1-2. (a) Dina ta ta ai hekwakwanai baita hanaidia totona dahaka ese be durudamu? Ba herevalaia. (b) Ina atikol ai dahaka baita herevalaimu?

“NA DAVARI hahetohodia na lalo loumu neganai, na dibamu unu na sibogu egu goada amo basinama hanaidia diba.” Nega ta unu o gwau toma, a? Ita momo na unu ta gwa toma. Reana gorere badana ta eiava lalokau tauna ta ena mase o haheaukalaia dalana o lalohadailaia murinai unu o gwa toma. Unu hahetoho o lalo loumu neganai, o hemamimu dina ta ta ai o haheauka badina Iehova ese ena lauma helaḡa amo “siahu herea-daena” o goada e henimu.​—2 Kor. 4:7-9.

² Lauma helaḡa ena heduru ai baita tabekau, unu amo ina tanobada dikana baita dadaraia. (1 Ioa. 5:19) Bona baita hekwarahi “lauma dikadia” baita tuari henidia. (Efe. 6:12) Unu iboudiai lalodiai, lauma helaḡa ese be durudamu daladia rua baita herevalaimu. Bona, lauma helaḡa ena namo baita abia totona dahaka baita kara baita herevalaimu.

3. Iehova ese ede e duruda tomamu hahetoho baita haheaukalai?

³ Iehova ena lauma helaḡa ese ita be durudamu dalana na, goada be henidamu hahetoho negadiai eda maduna baita huadia. Aposetolo Paulo na e hemami hahetoho lalodiai ena ḡaukara na dounu e karaiava badina “Keriso ena siahu” ai e tabekau. (2 Kor. 12:9) Ena misinari laolaona iharuana ai, Paulo na dia e haroro mo to ena dabu ḡaudia baine abi totona moni ḡaukara e kara. Ia na Korinto ai, Akwila bona Priskila ida e nohova. Idia na palai e turiva taudia. Paulo danu una ḡaukara tamona e karaiava dainai, dina haida na idia ida palai e turiva. (Apos. 18:1-4) Paulo na lauma helaḡa ese goada e henia dainai moni ḡaukara bona haroro ḡaukarana e karaia.

4. Korinto Iharuana 12:7b-9 heḡereḡerena, Paulo ese e davaria hahetohona be dahaka?

⁴ Korinto Iharuana 12:7b-9 ba duahi. Una siri ai, Paulo na e gwa “ḡiniḡini ta, amo e gwadagu,” ena hereva anina be dahaka?  Bema ḡiniḡini ta na oi kopimu ai e hegwada kau, oi na hisihisi bada herea bo mamiamu, ani? Una dainai Paulo ena hereva anina na, ia na hekwakwanai ta bona hisihisina na bada herea e mamia. Ia ese una hekwakwanai na e gwauraia “Satana ena hesiai tauna” bona una ese e ‘tutuava’ o e hahisihisiava. Reana Satana eiava ena demoni anerudia ese Paulo e davari hahetohodia na se havara taku; vaitani ḡiniḡini na hidiona ai bema hegwada vareai. To unu lauma dikadia ese Paulo ena hekwakwanai e itaia neganai, reana e ura una hisihisi na bae habadaia. Vaitani ta ese ḡiniḡini na ia hidiona ai e gwadaia vareaiva. Paulo be dahaka e kara?

5. Iehova ese Paulo ena ḡuriḡuri be ede e haerelaia toma?

⁵ Matamanai Paulo na e ura Iehova ese “ḡiniḡini” na bema kokia. Ia na e gwa: “Una ḡau dainai nega hatoi Lohiabada na noia, baine abia oho.” Herevana Paulo ese e ḡuriḡurilaia to una ḡiniḡini o hekwakwanai na dounu mia. Una dainai anina be Iehova ese Paulo ena ḡuriḡuri se haerelaia, a? Iehova ese iena ḡuriḡuri na e haerelaia. Ena be Iehova ese una hekwakwanai na se kokia, to goada hari e henia baine haheauka. Iehova na e gwa: “Badina be manoka-manoka ai lauegu siahu na herea.” (2 Kor. 12:8, 9) Dirava ena heduru amo Paulo na e moale bona lalomaino e abia!​—Flp. 4:4-7.

