Una murinai e vara ḡauna do asina herevalaia lalonai, ful-taim hesiai ḡaukara na hamatamaia dalana aina herevalaia guna.

Lau na laḡani 1942 ai na vara, Caribbean motumotuna, Curaçao ai. Tamagu na Suriname tauna, to ḡaukara dainai una motumotu ela. Lau do asina vara ai, ia na Curaçao ai e bapatiso Iehova ena Witnes ginigunadia ta. a Ia na wiki ta ta iboudiai, ai natu emai stadi e karaiava, ena be nega momo ai na asia urava baia stadi. Laḡanigu e 14 neganai, aina ala Suriname ai a nohova, tamagu na ia sinana burukana baine naria dainai.

Suriname ai, lau ese kongrigeisin lalonai Iehova ena hesiai ḡaukara e goadalaiava matamata taudia na bamodiava. Idia laḡanidia na babada bona regula painia ḡaukara e karaiava. Haroro ḡaukara ai e davariva ekspiriens na mai moaledia ida e herevalaiva. Kongrigeisin heboudia muridiai, turagu ida Baibul ai topik idauidau a herevalaiva​—nega haida, murimuri ai a helaiva bona hisiu a itadiava. Idia ese e durugu egu mauri ai na ura baina karaia ḡauna na lalopararalaia; na ura Iehova ena ḡaukara baina karaia. Una dainai laḡanigu e 16 neganai na bapatiso. Gabeai, laḡanigu 18 e abia neganai, regula painia ḡaukara na hamatamaia.

Egu painia ḡaukara ai ḡau momo na diba, bona unu ese ful-taim hesiai ḡaukarana ai e durugu. Heḡereḡere, na dibaia ḡauna ta na, ma haida baina hadibadia na mai anina bada. Na painia matama neganai, misinari ta ladana Willem van Seijl ese e durugu. b Nega momo ia ese kongrigeisin madunadia ihuadia daladia e hadibaguva. Una negai, asina laloa una hahediba karana ese lau na be durugu badamu. Murina laḡanina ai, lau na e abigu hidi spesol painia  ḡaukarana baina karaia, una murinai Suriname ena uda badadia ai grup maraḡidia na durudia matama. Na moale badina tadikaka haida, heḡereḡere Willem, ese nega korikori ai e hadibagu! Una nega amo lau ese edia haheitalai na tohotohoa, nega na ato ma haida na hadibadiava.

Lau ese na dibaia ḡauna iharuana na, egu mauri ai ḡau momo basina tahu bona plen namodia baina kara na mai ena namo. Hua ta ta matamadia ai, a painia hebouva tadikakana ida emaiva wikidia totodia aniani bona ma ḡau haida a plenilaiva. Bena ai ta na gabu daudau amo a laova siti lalona unu ḡau baia hoi totona. Hua ta ta ai idurumai totona e henimaiva monina na a ḡaukaralaia namonamova, unu amo a hoiva ḡaudia na hua ibounai lalonai bae mia diba. Uda lalonai bema ḡau ta na e oreva, taunimanima ma haida ese e durumaiva. Na abia dae matamatagu negana ai, ḡau momo asina tahu bona plen namodia na karadia ese e durugu, egu mauri lalonai Iehova ena ḡaukara baina laloa bada totona.

Lau ese na dibaia ḡauna ihatoina na, taunimanima na edia gado korikori ai baina hadibadia. Na tubu daeva lalonai, na ḡaukaralaiva gadodia na Dutch, English, Papiamento, bona Sranantongo (ladana ta na Sranan), una na Suriname ena gado badana. To na itaia uda badadia lalodiai e nohova taudia na edia gado korikori ai a haroro henidiava neganai, sivarai namona na e kamonaia namonamova. Na davaria egu ai na auka unu gado haida, heḡereḡere Saramaccan ai baina hereva, edia hereva reḡena na e daemu bona e dihomu. Ena be na hekwarahi, to una gado na dibaia dainai na moale. Laḡani momo lalodiai, lau ese taunimanima momo na hereva momokani na hadibadia badina edia gado ai na herevava.

Momokani, una gado ai na herevava neganai, hereva haida na gwaurai kerereva. Heḡereḡere, nega ta lau na Saramaccan gado ai stadi hahinena baina nanadaia iena hemami be ede bamona, badina bogana e hisihisiva. To na gwauraia henanadaina be bema ia na rogorogo. Momokani, una henanadai dainai ia na madi e hemarai. Ena be hereva kereredia na gwauraiva, to nega iboudiai na hekwarahiva egu asainmen ai taunimanima na edia gado korikori ai baina hereva henidia.

