Lau na laḡani 1948 ai na vara, Nigeria ena saut west hanua maraḡina ta ai. Una negai, vavagu Mustapha, lau tamagu tadina, bona Wahabi, lau kakagu, na e bapatiso bena Iehova ena Witnes taudia ai ela. Lau laḡanigu 9 neganai, tamagu e mase. Una nega ai kudougu na e makohi. Wahabi ese e hamaorogu, toreisi lou negana ai tamamai na baia itaia loumu. Una ese e hagoadagu Baibul baina stadilaia bona laḡani 1963 ai na bapatiso. Se daudau, kakagu memerodia rarua bona tadigu merona danu e bapatiso.

Laḡani 1965 ai Lagos nala, kakagu Wilson dekena, bona Igbobi Kongrigeisin edia regula painia ibamodia karana na na moalelaia. Edia hesiai ḡaukara e moalelaiava bona e goadalaiava karana ese e durugu dainai, January 1968 ai lau danu na painia.

Betele ai e ḡaukarava tadikakana ta, Albert Olugbebi, ese hebou ta e boilaia bona ai matamata taumai e hamaoromai idia na e urava spesol painia haida na Nigeria ena not kahana bae siaidia lao. Tadikaka Olugbebi ena hereva na doini na laloataomu, e gwa: “Umui na doini matamata bona emui nega bona goada na Iehova dainai ba ḡaukaralaia. Umui na ḡaukara momo ba kara  diba!” Na ura peroveta tauna Isaia baina tohotohoa, una dainai aplikeisin ta na hahonua.—Isa. 6:8.

May 1968 ai, lau na e siaigu Nigeria ena siti ta ladana Kano ai special painia ḡaukarana baina karaia. Una negai, Nigeria ena not kahana bona ist kahana ai tuari (Biafran War 1967-1970) e varava. Una tuari ai haida e bero bona momo e mase. Tadikaka ta na se ura lau e siaigu gabuna bainala, badina dika baina davari garina. To na hamaoroa, “Tenkiu o lalogumu dainai, to bema Iehova na e uramu una gabu bainala, na dibamu ia na lau ida.”

Tuari ese siti badana Kano na e hadikaia momokani. A harorova lalonai nega haida tuari ai e aladia taudia tauanidia a itava. Kano ai kongrigeisin na momo to tuari dainai tadikaka momo na e heau. Asie heau pablisa iboudiai be 15 heḡereḡerena; iboudiai e gariva bona e lalomanoka. To ai spesol painia siks a kau neganai, unu tadikaka bona taihu na e moale dikadika. A hagoadadia kongrigeisin heboudia bona haroro ḡaukara bae hamatamadia lou, bona edia haroro ripoti bona literature odadia na brens a siai lao.

Lau ida a spesol painia hebouva taumai na Hausa gado a dibaiava. Unuseniai e nohova taudia na edia gado ai Basileia sivaraina a herevalaiava neganai, momo na e kamonaiva. To, Kano ai dubu badana taudia na se urava baia haroro dainai a henahua tohova. Nega ta, tau ta ese lau bona lau e bamogu tadikakana na kaia amo e havamai. To a heau haraḡa dainai se dogomai tao! Ena be daḡedaḡe a davariva to Iehova ese e ‘gimamaiva’ bona pablisa edia namba na e bada. (Sal. 4:8) Hari Kano ai, kongrigeisin iboudiai na 11 bona edia pablisa na 500 mai kahana.

Kano ai hua haida mo a noho, bena August 1968 ai, lau bona spesol painia rarua na Republic of Niger ena siti badana Niamey e siaimai lao. Gabeai a diba West Africa ai, Niger na siahu herea gabuna. Ai na dia una siahu mo a  haheaukalaiava, to una gabu ena gado badana French danu a dibaiava. Ena be mai hekwarahina to Iehova enai a tabekau, bona unuseniai e nohova pablisa haida ida a haroro matama. Se daudau, Niamey ai Baibul stadi bukana ladana, The Truth That Leads to Eternal Life na duahiduahi mai dibadia taudia ediai kope ta ta a rakataniva. Taunimanima haida na ai e tahumaiva badina e urava edia kope ta bae abi.

