1-2. (a) Dahaka dainai aposetolo Paulo na e gwa lalokau na kara “herea-daena”? (b) Ededia henanadai baita herevalaimu?

 APOSETOLO Paulo ese abidadama, helaro bona lalokau e herevalaidia neganai, ia na e gwa “herea-daena be lalokau mo.” (1 Kor. 13:13) Dahaka dainai Paulo na unu e hereva toma? Vaira negai Dirava ena gwauhamata na vada be ḡuḡurumu dainai, unu gwauhamata na ma basita larodia loumu. To eda lalokau Iehova bona taunimanima ediai na be mia hanaihanaimu. Bona eda lalokau idia ediai na baita habadaiamu.

² Lalokau na hanaihanai baita hahedinaraiamu dainai, ini henanadai mani baita lalodia. Ginigunana na, dahaka dainai baita helalokau heheni? Iharuana na, edena dala ai baita helalokau heheni? Bona ihatoina be, edena dala ai eda helalokau heheni karana baita hagoadaia?

3. Dahaka dainai baita helalokau heheni?

³ Dahaka dainai baita helalokau heheni na mai anina bada? Badina ta na Kristen taudia korikoridia edia kara badana na lalokau. Iesu ese ena aposetolo taudia e hamaorodia, eto:  “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Danu, baita helalokau hehenimu neganai lalotamona ai baita nohomu. Paulo na e gwa lalokau “na ihatamonada ḡauna herea-daena.” (Kol. 3:14) To, baita helalokau heheni badina ma ta na, aposetolo Ioane ese tadikakana e tore henidia neganai e gwauraia, eto: “Dirava e ura heniamu tauna ese tadikakana danu baine ura henia.” (1 Ioa. 4:21) Baita helalokau hehenimu neganai, baita hahedinaraiamu Dirava na ta lalokau heniamu.

4-5. Edena dala ai Dirava ilalokau henina karana, bona ta ta baita helalokau heheni karana na e ḡaukara heboumu? Mani haheitalai ta a gwauraia.

⁴ Edena dala ai Dirava ilalokau henina karana, bona ta ta baita helalokau heheni karana na e ḡaukara heboumu? Ina haheitalai aita laloa, kudou bona tauani kahadia ma haida na e ḡaukara heboumu. Heḡereḡere, dokta ese imada ai eda pulse e sekeamu badina e uramu baine diba bema kudouda na goada eiava lasi. Una haheitalai amo dahaka ta dibamu?

⁵ Dokta ese eda pulse amo kudouda ena goada e dibamu heḡereḡerena, ita danu eda lalokau ma haida ediai baita haeroamu neganai baita dibamu eda lalokau Dirava enai be goada eiava lasi. Bema ta lalopararamu ḡau haida daidiai eda lalokau tadikaka taihu ediai na dia guna bamona, anina na eda lalokau Dirava enai danu e ore e laomu. A bema tadikaka taihu baita lalokau henidiamu, una ese be hahedinaraiamu eda lalokau Dirava enai na goada.

6. Bema tadikaka taihu ediai eda lalokau na dia goada, dahaka dainai una na hekwakwanai badana? (1 Ioane 4:​7-9, 11)

⁶ Bema eda lalokau tadikaka taihu ediai na dia goada una na hekwakwanai badana. Dahaka dainai? Badina una ese e hahedinaraiamu eda hetura karana Iehova ida na dia goada. Aposetolo Ioane ese una na e hahedinaraia, eto: “Tadikakana, e itaiamu tauna, na basinema ura henia, se itaiamu Diravana ede bema ura henia toma?” (1 Ioa. 4:20) Dahaka ta dibamu? Bema ita na ‘baita heura hehenimu,’ Iehova na be moalemu.—1 Ioane 4:​7-9, 11 ba duahidia.

7-8. Ededia dala ai baita helalokau heheni?

⁷ Nega momo Dirava ena Hereva ese e haḡanidamu baita “helalokau heheni.” (Ioa. 15:​12, 17; Roma 13:8; 1 Tes. 4:9; 1 Pet. 1:22; 1 Ioa. 4:11) To lalokau na kudou amo e varamu karana, bona taunimanima ese ita kudouda na se itaiamu. Una dainai, edena dala ai haida na bae diba ita na idia ta lalokau henidiamu? Eda hereva bona kara amo be dibamu.

⁸ Ita ese dala idauidau ai baita hahedinaraia tadikaka taihu na ta lalokau henidiamu. Dala haida na ini: “Ba hereva heheni mai momokanimui ida.” (Sek. 8:16) “Ba noho hebou mai mainomui ida.” (Mar. 9:50) “Ba hemataurai heheni.” (Roma 12:10) “Ba heabi-dae heheni.” (Roma 15:7) Nega iboudiai “emui dika ba hegwau tao heheni.” (Kol. 3:13) “Umui ta ta emui maduna ba hehua heheni.” (Gal. 6:2) “Ba hahegoada heheni.” (1 Tes. 4:18) “Ba hahealo heheni.” (1 Tes. 5:11) Bona “ta ta bamomui daidiai ba ḡuriḡuri.”—Iak. 5:16.