6. (a) Iehova ese edena dalai eda ḡuriḡuri be haerelaimu? (b) Paragraf ai e ato siridia lalodiai ededia hahegoada herevadia ese oi na e hagoadamumu?

⁶ Paulo heḡereḡerena, nega ta Iehova o noia emu hekwakwanai baine kokia totona, a? Ena be emu hekwakwanai na nega momo o ḡuriḡurilaia, to se ore haraḡa eiava e bada dainai nega haida o laloamu Iehova ese oi na se lalomumu, a? Bema unu bamona, namona na Paulo ena haheitalai ba laloa. Iehova ese iena ḡuriḡuri e haerelaia heḡereḡerena, oiemu ḡuriḡuri danu baine haerelaia. Iehova ese reana emu hekwakwanai na basine kokiamu. To, lauma helaḡa ena heduru amo goada be henimumu ba haheaukalaia totona. (Sal. 61:3, 4) Reana oi na be ‘haketomumu,’ to Iehova ese basine rakatanimumu.​—2 Kor. 4:8, 9; Flp. 4:13.

7-8. (a) Edena dalai lauma helaḡa na lai ida e haheḡereḡerea? (b) Petero ese lauma helaḡa ena ḡaukara dalana be ede e herevalaia toma?

⁷ Iehova ena lauma helaḡa ese ita e durudamu dalana ma ta be dahaka? Lauma helaḡa na lai ida baita haheḡereḡerea. Vanaḡi ta na ena laolao gabuna ai baine kau totona, lai ena toa dalana baine badinaia ena be hurehure na bada. Una heḡereḡerena, lauma helaḡa ese baine duruda diba, hekwakwanai lalodiai Iehova baita hesiai henia ela bona Dirava ese e gwauhamatalaia tanobada matamatana lalonai baita vareai.

⁸ Aposetolo Petero na haoda tauna dainai, vanaḡi e heaumu dalana na mai dibana. Reana una dainai, lauma helaḡa ena ḡaukara e herevalaia neganai, vanaḡi ta e heaumu dalana ida e haheḡereḡerea. Ia na e gwa: “Badina be peroveta herevadia na taunimanima edia ura kava amo asie vara, a Lauma Helaḡa ese Dirava ena helaḡa taudia e haduadia heḡereḡerena e herevava.” Grik gado amo e hahanaia herevana “e haduadia” anina na e laohaidia eiava e hakaudia.​—2 Pet. 1:21.

9. Petero ese ina hereva, “e haduadia,” e gwauraia neganai dahaka ida e haheḡereḡerea?

⁹ Petero ese ina hereva, “e haduadia,” e gwauraia neganai dahaka ida e haheḡereḡerea? Kara bukana e torea tauna Luka ese Grik gado amo e hahanaia herevana heḡereḡerena ta e ḡaukaralaia, unu amo ia na lai ese vanaḡi “e hohoa” karana e herevalaia. (Apos. 27:15) Baibul e stadilaia tauna ta na eto, Petero ena hereva lalonai e gwa Baibul e torea taudia na lauma helaḡa ese “e haduadia,” una neganai ia na taunimanima ese  vanaḡi ta e heaumu dalana e herevalaiamu herevana ta e ḡaukaralaia. Petero na e gwa, vanaḡi na ena heau dalana baine haḡuḡurua totona lai ena toa dalana be badinaiamu, una heḡereḡerena Baibul e torea taudia bona peroveta taudia na lauma helaḡa ese e hakaudia bena edia ḡaukara e haḡuḡurua. Una Baibul e stadilaiamu tauna na ma e gwa, “Baibul e torea taudia na vaitani vanaḡi palaina bema papaia, unu amo idia na vada heḡaeḡae lauma helaḡa ese e hakaudia ḡaukarana bae karaia.” Iehova na idia idurudia totona ena kaha na e karaia. Ia ese lai o anina na lauma helaḡa amo e durudia. Baibul e torea taudia danu edia kaha na e karaia. Idia na lauma helaḡa ena hahekau dalana e badinaia.

10-11. Ededia dala rua ese e hahedinaraiamu ita na lauma helaḡa ena heduru ta abiamu? Haheitalai ta ba gwauraia.

¹⁰ Momokani, hari ina negai Iehova ese lauma helaḡa na se ḡaukaralaiamu taunimanima ese Baibul bukadia bae tore totona. To, e ḡaukaralaiamu ena hesiai taudia e hakaudiamu. Iehova ese ena kaha na doini e karaiamu. Edena dalai baita hahedinaraia ita na lauma helaḡa ese e hakaudamu? Namona na baita hahedinaraia eda kaha na ta karaiamu. Edena dalai?

