1-2. (a) Ededia henanadai baita herevalaimu? (b) Dahaka ese e hahedinaraiamu Iehova na e ura dikadikamu ita baine duruda?

 IEHOVA ese ita na be durudamu eda mauri ai e varamu hekwakwanaidia baita haheaukalai bona eda hesiai ḡaukara ai baita moale. Ededia dala ai e durudamu? Bona Iehova ena heduru amo namo be ede baita davari toma? Unu henanadai haeredia na ina atikol ai baita herevalaimu. To, unu do asita herevalai lalonai, mani ina henanadai aita laloa: Iehova be momokani e uramu ita baine duruda?

² Aposetolo Paulo ese Heberu Kristen taudia e tore henidia revarevana ai, e ḡaukaralaia herevana ta amo una henanadai haerena baita dibamu. Paulo na eto: “[Iehova] be egu hekaha, lau na basina gari; taunimanima ese ede bae hadikagu toma?” (Heb. 13:6) Baibul e herevalaia bukana ta na e gwa, una siri ai ina hereva “hekaha,” anina na heduru e uramu tauna iduruna totona e heau laomu tauna e herevalaiamu. Iehova na unu baita laloa toma, ia ese hisihisi tauna e durua haraḡamu. Una ese e hahedinaraiamu Iehova na e ura dikadikamu ita baine duruda. Iehova na eda kaha ai dainai, hahetoho baita haheaukalaidia mai moaleda ida.

3. Ededia dala toi ai Iehova ese e durudamu hahetoho baita haheaukalai mai moaleda ida?

³ Ededia dala ai Iehova ese e durudamu hahetoho baita haheaukalai mai moaleda ida? Haere baita diba totona, Isaia bukana baita itaiamu. Dahaka dainai? Badina Dirava ese Isaia e hadibaia peroveta herevadia momo na hari ina negai Dirava ena hesiai taudia ediai na mai anidia bada. Danu, Isaia na Iehova  e herevalaia neganai, baita lalopararalai diba herevadia e ḡaukaralai. Isaia karoa 30 lalonai hereva unu bamodia haida baita itamu. Una karoa ai, Isaia na haheḡereḡere herevadia amo Iehova ese ita e durudamu daladia e hahedinarai, unu na (1) eda ḡuriḡuri e hakala henimu bona e haerelaidiamu, (2) e hakaudamu, bona (3) e hanamodamu hari bona vaira negai danu. Mani unu dala toiosi aita herevalaidia.

4. (a) Iehova ese Isaia ena negai e nohova Iuda taudia be ede e herevalaidia toma, bona idia ediai be dahaka e vara? (b) Iehova ese ia e abidadama henia taudia be dahaka helaro e henidia? (Isaia 30:18, 19)

⁴ Isaia karoa 30 matamana kahanai, Iehova ese Iuda taudia na e gwauraidia “gwau-edeede memerodia,” “kara dika na kara dika latanai e atoa kaumu” taudia. Ma eto: “Idia na gwau-edeede besena, . . . Iehova ena hahediba herevadia ikamonaidia asie uramu memerodia.” (Isa. 30:1, 9) Taunimanima na asie ura bae kamonai dainai, Isaia na e peroveta idia na dika bae davari bona Iehova ese una na basine koua. (Isa. 30:5, 17; Ier. 25:8-11) Bona una na e vara, idia na Babulono taudia ese edia iḡui taudia ai e halaodia. To, unu Iuda taudia bogaraḡidiai haida na abidadama taudia, bona Isaia ese edia helaro na e gwauraia. E hamaorodia nega ta idia na Iehova ese baine durudia Ierusalem bae lou lao. (Isaia 30:18, 19 ba duahidia.) Bona unu e vara toma. Iehova ese Babulono ena iḡui amo e ruhadia. To, una na laḡani momo muridiai e vara. Ina hereva, “Iehova na e henarimu, baine hanamomui e tomamu,” ese e hahedinaraiamu, nega taina baine daudau murinai, unu abidadama taudia baine ruhadia. Oibe, Israel taudia na laḡani 70 Babulono ai e noho murinai, idia haida na Ierusalem e lou lao. (Isa. 10:21; Ier. 29:10) Israel taudia na Babulono ena iḡui ai e nohova neganai, hisihisi dainai e taiva, to edia tano e lou lao neganai, moale dainai e tai.

