1-2. (a) Efeso 6:16 heḡereḡerena, dahaka dainai “abidadama kesina” baita dogoatao na namo? (b) Ededia henanadai baita herevalaimu?

OI BE mai emu “abidadama kesina,” a? (Efeso 6:16 ba duahia.) Oi na bo gwau dibamu oibe. Tuari tauna ta na kesi badana amo e hegimamu heḡereḡerena, oiemu abidadama ese oi na matabodaḡa karadia, daḡedaḡe karadia bona Dirava ena taravatu e utumu tanobadana amo baine gimamu diba.

² Ita na “dina gabediai” ta nohomu bona eda aidadama na be tohoa louloumu. (2 Tim. 3:1) Emu abidadama kesina be ede ba sekea toma bena ba diba bema ia na goada? Bona oi be dahaka ba kara emu abidadama ba hagoadaia totona? Unu henanadai haeredia mani aita herevalai.

3. Tuari taudia bae tuari totona edia kesi be ede e tomava, bona dahaka dainai?

³ Baibul negadiai, tuari taudia ese edia kesi na leather amo e koudia ahuva. Unu kesi na oela amo e dahuva unu amo leather baine mia daudau bona auridia na basie rasta. Bema tuari tauna ta na e itaiava iena kesi na e dika, baine hanamoa na namo, unu amo ia na heḡaeḡae tuari ma ta ai baine tuari. Edena dalai una haheitalai na emu abidadama ida ba haheḡereḡerea?

4. Dahaka dainai emu abidadama kesina na ba sekea, bona edena dalai unu ba kara toma?

⁴ Unu tuari taudia heḡereḡeredia, namona na hanaihanai emu abidadama kesina na ba sekea bona ba hanamoa unu amo tuari totona oi na heḡaeḡae. Ita na Kristen tauda dainai, ita na lauma tuarina ta lalonai, bona inaida na lauma dikadia. (Efe. 6:10-12) Ta ese emu abidadama kesina basine reḡuamu, una na oiemu maduna. Edena dalai bo dibamu  hahetoho negadiai emu abidadama na goada? Ginigunana na, ḡuriḡuri amo Dirava ena heduru ba noia. Bena, Baibul ba ḡaukaralaia unu amo baine durumu Dirava ena lalohadai bona iena ura heḡereḡerenai ia bavabidadama henia. (Heb. 4:12) Baibul na e gwaumu: “Iehova bavabidadama henia mai lalomu idoinai; sibomu emu lalo-parara basio abidadama henia.” (Her. 3:5, 6) Una dainai, mani emu mauri ai e vara ḡauna ta dainai o karaia abi hidina a laloa? Heḡereḡere, moni dalanai hekwakwanai badana ta o davaria, a? Oi ese Heberu 13:5 ai Iehova ena gwauhamata “Lau na basina negemu bona basina rakatanimu, lasi ona lasi vaitani” o laloa, a? Una gwauhamata dainai o diba momokani Iehova na oi baine durumu, a? Bema oibe, una ese e hahedinaraiamu, emu abidadama kesina na o reḡua namonamomu.

5. Emu abidadama bo sekea namonamomu murinai dahaka ḡau haida bo dibamu?

⁵ Emu abidadama bo sekea namonamomu murinai reana bo dibamu ḡaudia daidiai bo hoamu. Bena laḡani momo lalodiai oi e hamanokamu ḡaudia da bo itadiamu. Heḡereḡere, reana bo lalopararamu lalohekwarahi momo karana, koikoi herevadia bona lalomanoka ese emu abidadama na e hadikaia. Bema oiemu ai una na e vara, emu abidadama be ede ba gimaia toma unu amo hekwakwanai ese basine hadikaia badabada?

6. Baita lalohekwarahilai ḡaudia haida be dahaka?

⁶ Ta lalohekwarahilaimu ḡaudia haida na nanamo, heḡereḡere, Iehova bona Iesu ihamoaledia totona baita lalohekwarahi. (1 Kor. 7:32) Bema kara dika badana ta ta karaiamu, ita na eda hetura karana Dirava ida baita hanamoa lou totona baita lalohekwarahimu. (Sal. 38:18) Danu, ta uramu adavada baita hamoaledia, bona eda ruma bese taudia bona tadikaka taihu edia namo ta lalomu daidiai ta lalohekwarahimu.​—1 Kor. 7:33; 2 Kor. 11:28.

7. Hereva Lada-isidia 29:25 heḡereḡerena, dahaka dainai taunimanima garidia na basita gari?

⁷ To, lalohekwarahi momo karana ese eda abidadama na baine hadikaia diba. Heḡereḡere, baita animu anianidia bona baita kara dabuadia baita lalohekwarahilaimu. (Mat. 6:31, 32) Una dainai, ita na unu tauani idurulaidia ḡaudia mo baita lalo badamu. Bena moni iura henina lalohadaina baita abiamu. Bema nahuada basita tohomu, eda abidadama Iehova enai na be manokamu bona iseda hetura karana ia ida na be dikamu. (Mar. 4:19; 1 Tim. 6:10) Eiava, baita lalohekwarahilaia momomu ḡauna ma ta na, taunimanima ese ita e lalodamu dalana. Reana taunimanima ese be gwauraida dikamu eiava be daḡedaḡe henidamu dainai baita garimu to Iehova igari henina karana na basita laloa badamu. Una na isedai basine vara totona, Iehova baita noia abidadama bona goada baine henida.​—Hereva Lada-isidia 29:25 ba duahia; Luka 17:5.