9. Dahaka dainai ma haida ihagoadadia na lalokau karana? (Laulau danu ba itaia.)

⁹ Ma haida baita lalokau henidia dalana ta mani aita herevalaia. Paulo na e gwa: “Ba  hahegoada heheni.” Dahaka dainai haida ihagoadadia na lalokau karana? Baibul refrens ta ese Paulo e ḡaukaralaia herevana “hahegoada” anina na ini e herevalaia toma, “hekwakwanai badana ta e davaria tauna ta badinai ba gini bona ba hagoadaia.” Una dainai tadikaka ta o taihu ta na ena metau lalonai ta hagoadaiamu neganai, ta duruamu dounu Dirava baine hesiai henia. Ia ida ta tai heboumu neganai ta hahedinaraiamu ia na ta lalokau heniamu.—2 Kor. 7:​6, 7, 13.

10. Edena dala ai hebogahisi bona tauhalo ihenina karana na e ḡaukara heboumu?

¹⁰ Edena dala ai hebogahisi bona tauhalo ihenina karana na e ḡaukara heboumu? Hebogahisi tauna na hekwakwanai e davari tauna ena hisihisi e itaiamu bena ḡau haida e karamu baine durua helaoreana. Una dainai ta ta bogaia hisimu neganai, una hemami ese ita na e doridamu ia ta hagoadaiamu. Paulo ese Iehova ena hebogahisi taunimanima ediai na unu e herevalaia toma. Danu, e gwa Iehova na “Tama hebogahisina, tauhalo Diravana.” (2 Kor. 1:3) Paulo ese e ḡaukaralaia herevana, ‘hebogahisi’ na ita ese haida ta bogadia hisimu hemamina e herevalaia. Dirava na e gwauraia “Tama hebogahisina” badina ia na taunimanima e bogadia hisi badamu Diravana. Baibul e gwaumu, ‘eda hisihisi iboudiai lalodiai ia ese tauda e halodiamu.’ (2 Kor. 1:4) Nadi amo e aru lasimu ranu ḡoevana na ranu mase taudia ese e moalelaiamu heḡereḡerena, Iehova ese lalometau taudia na taudia e halomu bona goada e henidiamu. Edena dala ai Iehova heḡereḡerena haida baita bogadia hisi bona tauhalo baita henidia? Dala ta na, ita ese baita kara ḡaudia amo. Unu ḡau haida be dahaka?

11. Kolose 3:12 bona 1 Petro 3:8 heḡereḡeredia, ededia kara ese bae duruda ma haida baita lalokau henidia bona baita hagoadadia?

¹¹ Dahaka ese baine duruda hanaihanai ma haida baita lalokau henidia bona baita “hahegoada heheni”? Namona na baita hekwarahi baita hekaha heheni, baita heura heheni tadikaka na heheto, bona baita gado namo. (Kolose 3:12; 1 Petro 3:8 ba duahidia.) Unu kara ese ita be ede bae duruda toma? Hebogahisi bona kara namodia ma haida na iseda kara ai baela neganai, hekwakwanai e davarimu taudia na baita hagoadadiamu. Una na Iesu ena hereva bamona, eto: “Lalona e honu honu daemu ḡaudia amo uduna e herevamu. Tau namona ese ḡau namodia lalona ai e haboumu amo ḡau namodia e vaimu.” (Mat. 12:​34, 35) Heduru e uramu tadikakadia bona taihudia ta durudiamu neganai, ta hahedinaraiamu idia na ta lalokau henidiamu.

12. (a) Bema basita henahua tohomu, dahaka be varamu? (b) Edena henanadai baita herevalaiamu?

¹² Ita iboudai na ta uramu “baita heura heheni.” (1 Ioa. 4:7) To, namona na baita helalotao Iesu na e gwa ‘diaḡau edia lalokau do baine keru.’ (Mat. 24:12) Iesu na se gwa iena hahediba taudia padadiai lalokau na baine keru, to bema basita henahua tohomu, tanobada taudia heḡereḡeredia ita padadai eda lalokau na be kerumu. Una dainai, ina henanadai baita laloa na ḡau badana: Ede baita diba toma bema iseda lalokau tadikakada ediai na goada?

13. Dahaka ese iseda lalokau baine tohoa diba?

¹³ Dala ta na hekwakwanai e varamu negadiai ta karamu ḡaudia amo baita dibamu. (2 Kor. 8:8) Aposetolo Petro ese una na e herevalaia,  eto: “A herea-daena binai: ba heura heheni mai lalomui idoidiai, badina be uraheni ese kara dika momo e tahunimu.” (1 Pet. 4:8) Una dainai ma haida edia manoka ḡaudia bona kara kereredia ese iseda lalokau na baine tohoa diba.

