BAIBUL bukana Eseta lalonai e gwaurai sivaraidia ai Morodekai na ḡaukara badana ta e karaia. Ia na Iuda amo e abia mauri tauna ta bona Parasa basileiana ena king ena ruma ai e ḡaukarava. Una na “[King] Ahasuero ena nega ai,” ia na laḡani 496 B.C.E. ai e lohia matama. (Hari una king na e gwauraiamu Xerxes I.) Morodekai ese king bae hamasea plen hehunina e koua. King na e moale dainai, dala e kara Morodekai na taunimanima ese bae hanamoa. Gabeai, Morodekai bona Iuda taudia e inai henidiava tauna Hamana e mase murinai, king ese Morodekai na prime minister dagina e henia. Una dagi e abia ese dala e kehoa Morodekai na haheḡani ta e heni, Parasa Basileiana henunai e nohova Iuda taudia iboudiai bae haoredia karana e koua.​—Eseta 1:1; 2:5, 21-23; 8:1, 2; 9:16.

Idaunega sivaraidia e stadilaimu taudia haida na e gwa, Eseta bukana ai e gwaurai sivaraidia na dia sivarai momokanidia bona Morodekai na se mauri o se nohova. To, laḡani 1941 ai, gunaguna ḡaudia e ḡeidia bena e stadilai taudia (archaeologists) ese e davari ḡaudia amo e hamomokania, Baibul ese Morodekai e herevalaia na momokani. Idia be dahaka e davari?

Hetahu ḡaukara e karamu taudia haida ese Parasa edia uro o clay nadina ta e davaria, bona ia latanai na tau ta ladana Marduka (Motu gado ai na Morodekai) e hetore. Ia na Shushan siti lalonai ḡaukara e haheauava tauna (administrator) ta, reana moni ena heau dalana e itaia taova o accountant. Una toretore e davaria negana ai, una siti ena histri mai dibana namonamo tauna, Arthur Ungnad na e gwa, una na nega ginigunana una toretore ai “Morodekai ladana e hedinarai bona una toretore na dia Baibul kahana ta.”

Ungnad ese ena hereva e gwauraia negana amo, diba bada taudia haida ese Parasa edia nadi toretoredia ma tausen momo e hahanaidia. Idia padadiai na Persepolis siti e hadikaia momorudia lalodiai e davari nadi palakadia haida, unu na guna moni e nariva gabuna (Treasury), siti maḡudia badinai e davari. Unu toretore na Xerxes I ena lohia negana ai e tore ḡaudia. Unu toretore na Elam taudia edia gado ai, bona Eseta bukana lalonai e tore ladadia haida e hahedinarai. a

Persepolis toretoredia ai ina lada Marduka danu e hetore, ia na Xerxes I ena lohia negana ai ena ruma Shushan ai seketere ḡaukarana e karaiava. Nadi toretorena ta ai Marduka na e gwauraia gado hahanai tauna. Unu hereva na Baibul ese Morodekai e herevalaia dalana ida e heḡereḡere. Ia na King Ahasuero (Xerxes I) ena ruma ai hesiai ḡaukara e karaiava bona gado rua e herevalaiva. Morodekai na hanaihanai king ena ruma ikoukouna ai e helaiva Shushan ai. (Eseta 2:19, 21; 3:3) Una ikoukou na ruma o building badana ta bona king ena hesiai taudia edia ḡaukara gabuna.

Nadi toretoredia ai e gwauraia tauna Marduka bona Baibul ese e gwauraia tauna Morodekai na dala haida ai e heḡereḡere. Idia e noho negadia bona gabudia na heḡereḡere, edia dagi bona ḡaukara gabudia danu heḡereḡere. Unu hahemomokani ḡaudia ese e hahedinaraimu Marduka bona Morodekai na taunimanima tamona e herevalaia.