8. Bema ta na koikoi herevadia e herevalaimu, ita be dahaka baita kara?

⁸ Satana, “koikoi idoidiai tamadia” ese e gunalaidiamu taudia na e ḡaukaralaidiamu Iehova bona tadikaka taihu latadiai koikoi herevadia e gwauraimu. (Ioa. 8:44) Heḡereḡere, aposteit taudia ese websait bona TV, radio, niuspepa, bona magasin amo Iehova ena orea na e sivarailaia koikoimu. Unu koikoi herevadia na Satana ena “diba lahidia.” (Efe. 6:16) Bema ta na unu koikoi herevadia e herevalaimu, ita be dahaka baita kara? Basita kamonai! Dahaka dainai? Badina Iehova na ta  abidadama heniamu bona ta abia daemu eda tadikaka taihu na unu koikoi herevadia na basie kamonai henidiamu. Una dainai, aposteit taudia na basita hereva henidia. Tau ta eiava ḡau ta bona ta daradaralaimu ḡaudia daidiai idia ida basita hepapahuahu.

9. Lalomanoka dainai edai dahaka baine vara diba?

⁹ Lalomanoka ese eda abidadama baine hamanokaia diba. Nega haida ita na mai eda hekwakwanai dainai ta lalomanokamu. Eda hekwakwanai na basita lalodia momo. Bema unu baita kara tomamu, Iehova ese e gwauhamatalai ḡau namodia na basita laloboiomu. (Apok. 21:3, 4) Lalomanoka dainai baita manokamu bona Iehova ihesiai henina karana na baita hadokoamu. (Her. 24:10) To ita edai unu basine vara toma na namo.

10. Taihu ta ese e torea revarevana amo dahaka ta dibamu?

¹⁰ Mani United States ai e nohomu taihu ta aita laloa, ia na adavana, gorere badana ta e abia tauna e nariamu lalonai ena abidadama ai e gini goadamu. Hedkwota e tore henidia revarevana lalonai, ini e gwau toma: “Nega haida adavagu ena gorere ese lalometau bona lalomanoka e havaramu, to emai helaro na goada. Iehova ese emai abidadama e hagoadamu ḡaudia bona e ihagoadamai ḡaudia e henimu dainai a tenkiumu. Ai na a ura dikadika sisiba bona hahegoada herevadia unu bamodia baia abi na ḡau badana. Unu ese e hagoadamaimu bona e durumaimu Satana ese e ḡaukaralaimu hahetohodia baia haheaukalai totona.” Una taihu ena hereva amo ta dibamu lalomanoka na baita hanaia diba. Edena dalai? Ba helalotao, o davarimu hekwakwanaidia na Satana ena hahetoho ta. Bavabia dae momokani, Iehova na tauhalo e henimu Diravana. Bona ia ese e henidamu lauma aniani ba moalelaidia.

11. Bema ta uramu baita diba eda abidadama na goada, siboda ese ededia henanadai baita heni?

¹¹ Emu abidadama kesina be ede ba hanamoa toma? Hua haida vada ela, ḡau haida daidiai so lalohekwarahi momo, a? Oi  ese aposteit taudia edia koikoi herevadia na so kamonai bona unu daidiai idia ida so hepapahuahu, a? Oi ese lalomanoka o haheaukalaia, a? Bema oibe, oiemu abidadama na goada. To, namona na hanaihanai baita gima, badina be Satana na tuari ḡaudia ma haida be ḡaukaralaimu ita baine hamanokada. Mani una tuari ḡauna ta aita herevalaia.

12. Bema kohu bona moni baita tahu momomu, dahaka be varamu?

¹² Bema kohu bona moni baita tahu momomu, eda abidadama na be manokamu bona asi eda nega Iehova baita hesiai henia. Aposetolo Paulo na e gwa: “Tuari tauna ese ina mauri ḡaudia basine hatuarilai; unu amo tuari oreana lalonai e abia vareai tauna baine hamoalea.” (2 Tim. 2:4) Una ese e hahedinaraiamu, Roma tuari taudia na bisnes karadia lalodiai basie vareai. Bema tuari tauna ta na una hereva basine badinaiamu, ienai be dahaka baine vara diba?