14. Petro Ginigunana 4:8 ese e herevalaia lalokauna be ede baita hahedinaraia toma? Haheitalai ba gwauraia.

¹⁴ Mani Petro ena hereva aita haerodia. Siri 8 matamana kahanai, Petro ena hereva “ba heura heheni mai lalomui idoidiai,” anina na mai momokanida ida una kara baita hahedinaraia. Una siri dokonai, ina hereva ‘tahuni’ e ḡaukaralaia, anina na tadikaka taihu edia dika baita gwautao. Ini aita haheitalaia toma: Teibolo ta ai maka-maka na momo, oi na dabua ta bo tahoamu, dia maka tamona mo to maka iboudiai bo koudiamu. Dabua ese maka iboudiai e koumu heḡereḡerena, mai laloda idoinai ida tadikaka taihu baita lalokau henidiamu neganai, edia kara dika, dia ta o rua to iboudiai baita gwaudia taomu.

15. Bema eda lalokau tadikaka taihu edia na goada, dahaka baita kara dibamu? (Kolose 3:13)

¹⁵ Oibe, tadikakada ta lalokau henidia badamu dainai, edia dika na ta gwaudia taomu,  ena be nega haida unu baita kara toma na auka. (Kolose 3:13 ba duahia.) Tadikakada edia dika ta gwau taomu neganai, ta hahedinaraiamu eda lalokau idia ediai na goada bona ta uramu Iehova baita hamoalea. To bema haida edia kara na asita moalelaimu eiava e habadudamu, dahaka baita kara?

16-17. Dahaka ese baine duruda ma haida edia kerere baita laloboio? Haheitalai ba gwauraia. (Laulau danu ba itaia.)

¹⁶ Namona na tadikaka taihu edia kara namodia ba lalo, dia edia kerere. Mani ina haheitalai a laloa: Oi na tadikaka taihu haida ida o moale heboumu. Una moale hebou dokonai oi na grup foto ta o abia. To, foto ma rua o abi badina reana foto ginigunana na dia namo. Hari, dekemuai foto na toi, to foto ta ai tadikaka ta na se kiri. Oi be dahaka bo karamu? Una foto na bo kokiamu, badina foto ruaosi lalodiai, umui iboumui ai na o kiri, una tadikaka danu.

¹⁷ Ta dogotaomu fotodia na ta lalotaomu memoridia ida baita haheḡereḡereamu. Tadikaka taihu ida ta moalelai negadia na iseda memori namodia. To reana una moale hebou negana ta ai, tadikaka ta o taihu ta ena hereva eiava kara ese e hahisida. Dahaka baita kara? So ura heniamu foto o kokiamu heḡereḡerena una memori danu ba kokia. (Her. 19:11; Efe. 4:32) Namona na eda  tadikaka o taihu ena kerere maraḡimaraḡidia baita laloboio, badina ia ida nega namodia momo ta moalelai hebou. Oibe, ita na ta uramu memori unu bamodia baita lalodia tao.

18. Ina atikol ai lalokau baita hahedinaraia poin badadia be dahaka?

¹⁸ Dahaka dainai ta uramu eda helalokau heheni karana na baine goada? Ina atikol ai tame herevalaia bamona, tadikaka taihu ta lalokau henidiamu neganai, ta hahedinaraiamu Iehova ta lalokau heniamu. Ededia dala ai tadikaka taihu ediai lalokau ta hahedinaraiamu? Dala ta na, idia baita hagoadadia. Hebogahisi dainai ta uramu baita “hahegoada heheni.” Edena dala ai eda helalokau heheni karana baine goada? Baita hekwarahi ma haida edia dika baita gwautao.

19. Dahaka dainai hari helalokau heheni karana na mai anina bada?

¹⁹ Dahaka dainai hari helalokau heheni karana na mai anina bada? Petro ese badina e gwauraia, eto: “Ḡau iboudiai dokodia vada be kaumu; . . . ba heura heheni mai lalomui idoidiai.” (1 Pet. 4:​7, 8) Ina tanobada dikana na kahirakahira be oremu dainai, dahaka be varamu? Iesu ese ena hahediba e hamaorodia, eto: “Lau ladagu dainai bese iboudiai ese bae inai henimui.” (Mat. 24:9) Baita gini goada totona, namona na lalotamona ai baita noho. Unu baita kara tomamu neganai, Satana ese ita na basine hapararadamu, badina ita na ta helalokau hehenimu, bona lalokau na “ihatamonada ḡauna herea-daena.”—Kol. 3:14; Fili. 2:​1, 2.