1. Baita lalo maoromaoro anina be dahaka? (2 Timoteo 4:5, NWT)

 ḠAU ta ese laloda e hahisiamu neganai, una ese Iehova bona ena orea baita badinadia karana na be tohoamu. Edena dala ai una baita hanaia diba? Namona na baita lalo maoromaoro, baita gima, bona abidadama ai baita gini tutuka-tutuka. (2 Timoteo 4:5 ba duahia; NWT.) Ita na baita lalo maoromaoromu bema baita manaumu, baita lalo namonamomu, bona Iehova ena lalohadai heḡereḡerena ai ḡau baita haeromu. Unu baita kara tomamu neganai, eda hemami ese eda lalohadai na basie biagu dibamu.

2. Ina atikol ai dahaka baita herevalaimu?

² Atikol 47 ai, ita na kongrigeisin murimurina amo e maimu hahetohodia toi ta herevalai. Ina atikol ai, ita ese kongrigeisin lalonai Iehova ta badinaiamu karana be tohoamu ḡaudia toi baita herevalaimu. Idia na (1) eda tadikaka o taihu ta ese e hahisidamu neganai, (2) sisiba o matahakani ta abimu neganai, bona (3) orea ese e karamu sensidia ibadinadia totona ta hekwarahimu neganai. Hahetoho unu bamodia ta davarimu neganai, edena dala ai baita lalo maoromaoro bona Iehova bona ena orea baita badinadia?

3. Bema tadikaka o taihu ta ese laloda e hahisiamu dahaka baita kara?

³ Oi be tadikaka o taihu ta eiava maduna e huamu tauna ta ese lalomu e hahisia, a? Reana tadikaka na unu e kara toma neganai se laloa oi baine hahisimu. (Roma 3:23; Iak. 3:2) To dounu, iena kara ese lalomu na e hahisia. Reana una o lalohadailaiamu dainai so mahuta namonamomu. Reana bo lalomu, ‘Bema tadikaka na ini e kara tomamu, ina be momokani Dirava ena orea eiava?’ Satana na e uramu unu baita lalo toma.  (2 Kor. 2:11) Una lalohadai kererena ese ita na Iehova bona ena orea amo baine bibida oho diba. Una dainai bema tadikaka o taihu ta ese laloda e hahisiamu, edena dala ai baita lalo maoromaoro bona lalohadai kererena baita dadaraia?

4. Iosef na kakana ese e hahisia neganai edena dalai e lalo maoromaoro, bona ena haheitalai amo dahaka ta dibamu? (Genese 50:19-21)

⁴ Basio badu. Iosef na mero matamatana neganai, kakana ese e hahisiava. Idia ese e inai heniava, bona idia haida na e urava ia bae alaia mase. (Gen. 37:4, 18-22) Gabeai, hesiai tauna bamona e hoihoilaia. Una dainai, Iosef na laḡani 13 lalodiai hekwakwanai idauidau e davari. Reana Iosef na bema lalo Iehova ese ia na se lalokau heniamu. Bona reana bema lalo heduru baine abi na namo negadiai Iehova ese e rakatania. Iosef na se badu to e manau, unu amo lalo maoromaoro karana e hahedinaraia. Ena be edia dika davana bema haloua diba, to unu na se kara toma, ia ese e lalokau henidia bona edia dika na e gwautao. (Gen. 45:4, 5) Iosef ese ena hekwakwanai na se lalodia bada, to Iehova ena ura e laloa bada. (Genese 50:19-21 ba duahidia.) Dahaka ta dibamu? Bema haida ese e hahisimumu, Iehova na basio badu henia eiava basioto oi na e rakatanimu. To, ia ese oi e durumumu hekwakwanai ba haheaukalai daladia ba lalodia dobu. Danu, haida ese e hahisimumu neganai, lalokau dainai edia dika ba gwautao.​—1 Pet. 4:8.

