1. Ede ta diba tomamu Iehova na e uramu ia baita raka henia kahi?

 IEHOVA na ita e hamaorodamu ia baita raka henia kahi. (Iak. 4:8) E uramu ia na eda Dirava, Tamada, bona Turada ai bainela. Ia ese eda ḡuriḡuri e haerelaimu bona metau negadiai e durudamu. Danu ena orea amo e hadibadamu bona e gimadamu. To namona be dahaka baita kara, unu amo Iehova baita raka henia kahi?

2. Edena dalai Iehova baita raka henia kahi diba?

² Iehova baita raka henia kahi dalana na, ia baita ḡuriḡuri henia, iena Hereva baita duahia bona baita laloa dobu. Unu baita kara tomamu neganai, eda lalokau bona tenkiu karana ia enai na be badamu. Bena una ese be hagoadadamu ia baita badinaiamu bona baita imodaiamu. (Apok. 4:11) Iehova idibana karana baita habadaiamu neganai, eda abidadama ia enai bona iduruda totona e heni oreana enai baita habadaiamu.

3. (a) Edena dalai Diabolo na e uramu Iehova ena amo baine bibida oho? (b) Dahaka ese baine duruda eda Dirava bona ena orea basita rakatanidia? (Salamo 31:13, 14)

³ Hekwakwanai ta davarimu negadiai, Diabolo na e uramu Iehova ena amo baine bibida oho. Edena dala ai unu e kara tomamu? Ia ese taina ruana ita eda abidadama Iehova enai bona ena orea ai na e hadikaiamu. To Diabolo ena hahetoho na baita dadarai diba. Bema eda abidadama Iehova enai be goada hereamu, Iehova bona ena orea na basita rakatanidiamu.​—Salamo 31:13, 14 ba duahidia.

4. Ina atikol ai dahaka baita herevalaimu?

⁴ Ina atikol ai, ita na kongrigeisin murimurina amo e maimu hahetohodia toi baita herevalaimu; unu ese eda abidadama Iehova enai bona ena orea ai bae hadikaia diba. Edena dala ai unu hahetoho ese ita na Iehova ena amo baine bibida oho  diba? Bona dahaka baita kara Satana ena hahetoho baita dadaraidia totona?

5. Edena dalai ta davarimu hekwakwanaidia ese eda abidadama Iehova bona ena orea ediai e hadikaiamu?

⁵ Nega haida, ruma bese ese e inai henidamu eiava moni ḡaukara ta haboiomu. Edena dalai hekwakwanai unu bamodia ese eda abidadama Iehova ena orea ai e hadikaiamu bona Iehova ena amo e bibida ohomu? Ta davarimu hekwakwanaidia na nega daudau lalonai ta haheaukalaimu neganai, reana baita laloamu dala ta na lasi bona baita lalo metaumu. Satana na nega unu bamodia e ḡaukaralaimu, e uramu ita ese Iehova ena lalokau ita edai baita daradaralaia. Diabolo na e uramu baita laloa Iehova o Iena orea ese eda hisihisi e havaramu. Aigupto ai Israel taudia haida na lalohadai unu bamona e abia. Matamanai idia na e abia dae Iehova ese Mose bona Aaron e abidia hidi, Aigupto ena iḡui amo idia bae ruhadia. (Eso. 4:29-31) To gabeai, Farao ese edia mauri e ha-aukaia neganai, edia hekwakwanai dainai gwau na Mose bona Aaron e henidia, eto: “Farao bona ena hesiai taudia vairadiai ladamai vada o hadika, e kara ialalaimai darena imadia ai vada o atoa na heto.” (Eso. 5:19-21) Idia ese gwau na Dirava ena hesiai taudia e henidia. Una na dia namo, ani? Bema o davari hekwakwanaidia na nega daudau lalonai o haheaukalaidia, edena dala ai Iehova bona ena orea iabidadama henidia karana ba hagoadaia diba?

