TA ESE e durudamu eiava e hagoadadamu neganai una na hebogahisi karana! ta dibamu ta ese e lalodamu neganai, ta moalemu. Ita ta ta na ta uramu ta ese baine bogada hisi. Una kara namona be ede baita hahedinaraia toma?

Hebogahisi anina na mai momokanida ida ma haida edia namo baita lalo​—una na eda hereva bona kara amo baita hahedinaraia. Hebogahisi na dia hemataurai bona kara namo toadia mo baita hahedinarai. Una kara na ma ta enai ta hahedinaraiamu badina ta lalokau heniamu bona ena hemami ta laloa badamu. Danu, hebogahisi karana na Dirava ena lauma huahuana ta bona Kristen taudia ese bae hahedinaraia na namo. (Gal. 5:22, 23) Hebogahisi karana baita hahedinaraia totona, namona na Iehova bona Natuna ese una kara e hahedinaraia dalana bona baita tohotohodia daladia aita herevalai.

Iehova ese taunimanima iboudiai, “asie hanamoamu taudia bona kara havara taudia,” e bogadiahisimu. (Luka 6:35) Heḡereḡere, Iehova ese “dina na kara dika taudia bona kara namo taudia latadiai e hatataia dae rohamu, medu danu kara maoromaoro taudia bona kara kerere-kerere taudia latadiai e hadihoamu.” (Mat. 5:45) Una dainai, herevana haida na asie abia daemu Iehova na Ḡau Iboudiai Ihavaradia Tauna, to idia danu edia mauri lalonai Iena hebogahisi karana amo namo e davarimu bona e moalemu.

Iehova ese Adam bona Heva daidiai e karaia karana amo ena hebogahisi hereadaena e hahedinaraia. Adam bona Heva na e kara dika murinai, “suke raudia e turi hebou, edia riorio ḡaudia e kara.” To, Iehova na mai dibana Eden umana murimurina ai “au giniginidia bona ava ḡiniḡinidia” e tubuva gabuna ai bae noho dainai dabua bae hahedokilai na namo. Una dainai, Iehova ese e bogadiahisi bona “boromakau kopidia amo hahedoki dabudia e kara” idia edia.​—Gen. 3:7, 17, 18, 21.

Ena be Iehova ese “kara dika taudia bona kara namo taudia” e bogadiahisimu, to iena ura badana na ena abidadama hesiai taudia ediai hebogahisi karana baine hahedinaraia. Heḡereḡere, peroveta tauna Sekaria ena negai, aneru ta na se moale badina taunimanima ese Ierusalem ai dubu ihagini louna ḡaukarana e hadokoa. Iehova ese una aneru ena hereva e kamonai bona “hahenamo bona hahealo herevadia” amo e hagoadaia. (Sek. 1:12, 13) Iehova ese peroveta tauna Elia danu unu e kara henia toma. Nega ta, peroveta tauna na e lalometau dainai Iehova e noia bema mase hari namo. Iehova ese Elia ena hemami na e laloa bona aneru ta e siaia baine hagoadaia. Danu, Dirava ese peroveta tauna e hadibaia ia na dia sibona. Elia na hahegoada herevadia bona heduru e abi murinai, ena hesiai ḡaukara e karaia lou. (1 Han. 19:1-18) Dirava ena hesiai taudia bogaraḡidiai, daika ese Iehova ena hebogahisi karana e hahedinaraia?

Iesu na tanobada ai ena hesiai ḡaukara e karaiava lalonai, ma haida e bogadiahisiva bona e lalodia badava. Ia na se kara aukava bona se hekokorokuva. Ma haida edia hemami e lalo dainai, eto: “Tau boera taumui bona maduna metau taumui iboumui ai, lau dekegu aoma, lau ese laḡa-ani baina henimui. . . . Badina be egu maduna na haraḡa.” (Mat. 11:28-30) Iesu ena hebogahisi karana dainai, taunimanima ese e ḡavaia. Iesu ese e “bogadia hisi” dainai, edia gorere e hanamo, bona Tamana sivaraina e ‘hadibalaidia.’​—⁠Mar. 6:34; Mat. 14:14; 15:32-38.