¹¹ Mani ina haheitalai aita laloa. Bema vanaḡi mai palaina e haheauamu tauna na e uramu lai ese ena palai baine odaia, ia na ḡau rua baine kara. Ḡau ginigunana na, ena vanaḡi na lai e toamu kahanai baine atoa. Badina vanaḡi na basine mareremu bema ia na kone ai bona lai e toamu kahana amo na daudau. Iharuana na, vanaḡi palaina na baine haginia bona baine hapapaia. Unu amo lai ese palai na be odaiamu bona vanaḡi na be heaumu. Una heḡereḡerena, Iehova ena hesiai ḡaukara ai baita haheauka dibamu bema lauma helaḡa ena heduru baita abiamu. Ena namo baita abia totona, ḡau rua baita kara. Dala ginigunana na, Dirava ena lauma helaḡa ena hahekau amo e karamu ḡaukaradia lalodiai baita vareai. Dala iharuana na, mai eda ura bona goada ida unu ḡaukara baita kara, bena ita na vaitani vanaḡi palaina ta  haginiamu bona ta papaiamu. (Sal. 119:32) Bema unu dala baita badinamu, lauma helaḡa ena heduru amo daḡedaḡe bona hahetoho, hurehure badadia na heto baita hanaidiamu. Bona be durudamu eda abidadama baita hagoadaia ela bona Dirava ena gwauhamata tanobada matamatana ai baita kau.

12. Dahaka baita herevalaimu?

¹² Lauma helaḡa ese e durudamu daladia rua tame herevalai. Ginigunana na, goada e henidamu bona iharuana na e durudamu hahetoho negadiai Iehova baita badinaia. Lauma helaḡa ese e hakaudamu bona e durudamu Iehova ese e henida ḡaukarana baita karaia, unu amo mauri hanaihanai baita abia. Hari, ita ese lauma helaḡa ena namo baita abia totona ḡau foa baita herevalaimu.

13. Timoteo Iharuana 3:16, 17 heḡereḡerena, Baibul ese ita be ede be duruda tomamu, bona dahaka baita kara na namo?

¹³ Ginigunana na, Dirava ena Hereva ba stadilaia. (2 Timoteo 3:16, 17 ba duahi.) Ina hereva “Dirava ena heuda-roha dainai e tore” na Grik gado herevana ta amo e hahanaia. Dirava ese ena lauma helaḡa e ḡaukaralaia iena lalohadai na Baibul e torea taudia lalodiai e atoa. Baibul baita duahiamu bona baita laloa dobumu neganai, Dirava ena hereva na laloda bona kudoudai be vareaimu. Una ese ita na be durudamu eda mauri ai eda kara baita haidau, unu amo Iehova baita hamoalea. (Heb. 4:12) To ena namo baita abia totona, namona na nega baita ato hanaihanai Baibul baita stadilaia bona ta duahimu ḡaudia baita lalodia dobu. Unu amo baita herevalaimu herevadia bona baita karamu karadia na Iehova ena ura ida be heḡereḡeremu.

14. (a) Dahaka dainai baita gwau dibamu Kristen heboudia na vaitani lai e toamu gabudia? (b) Kristen heboudia ai lauma helaḡa ena namo baita abia totona, ita be dahaka baita kara?

¹⁴ Iharuana na, Dirava baita toma henia diho hebou. (Sal. 22:22) Laulau dalanai, eda Kristen heboudia na lai e toamu gabudia na heto badina Iehova ena lauma helaḡa na unuseniai. (Apok. 2:29) Dahaka dainai unu ta hereva tomamu? Badina tadikaka taihu ida ta toma diho heboumu neganai, lauma helaḡa totona ta ḡuriḡurimu, Basileia anedia ta abimu, bona lauma helaḡa amo e abidia hidi tadikakadia ese Baibul ena hahediba herevadia e henimu neganai ta kamonaimu. Taihu danu e durudiamu edia kaha bae heḡaeḡaelai bona bae kara. Ita ese lauma helaḡa amo namo baita abi totona hebou do asitala neganai baita heḡaeḡae bona hebou ai haere baita heni. Unu amo ita na vaitani vanaḡi palaina ta papaiamu bona lai ese e odaiamu heḡereḡerena.