5. Miqueas na e mamia haida ese e hahisia neganai edena dalai e lalo maoromaoro?

⁵ South America ai, elda ta ladana Miqueas ena ekspiriens aita laloa. b Ia na maduna e huamu tadikakadia haida ese e hahisia negana ta e laloa lou. Ia na e gwa: “Lalohisihisi unuhetomana ta na nega ta asina mamia. Na lalohekwarahi bada. Una hanuaboina ai asina mahuta namonamo, bona na tai badina na mamia ḡau ta basina karaia dibamu.” To, Miqueas na e lalo maoromaoro bona e hekwarahi ena hemami baine biagua. Ia na e ḡuriḡuri loulou, Iehova e noia ena lauma helaḡa bona goada baine heni, baine haheauka totona. Danu, eda pablikeisin ai ia bae durua diba atikol e itadia. Dahaka ta dibamu? Bema o mamiamu tadikaka o taihu ta ese e hahisimumu, namona na ba manau bona o abimu lalohadai kereredia ba dadarai. Reana oi na asi dibamu ia enai be dahaka e vara dainai unu e hereva toma o e kara toma. Una dainai Iehova ba ḡuriḡuri henia, bona ba noia baine durumu tadikakamu ena lalohadai heḡereḡerena ḡau ba haero. Unu bo kara tomamu ese be durumumu, tadikakamu ena kara bo lalopararalaiamu bona ena dika bo gwautaomu. (Her. 19:11) Ba helalotao, Iehova ese emu ai e varamu ḡauna na e itaiamu bona goada be henimumu ba haheauka totona​—2 Sis. 16:9; Koh. 5:8.

6. Dahaka dainai baita diba Iehova ena sisiba o matahakani na iena lalokau karana? (Heberu 12:5, 6, 11)

⁶ Sisiba o matahakani ese lalohisihisi na baine havaraia diba. To, bema ta mamia hisihisina mo baita laloa badamu, sisiba na baita laloa maraḡimu, bona baita mamiamu una sisiba na dia maoro eiava sisiba aukana. Unu amo mai anina bada ḡauna baita laloa boiomu​—matahakani na Iehova ena lalokau karana. (Heberu 12:5, 6, 11 ba duahidia.) Bona bema eda hemami ese be biagudamu, dala baita kehoamu Satana ese eda abidadama baine hadikaia. Ia na e uramu sisiba baita dadarai bena taina ruana Iehova bona kongrigeisin amo baita daudau. Sisiba o matahakani o abimu neganai, edena dala ai ba lalo maoromaoro diba?

7. (a) Laulau ai heḡereḡerena, Petro ese sisiba e abia dae murinai edena dalai Iehova ese e ḡaukaralaia? (b) Petro ena haheitalai amo dahaka o dibamu?

 ⁷ Sisiba bavabi dae, bona emu kara ba haidau. Nega momo Iesu na aposetolo ma haida vairadiai Petro e sisiba henia. (Mar. 8:33; Luka 22:31-34) Reana Petro na e hemarai dikadika! To, Petro na dounu Iesu e badinaia. Ia na sisiba e abi dae bona ena kerere e hamaoromaoro. Una dainai, Iehova ese Petro ena abidadama karana na e hanamoa bona kongrigeisin lalonai maduna badadia e henia. (Ioa. 21:15-17; Apos. 10:24-33; 1 Pet. 1:1) Petro ena haheitalai amo dahaka ta dibamu? Haida vairadiai e sisiba henidamu dainai ta hemaraimu hemamina basita laloa bada, to una sisiba baita abia dae, bona eda kara baita hamaoromaoroa neganai, ita bona ma haida na namo baita davarimu. Unu baita kara tomamu neganai, Iehova ese be ḡaukaralaidamu bona tadikakada baita durudiamu.

8-9. Bernardo na sisiba e abi neganai, matamanai ena hemami be ede bamona, to dahaka ese e durua ena lalohadai e hamaoromaoroa?

⁸ Mozambique ai, tadikaka ta ladana Bernardo enai e vara ḡauna aita laloa. Iena elda maduna na e kokia. Matamanai Bernardo ena hemami be ede bamona? Ia na e gwa: “Lau na na badu, badina na abia sisibana na asina moalelaia.” Kongrigeisin taudia ese ia ede e laloa toma na e lalohekwarahilaia. E gwa: “Hua haida muridiai lalohadai maorona na abia bona Iehova bona ena orea na abidadama henidia lou.” Dahaka ese Bernardo e durua lalohadai maorona e abia?

⁹ Bernardo na ena lalohadai e hamaoromaoroa. Ia na e gwa: “Elda ḡaukarana na karaiava neganai, Heberu 12:7 amo haida na durudiava Iehova ena matahakani karana ai lalohadai maorona bae abia. Hari, sibogu na henanadaimu, ‘Daika ese ina siri ena hereva baine badinaia na namo?’ Iehova ena hesiai taudia iboudiai, bona lau danu.” Bernardo na ḡau ma haida e kara, unu amo ena abidadama Iehova enai bona ena orea ai e hagoadaia lou. Ia ese ena Baibul duahiduahi karana e habadaia bona e duahiva ḡaudia e lalodia dobu. Ena be ia na tadikaka taihu ese ia e laloava dalana dounu e lalohekwarahilaia, to idia ida e haroro hebouva bona kongrigeisin heboudia ai haere e heniva. Gabeai, Bernardo na elda madunana e abia lou. Bernardo heḡereḡerena, bema oi na ta ese vada e sisiba henimu, o mamia hemaraina na basio laloa momo, to una  sisiba bavabia dae, bona emu kara ba haidaua na namo. c (Her. 8:33; 22:4) Unu bo kara tomamu neganai, bo dibamu Iehova ese be hanamomumu badina ia bona ena orea o badinadiamu.

