoda tataudia, Andrea bona Petro na Iesu ese e boiridia ‘taunimanima ihaoda-henidia taudia ai baine halaodia’ neganai, idia ese “edia reke e rakatani.” (Mat. 4:18-20) Hari ina negai hereva momokani e dibamu taudia momo na dia maoromaoro edia moni ḡaukara bae rakatani. Badina Baibul na e gwaumu edia ruma bese bae naridia na namo. (1 Tim. 5:8) To, hereva momokani e dibamu taudia na e lalopararamu moni bona kohu ai lalohadai maorona bae abia bona ḡau mai anidia bae ato guna. Iesu ese una e herevalaia, eto: “Emui kohu na ina tanobada ai basio habou . . . A emui kohu na guba ai ba habou.” (Mat. 6:19, 20) Mani kekeni ta ena sivarai aita herevalaia.

¹⁰ Maria na maraḡina vaitani golf gadarana e manadalaia. Haiskul ai una gadara e dibaia namonamo dainai, skolasip e  abi iunivesiti bainela. Ena mauri lalonai, ia na e urava golf gadarana amo baine taḡa. To Baibul e stadilaia matama neganai e diba hereva momokanidia na e moalelai. Una ese e durua ena mauri ai ḡau haida baine haidau. Ini e gwau toma: “Egu lalohadai bona mauri dalana na Baibul ena hereva heḡereḡerena na haidaua neganai, na moale.” E laloparara biagu rarua isiaidia baine lao heni na auka. (Mat. 6:24) Una dainai, golf gadarana e rakatania bona taḡa bona lada bada urana e dadaraia. Hereva momokani e diba dainai, hari e painiamu bona e gwaumu, “ena mauri na mai anina bona e moalelaiamu.”

11. Hereva momokani ta dibaiamu neganai, haida ese ede be kara henida tomamu?

¹¹ Hebamo. Eda mauri lalonai Baibul ena hereva momokani ta badinaiamu neganai, eda hebamo karana turada bona varavarada ida danu e idaumu. Dahaka dainai? Iesu na ena hahediba daidiai e ḡuriḡuri neganai, eto: “Hereva momokani ai ba hahelaḡadia: emu hereva na hereva momokani.” (Ioa. 17:17) “Ba hahelaḡadia” anina ma ta na “ba idau.” Hereva momokani ta abia daemu neganai, eda lalohadai bona kara na e idaumu ina tanobada taudia edia amo. Ta abi daemu ḡaudia na idau dainai nega haida e laloda kereremu. Baibul ena taravatu ta badinamu. Ena be asita uramu baita heiriheiri to turada haida bona varavarada ese basie bamodamu bona eda abidadama dainai be inai henidamu. Asita daradaramu, badina Iesu na eto: “Ruma taudia ese ruma biaguna bae inai henia.” (Mat. 10:36) To ma eto, baita davari hahenamodia ese baita haboio ḡaudia na be hereadiamu.​—⁠Mareko 10:28-30 ba duahi.

12. Aaron na hereva momokani e diba neganai, dahaka e vara?

¹² Jew edia bisnes tauna ta ladana, Aaron, na maraḡinai e hadibaia Dirava ladana baine gwauraia na taravatu. To, ia na e ura dikadikava hereva momokani baine diba. Dina ta, Witnes tauna ta ese e hadibaia bema Heberu letadia hani (YHWH) na vowel ida baine haboudia neganai, Dirava ladana “Iehova” igwauraina dalana be dibamu. Una e diba neganai mai moalena ida ena dubu ela hahediba taudia ediai una baine herevalaia. Aaron ese Dirava ladana e dibaia dainai, idia na bema moale, to lasi, idia ese Aaron e kanudia bona dubu amo e lulua. Iena ruma bese ese danu se ura henia. To se gari, hereva momokani e dibaia bona Iehova ena Witnes ta ai ela. Aaron heḡereḡerena, hereva momokani baita dibamu neganai, eda mauri ai eiava ruma bese lalonai ḡau haida na be idaumu.

13, 14. Hereva momokani baita badinaia totona eda mauri ai dahaka baita haidau na namo? Haheitalai ta ba gwauraia.