15. Edena dalai haroro ḡaukara ai lauma helaḡa ese baine duruda?

¹⁵ Ihatoina na, baita haroro. Haroro bona hahediba ḡaukarana lalonai Baibul baita ḡaukaralaiamu neganai, dala ta kehoamu lauma helaḡa ese baine duruda. (Roma 15:18, 19) Dirava ena lauma helaḡa ena heduru amo namo bavabi totona, namona na hanaihanai haroro ḡaukarana ba karaia bona dala baine hekoho negadiai Baibul ba ḡaukaralaia. Haroro ḡaukara ba moalelaia dalana ta na, Mauri Bona Hesiai Ḡaukara Hebou Pepana ai haroro daladia kahana ba ḡaukaralai.

16. Lauma helaḡa ena heduru baita abia dalana ma ta be dahaka?

¹⁶ Ihahanina na, Iehova baita ḡuriḡuri henia. (Mat. 7:7-11; Luka 11:13) Lauma helaḡa ena heduru baita abia totona ḡuriḡuri amo Iehova baita noia. Ḡau ta eiava tau ta​—dibura ruma habana eiava Satana danu​—ese Iehova ta ḡuriḡuri heniamu karana eiava Dirava ena lauma helaḡa baita abia abia dalana basine koua diba. (Iak. 1:17) Edena dalai baita ḡuriḡuri unu amo lauma helaḡa ese baine duruda? Una henanadai haerena baita  diba totona, Luka ena Evanelia bukana ese ḡuriḡuri e herevalaia parabolena mani aita laloa. *

17. Iesu ena hereva Luka 11:5-9, 13 ai heḡereḡerena, ḡuriḡuri be ede e herevalaia toma?

¹⁷ Luka 11:5-9, 13 ba duahi. Iesu ese e gwauraia parabolena lalonai, lauma helaḡa ena heduru iabina totona baita ḡuriḡuri dalana e hahedinaraia. Una parabole lalonai, tau ta na “ena noinoi loulou dainai” ena ura ḡauna e abia. Ena be una na malokihi to ia na se gari turana baine noia ia baine durua totona. (Stadi herevana Luka 11:18 na mwb18 July ai ba itaia.) Edena dalai Iesu ese una parabole na ḡuriḡuri karana ida e herevalaia? Ia na eto: “Ba noinoi, do baine henimui: ba tahu, do ba davari; ba pidipidi, iduara baine hekeho emui.” Una ese be dahaka e hadibadamu? Lauma helaḡa ena heduru baita abia totona, namona na baita ḡuriḡuri loulou.

18. Iesu ese e gwauraia parabolena heḡereḡerena, dahaka dainai ta diba momokanimu Iehova ese ena lauma helaḡa amo baine duruda?

¹⁸ Bona Iesu ena parabole ese ita na e durudamu unu amo Iehova ese lauma helaḡa amo baine duruda badina baita dibaia. Parabole ai e herevalaia tauna na e ura ruma tauna ese heabidae karana baine hahedinaraia. Una ruma tauna na e ura aniani baine heni to dekena na asi ḡauna. Iesu na e gwa una tau na aniani e noi loulouva dainai ruma tauna na e haere. Iesu ena hereva anina be dahaka? Bema dia ḡoevadae tauna ta na e uramu e noia louloumu tauna ta baine durua, ita na ta dibamu Tamada guba ai e nohomu ese e noia louloumu taudia na lauma helaḡa baine henidia. Una dainai, ta diba momokanimu Iehova enai lauma helaḡa baita noia louloumu neganai, ia ese na be henidamu.​—Sal. 10:17; 66:19.

19. Dahaka dainai ta diba momokanimu ita na baita kwalimu?

¹⁹ Ta diba momokanimu ena be Satana na e hekwarahi badamu ita baine hamoruda, to ita na baita kwalimu. Dahaka dainai? Badina lauma helaḡa ese dala rua ai be durudamu. Ginigunana na, goada e henidamu hahetoho idauidau baita haheaukalai. Iharuana na, goada baine henida Iehova baita hesiai henia ela bona Dirava ese e gwauhamatalaia tanobada matamatana lalonai baita vareai. Namona na laloda baita hadai lauma helaḡa ena heduru amo namo baita abi totona!