BAIBUL negadiai, kohu ireḡuna tauna na ma ta ena ruma bona kohu e nariva. Heberu bona Grik gadodia ai e hahanaia herevana, “ireḡuna tauna” na nega haida e gwauraiava heitatao tauna eiava ruma inarina tauna.

Aigupto ai Iakobo natuna Iosef na ia biaguna ena ruma ireḡuna tauna ai ela. Unuseniai ia biaguna ese “ena ḡau idoidiai [ia] imanai e ato.” (Gen. 39:2-6) Gabeai, Iosef na Aigupto lohiana ai ela neganai, ia ese ena ruma ireḡuna tauna ta e abia hidi.​—⁠Gen. 44:4.

Iesu ena negai, tano biagudia na dia edia fam gabudia ai e nohova to siti ai e nohova. Una dainai, tano biagudia na edia fam ireḡudia taudia e abidia hidiva dina ta ta ai e ḡaukarava taudia bae itadia tao totona.

Daika be heḡereḡere una heitatao ḡaukarana baine karaia? Aposetolo taudia edia negai, Roma toretore tauna Columella na e gwa, namona na kohu ireḡuna o heitatao tauna ai e halaoava hesiai tauna na “ḡaukara e dibaia namonamo tauna ta. Bona ia na se hesikumu bona ena siahu na daḡedaḡe dalanai na se ḡaukaralaiamu.” Ia na ma e gwaumu: “Mai anina bada ḡauna na kohu ireḡuna tauna na basine laloa ia na ḡau iboudiai mai dibana, to namona baine ura diba ma haida baine abi.”

Dirava ena Hereva ese kohu ireḡuna tauna bona ena ḡaukara e herevalaidia amo Kristen kongrigeisin ai e varamu ḡaudia baita dibadiamu. Heḡereḡere, aposetolo Petero ese Kristen taudia e hagoadadia ‘Dirava ena harihari-bada ireḡuna taudia ai baela.’​—1 Pet. 4:10.

Luka 16:1-8 ai Iesu ese kohu ireḡuna tauna ena haheitalai e ḡaukaralaia. Bona Iesu baine lohia bona ena noho negana e perovetalaia toana e herevalaia neganai, Iesu ese ena hahediba taudia e hamaorodia ia ese “hesiai tauna mai ena kamonai bona mai ena kara maoromaoro” o “kohu ireḡuna tauna mai ena kamonai” baine abia hidi. Kohu ireḡuna tauna ena ḡaukara badana na nega dokonai Keriso e badinaiamu taudia edia lauma aniani baine heni. (Mat. 24:45-47; Luka 12:42) Tanobada heḡeḡemadai kohu ireḡuna tauna mai ena kamonai ese abidadama e hagoadamu pablikeisin e heḡaeḡaelaimu bona e henidamu dainai ita na ta moalemu.