10. Dahaka sensi ese Israel tataudia haida edia abidadama e tohoa?

¹⁰ Dirava ena orea ese e karamu sensidia ese eda abidadama na be tohoa dibamu. Bema basita henahua tohomu, una ese Iehova ena amo be bibida oho dibamu. Heḡereḡere, Mose ena Taravatu henunai e karaia sensina ta ese Israel taudia edia abidadama e tohoa dalana mani aita laloa. Dirava ese Taravatu do se heni neganai, ruma bese kwaradia ese hahelaḡa ḡaukaradia e karava. Idia ese boubou patadia e hagini bona edia ruma bese daidiai boubou ḡaudia na Iehova e henia. (Gen. 8:20, 21; 12:7; 26:25; 35:1, 6, 7; Iobu 1:5) To Taravatu e heni neganai, ruma bese kwaradia ese unu ḡaukara na vada asie karava. Iehova ese Aaron ena ruma bese amo hahelaḡa taudia e abidia hidi boubou ḡaudia bae heni. Una sensi e karaia negana amo, bema ruma bese kwarana ta na dia Aaron ena bese tauna ta, to hahelaḡa ḡaukarana baine karaia, ia na bae hamasea diba. d (Lev. 17:3-6, 8, 9) Kora, Datan, Abiram bona orea lohiadia 250 ese Mose bona Aaron e gwau-edeede henidia badina ta be reana una, ani? (Num. 16:1-3) Ita na asi dibada. Herevana dahaka badi dainai, to Kora bona ia bamona ese Iehova na asie badinaia. Bema orea ese e karamu sensidia ese emu abidadama bae tohoa, dahaka ba kara diba?

11. Levi iduhuna lalonai Kohat taudia haida edia haheitalai amo dahaka ta dibamu?

¹¹ Dirava ena orea ese e karamu sensidia ba badinadia namonamo. Tano ḡaḡaena ai edia laolao lalonai, Kohat besena na mai anina bada ḡaukarana ta e karaiava. Israel taudia na gabu ma ta ai bae ha kamepa negadia ai, Kohat taudia haida na taunimanima iboudiai vairadiai taravatu mauana e huaiava bona e rakava. (Num. 3:29, 31; 10:33; Ios. 3:2-4) Una na hahenamo ta! To, Israel taudia na Gwauhamata Tanona ai e noho neganai, ḡau haida na e idau. Taravatu Mauana na gabu ta amo gabu ma ta bae laohaia ḡaukarana na vada e ore. Una dainai Solomon king ai ela neganai, Kohat taudia haida na ane abi ḡaukarana e gunalaia, haida be ikoukou igimadia ḡaukarana e karaiava, bona haida be habou-habou rumadia itataodia taudia ai ela. (1 Sis. 6:31-33; 26:1, 24) Gabu ta ai asita duahia Kohat taudia na e maumau, eiava guna e abia hahenamona dainai e ura dagi badana ma ta bae abia. Dahaka ta dibamu? Iehova ena orea ese e karamu sensidia​—emu asainmen ai e varamu sensidia danu​—na mai kudoumu idoinai ida ba badinadia. Herevana dahaka asainmen e henimumu, namona na ba moalelaia. Ba helalotao Iehova ese oi na dia emu asainmen o ḡaukara dainai, to ia o badinaiamu dainai e lalomu badamu.​—1 Sam. 15:22.

12. Zaina na Betele amo ena asainmen e idau neganai ena hemami be ede bamona?

¹² Middle East ai, taihu Zaina aita laloa, ia na asainmen matamatana e abia neganai, e ura heniava asainmen na e haboioa. Betele ai laḡani 23 e ḡaukara murinai e siaia baine  painia. Ia na e gwa: “Egu asainmen e haidaua neganai na hoa dikadika. Na hemami lau na asi egu ḡaukara, bona sibogu na henanadaiva, ‘Lau be dahaka kerere na kara?’” Madi, kongrigeisin ai tadikaka bona taihu haida ese ena lalohisihisi na e habadaia, badina e hamaoroa: “Bema emu Betele ḡaukarana na namo, basiema siaimu.” Nega momo, Zaina na e lalometauva dainai hanuaboi momo e taiva. To ia na e gwa: “Lau ese orea o Iehova ena lalokau na asina daradaralaia.” Edena dala ai Zaina na e lalo maoromaoro?

