1. Iehova ese ita na se koudamu dahaka baita kara?

IEHOVA ese ita na se koudamu eda mauri dalana baita abia hidi totona. Ia ese abi hidi namodia baita kara daladia e hadibadamu, bona ia ese e moalelaimu abi hididia baita karamu neganai, ita na be durudamu unu baita haḡuḡuru totona. (Sal. 119:173) Baibul amo ta dibamu aonega herevadia baita badinamu neganai, abi hidi namodia baita karamu.​—Heb. 5:14.

2. Abi hidi ta ta karaiamu murinai, dahaka baine vara diba?

² Ena be abi hidi maorona ta ta karaiamu, to nega haida ta hekwarahimu ta hamatamaia ḡauna baita haḡuḡurua. Mani ini haheitalai haida aita lalo: Eregabe tadikakana ta na lalona e hadaia Baibul ibounai baine duahia. Wiki haida lalodiai Baibul e duahia to gabeai badi haida daidiai e hadokoa. Taihu ta na lalona e hadaia baine regiula painia, to baine hamatamaia dinana e abiava neganai, dina ta ai ma e atoa hanaiva. Elda oreana na e lalotamona mamoe vadivadina bae karaia, to hua haida e ore murinai una na asie karaia. Ataiai tame herevalai haheitalai toi na i’idau. To iboudiai ese e abi hidi ḡaudia na asie haḡuḡuru. Korinto ai e nohova Kristen ginigunanadia na hekwakwanai unu bamona ta e davaria. Idia edia amo baita dibamu ḡaudia mani aita herevalai.

3. Korinto taudia be edena abi hidi badana ta e karaia, to dahaka e vara?

³ Laḡani 55 C.E. ai, Korinto Kristen taudia na abi hidi badana ta e karaia. Idia na e diba Ierusalem ai e nohova tadikaka bona taihu edia mauri na e auka bona e ogoḡami dainai kongrigeisin haida na moni e habouva idia bae durudia. Idia e bogadia hisiva bona e urava bae harihari henidia dainai lalodia e hadai bae heduru bona aposetolo Paulo e nanadaia ede bae heduru toma. Bena bae heduru daladia na Paulo ese e hamaorolaidia bona Tito e abia hidi e habou monidia baine  gogo. (1 Kor. 16:1; 2 Kor. 8:6) Hua haida muridiai, Paulo na e kamonai Korinto taudia ese edia hereva na asie badinaia. Una dainai, idia na asie heḡaeḡae edia harihari ḡaudia na kongrigeisin ma haida edia harihari ḡaudia ida Ierusalem bae siai lao.​—2 Kor. 9:4, 5.

4. Korinto Iharuana 8:7, 10, 11 ai e herevalaia heḡereḡerena, Paulo ese Korinto taudia e hagoadadia dahaka bae kara?

⁴ Korinto Kristen taudia na abi hidi namona e karaia bona Paulo ese edia abidadama goadana bona edia harihari badana karana dainai e hanamodia. To baine hagoadadia danu e hamatamaia ḡauna na bae haḡuḡurua. (2 Korinto 8:7, 10, 11 ba duahi.) Edia haheitalai ese ita na e hadibadamu abidadama Kristen taudia danu be hekwarahimu abi hidi maorona ta bae haḡuḡurua totona.

5. Ededia henanadai baita haerelaimu?

⁵ Korinto taudia heḡereḡeredia, ita danu reana ta hekwarahimu ta abi hidi ḡaudia baita haḡuḡuru totona. Dahaka dainai? Ita na kara dika tauda dainai, laloda ta hadaimu ḡau ta baita karaia to ma ta gwaumu gabeai baita karaia. Eiava e “vara kavamu” ḡaudia daidiai nega haida edai na be aukamu. (Koh. 9:11; Roma 7:18) Ta karaia abi hidina ta haeroa loumu bona ta uramu baita haidaua neganai, dahaka baita kara na namo? Bona edena dalai baita dibamu ta hamatamaia ḡauna na baita haḡuḡuruamu?

6. Dahaka dainai abi hidi ta na baita haidaua diba?

⁶ Abi hidi badadia haida na basita haidau diba. Heḡereḡere, Iehova baita hesiai henia gwauhamatana, bona headava gwauhamatana na baita badinadia. (Mat. 16:24; 19:6) To, abi hidi ma haida be baita haidau diba. Dahaka dainai? Badina mauri ai e varamu ḡaudia na e idaumu. Dahaka ese baine duruda diba abi hidi namodia baita kara?