6. Hekwakwanai ihaheaukalaidia karana ai peroveta tauna Habakuku amo dahaka ta dibamu? (Habakuku 3:17-19)

⁶ Kudoumu ai e miamu ḡaudia na Iehova enai ba ḡuriḡurilai, bona ia enai ba tabekau. Peroveta tauna Habakuku na hekwakwanai momo e davari. Nega ta, ia na e daradara bema Iehova ese ia e laloava eiava. Una dainai ḡuriḡuri amo ena hemami na Iehova enai e gwaurai hedinarai. Eto: “Iehova e, baina boi henimu, ba durugu totona; bena basio kamonai ela bona edena nega ai? . . . Dahaka dainai hekwakwanai ḡaudia o hahedinarai henigumu?” (Hab. 1:2, 3) Iehova ese ena hesiai tauna goadana ena ḡuriḡuri na e haerelaia. (Hab. 2:2, 3) Habakuku na Iehova ena hahemauri karadia e lalodia dobu neganai, e moale. Bona e abia dae momokani Iehova ese ia na e laloa badava bona baine durua hekwakwanai baine haheaukalai. (Habakuku 3:17-19 ba duahidia.) Una ese ita be dahaka e hadibadamu? Hekwakwanai o davarimu neganai, Iehova ba ḡuriḡuri henia bona emu hemami na ia ba hamaorolaia. Bona Iehova enai ba tabekau baine durumu totona. Unu bo kara tomamu neganai, bo dibamu Iehova ese goada be henimumu ba haheauka totona. Bona bo mamiamu ia na oi e durumumu neganai, emu abidadama na be goadamu.

7. Shirley be varavarana ese dahaka e hamaorolaia, bona dahaka ese e durua Iehova dounu e abidadama henia?

⁷ Lauma ḡaudia ba goadalai. Papua New Guinea ai, taihu ta ladana Shirley na hekwakwanai e davari neganai, lauma ḡaudia e goadalai karana ese e durua dalana a laloa. b Shirley ena ruma bese na ogoḡami, bona nega haida, aniani iabidia totona e hekwarahiva. Varavarana ta na e ura ena abidadama Iehova enai baine hadikaia dainai, eto: “O gwaumu Dirava ena lauma helaḡa ese e durumuimu, to heduruna be edekahai? Ruma bese na dounu e ogoḡamimu. Emui nega o haore kavamu haroro ai.” Shirley na e gwa: “Sibogu na henanadaiva: ‘Dirava ese ai e lalomaimu eiava lasi?’ Una dainai maoromaoro Iehova na ḡuriḡuri henia bona lalogu ai e miava ḡaudia iboudiai  na ia na hamaorolaia. Baibul bona eda pablikeisin iduahidia karana na asina hadokoa, bona hanaihanai na harorova bona hebou na laova.” Shirley na e laloparara Iehova ese ena ruma bese na e nariava. Ena ruma bese na se hitolova, bona e moaleva. Shirley na e gwa: “Na mamia Iehova ese egu ḡuriḡuri na e haerelai.” (1 Tim. 6:6-8) Oi danu lauma ḡaudia bo goadalaimu neganai, hekwakwanai o daradara ese Iehova ena amo basie bibimu oho dibamu.

8. Iehova ena orea lalonai maduna e huamu tadikakadia ediai be dahaka baine vara diba?

⁸ Ita e inai henidamu taudia na media o intanet amo Iehova ena orea ai maduna e huamu tadikakadia e sivarailaidia koikoimu. (Sal. 31:13) Tadikaka haida na pulisi ese e abidia bona e gwauraidia idia na taravatu iutuna taudia. Kristen ginigunadia edia negai hekwakwanai unu bamona ta e vara; aposetolo Paulo na inaina ese e habadelaia koikoi bona e hadiburaia. To Kristen taudia be dahaka e kara?

9. Aposetolo Paulo e hadiburaia neganai, Kristen taudia haida be dahaka e kara?

⁹ Aposetolo Paulo na Roma ai e hadiburaia neganai Kristen ginigunadia haida ese ia iduruna karana na e hadokoa. (2 Tim. 1:8, 15) Dahaka dainai? Idia be e hemarai taunimanima ese Paulo na taravatu iutuna tauna ta bamona e laloa dainai, a? (2 Tim. 2:8, 9) Eiava e gari, badina e laloa idia danu bae daḡedaḡe henidia, a? Herevana edia kara badina be dahaka, to Paulo lalona na e hisihisi bada, ani? Badina ia na hekwakwanai momo e haheaukalai bona idia daidiai kahirakahira ena mauri e haboioa. (Apos. 20:18-21; 2 Kor. 1:8) Paulo asie durua taudia heḡereḡeredia basita kara. Maduna e huamu tadikakadia e daḡedaḡe henidiamu neganai, dahaka baita laloatao be namo?

