1. Haroro ai be dahaka be varamu, bona ta dibamu dahaka heduru baita abiamu?

 EDA haroro ḡaukara baita karaiamu neganai haida ese be inai henidamu. Bona nega vairai una na be bada be laomu. (Dan. 11:44; 2 Tim. 3:12; Apok. 16:21) To, ta diba momokanimu Iehova ese ita na be durudamu. Dahaka dainai? Badina Iehova ese ena hesiai taudia na hanaihanai e durudiamu, edia ḡaukara bae haḡuḡuru totona​—ena be unu na ḡaukara aukadia. Una baita diba totona, mani Babulono ai Iuda taudia e haroro henidia peroveta tauna Esekiel, ena mauri ai e vara ḡaudia haida aita lalodia.

2. (a) Esekiel ese e haroro henidia taudia be Iehova ese ede e gwauraidia toma? (b) Ina atikol ai dahaka baita herevalaimu? (Esekiel 2:3-6)

² Esekiel ese e haroro henidia taudia be taunimanima ede bamodia? Iehova ese idia na e gwauraidia asi edia hemataurai, lalo-auka, bona daḡedaḡe taudia. Edia hahehisi karadia na ava ginigini bona doadoa edia hahehisi na heto. Una dainai, Iehova ese Esekiel e hamaoroa loulou: “Garidia basio gari”! (Esekiel 2:3-6 ba duahidia.) Esekiel ese ena haroro ḡaukara na e karaia, badina ia na (1) Iehova ese e siaia, (2) Dirava ena lauma amo goada e abi, bona (3) Dirava ena Hereva ese ena abidadama e hagoadaia. Unu ḡau toi ese Esekiel be ede e durua toma? Bona hari ita be ede e duruda tomamu?

3. Ededia hereva ese Esekiel e hagoadaia, bona edena dala ai Iehova ese e hadibaia baine durua?

³ Iehova ese Esekiel e hamaoroa, eto: “Na siaimumu.” (Esek. 2:3, 4) Unu hereva ese Esekiel na e hagoadaia. Dahaka dainai? Badina Esekiel na e lalo lou, Iehova ese Mose bona Isaia na peroveta ḡaukaradia e henidia neganai, hereva unu bamodia e  ḡaukaralai. (Eso. 3:10; Isa. 6:8) Danu, Esekiel na mai dibana Iehova ese unu peroveta taudia raruosi be ede e durudia toma edia ḡaukara e haḡuḡurua. Una dainai, Iehova ese Esekiel na nega iharuana e hamaoroa: “Na siaimumu,” neganai, Esekiel na e diba momokani Iehova ese ia na be duruamu. Danu, Esekiel bukana ai ina hereva, “Iehova ena hereva na egu ai e kau,” na nega momo e hedinarai. (Esek. 3:16; 6:1) Oibe, Esekiel na e abia dae momokani ia na Iehova ese e siaia. Esekiel tamana na hahelaḡa tauna ta, bona reana ia ese Esekiel na e hadibaia Iehova na hanaihanai ena peroveta taudia e hadibadiava baine durudia. Iehova ese Isaak, Iakob, bona Ieremia e hamaorodia ia ese baine bamodia o ‘ia na idia ida.’​—Gen. 26:24; 28:15; Ier. 1:8.

4. Esekiel be ededia hereva ese e hagoadaia?

⁴ Esekiel ese e haroro henidia neganai, Israel taudia momo be dahaka e kara? Iehova na e gwa: “Israel besena ese basine kamonai henimu, badina be idia na asie uramu lau bae kamonai henigu.” (Esek. 3:7) Taunimanima ese Esekiel e dadaraia neganai, Iehova danu e dadaraia. Unu hereva ese Esekiel na e hagoadaia ia na dia peroveta tauna dikana, ena be taunimanima ese e dadaraia. Danu, Iehova ese Esekiel e hagoadaia baine harorolai hahemaoro herevadia bae ḡuḡuru neganai, taunimanima na bae diba “peroveta tauna ta na idia bogaraḡidiai vada ema.” (Esek. 2:5; 33:33) Ta dibamu unu hereva ese Esekiel e hagoadaia ena hesiai ḡaukara baine karaia.

5. Isaia 44:8 ena hereva ese ita be ede e hagoadada tomamu?

⁵ Ita danu ta dibamu Iehova ese e siaida baita haroro dainai, una ese ita na e hagoadadamu. Ia ese e laloda badamu badina e gwauraidamu  ena ‘hereva ihamomokanidia taudia’ o witnes taudia. (Isa. 43:10) Una na hahenamo hereadaena! Iehova ese Esekiel e hamaoroa: “Basio gari.” Una heḡereḡerena ita e hamaorodamu: “Asio gari.” Dahaka dainai e daḡedaḡe henidamu taudia garidia basita gari? Badina Esekiel heḡereḡerena, ita na Iehova ese e siaida bona e durudamu.​—Isaia 44:8 ba duahia.