¹³ Dirava ese se moalelaimu lalohadaidia bona karadia. Hereva momokani baita abia dae bona Baibul ena taravatu baita badinadia totona, namona na mai eda ura ida eda lalohadai bona kara baita haidau. Petro ena sisiba mani aita laloa. Eto: “Kamonai memeromui ai baola. O diburava negadia ai o ḡahusiva ḡaudia na basio haḡoidia; a . . . ba helaḡa, emui kara idoidiai lalodiai.” (1 Pet. 1:14, 15) Korinto hanuana ai lebulebu karana na bada. Una dainai, ta na hereva momokani baine badinaia totona ena mauri ai ḡau momo baine haidau na namo. (1 Kor. 6:9-11) Hari ina negai danu, momo na edia kara dikadia e rakatanimu unu amo hereva momokani bae badinaia. Petro ese Kristen taudia ma  e haḡanidia, eto: “Gunaguna umui na bese idauidau taudia heḡereḡeredia ai o nohova, mata-dika bona heḡahusi karadia o karava, vine ranuna o inu momova, o lebulebuva, o kekerova, kaivakuku dikadia o toma heni dihova.”​—⁠1 Pet. 4:3.

¹⁴ Laḡani momo lalodiai, Devynn bona Jasmine na kekero karana e manadalaia. Devynn na bookkeeper namona ta, to e kekero momova dainai se ḡaukara taritariva. Momo na mai dibadia Jasmine na daḡedaḡe hahinena. Nega ta, ia na mai kekerona ida dala ai e rakava lalonai Witnes taudia rarua ida e hedavari. Unu Witnes na dala e kara Jasmine ida Baibul bae stadilaia, to una wiki murinai Devynn bona Jasmine edia ruma ela neganai, kekerodia ai e davaridia. Devynn bona Jasmine na e tomava unu Witnes taudia ese idia na basie vadivadidiamu. To gabeai ma e lou lao neganai Baibul stadi e abia dae. Jasmine bona Devynn na edia stadi ginigunana e moalelaia bona e diba ḡaudia na edia mauri ai e badina. Hua toi lalodiai, kekero karana e hadokoa bona edia headava e hamaoromaoroa. Edia mauri e haidau sivaraina na hanua taudia momo ese e kamonaia, una dainai idia danu e ura Baibul bae stadilaia.

15. Dahaka dainai Baibul ena taravatu e utuamu kastom karadia baita dadarai na mai hekwarahina?

¹⁵ Baibul ena taravatu e utumu kastom karadia. Hereva momokani dainai, Baibul ena taravatu e utumu kastom karadia idadaraidia na mai hekwarahina. Haida ese unu bae dadarai na dia auka, to ma haida na e hekwarahimu badina edia ruma bese, e ḡaukara heboumu taudia, bona turadia e lalodiamu. Heḡereḡere, haida na varavaradia e masemu neganai, vaevae e karamu kastom karadia ai na asie vareaimu dainai edia bese ese e badu henidiamu. (Deu. 14:1) Lalogoada karana e hahedinaraia taudia edia haheitalai ese baine duruda diba ḡau haida baita haidau. Mani Kristen ginigunadia edia negai, Efeso taudia haida ese e hahedinaraia lalogoada karana aita laloa.

16. Efeso ai haida na hereva momokani bae badinaia totona dahaka e kara?

¹⁶ Efeso ai momo na babalau karadia e karava. Kristen taudia matamatadia be dahaka e kara babalau karadia bae rakatani bona hereva momokani bae badinaia totona? Baibul na eto: “Babalau taudia dia gagadoi edia buka e habou, taunimanima iboudiai vairadiai e gabu. Buka davadia e hagau, davadia silver monidia gerebu ima. Taunabunai, Lohiabada ena hereva vada e vara rohorohova bona e kwalimuva.” (Kara 19:19, 20) Unu abidadama Kristen taudia na edia mauri e haidau dainai hahenamo momo e abi.

17. (a) Hereva momokani dainai ta dadarai ḡaudia haida be dahaka? (b) Stadi gabena ai ededia henanadai baita herevalaimu

¹⁷ Hereva momokani ba badinaia totona dahaka o kara? Ita na nega ta ato hereva momokani baita dibaia. Haida na taḡa maurina e dadaraia, bona ma haida be varavaradia ese e dadaraidia. Haida be edia lalohadai bona kara e haidau unu amo Baibul ena taravatu e utumu karadia e dadarai. Hereva momokani dainai eda mauri ta haidaua na dava bada ḡauna. Badina una ese dala e kehoa Iehova baita hetura henia totona. Hereva momokani dainai ta abimu hahenamodia ta itamu neganai ta moalemu, to haida ese una na se laloa badamu. Dahaka dainai haida ese hereva momokani se laloa badamu? Dahaka baita kara hereva momokani basita rakatania? Stadi gabena ese unu henanadai be haerelaimu.