Iesu na ma haida e kara namo henidiava neganai edia hemami na e lalopararalaiva, unu amo ena hebogahisi e hahedinaraia. Momokani, ena be nega haida e urava baine laḡa-ani, to heduru e urava taudia na e ‘abidia daeva.’ (Luka 9:10, 11) Heḡereḡere, hahine ta na ena rara moru gorerena dainai, haida baine daudia toho neganai baine hamirodia diba, to Iesu ena dabua rimuna e dogoatao neganai Iesu ese na se gwau henia. (Lev. 15:25-28) Una hahine na laḡani 12 e gorerea, to Iesu na mai hebogahisina ida eto: “Natugu e, emu abidadama ese e hamaurimu; mai mainomu ida aola, emu gorere vada eme doko vaitani.” (Mar. 5:25-34) Una na hebogahisi karana hereadaena!

Tame herevalai haheitalaidia ese e hahedinaraimu hebogahisi korikorina na eda kara amo baita hahedinaraia. Iesu na Samaria tauna ena parabole amo una kara baita hahedinaraia dalana e herevalaia. Ena be Samaria bona Iuda taudia na e heinai heheniva, to una parabole ai Samaria tauna ta na Iuda tauna ta e bogaiahisi badina haida ese ena kohu e henao, e dadabaia bona dala ai e rakatania. Samaria tauna ese e bogaiahisi dainai e durua. Una tau berona e kumi bona henitao rumana (inn) ta e laohaia. Bena Samaria tauna ese ruma biaguna moni e henia bero e davari tauna baine naria, bona ḡau ma haida davadia danu eto baine heni.​—Luka 10:29-37.

Hebogahisi na dia kara ai mo, to hahegoada herevadia amo baita hahedinaraia danu. Baibul na e gwaumu: “Lalo-hekwarahi ese tau ta e hametauamu, a hereva namona ese e hamoaleamu.” (Her. 12:25) Ma haida ediai hebogahisi bona kara namodia baita hahedinaraimu neganai, unu ese be hagoadadiamu bona be hamoalediamu. * Eda hahegoada herevadia amo be dibamu idia na ta lalodia badamu. Bona be durudiamu, edia mauri ai bae davari hekwakwanaidia na bae haheaukalai.​—Her. 16:24.

Dirava ese taunimanima e karadia na ia “heida-idana,” una dainai hebogahisi karana bae hahedinaraia diba. (Gen. 1:27) Heḡereḡere, Roma tuari tauna ta Iulio ese Paulo e laohaia Roma hanuana ta ladana Sidono. Unuseni ai ia ese Paulo “e kara namo henia, e kahua nege, turana dekedia bainela bona dekediai baine laḡa ani.” (Kara 27:3) Gabeai, Paulo bona ma haida e gui kadana e dika neganai, Melita taudia ese “heabi-dae karana” e hahedinaraia. Idia ese lahi e kara Paulo bona ma haida daidiai. (Kara 28:1, 2) Momokani, idia na kara namodia e hahedinarai. To hebogahisi na dia nega dikadia ai mo baita hahedinaraia.

Dirava baita hamoalea totona, namona na eda mauri lalonai hebogahisi karana baita hahedinaraia. Una dainai, Iehova ese e hadibadamu hebogahisi na dabua bamona ‘baita hahedokilaia.’ (Kol. 3:12) Momokani, nega  haida ta hekwarahimu una kara baita hahedinaraia. Dahaka dainai? Reana ta hemaraimu, ta daradaramu, daḡedaḡe ta davarimu, eiava siboda eda namo mo ta lalomu. To, unu na baita hanaidia diba, bema Dirava ena lauma helaḡa ena heduru ai baita tabekau bona Iehova baita tohotohoa.​—1 Kor. 2:12.