Gabeai a laloparara gavamani ese Iehova ena Witnes taudia na se ura henidiava. July 1969 ai, ai na a hegogo emai sekit hebouhebou ginigunana baia abia, bona 20 mai kahana ema. Pablisa rarua na una hebou badana ai bae bapatiso, bona a ura dikadika una baia itaia. To hebou baia abia dinana ginigunana ai, pulisi ese emai program e koua. Ai spesol painia tadikakadia bona sekit tauna na polis steisin e laohaimai. E hereva henimai murinai e hamaoromai murina dinana ai ma baia lou lao. A dibava hekwakwanai ta na be varamu, una dainai ruma ta ai bapatiso tok a karaia bena hehuni ai pablisa na sinavai ta ai a habapatisodia.

Wiki haida muridiai, gavamani ese lau bona spesol painia tadikaka foa e hamaoromai hora 48 lalonai Niger baia rakatania, bona sibomai emai lou dalana baia karaia. Gavamani ena hereva a badinaia bena maoromaoro Nigeria ena brens ofis ala, unuseniai asainmen matamata e henimai.

Lau e siaigu gabuna na Nigeria ena hanua ta ladana Orisunbare, unuseniai e nohova pablisadia na dia momo, to egu haroro bona Baibul stadi ḡaukarana na moalelaia. Hua siks muridiai, brens ofis ese lau sibogu e siaigu Niger baina lou lao. Matamanai na hoa bona taina na gari, to na ura Niger ai tadikaka ma baina itadia lou!

Niamey na lou lao. Na kau dinana murinai, Nigeria bisnes tauna ta na e diba lau na Witnes tauna ta dainai Baibul henanadaidia momo e heni. Lau ese na stadi henia, bena siga ani bona inuinu kekero karana e rakatani murinai e bapatiso. Niger ena gabu idauidau ai tadikaka bona taihu ida haroro ḡaukara na na moalelaia, bona laḡani haida muridiai taunimanima haida ese hereva momokani na e abia dae. Una gabu ai na kau matama neganai Witnes taudia na 31, to una gabu na rakatania neganai una namba na e dae 69.

December 1977 ai, na lou Nigeria treinin baina abi totona. Una wiki toi ena treinin dokona ai Brens Komiti ena kodineita, Malcolm Vigo, ese e boirigu bena Sierra Leone brens ofesi ese e siaia revarevana e henigu baina duahia. Tadikaka na e urava singul painia tadikakana ta bae siaia Guinea ai sekit ḡaukarana baine karaia, bona namona ia na English bona French gado mai dibana. Tadikaka Vigo ese e hamaorogu, lau na una  asainmen dainai treinin na abi. E hamaorogu eto, “Ina na asainmen aukana dainai, do ba lalohadailaia guna gabeamo bavabia dae.” Lau na maoromaoro na haere na gwa: “Ina na Iehova ese e siaigumu dainai bainala.”

Plein amo Sierra Leone nala bona brens ofis ai tadikaka ida a hebou. Brens Komiti ta ese e hamaorogu eto, “Asi dibamai guinea ai tadikaka taihu edia hesiai ḡaukara be ede bamona.” Ena be Guinea ai haroro ḡaukara na Sierra Leone brens ofis ese e itaia taova, to pablisa ida bae herevahereva na auka badina unuseniai politikol heiriheiridia e varava. Nega momo brens ofis na e urava tadikaka ta bae siaia to Guinea ai bae vareai na auka. Una dainai, lau e siaigu Guinea ena siti badana, Conakry ai gavamani amo gwaumaoro baina abi unuseniai baina noho totona.

Conakry ai na kau neganai, Nigeria ena embassy nala bona ambassador na hereva henia. Na hamaoroa lau na na urava Guinea ai baina haroro. To ia ese e hamaorogu namona na basina noho bae arestigu eiava bae hahisigu garina. Una ambassador na eto: “Ba lou Nigeria bona unuseniai ba haroro.” To na hamaoroa nato: “Lau na na uramu iniseniai baina noho.” Una dainai ambassador ese Guinea edia Minister ta e tore henia bona e noia lau baine durugu, bona una Minister ese ena noinoi e abia dae.