6. (a) Edena dala ai Iehova na e gwauhamata ita baine duruda? (b) Dahaka ese ita e hagoadadamu?

⁶ Iehova na e gwauhamata ita baine duruda. Heḡereḡere, Iehova ese ina hereva: “Umui na egu hereva ihamomokanidia taumui,” do se gwauraia neganai, ia na eto: “Ranu lalodia amo ba hanai negana ai, lau na oi ida; sinavai lalodia amo ba hanai negana ai na basie habubunimu; lahi amo ba raka hanai negana ai, basio heara; lahi hururu-hururuna ese basine ḡolemu oho.” (Isa. 43:2) Haroro ḡaukara ta karaiamu neganai, nega haida sinavai na heto hekwakwanaidia o lahi na heto hahetohodia ta davarimu. To, Iehova ena heduru dainai dounu ta haroromu. (Isa. 41:13) Esekiel ena nega heḡereḡerena, hari ina negai taunimanima momo ese ta harorolaiamu sivaraina na e dadaraiamu. Baita laloatao edia hedadarai karana ese na se hahedinaraiamu eda haroro ḡaukara na asita karaia namonamo. Lasi, to ta dibamu haroro ḡaukara baita karaia hanaihanaimu neganai, Iehova na be moalemu bona una ese e hagoadadamu. Aposetolo Paulo na eto: “Ta ta davadia bae abi, edia hekwarahi heḡereḡeredia.” (1 Kor. 3:8; 4:1, 2) Laḡani daudau e painia taihuna ta na eto: “Na moalemu badina na dibamu Iehova ese eda hekwarahi na e hanamoamu.”

7. Esekiel na e itaia matahanaina e laloava karana ese ede e durua toma? (Rau 1 laulauna ba itaia.)

⁷ Esekiel na e diba Dirava ena lauma na mai siahuna. Matahanai lalonai, e itaia Dirava ena lauma helaḡa na aneru e durudiava bona guba kariotana ena wili badadia e haheaudiava. (Esek. 1:20, 21) Esekiel be dahaka e kara? Ia ese e karaia ḡauna na ini e torea toma: “Bena na itaia negana ai, lau na goru diho.” Esekiel na e hoa dikadika dainai, tano ai e moru. (Esek. 1:28) Gabeai, Esekiel na una matahanai e laloava negadia ai, una ese ena abidadama na e hagoadaiava, badina e diba Dirava ena lauma ese be duruamu ena hesiai ḡaukara baine haḡuḡurua.

8-9. (a) Iehova ese Esekiel e hamaoroa baine gini tore neganai Esekiel enai be dahaka e vara? (b) Iehova ese Esekiel be ma dahaka hahegoada e henia?

⁸ Iehova ese Esekiel e hamaoroa: “Taunimanima natuna e, a gini tore, bena baina hereva henimu.” Una hereva bona Dirava ena lauma ese Esekiel na goada e henia dainai, e gini tore. Esekiel na eto: “Lauma ese e rohegu bona e haginigu tore.” (Esek. 2:1, 2) Gabeai, Esekiel na ena hesiai ḡaukara lalonai, Dirava “imana” o ena lauma helaḡa ese e hakaua. (Esek. 3:22; 8:1; 33:22; 37:1; 40:1) Dirava ena lauma ese Esekiel e hagoadaia “vairadia e huamu bona lalodia e ha-aukamu” taudia baine haroro henidia. (Esek. 3:7) Iehova ese Esekiel e hamaoroa: “Oi vairamu vada na ha-aukaia, idia edia vaira-auka davana; bona oi vairamu vada na hahuakaia, idia edia vaira-hua davana. Vairamu vada na ha-aukaia, nadi-vasiga ena auka e hereaiamu nadina na heto; idia garidia basio gari bona edia vaira-hua basio garilaia.” (Esek. 3:8, 9) Iehova ese Esekiel na vaitani e hamaoroa: ‘Taunimanima edia gwau-edeede karadia daidiai basio lalo-manoka. Lau ese oi baina hagoadamu.’

⁹ Una murinai, Dirava ena lauma ese Esekiel na baine haroro heni gabudia e laohaia. Esekiel na e gwa: “Iehova imana na auka, lau latagu ai.” Ia ese baine harorolaia herevana na wiki ta lalonai baine lalopararalaia namonamo,  unu amo mai goadana ida baine harorolaia. (Esek. 3:14, 15) Bena Iehova ese e hamaoroa taora bainela bona unuseni ai ‘lauma ese e rohea.’ (Esek. 3:23, 24) Oibe, Esekiel na vada heḡaeḡae ena haroro ḡaukara baine hamatamaia.