13. Dahaka dainai tuari tauna na bisines karadia lalodiai basine vareai?

¹³ Mani ina a laloa. Daba ai, tuari oreana ta na edia tuari kaiadia e abi bona e treininimu, to idia padadiai ta na lasihia. Ia na makedi ai aniani e hoihoilaimu. Adorahi ai, unu tuari taudia na edia tuari kohudia e sekemu bona edia tuari kaiadia e seḡemu. A aniani e hahoihoilai tauna na dabai baine hoihoilai anianidia e heḡaeḡaelaimu. To dabai inaidia ese e hahoadia. Idia padadiai, edena tuari tauna be vada e heḡaeḡae baine tuari bona biaguna baine hamoalea? Bema oi na una tuari lalonai, oi be o uramu unu e heḡaeḡae tuari taudia badidiai ba gini eiava aniani e hahoihoilai tauna badinai ba gini?

14. Ita na Keriso ena tuari tauda dainai, ita edai mai anina bada ḡauna be dahaka?

¹⁴ Ita na unu tuari taudia namodia heḡereḡeredia. Ita ese baita karaia ḡauna badana na ita Biaguda Iehova bona Keriso baita hamoaledia. Una na mai anina bada badina Satana ena tanobada ese una na basine henida diba. Namona na baita hahedinaraia ita na mai eda nega bona goada  Iehova baita hesiai henia totona, dia una mo to eda abidadama kesina bona Dirava ese e henida lauma tuari dabuana ibounai baita reḡudia namonamo.

15. Paulo ena sisiba herevana be dahaka, bona dahaka dainai?

¹⁵ Namona na hanaihanai baita gima! Dahaka dainai? Aposetolo Paulo ena sisiba herevana na ini e gwa toma: “Taḡa e ura heniamu taudia” edia abidadama na baine manoka. (1 Tim. 6:9, 10) Bema ita na unu baita kara tomamu, eda mauri ai mai anidia bada ḡaudia na baita lalodia maraḡimu. Bena kudouda ai “ura kavakavadia bona ura dikadia” baita ura heni matamamu. Baita helalotao Satana ese unu ura dikadia na be ḡaukaralaimu eda abidadama baine hamanokaia totona.

16. Mareko 10:17-22 ai e herevalaia sivaraina dainai, ededia henanadai baita lalodia na namo?

¹⁶ Reana eda moni na heḡereḡere kohu momo baita hoi. Bema eda mauri ai asita ura heni momokanimu kohudia baita hoimu, o laloamu una be kerere, a? Una na asi ena kerere. To mani ini henanadai a lalodia: Ena be eda moni na heḡereḡere ḡau ta baita hoia, ita be momokani mai eda nega bona goada una ḡau baita ḡaukaralaiamu bona baita reḡuamu, a? Ita be kohu bona moni ta ura heni dikadikamu, a? Iesu ese e hamaoroa ia murinai baine raka bona Dirava ena ḡaukara baine habadaia  to e dadaraia eregabena be ita ese ta tohotohoamu, a? (Mareko 10:17-22 ba duahi.) Bema eda mauri ai kohu momo basita tahumu bona eda nega bona goada baita ḡaukaralaimu Dirava ena ura baita karaiamu, baita moalemu.

17. Dahaka baita laloatao na ḡau badana?

¹⁷ Namona na baita helalotao ita na tuari ta lalonai bona dina iboudiai baita heḡaeḡae. (Apok. 12:17) Tadikaka bona taihu ese iseda abidadama kesina na basie huaiamu. To ita ta ta siboda ese eda abidadama baita hagoadaia.

18. Dahaka dainai Baibul negadiai, tuari taudia ese edia kesi na e dogotao tarika-tarikava?

¹⁸ Baibul negadiai, tuari lalonai e goadava bona e kwalimuva tauna na e matauraiava. To bema asi kesina ida tuari amo e louva, ienai una na hemarai ḡauna. Roma edia histri itorena tauna Tacitus, na ini e gwau toma: “Tuari ai ta ena kesi basine dogoatao auka bona baine hamorua, una na hemarai bada ḡauna.” Una dainai tuari taudia ese edia kesi bae dogotao tarika-tarika na ḡau badana.

19. Edena dalai iseda abidadama kesina na baita dogoatao tarika-tarika?

¹⁹ Ita ese eda abidadama kesina na ta dogoatao tarika-tarikamu dalana na hanaihanai Kristen heboudia ta laomu bona Iehova ladana bona iena Basileia na ma haida ta hadibalaidiamu. (Heb. 10:23-25) Bona, dina iboudiai Dirava ena Hereva ta duahiamu bona Iehova ta ḡuriḡuri heniamu baine duruda eda mauri ai ta duahimu ḡaudia baita badina totona. (2 Tim. 3:16, 17) Unu amo, Satana ena tuari kohuna ta ese ita na basine hadikada. (Isa. 54:17) Iseda “abidadama kesina” ese ita na be gimadamu. Baita gini goadamu, bona eda tadikaka taihu ida baita ḡaukara heboumu mai goadada ida. Dina ta ta ai eda tuari lalonai baita kwalimumu, unu amo eda abidadama na be goadamu. Bona mai anina bada ḡauna na, Iesu ese Satana bona ia e badinaiamu taudia be hadarerediamu neganai, ita na Iesu ena kahai baita ginimu.​—Apok. 17:14; 20:10.