Una murinai, Sierra Leone brens ofis na lou lao bona Guinea edia Minister ena disisen na tadikaka na hadibadia. Na hamaorodia lau na Guinea gavamani ese gwaumaoro e henigu unuseniai baina noho. Tadikaka na Iehova ese egu laolao e hanamoa dalana e kamonai neganai, idia na e moale dikadika!

Laḡani 1978 ela 1989 ai lau na seket ḡaukarana na karaia Guinea, Sierra Leone ai bona Liberia ai sekit iduruna ḡaukarana na karaia. Matamanai na e goreregu momova, nega haida gunika gabudia ai danu e gorereguva. To, tadikaka na madi e hekwarahiva hospele bae laohaigu.

Nega ta malaria dikana ese e abigu, bona bogagu na mai bilugana. Lau na namo lou neganai, tadikaka ese e hamaorogu idia na e tomava lau na ba masemu dainai igurigu gabuna e herevalaiava! Ena be ḡau unu bamodia e varava, to asina urava egu asainment baina rakatania. Oibe, na abia daemu Dirava sibona ese baine gimada diba bona ena be baita mase, ia sibona ese be hatoreda isi loumu.

Laḡani 1988 ai Dorca ida na hedavari, ia na manau bona lauma ḡaudia e lalo badamu painia taihuna ta. A headava murinai, sekit ḡaukarana ai lau e bamoguva. Dorcas na hahine namona bona ina asainmen ai na e durugu bada. Nega momo baia vadivadidia kongrigeisin edia daudau na kilomita 25; emai kohu a huava bena a rakava. To kongrigeisin daudaudia a laova neganai motuka ai a guiva bona dala kopukopudia bona mai dogudogudia a heaudiava.

Dorcas na boga auka hahinena. Heḡereḡere a laova gabudia haida na mai sinavaidia bona unu sinavai na mai hualadia. Gabu ta na dina  faiv muridiai bo ginidaemu, unu baiala totona ai na vanagi ai a gui badina uafo na didika. Dorcas na vanaḡi amo baine diho neganai, sinavai ai e moru. Ai raruosi na asi nahu dibamai, bona una sinavai ai huala na momo. Memero haida e pau dobi Dorcas e durua. Una e vara murinai hanuaboi momo na asia mahuta namonamova, to emai hesiai ḡaukara na dounu a karaiava.

Laḡani 1992 matamana kahanai, ai na a hoa Dorcas na mai bogana. Anina be sekit ḡaukara baia rakatania bena baia spesol painia, eiava? Lau bona Dorcas na a lalotamona, “Ina na Iehova ese e henimai harihari ḡauna ta!” Una dainai natumai kekenina ladana a hatoa, Jahgift. Laḡani foa muridiai tadina Eric e vara. Natumai na momokani Iehova ena harihari ḡaudia. Jahgift na Conakry remote translation office ai e ḡaukara, bona Eric be hesiai tauna.

Ena be Dorcas na natumai inaridia dainai spesol painia ḡaukarana e rakatania, to dounu regula painia ḡaukarana e karaiava. Lau be Iehova ena heduru amo dounu spesol painia ḡaukarana na karaiava. Natumai e bada murinai, Dorcas na ma spesol painia ḡaukarana e karaia lou. Hari ai raruosi na Conakry ai misinari ḡaukarana a karaiamu.

Lau na hanaihanai Iehova e ura bainala gabudia nala. Adavagu ida Iena hegima bona hahenamo na a mamidia. Ai ese Iehova a abidadama henia dainai, ina tanobada kohudia ai e tabekaumu taudia ese e davarimu hekwakwanaidia na asia davari. Dorcas ida emai ekspiriens amo a diba ḡauna na Iehova sibona na ‘Ihamaurida Diravana.’ (1 Sis. 16:35) Lau na na abia daemu Iehova e abidadama heniamu taudia na ia ese be gimadiamu, “ena hereḡu ese mauri taudia ida baine ḡuidia hebou.”—1 Sam. 25:29.