10. Dahaka ese baine duruda haroro ḡaukara baita karaia, bona dahaka dainai?

¹⁰ Dahaka ese baine duruda eda haroro ḡaukara baita karaia? Haere baita diba totona, Esekiel enai e vara ḡauna aita laloa. Ena haroro ḡaukara do se hamatamaia neganai, ia na Dirava ena lauma amo goada e abi. Esekiel heḡereḡerena, hari ina negai ita na Dirava ena lauma ena heduru amo haroro ḡaukara baita karaia diba. Dahaka dainai? Badina Satana na ita e tuari henidamu, e uramu eda haroro ḡaukara baine koua. (Apok. 12:17) Taunimanima edia lalohadai ai, ita na basita kwalimu dibamu badina Satana na goada herea. To, eda haroro ḡaukara amo ia na ta hadarereamu! (Apok. 12:9-11) Edena dala ai? Ta haroromu neganai, ta hahedinaraiamu Satana ena hahegari karadia garidia na asita garimu. Ta haroromu negadia ta ta ai, Satana na e dareremu. Ena be inaida ese e koudamu, to haroro ḡaukara dounu ta karaiamu dainai dahaka ta dibamu? Ta dibaiamu ḡauna na, Iehova ese e lalonamo henidamu bona ena lauma helaḡa amo goada e henidamu.​—Mat. 5:10-12; 1 Pet. 4:14.

11. Dirava ena lauma ese ede be duruda tomamu, bona edena dalai ena heduru baita abia?

¹¹ Iehova ese Esekiel e hagoadaia dalana baita laloamu neganai, dahaka ma baita dibamu? Dirava ese ena lauma amo goada be henidamu, bena eda haroro ḡaukara ai baita davarimu hekwakwanaidia baita hanaidiamu. (2 Kor. 4:7-9) To, Dirava ena lauma baita abia totona dahaka baita kara? Namona na baita ḡuriḡuri loulou, badina mai dibada Iehova ese eda ḡuriḡuri na be kamonaimu. Iesu ese ena hahediba e hamaorodia, eto: “Ba noinoi, . . . ba tahu, . . . ba pidipidi.” Bena, Iehova ese lauma helaḡa e noiamu taudia na baine henidia.​—Luka 11:9, 13; Apos. 1:14; 2:4.

12. Esekiel 2:9–3:3 ese e gwauraia pepa helokuna be ede amo, bona lalonai be dahaka?

¹² Esekiel na Dirava ena lauma amo goada e abi, to dia una mo, Dirava ena hereva ese danu ena abidadama e hagoadaia. Matahanai lalonai, Esekiel ese ima ta e itaia pepa helokuna (scroll) ta e dogoatao. (Esekiel 2:9–3:3 ba duahidia.) Una pepa helokuna be ede amo ema? Bona lalonai be dahaka? Una ese Esekiel be ede e hagoadaia toma? Mani aita herevalaia. Una pepa helokuna na Dirava ena terono amo ema. Toana na Esekiel ese matamanai e itadia anerudia haniosi amo Iehova ese ta e ḡaukaralaia una pepa helokuna na Esekiel e henia. (Esek. 1:8; 10:7, 20) Una pepa helokuna lalonai na Dirava ena hereva​—unu na Esekiel ese daḡedaḡe besena ediai baine harorolai hahemaoro herevadia. (Esek. 2:7) Unu hereva na pepa helokuna vairanai bona murinai e hetore.

13. Iehova ese Esekiel e hamaoroa pepa helokuna be ede baine tomaia, bona dahaka dainai mai gaihona?

¹³ Iehova ese ena peroveta tauna e hamaoroa, una pepa helokuna baine ania, ‘bogana baine hakunulaia.’ Esekiel na una hereva e badinaia, bona una pepa helokuna na ibounai e ania. Una anina be dahaka? Esekiel ese baine harorolaia herevana na baine lalopararalaia namonamo. Namona na una hereva baine abia dae, bena una ese baine hagoadaia baine harorolaia. Bena ma ḡau ta e vara. Esekiel na e diba una pepa helokuna na mai gaihona o mai digarana, “bada-ranuna na heto.” (Esek. 3:3) Dahaka dainai? Esekiel enai, Iehova ihesiai henina ḡaukarana na mai moalena. (Sal. 19:8-11) Ia na e moale badina Iehova ese e abia hidi peroveta ḡaukarana baine karaia.