7. Dahaka baita ḡuriḡurilaia, bona dahaka dainai?

⁷ Iehova ba ḡuriḡuri henia aonega baine henimu. Iehova ena lauma helaḡa ena heduru amo Iamesi (BHḡ ‘Iakobo’) na e gwa: “Umui ta aonega ai bema dabu, ia ese taunimanima iboudiai e henidia dudu kaumu bona se gwaugwaumu Diravana na baine noia, bena do baine henia.” (Iak. 1:5) Nega haida ita na “aonega” ai ta dabumu. Una dainai, abi hidi ta ta karaiamu bona ta uramu baita haidaua neganai, Iehova enai baita tabekau. Iehova ese oi na be durumumu abi hidi maorodia bo karamu.

8. Abi hidi ta do asita karaia neganai, baita hetahulai namonamo ḡaudia haida be dahaka?

⁸ Ba hetahu namonamo. Baibul amo heduru maorodia ba tahu, Iehova ena orea amo e halasimu pablikeisin ba duahi, bona heduru maorodia baine heni diba tauna ta ba hereva henia. (Her. 20:18) Una na mai anina bada, bema oi na o uramu emu moni ḡaukara ba haidaua, gabu ma ta ai ba noho, eiava emu haroro ḡaukarana iduruna totona sikuli namona ta o uramu bavabia hidi.

9. Dahaka namo baita davarimu bema mai momokanida ida abi hidi baita karamu?

⁹ Emu abi hidi badidia na ba haero namonamo. Iehova ese e laloa badamu ḡauna na, ḡau ta ta karaiamu badina. (Her. 16:2) Ia na e uramu ḡau iboudiai na mai momokanida ida baita kara. Una dainai abi hidi ta karamu neganai, siboda edai bona ma haida ediai iseda abi hidi badidia na mai momokanida ida baita kara. Bema baita koikoimu, una abi hidi ibadinana na be aukamu. Heḡereḡere, eregabe tadikakana na abi hidi ta e karaia baine regiula painia. Gabeai, ena painia horana ihaḡuḡuruna na e auka bona haroro ḡaukara na se moalelaia.  Reana ia na e laloa e painia badina badana na Iehova baine hamoalea. To reana painia ḡaukara e karaia badina badana na tamana bona sinana eiava ma ta ihamoalena totona?

10. Dahaka ese baine duruda eda mauri ai ḡau haida baita haidau?

¹⁰ Mani a laloa, Baibul stiuden ta na e uramu siga ani karana baine hadokoa. Wiki ta o rua lalodiai ia ese siga ani karana na be hadokoa tohomu, to gabeai una kara na ma be karaia loumu. Dokonai lalona be hadaiamu siga ani karana baine dadaraia vaitani! Iehova e lalokau henia bona e ura baine hamolea dainai una ese ia na e durua una kara mirona baine rakatania.​—⁠Kol. 1:10; 3:23.

11. Dahaka dainai ḡau maorodia bavabi hidi?

¹¹ Ḡau maorodia bavabi hidi. Bema ḡau maorodia bo abi hidimu, unu na bo haḡuḡurudiamu. Heḡereḡere, oi na bo uramu Baibul duahiduahi karana ba habadaia. To, bema oi na sediual ta basio karaiamu, reana o palanilaia ḡauna na basio haḡuḡuruamu. * Eiava kongrigeisin ta ai elda na reana be lalomu namona na mamoe bae vadivadidia, to dina haida muridiai e palanilaia ḡauna na basie badinaiamu. To edia palani bae haḡuḡurua totona, reana sibodia bae henanadai: “Ai be ededia tadikaka bona taihu baia vadivadi henidia bona baia hagoadadia? Emai vadivadi negana vada abia hidi, a?”

12. Dahaka baita kara na namo, bona dahaka dainai?

¹² Ba kara diba ḡaudia bavabi hidi. Nega haida eda nega, kohu eiava goada na dia heḡereḡere ta uramu baita kara ḡaudia iboudiai baita haḡuḡuru. Una dainai o abi hidimu ḡaudia na ba lalopararalaidia bona ba lalodia namonamo. Bema o laloamu o karaia abi hidina ta na basio haḡuḡurua diba, ba haidaua. (Koh. 3:6) Bema oi na emu abi hidi na o haeroa lou, bona o haidaua bona o laloamu ba badinaia diba, ini dala faiv mani ba lalo. Oi na be durumumu o hamatamaia ḡauna ba haḡuḡurua.

13. Emu abi hidi ba haḡuḡurua totona, goada be ede bavabi toma?

¹³ Iehova ba ḡuriḡuri henia goada baine henimu. Dirava ese goada baine henimu bona o kara abi hididia ba haḡuḡuru totona. (Flp. 2:13) Una dainai, Iehova ba noia iena lauma helaḡa amo goada baine henimu. Iehova iḡuriḡuri henina karana na basio hadokoa, ena be o laloamu emu ḡuriḡuri na do se haerelaidia. Iesu ena hereva heḡereḡerena: “Ba noinoi, [lauma helaḡa] do baine henimui.”​—⁠Luka 11:9, 13.