10. Maduna e huamu tadikakadia e daḡedaḡe henidiamu neganai dahaka baita laloatao be namo, bona dahaka dainai?

¹⁰ Baita helalotao dahaka dainai daḡedaḡe ta davarimu bona daika ese e havaramu. Timoteo Iharuana 3:12 na eto: “Keriso Iesu lalonai Dirava ibadinana bae ura taudia iboudiai na daḡedaḡe do bae hisihisilai.” Una dainai, namona  na basita hoa Satana ese maduna e huamu tadikakadia na e hahisidia badamu. Ia na e uramu edia abidadama baine hadikaia bona ita baine hagarida.​—1 Pet. 5:8.

11. Onesiforo ena haheitalai amo dahaka ta dibamu? (2 Timoteo 1:16-18)

¹¹ Hanaihanai tadikakamu ba durudia bona ba badinadia. (2 Timoteo 1:16-18 ba duahidia.) Paulo e hadiburaia neganai Kristen tauna ta ladana Onesiforo ena kara na idau. Ia na Paulo “ena gadea hemaraina se hemarai.” To, Paulo e tahua bona e davaria neganai, ḡau haida e kara baine durua. Onesiforo na unu e kara toma neganai, kahirakahira ena mauri e haboioa. Dahaka ta dibamu? Taunimanima igari henidia karana ese basine kouda, daḡedaḡe e davarimu tadikakadia baita durudia totona. To, namona na idia daidiai baita hereva o idurudia karadia baita kara. (Her. 17:17) Iseda lalokau bona heduru na mai anidia bada idia ediai.

12. Russia tadikaka bona taihu edia amo dahaka ta dibamu?

¹² Eda tadikaka taihu ese Russia ai e hadiburadia tadikakadia e durudia dalana mani aita laloa. Idia haida e hakotadia neganai, tadikaka taihu momo na kota gabuna ela heduru bae heni totona. Dahaka ta dibamu? Haida ese maduna e huamu tadikakadia ladadia e hadikamu, e hadiburadiamu, eiava e daḡedaḡe henidiamu neganai, basita gari. Idia daidiai baita ḡuriḡuri, edia ruma bese taudia baita naridia, bona dala ma haida ai baita heduru.​—Apos. 12:5; 2 Kor. 1:10, 11.

13. Edena dalai e gwauraida dikamu karana ese Iehova bona ena orea iabidadama henidia karana be hadikaiamu?

¹³ Haroro ḡaukara ta karaiamu bona Iehova ena kara maoromaoro taravatudia ta badinamu dainai, varavarada, bona ta ḡaukara heboumu o ta skuli heboumu taudia ese e gwauraida dikamu. (1 Pet. 4:4) Idia na reana be gwaumu: “Oi na taunimanima namomu, to emu tomadiho na taravatu aukadia e atomu bona tomadiho gunana.” Ma haida be orea murimurinai e atodiamu taudia ta kara henidiamu dalana dainai, reana be gwau henidamu, be tomu: “O gwaumu lalokau taumu, a murimuri ai e atodiamu taudia be ma o kara auka henidiamu?” Hereva unu bamodia ese daradara be havaramu. Reana baita lalomu: ‘Iehova be e uramu ḡau momo baina kara, a? Iena orea ese lau be ḡau momo ai e kougumu, a?’ Bema emu ai na unu e vara tomamu, edena dala ai Iehova bona ena orea ba badinadia?

14. Iehova ena taravatu ta badinamu dainai haida ese e gwauraida dikamu neganai dahaka baita kara? (Salamo 119:50-52)

¹⁴ Lalomu ba hadaia Iehova ena taravatu ba badinadia. Iobu na Iehova ena taravatu e badinadiava, ena be unu e kara toma dainai haida ese e gwauraia dika. Iobu turana koikoina ta na e ura Iobu na baine abia dae, Dirava enai na dia ḡau badana bema Iobu ese iena taravatu baine badinaia eiava lasi. (Iobu 4:17, 18; 22:3) To Iobu ese unu koikoi herevadia na se abi dae. Ia na mai dibana Iehova ena taravatu, maoro bona kerere ai, na mamaoro, bona lalona e hadaia baine badinadia. Haida ese ia na asie koua Dirava baine badinaia totona. (Iobu 27:5, 6) Dahaka ta dibamu? Haida ese e gwauraida dikamu neganai, Iehova ena taravatu basita daradaralai na namo. Emu mauri ai e vara ḡaudia ba lalo lou. Reana nega momo o davaria Iehova ena taravatu maorodia o badinadia karana ese oi na e durumu. Lalomu ba hadaia Dirava ena taravatu e badinamu oreana ba badinaia. Bena ena be haida ese bae gwauraimu dika, to una ese Iehova ena amo  basine bibimu oho diba.​—Salamo 119:50-52 ba duahidia.