5. Isaia 30:19 ese ita be ede e hagoadada tomamu?

⁵ Hari ina negai ina hereva ese ita na baine hagoadada diba, e gwaumu: “Momokani, emui taitai reḡena dainai ia ese baine hanamomui.” (Isa. 30:19) Isaia ese e hagoadadamu Iehova baita tai heniamu neganai, ia na be kamonaimu bona eda ḡuriḡuri na be haerelai haraḡamu. Isaia na ma eto: “Baine kamonai negana ai baine haere henimui.” Una ese e hadibadamu, Tamada na e ura dikadikamu ia enai heduru e tahumu taudia baine durudia. Una ta dibamu dainai, baita haheauka diba mai moaleda ida.

6. Isaia 30:19 ai e ḡaukaralaia Heberu herevana ese edena dalai e hahedinaraiamu Iehova na ena hesiai taudia ta ta edia ḡuriḡuri e kamonaimu?

⁶ Isaia 30:19 ese eda ḡuriḡuri karana ai ma dahaka e hadibadamu? Iehova ese ita ta ta eda ḡuriḡuri na e hakala heni namonamomu. Dahaka dainai unu ta gwau tomamu? Isaia karoa 30 matamana kahanai ina hereva “umui” e ḡaukaralaia, unu amo e hahedinaraia Iehova ese ena taunimanima iboudiai e hereva henidia. Ena be siri 19 ai e hahedinaraia Iehova ese taunimanima iboudiai e hereva henidia, to Heberu gado ai e ḡaukaralaia herevana ese e hahedinaraiamu, Ia na taunimanima ta ta e hereva henidia. Iehova na Tama lalokauna dainai, natuna e lalo manokamu neganai basine hamaoroamu, “Oi na kakamu o tadimu heḡereḡerena ba goada.” Lasi, to ia ese ita ta ta e laloda badamu bona eda ḡuriḡuri e kamonaimu.​—Sal. 116:1; Isa. 57:15.

7. Edena dalai Isaia bona Iesu ese e hahedinaraia baita ḡuriḡuri loulou na mai anina bada?

⁷ Ita ese eda lalohekwarahi ḡauna ta na Iehova ta hamaorolaiamu neganai, ia na haraḡa herea goada be henimu baita haheauka totona. To bema eda hekwakwanai na se  ore haraḡamu, Iehova baita noia loulou goada baine henida baita haheaukalaia totona. Ia ese e hamaorodamu unu baita kara toma. Una na Isaia ese e gwaurai herevadia amo e hedinarai, eto, Iehova na “basio halaḡaia ani.” (Isa. 62:7) Una hereva anina be dahaka? Eda ḡuriḡuri ai Iehova ta noia louloumu neganai, una na vaitani ia na asita halaḡaia animu. Isaia ena hereva dainai Iesu ese ḡuriḡuri karana ai e gwaurai haheitalaidia Luka 11:8-10, 13 ai ta lalodiamu. Unu siri lalodiai, Iesu ese ita e hagoadadamu lauma helaḡa iabina totona baita “noinoi loulou.” Danu Iehova baita noia baine duruda, unu amo abi hidi maorodia baita kara.

8. Idaunegai, Isaia 30:20, 21 be ede e ḡuḡuru toma?

⁸ Isaia 30:20, 21 ba duahidia. Babulono tuari taudia ese laḡani ta mai kahana lalonai, Ierusalem e koua heḡeḡe neganai, taunimanima na dina ta ta ai hisihisi bada herea e aniva, vaitani parao bona ranu na heto. To Isaia 30:20 bona 21 heḡereḡerena, Iehova na e gwauhamata bema Iuda taudia bae helalo-kerehai bona edia kara bae haidau, ia ese baine hamauridia. Isaia ese Iehova na e gwauraia idia edia “Hahediba Tauna” Badana. Bona e hamaorodia Iehova ese ia bae tomadiho henia dalana maorona na baine hadibadia. Iuda taudia na iḡui amo e ruhadia neganai unu hereva na e ḡuḡuru. Iehova ese e hamomokania ia na idia edia Hahediba Tauna Badana, bona iena hahekau henunai, ena taunimanima ese tomadiho ḡoevana e haginia lou. Hari ina negai ta moale dikadikamu badina Iehova na eda Hahediba Tauna Badana.