14. Edena dalai Hereva Lada-isidia 21:5 ese e gwauraia hahekau herevana ese oi na baine durumu emu abi hidi ba haḡuḡurua?

¹⁴ Palani ta ba karaia. (Hereva Lada-isidia 21:5 ba duahia.) Ḡaukara ta ihamatamana totona, oi na palani ta bo karaiamu. Bena oi na una palani heḡereḡerena bo ḡaukaramu. Una heḡereḡerena, abi hidi ta o karaiamu neganai, ba haḡuḡurua daladia ba palanilai. Bema ḡaukara ta na auka, ḡaukara maraḡidia ta ta do ba kara guna. Unu amo ba haḡuḡurua diba. Paulo ese Korinto taudia e hagoadadia “pura dinana gini-gunana” ai edia harihari ḡaudia bae ato tabe to dia bae nari ela bona ia baine kau bena edia harihari ḡaudia bae habou. (1 Kor. 16:2) Ḡaukara badadia ba haḡuḡuru totona, ḡaukara maraḡidia do ba kara unu amo oi na basio lalohekwarahimu ihaḡuḡurudia totona.

15. Palani ta o karaiamu murinai, dahaka ba kara?

 ¹⁵ Bema emu palani na bo torediamu, ikaradia na be haraḡamu. (1 Kor. 14:40) Heḡereḡere, elda oreana ese elda ta e abia hidimu bae kara abi hididia baine toredia, bona daika ese unu baine kara bona baine karaia negana danu. Elda taudia ese listi unu bamona ta be karaiamu neganai, idia ediai na be haraḡamu bae abi hidi ḡaudia bae haḡuḡuru. (1 Kor. 9:26) Emu mauri ai una dala ba tohoa diba. Heḡereḡere, dina ta ta ai ba kara ḡaudia na ba listidia bona ba karaia guna ḡauna na listi matamanai ba torea. Una ese be durumumu o hamatamaia ḡauna bo haḡuḡuruamu bona nega na bada ḡau ma haida bo karamu.

16. Emu abi hidi ba haḡuḡurua totona dahaka be mai anina bada, bona Roma 12:11 ena sisiba herevana be dahaka?

¹⁶ Ba hekwarahi. O palanilaia ḡauna ibadinana bona ihaḡuḡuruna totona, ba hekwarahi. (Roma 12:11 ba duahia.) Paulo ese Timoteo na e hadibaia hahediba tauna namona ai bainela totona, baine goada bona baine hekwarahi na namo. Iehova dainai ta karamu ḡaudia lalodiai Paulo ena sisiba herevana na baita badinaia.​—⁠1 Tim. 4:13, 16.

17. Edena dalai abi hidi ta karamu neganai, Efeso 5:15, 16 baita badinaia?

¹⁷ Emu nega na ba ḡaukaralaia namonamo. (Efeso 5:15, 16 ba duahi.) O uramu ba karaia ḡauna totona nega bavato bona ba badinaia. Basio nari ela bona nega maorona ta ai o laloamu ba karaia ḡauna ba karaia. (Koh. 11:4) Namona na emu nega bona goada na ḡau mai anidia ai ba ḡaukaralai. (Flp. 1:10) Bema mai dalana, haida ese emu ḡaukara basie hadika negana bavabia hidi. Ba hadibadia una nega na o abia hidi emu ḡaukara ba haḡuḡurua. Heḡereḡere, emu foun ba haofua bona e-mail o intanet na gabeai ba sekedia. *

18-19. Dahaka ese oi baine durumu o uramu ba haḡuḡurua ḡauna ba karaia ena be una na auka?

¹⁸ Emu abi hidi ena namo ba laloa. Emu abi hidi amo bae vara ḡau namodia na vaitani o lao heniamu gabuna ta. Bema oi na o uramu una gabu ai ba kau, ena be dala na hekou to oi na dounu dala idauna ta amo una gabu bo lao heniamu. Una heḡereḡerena, bema oi na emu abi hidi amo bae vara ḡau namodia bo lalodiamu, ena be hekou ḡaudia be varamu oi na basio hesiku haraḡamu.​—⁠Gal. 6:9.

¹⁹ Abi hidi namodia baita kara na auka, bona ihaḡuḡurudia na mai hekwarahina. To, Iehova ena heduru amo aonega bona goada bo abimu o hamatamaia ḡauna ba haḡuḡurua totona.