15. Dahaka dainai Brizit na e gwauraia dika?

¹⁵ India ai, taihu ta ladana Brizit ena ekspiriens aita laloa. Ia na ena abidadama dainai ena ruma bese taudia ese e gwauraia dikava. Laḡani 1997 ai e bapatiso, bena se daudau adavana dia Witnes tauna na ena moni ḡaukara e haboioa. Una dainai tau na lalona e hadaia, ia, Brizit bona natudia kekenidia na tamana sinana dekediai bae ha noho; idia na taoni ma ta ai e nohova. To Brizit na hekwakwanai badadia ma haida e davari. Adavana na se ḡaukarava dainai, ia ese fultaim moni ḡaukara baine karaia ena ruma bese baine durua. Danu, kongrigeisin ena daudau na 350 kilomita (220 mi) heḡereḡerena. Bona ena abidadama dainai adavana ena ruma bese ese e inai heniava. Una inai karana na e bada herea dainai Brizit ena ruma bese na ma gabu ta ela. Gabeai, adavana na e mase. Una murinai, natuna kekenina ta, laḡanina 12, na cancer ai e mase. Unu e vara ḡaudia daidiai, Brizit varavarana ese gwau na ia e heniava. E gwauva bema ia na Iehova ena Witnes ta ai basinema lao, unu hekwakwanai na basiema vara. To, Brizit na dounu Iehova e abidadama henia bona ena orea e badinaia.

16. Edena dalai Brizit na Iehova bona ena orea e badinadia dainai namo e davari?

¹⁶ Brizit ena noho gabuna na daudau kongrigeisin amo, una dainai seket tauna ta ese e hagoadaia e nohomu gabunai baine haroro bona ena ruma ai hebou baine abia. Matamanai, e mamia una na basine karaia diba. To seket tauna ena hereva e badinaia. Ia ese ma haida ediai sivarai namona e harorolaiava, ena ruma ai hebou e karava, bona hanaihanai nega e atova natuna kekenidia ida ruma bese tomadiho e karaiava. Dahaka namo e vara? Brizit na Baibul stadi momo e karadia, bona idia momo na e bapatiso. Laḡani 2005 ai, ia na regula painia e hamatamaia. Ia ese Iehova e abidadama henia bona ena orea e badinaia dainai hahenamo e abi. Natuna kekenidia na Iehova e hesiai henia goadagoadamu, bona hari edia gabu ai kongrigeisin na rua! Brizit na e diba momokani Iehova ese goada e henia,  ena hekwakwanai bona ena ruma bese ese e gwauraia dikava herevadia e haheaukalaidia.

17. Laloda baita hadai dahaka baita kara?

¹⁷ Satana na e uramu baita abia dae eda hisihisi lalodiai, Iehova ese ita na e rakatanidamu bona Iehova ena orea baita badinaiamu karana ese eda mauri be ha-aukaiamu. Satana na e uramu maduna e huamu tadikakadia ladadia e hadikamu, e daḡedaḡe henidiamu, bona e hadiburadiamu neganai, ita na baita gari. Danu, e uramu taunimanima edia hahedika herevadia amo Iehova ena taravatu bona ena orea iabidadama henidia karana baine hadikaia. To, Satana ena dibaka karadia na mai dibada namonamo bona basine koida. (2 Kor. 2:11) Namona na laloda baita hadai Satana ena koikoi daladia baita dadarai, bona Iehova bona ena orea baita badinadia hanaihanai. Baita helalotao, Iehova ese ita na basine rakatanidamu. (Sal. 28:7) Una dainai, ḡau ta ese Iehova ena amo basine bibida oho na namo!​—Roma 8:35-39.

18. Atikol gabena ai dahaka baita herevalaiamu?

¹⁸ Ina atikol ai, ita na kongrigeisin murimurina amo e maimu hahetohodia tame herevalai. To kongrigeisin lalonai e varamu ḡaudia ese danu eda abidadama Iehova enai bona ena orea ai be tohoamu. Unu be ede baita hanaidia toma? Atikol gabena ai una baita herevalaiamu.