9. Hari ina negai Iehova ese e hakaudamu dalana ta be dahaka?

⁹ Isaia 30:20, 21 ai, Isaia ese ita na stiuden ida e haheḡereḡereda bona Iehova ese dala rua ai e hadibadamu. Ginigunana be, Isaia na e gwa: “Matamui ese emui Hahediba Tauna bae itaia.” Una na heḡereḡere, hahediba tauna na stiuden vairadiai gini. Hari ina negai Iehova ese e hadibadamu na hahenamo ta. Iehova ese ita be ede e hadibada tomamu? Ia ena orea amo e hadibadamu. Iehova ena orea ese e hadibada namonamomu dainai ta moalemu! Kongrigeisin heboudia, hebouhebou badadia, pablikeisin idauidau, broadcast, bona ma ḡau momo amo e hadibadamu, bona e durudamu nega aukadia ai baita haheauka mai moaleda ida.

10. Edena dalai ita na ‘hereva ta murida kahana amo ta kamonaimu?

¹⁰ Isaia na Iehova ese ita e hadibadamu dalana iharuana e gwauraia, eto: “Taiamui na  hereva ta murimui kahana amo bae kamonai.” Peroveta tauna Isaia ese Iehova na stiuden e itadia taomu hahedibana ta ida e haheḡereḡerea, ia na idia muridiai e rakamu bona e hamaorodiamu edena dala bae badinaia. Hari ina negai ita ese Dirava gadona na murida kahana amo ta kamonaimu. Edena dala ai? Dirava ena hereva na idaunegai Baibul lalonai vada e toredia. Una dainai, Baibul ta duahiamu neganai, una na vaitani Dirava gadona na murida kahana amo ta kamonaimu.​—Isa. 51:4.

11. Dahaka baita kara baita haheauka mai moaleda ida totona, bona dahaka dainai?

¹¹ Iehova ese ena orea bona ena Hereva amo e hakaudamu dalana amo namo be ede ta davari tomamu? Isaia ese ḡau rua e gwaurai. Ginigunana be, “dalana binai.” Iharuana be, “ia lalonai ba raka.” (Isa. 30:21) Una ‘dala’ mo baita dibaia na dia heḡereḡere, to “lalonai” danu baita “raka” na namo. Iehova ese ena orea amo ena Hereva na ita e hadibalaida namonamomu dainai, Iehova ena ura ita edai na ta dibamu. Bona baita badinaia dalana danu ta dibaia namonamomu. Iehova ena hesiai ḡaukara lalonai baita haheauka mai moaleda ida totona, unu dala ruaosi baita badina na mai anina bada. Unu baita kara tomamu neganai Iehova ena hahenamo baita abimu.

12. Isaia 30:23-26 heḡereḡerena, Iehova ese ena taunimanima be ede e hanamodia tomamu?

¹² Isaia 30:23-26 ba duahidia. Iuda taudia na Babulono ena iḡui amo e lou Israel neganai, edena dala ai una peroveta herevana na e ḡuḡuru? Idia na tauanina dalanai bona lauma dalanai hahenamo momo e davari. Iehova ese ena taunimanima na aniani momo herea e henidia. Bona mai anina bada ḡauna na, tomadiho momokanina e haginia louva lalonai, ia ese lauma aniani momo e henidia. Dirava ena taunimanima ese una negai e moalelaiva hahenamodia lauma dalanai na dia guna bamona. Siri 26 ai e hahedinaraiamu, Iehova ese lauma diarina na e habadaia herea, anina na e durudia iena hereva e lalopararalaia namonamo. (Isa. 60:2) Iehova ena hahenamo dainai iena hesiai taudia na mai “edia lalo-namo” bona lalo goada ida ia e hesiai henia.​—Isa. 65:14.

13. Hari, tomadiho ḡoevana ihagini louna peroveta herevana be ede e ḡuḡuru tomamu?

¹³ Hari, ita edai tomadiho ḡoevana ihagini louna peroveta herevana be mai anina bada, a? Oibe! Edena dala ai? Laḡani 1919 C.E. amo taunimanima milion momo na Babulono Badana, tanobada idoinai tomadiho orea koikoidia iboudiai, edia iḡui amo e  heruha. Idia na Israel ena Gwauhamata Tanona e hereaia gabuna ta ai e vareai. Una na lauma paradaisona. (Isa. 51:3; 66:8) Lauma paradaisona be dahaka?

14. Lauma paradaisona be dahaka, bona hari ina negai daidia be unuseniai e nohomu? (Hereva Anina ba itaia.)

¹⁴ Laḡani 1919 C.E. amo horoa taudia na lauma paradaisona e moalelaiamu. b Gabeai, tanobada helarona e abia taudia o “mamoe idaudia” danu, una lauma paradaisona ai e vareai bona Iehova ena hahenamo momo e moalelaimu.​—Ioa. 10:16; Isa. 25:6; 65:13.