14. Dahaka ese Esekiel e durua dainai ia na vada heḡaeḡae haroro ḡaukara baine karaia?

¹⁴ Gabeai, Iehova ese Esekiel e hamaoroa: “Na herevalai henimumu herevadia iboudiai na lalomu ai bavabi dae, bona taiamu amo ba hakala henidia.” (Esek. 3:10) Iehova ese unu hereva amo Esekiel e hamaoroa pepa helokuna ai e hetore herevadia na baine lalodia tao bona baine lalodia dobu. Esekiel na unu e kara toma neganai, ena abidadama na e goada. Danu, una ese e durua Dirava ena hereva na taunimanima ediai baine harorolaia. (Esek. 3:11) Esekiel na Dirava ena hereva e lalopararalaia namonamo bona e abia dae neganai, ia na vada heḡaeḡae haroro ḡaukara baine karaia bona baine haḡuḡurua.​—Salamo 19:14 ba itaia.

15. Baita haheauka totona, ‘laloda ai’ dahaka baita abi dae na namo?

¹⁵ Eda haroro ḡaukara ai baita haheauka totona, namona na Dirava ena hereva amo eda abidadama baita hagoadaia. Namona na Iehova ese e henidamu herevadia iboudiai na ‘laloda ai’ baita abi dae. Hari ina negai, Iehova ese ena Hereva, Baibul, amo ita e hereva henidamu. Dahaka baita kara unu amo Dirava ena Hereva ese eda lalohadai, hemami bona ura baine biagudia?

16. Dahaka baita kara Dirava ena Hereva baita lalopararalaia namonamo totona?

¹⁶ Ita na ta anianimu neganai tauanida na e goadamu, una heḡereḡerena, Dirava ena Hereva ta stadilaiamu bona ta laloa dobumu neganai eda abidadama na e goadamu. Pepa helokuna amo ta dibaia ḡauna baita laloatao. Iehova na e uramu iena Hereva amo bogada baita hakunua, anina na, ia ena Hereva baita lalopararalaia namonamo. Unu baita kara toma dalana na, baita ḡuriḡuri, baita duahiduahi, bona baita lalo dobu. Ginigunana na, baita ḡuriḡuri unu amo kudouda baita heḡaeḡaelaia Dirava ena lalohadai baita diba totona. Iharuana be, Baibul ai kaha ta baita duahia. Ihatoina be, ta duahiamu ḡauna na baita  laloa dobu. Bena dahaka be varamu? Dirava ena Hereva baita laloa dobumu neganai, baita lalopararalaia namonamomu, bona una ese eda abidadama na be hagoadaiamu.

17. Dahaka dainai Baibul ai ta duahiamu ḡauna baita laloa dobu na mai anina bada?

¹⁷ Dahaka dainai Baibul baita duahia bona baita laloa dobu na mai anina bada? Badina una ese be hagoadadamu, hari ina negai Basileia sivaraina baita harorolaia, bona vaira negai hahemaoro hereva aukadia baita harorolai. Danu, Iehova ena kara namodia baita lalodia dobumu neganai, eda hetura karana ia ida na be goada be laomu. Unu amo ita na ḡau gaihona ta baita moalelaiamu, anina na, baita lalo mainomu bona baita moalemu.​—Sal. 119:103.

18. Taunimanima ese dahaka bae lalopararalaia be namo, bona dahaka dainai?

¹⁸ Esekiel na peroveta tauna, to ita be dia peroveta tauda. To, ita na laloda ta hadai, Iehova ese ena Hereva lalonai e tore herevadia baita harorolai hanaihanai, ela bona eda haroro ḡaukara na iena ura heḡereḡerena baita haḡuḡurua. Dirava ena hahemaoro negana baine kau neganai, taunimanima na basie gwau dibamu idia na asie hadibadia o Dirava ese na se lalodia. (Esek. 3:19; 18:23) Lasi, to be lalopararamu ta harorolaia sivaraina na Dirava ena amo.

19. Dahaka ese baine hagoadada eda haroro ḡaukara baita haḡuḡurua?

¹⁹ Dahaka ese baine hagoadada eda haroro ḡaukara baita haḡuḡurua? Esekiel e hagoadaia ḡaudia toi ese bae hagoadada. Ita na doini ta haroromu badina ta dibamu ita na Iehova ese e siaida, Dirava ena lauma helaḡa amo goada ta abimu, bona Dirava ena Hereva ese eda abidadama e hagoadaiamu. Iehova ena heduru dainai, ta ura dikadikamu eda haroro ḡaukara baita karaia, bona baita haheauka “ela bona dokona.”​—Mat. 24:13.