13. Zaina be dahaka e kara ena lalohadai kereredia baine dadarai totona?

¹³ Zaina ese ena lalohadai kereredia e dadaraidia. Edena dala ai? Ia ese eda pablikeisin ai ia enai e vara ḡaudia e herevalai atikol-dia e duahi. February 1, 2001 Watchtower ai, atikol ladana “You Can Cope With Discouragement!” ese e durua bada. Una atikol ai e hahedinaraia Baibul e torea tauna Mareko na ena asainmen e idau neganai, hemami una bamodia e abi danu. Zaina na e gwa: “Mareko ena haheitalai ese e durugu egu lalomanoka na hanaia.” Danu Zaina na turana e bamodiava. Tadikaka taihu ibamodia o idia ida haroro hebou karana na se hadokoa, bona sibona se helalo. Ia na e diba Iehova ese ena lauma amo ena orea e hakauamu bona hahekau taudia ese ia na e laloa badamu. To danu, e laloparara Dirava ena orea ese Iehova ena ḡaukara baine karaia na mai anina bada.

14. Orea ese dahaka sensi e karaia neganai Vlado enai na e auka baine badinaia, to dahaka ese e durua?

¹⁴ Slovenia ai, Vlado, laḡanina 73 elda tauna, ena kongrigeisin na kongrigeisin ma ta ida e hatamonaia bona e lao heniava Kingdom Hall na e koua neganai ia enai na e auka. Ia na e gwa: “Asina lalopararava dahaka dainai Kingdom Hall hereana e koua. Egu hemami na se namo badina vanegai mo una Kingdom Hall a hanamoa. Lau na kapenta, bona lau ese lalona kohudia matamatadia haida na karadia. Danu, kongrigeisin ruaosi e hatamonadia karana ese ḡau momo e haidau bona ai iahumai emai ai na auka baia badinadia.” Dahaka ese Vlado e durua orea ena hahekau dalana e badinaia? Ia na e gwa: “Iehova ena orea ese e karamu sensidia baita abi daemu neganai hanaihanai hahenamo na baita abimu. Unu sensi ese ita na vaira negai bae vara ḡaudia totona e heḡaeḡaedamu.” Kongrigeisin e hatamonadiamu  o asainmen e idaumu neganai, emu ai e aukamu bavabia dae totona, a? Namona na ba diba Iehova ese emu hemami na e lalopararalaiamu. Orea ese e kara sensidia bo abi daemu bona Iehova bona ia ese e ḡaukaralaiamu oreana bo badinadiamu neganai, Iehova ese be hanamomumu.​—Sal. 18:25.

15. Kongrigeisin ai hahetoho ta davarimu neganai edena dalai baita lalo maoromaoro diba?

¹⁵ Nega dokona ta lao heniamu lalonai, kongrigeisin ai hahetoho na baita davarimu. Unu ese Iehova ta badinaiamu karana na be tohoa dibamu. Una dainai namona na baita lalo maoromaoro. Bema o hemamimu tadikaka o taihu ta ese e hahisimumu, basio badu na namo. Bema sisiba o matahakani o abimu, basio hemarai, to sisiba bavabia dae, bona emu kara ba haidau. Bona Iehova ena orea ese sensi e karamu neganai, mai kudoumu idoina ida bavabi dae bona orea ena hahekau dalana ba badinaia.

16. Edena dalai Iehova bona ena orea iabidadama henidia karana ba hagoadaia?

¹⁶ Dirava o badinaiamu karana e tohoamu neganai, Iehova bona ena orea iabidadama henidia karana na ba hagoadaia. To unu ba kara toma totona, ba lalo maoromaoro na namo, anina na, ba manau, ba lalo namonamo, bona Iehova ena lalohadai heḡereḡerena ḡau ba haero. Lalomu ba hadaia Baibul ai oiemu hekwakwanai heḡereḡeredia e haheaukalai taudia sivaraidia ba stadilai bona ba lalodia dobu. Ḡuriḡuri karana amo Iehova ena heduru ba noia. Bona kongrigeisin amo basio daudau. Bena herevana dahaka bae vara, to Satana ese oi na Iehova bona ena orea amo basine bibimu oho diba.​—Iak. 4:7.