Laḡani 1970 ai, lau na e abigu hidi seket ḡaukara baina karaia. Una laḡani ai lau ese uda badadia lalodiai e nohova grup maraḡidia momo ediai slide program ladana “Visiting the World Headquarters of Jehovah’s Witnesses” na halasia. Idia baina vadivadidia totona, tadikaka haida ida vanaḡi latana ta ai a gui bena uda badadia sinavaidia amo a laova. Emai vanaḡi ai a uda ḡaudia na generator ta, bendin tankana, petrol lamepadia, bona slide baia halasi kohudia. Baia lao heni gabudiai a kauva neganai, unu kohu iboudiai na a huava bena uda badadia lalodia amo a laova slide baia halasia gabuna. To, unu laolao ai na laloataomu ḡauna na, gabu daudaudia ai e nohova taudia ese unu program na e moalelaidia badava. Na moale bada badina ma haida na durudia Iehova bona ena  orea tanobada ai e dibadia. Haida na itadia Iehova turana ai ela neganai, egu hekwarahi anina na na moalelaia.

Ena be egu hesiai ḡaukara ai singul maurina ena namo na itaia, to na ura baina headava. Una dainai na ḡuriḡurilaia, baina adavaia taihuna na lau ida uda badadia lalodiai mai moalena ida hesiai ḡaukara baine karaia taihuna. Laḡani ta murinai, spesol painia taihuna Ethel, ida a hetura matama, ia na mai ena ura ida Iehova ena hesiai ḡaukara e karaiava, ena be ia enai na auka. Ethel na maraḡina amo, aposetolo Paulo ena haheitalai e moalelaia bona e ura hesiai ḡaukarana baine karaia Paulo heḡereḡerena. Ai na September 1971 ai a headava bona raruosi seket ḡaukarana a karaia matama.

Ethel na dia kohu momo maurina ai e tubu dae, una dainai uda badadia lalodiai seket ḡaukara baia karaia na dia auka ia enai. Heḡereḡere, uda badadia lalodiai kongrigeisin baia vadivadidia neganai, ḡau momo asia abi kauva. Sinavai ai dabua a huriva bona a diguva. Danu tadikaka ese dahaka e henimaiva na a aniva​—heḡereḡere iguanas, piranhas, eiava e ha labanava eiava e haodava o e kimaiva vamudia na a abi daeva. Mereki lasi neganai, biku raudia a ḡaukaralaiva. Bona sipuni o foka lasi neganai, imamai a ḡaukaralaiva. Lau bona Ethel na Iehova ena hesiai ḡaukara ai a kara hebouva ḡaudia ese emai hetura karana Iehova ida na e hagoadaia, vaitani varo ere toi e kwatudia auka hebou. (Koh. 4:12) Asia ura ḡau ta ese una baine haidaua!

Dina ta uda ai tadikaka a vadivadidia murinai, a lou laova ai sivarai matamanai na herevalaia ḡauna e vara. Vanaḡi na sinavai ena aru goadana ai e vareai neganai, ranu lalonai e diho to haraḡa herea ma e dae lou. A moale badina ai na life jackets a karadia bona vanaḡi amo na asia moru. To ranu na e vareai vanaḡi lalonai. Emai pani lalodia anianidia na a bubudia sinavai  ai bena unu pani a ḡaukaralai ranu a kado lasiva.

Ai na da asi emai aniani dainai, sinavai amo a laova neganai a kimaiva. To ḡau ta asia veria. Una dainai Iehova a ḡuriḡuri henia bona a noia una dina ai amai baine heni. A ḡuriḡuri murinai, tadikaka ta ese kimai e negea bona gwarume badana ta e veria, una na heḡereḡere ai taumai imaosi ese una hanuaboi ai baia ania.

Ethel ida laḡani 5 seket ḡaukara a karaia hebou murinai, asia laloa hahenamona ta a abia​—natumai ta vada be varamu. Una sivarai na kamonai neganai na moale, ena be asi dibagu vairai be dahaka be varamu. Lau bona Ethel na a ura bada ful-taim hesiai ḡaukarana dounu baia karaia bema mai dalana. Laḡani 1976 ai natumai merona Ethniël e vara. Bona laḡani rua mai kahana murinai natumai merona ma ta, Giovanni e vara.