15. Lauma paradaisona be edekahai?

¹⁵ Hari ina negai, lauma paradaisona be edekahai? Iehova e tomadiho heniamu taudia na tanobada ibounai lalonai e nohomu. Una dainai, lauma paradaisona danu tanobada ibounai lalonai. Una ese e hahedinaraiamu, herevana edekahai ta nohomu, to lauma paradaisona ai na baita noho diba bema tomadiho momokanina ta duruamu.

16. Edena dalai lauma paradaisona hairaina baita itaia diba?

¹⁶ Lauma paradaisona ai baita noho totona, namona na tanobada heḡeḡemadai Kristen kongrigeisin baita laloa bada. Edena dala ai unu baita kara toma? Tadikaka taihu edia kara namodia baita lalo bada, to dia edia kerere. (Ioa. 17:20, 21) Dahaka dainai una na mai anina bada? Mani ina haheitalai a laloa. Uma hairaina ta lalonai ita na ta uramu au idauidau baita itadia. Una heḡereḡerena, kongrigeisin lalodiai lauma paradaisona ai e nohomu tadikaka bona taihu na idauidau. (Isa. 44:4; 61:3) Unu au edia hairai ta itamu heḡereḡerena, namona na tadikaka taihu edia kara namodia baita itadia o baita lalodia bada, dia edia kerere. Siboda eda kerere eiava kongrigeisin taudia ma haida edia kerere ese basie kouda, unu amo tanobada heḡeḡemadai Kristen kongrigeisin ena lalotamona karana baita laloa bada.

17. Ita ta ta be dahaka baita kara kongrigeisin ena lalotamona karana baita hagoadaia totona?

¹⁷ Ita ta ta be dahaka baita kara kongrigeisin ena lalotamona karana baita hagoadaia totona?  Namona na herohemaino taudia ai baitala. (Mat. 5:9; Roma 12:18) Kongrigeisin ai ma haida ida maino ai baita noho karadia ta karamu negadia ai, ita na lauma paradaisona ena hairai ta habadaiamu. Baita helalotao lauma paradaisona lalonai e nohomu taudia ta ta iboudiai na Iehova ese tomadiho ḡoevana lalonai e hakaudia vareai. (Ioa. 6:44) Mani a laloa, Iehova na be moale dikadikamu bema be itaiamu ita na ta hekwarahimu iena hesiai taudia​—ia ese e lalodia badamu taudia​—padadiai maino bona lalotamona ta hagoadaiamu!​—Isa. 26:3; Hag. 2:7.

18. Dahaka baita lalodia dobu loulou na namo, bona dahaka dainai?

¹⁸ Dirava ena hesiai taudia ese e davarimu ḡau namodia momo amo namo be ede baita davari toma? Dirava ena Hereva, Baibul, bona eda pablikeisin idauidau ai ta stadilaimu ḡaudia baita lalodia dobu. Stadi bona lalo dobu karana ese be durudamu, Kristen kara namodia baita hahedinaraimu, unu amo kongrigeisin lalonai ‘ta ta baita heura hehenimu, varavara na heheto.’ (Roma 12:10) Ina harihari ta abimu hahenamodia baita lalodia dobumu neganai, eda hetura karana Iehova ida baita hagoadaiamu. Bona Iehova ese vaira negai be henimu hahenamodia baita lalodia dobumu neganai, ia baita hesiai henia hanaihanai urana na be goadamu. Unu baita kara tomamu neganai, mai moaleda ida Iehova baita hesiai heniamu.

19. (a) Isaia 30:18 amo dahaka ta dibamu? (b) Dahaka ese baine duruda baita haheauka mai moaleda ida?

¹⁹ Iehova ese tanobada dikana be haoreamu neganai, ia na ita daidai be “tore isimu.” (Isa. 30:18) Ta diba momokanimu Iehova na “hahemaoro ḡoevaḡoeva Diravana” dainai, Satana ena tanobada baine hahemaoro henia dinana na basine hadaudauamu to ena nega korikori ai be kaumu. (Isa. 25:9) Basita hesiku to Iehova ida una hahemauri dinana baine kau totona baita nari. To hari, namona na laloda baita hadai hanaihanai ḡuriḡuri karana baita laloa bada, Dirava ena Hereva baita stadilaia bona baita badinaia, bona eda hahenamo idauidau baita lalodia dobu. Unu baita kara tomamu neganai, Iehova ese be durudamu ia itomadiho henina karana ai baita haheaukamu mai moaleda ida.