Ededia dala haida ai hebogahisi baita hahedinaraia diba? Siboda baita henanadai: ‘Ta ena hemami e gwauraiamu neganai lau be na hakalamu, eiava? Ma haida na durudiamu eiava? Idau tauna ta enai hebogahisi karana vada na hahedinaraia, eiava?’ Bena baita kara ḡaudia haida baita lalo, heḡereḡere eda hanua taudia eiava Kristen kongrigeisen taudia baita dibadia namonamo. Unu amo edia noho dalana bona e dabumu ḡaudia baita dibamu. Danu ta uramu ma haida ese bae kara namo henidia heḡereḡerena, ita ese unu baita kara henidia toma. (Mat. 7:12) Bema Iehova ena heduru baita noiamu, Ia ese be durudamu ma haida baita bogadiahisimu.​—Luka 11:13.

Aposetolo Paulo na “hebogahisi” karana e herevalaia amo e hahedinaraia ia na Dirava ena hesiai tauna ta. (2 Kor. 6:3-6) Taunimanima ese Paulo na e ura heniava badina mai ena hebogahisi ida taunimanima e hereva henidiava bona e kara henidiava. (Kara 28:30, 31) Una heḡereḡerena, eda hebogahisi karadia amo ma haida baita durudia diba hereva momokani bae abia dae. Bema taunimanima iboudiai​—⁠e daḡedaḡe henidamu taudia danu​—⁠baita bogadiahisimu, idia na be moalemu bona basie badumu. (Roma 12:20) Gabeai, idia danu Baibul ena hereva be abia daemu.

Tanobada Paradaisona ai, bae toreisi lou taudia na reana edia nega ginigunana hebogahisi korikorina be mamiamu. Bena idia danu mai moaledia ida ma haida be bogadiahisimu. Una negai bema ta na hebogahisi karana basine hahedinaraia bona haida basine durudia, Paradaiso ai basine noho hanaihanaimu. To, Dirava ese e lalonamo henidiamu taudia na mauri hanaihanai bae abia, bae helalokau heheni bona kara namodia bae hahedinarai. (Sal. 37:9-11) Taunimanima na bae moale bona maino ai bae noho! To, una nega namona do se vara ai, edena dala ai hebogahisi baita hahedinaraia na mai ena namo?

Baibul na e gwaumu: “Hebogahisi tauna na sibona ena namo e havaraiamu.” (Her. 11:17) Taunimanima ese hebogahisi tauna na e ura heniamu bona e matauraiamu. Iesu na eto: “O heni laomu hahetohona heḡereḡerena ma bae henimui.” (Luka 6:38) Una dainai, hebogahisi tauna ese turana namodia baine davaridia na haraḡa bona edia hetura na baine mia daudau diba.

Aposetolo Paulo ese Efeso kongrigeisen taudia e haḡanidia ‘bae hekaha heheni, bae hebogahisi heheni; edia dika bae hegwau tao heheni.’ (Efe. 4:32) Kongrigeisen lalonai moale baine vara diba, bema Kristen taudia na bae hebogahisi heheni bona bae heduru heheni. Idia na hereva dikadia asie gwauraimu, ma haida ihahisidia herevadia asie gwauraimu, asie maumaumu eiava hekirikirilai herevadia asie gwauraimu. To, e hekwarahimu edia hereva amo ma haida bae hagoadadia. (Her. 12:18) Una dainai, kongrigeisen na baine goada diba bona mai moaledia ida Iehova bae hesiai henia.

Oibe, hebogahisi karana na eda hereva bona kara amo baita hahedinaraia. Unu baita kara tomamu neganai, ita na eda Dirava, Iehova, ena kara ta tohotohoamu. (Efe. 5:1) Unu amo eda kongrigeisen ta hagoadaiamu bona haida ta durudiamu tomadiho ḡoevana bae abia dae. Namona na taunimanima bae diba ita na hebogahisi tauda!