Una negai Suriname ai hesiai ḡaukara na bada dainai, brens ofesi na dala e kara seket ḡaukara dounu baina karaia, natumai a naridiava lalonai. Natumai na mamaraḡi neganai, egu seket ḡaukara ai kongrigeisin haida mo e henigu baina naridia. Una ese dala e kehoa, hua ta ta ai wiki haida be seket ḡaukara baina karaia bona wiki oredia be egu kongrigeisin ai painia ḡaukara baina karaia. Emai noho gabuna badina kongrigeisin na vadivadidiava neganai Ethel bona natumai memerodia ese e bamoguva. To, uda badadia lalodiai kongrigeisin ivadivadidia bona hebouhebou iabidia totona be sibogu na laova.

Ḡau iboudiai na plen namonamova unu amo egu maduna iboudiai baina haḡuḡurudia. Na hekwarahiva emai ruma bese stadi na wiki iboudiai baia karaia totona. Uda badadia lalodiai kongrigeisin na vadivadidiava neganai, Ethel ese ruma bese stadi na natumai ida ruma ai e karaiava. To, nega momo ruma bese lalonai ḡau na a kara hebouva. Hanaihanai lau bona Ethel na natumai ida moale karadia a kara hebouva​—heḡereḡere a gadara hebouva eiava gabu ta ai a loaloava. Nega momo na nogava ela bona malo, tiokratik ḡaukaradia baina heḡaeḡaelai totona. Bona Ethel na hahine namona, ia na Hereva Lada-isidia 31:15 heḡereḡerena, daba vaburana ai e tore isiva e heḡaeḡaeva, dina sirina baia duahia bona daba anianina baia ania hebou totona, una murinai natumai na skuli e laova. Na moale dikadikamu badina adavagu na ḡaukara  goadagoada hahinena, bona hanaihanai e duruguva Dirava ese e henigu madunadia na haḡuḡuruva!

Ai na tama sina dainai, a ḡaukara goadava, natumai memerodia baia durudia Iehova bae lalokau henia bona iena hesiai ḡaukara bae ura henia. A urava natumai na ful-taim hesiai ḡaukarana bae abia hidi, dia aiemai ura dainai to idia sibodia edia abi hidi. Nega iboudiai idia ediai ful-taim hesiai ḡaukara ena moale a herevalaiava. Emai hesiai ḡaukara lalonai a davari ḡaudia a herevalai, to mai anina bada ḡauna na, Iehova ese ai e durumai bona e hanamomai daladia na idia ediai a herevalai. Danu, dala a karava natumai ese tadikaka goadadia, edia mauri lalonai Iehova e atoa gunava taudia, bae bamodia.

Emai ruma bese a nariava lalonai Iehova ese emai dabu ḡaudia na e heniva. Vaia, nega momo na hekwarahiva egu ruma bese baina durua. Egu singul negana ai uda badadia lalodiai spesol painia ḡaukara na karaia neganai, egu ai e vara ḡaudia ese e hadibagu tauanina iduruna ḡaudia iabidia totona baina plen guna be namo. Ena be a hekwarahiva emai dabu ḡaudia baia abi totona, to ḡau haida ai na asia heḡereḡereva. Nega unu bamodiai na abia dae momokani Iehova ese ai na e durumaiva. Heḡereḡere, laḡani 1980 ela 1990 lalodiai, Suriname ai tuari e vara. Unu laḡani lalodiai, emai dabu ḡaudia baia abi na auka. Ena be unu bamona, to Iehova ese ai na e narimai.​—Mat. 6:32.

Emai mauri lalonai, Iehova ese nega iboudiai e narimaiva, bona e durumai dainai a moale. Natumai ese e hamoalemai bona a durudia Iehova bae hesiai henia na hahenamo ta. Ai na a moale badamu badina idia danu edia mauri lalonai ful-taim hesiai ḡaukara e abia hidi. Ethniël bona Giovanni na tiokratik skulidia ela​—hari e gwauraiamu Basileia Evanelia Skuli​—bona hari idia na adavadia ida Suriname brens ofesi ai e ḡaukaramu.

Hari lau bona Ethel laḡanimai na vada babada, to doini Iehova ena ḡaukara lalonai spesol painia ḡaukara a karaiamu. Momokani, ḡaukara na bada herea dainai asi egu nega nahu dalana baina diba! To ḡau ta ai asina lalohisihisimu. Na lalo loumu neganai baina gwa diba egu matamata negana lalonai ful-taim hesiai ḡaukarana na abia hidi na abi hidi namo hereana.