1-2. Ededia dala ai haida ese basie kara namo henidamu?

 IESU ena haheitalai ta lalonai, vabu ta ese judge ta e noia loulouva baine durua, badina ta ese se kara namo heniava. Iesu ena hahediba taudia ese una hahine ena hemami na e lalopararalaia, badina una negai, taunimanima momo na asie kara namo henidiava. (Luka 18:​1-5) Ita ese una hahine ena hemami danu ta lalopararalaiamu, badina nega haida ita danu haida ese asie kara namo henidamu.

² Hari ina nega ai, taunimanima momo ese bese iabi isidia karadia, heiriheiri, bona mataḡaniḡani karadia e lalo badamu, unu ḡau daidiai nega haida ita danu basie kara namo henidamu. (Koh. 5:8) To, reana ita na basita moalemu bema nega haida tadikaka o taihu ta ese basine kara namo henidamu. Momokani, eda tadikaka bona taihu na dia ita e inai henidamu taudia. Idia danu dia ḡoevadae taudia. To, ita na ḡau momo baita dibamu Iesu bona ma haida ese idia asie kara namo henidiava taudia e kara henidia dalana amo. Bema ita e inai henidamu taudia edia kara na ta haheaukalaimu, namona na eda tadikaka taihu ediai danu haheauka karana baita hahedinaraia! Iehova ena lalohadai be ede bamona bema kongrigeisin lalonai tadikaka taihu eiava ma haida ese se kara namo henidamu? Ia ese ita edai e varamu ḡaudia be e lalodia badamu, a?

3. Haida ese e hahisidamu neganai, Iehova ese una kara be ede e laloa tomamu, bona dahaka dainai?

³ Iehova na e uramu haida ese bae kara namo henida. Haida ese e hahisidamu neganai, ia ese una kara na e itaiamu. “Iehova na kara maoromaoro e ura heniamu.” (Sal. 37:28) Iesu ese  ita e gwauhamata henida Iehova na ena nega korikori ai “davadia do baine henidia haraḡa”. (Luka 18:​7, 8) Bona kahirakahira ia ese eda hisihisi iboudiai be haoremu bona una nega ai ta ese basine hahisida loumu.—Sal. 72:​1, 2.

4. Hari ina nega ai Iehova be edena dala ai ita e durudamu?

⁴ Iehova ese hekwakwanai iboudiai be haoremu negana ta nariamu lalonai, Ia ese e durudamu haida ese se kara namo henidamu karadia baita haheaukalai. (2 Pet. 3:13) Heḡereḡere, Iehova ese ita asie kara namo henidamu taudia baita kara henidia daladia e hadibadamu, unu amo hekwakwanai basie bada. Iehova ese una e karaia dalana ta na, Baibul ai Natuna ena haheitalai hereadaena e torea, unu amo ita baine duruda kara unu bamodia baita haheaukalai. Danu haida ese se kara namo henidamu neganai, Iehova ese Baibul amo ita baita badina hahekau herevadia e henidamu.

OI ASIE KARA NAMO HENIMU TAUDIA O KARA HENIDIAMU DALANA NAHUANA BA TOHO

5. Dahaka dainai se kara namo henidamu taudia ta kara henidiamu neganai, nahuada baita toho?

⁵ Haida ese basie kara namo henidamu neganai, baita hisihisimu bona baita lalohekwarahimu. (Koh. 7:7) Abidadama hesiai taudia, heḡereḡere Iobu bona Habakuku danu, unu e hemami toma. (Iobu 6:​2, 3; Hab. 1:​1-3) Vaia una na e varamu ḡauna, to bema se kara namo henidamu taudia ta hereva henidiamu neganai, namona na baita henahua toho unu amo hekwakwanai basita havara.

6. Absalom ena haheitalai amo dahaka ta dibamu? (Laulau danu ba itaia.)

⁶ Bema ta ese ita eiava ta lalokau heniamu tauna ta se kara namo heniamu neganai, reana ta uramu davada baita abi. Unu baita kara tomamu neganai, hekwakwanai na be badamu. Mani King David natuna Absalom ena haheitalai a laloa. E kamonai taihuna Tamara na Amnon ese e reipia neganai, ia na e badu dikadika. Mose ena Taravatu heḡereḡerena ai, Amnon na ena kerere dainai baine mase na maoro. (Lev. 20:17) Badi maorona dainai Absalom na e badu, to ia na asi ena maoro Amnon baine alaia mase.—2 Sam. 13:​20-23, 28, 29.

7. Salamo e torea tauna na taunimanima edia kara havara e ita neganai, dahaka e kara?

⁷ Taunimanima ese edia kerere davadia asie abimu neganai, reana baita lalomu eda kara maoromaoro na ta hahedinaraia  kavamu. Iehova ena hesiai tauna ta na e itaia taunimanima namodia na ma haida ese asie kara namo henidiava, a kara dika taudia be edia mauri na e moalelaiva. Ia na e gwa, “kara dika taudia bini; asie hekwarahimu.” (Sal. 73:12) Taunimanima edia kara havara dainai ia na e lalohisihisi bona e lalo ena hesiai ḡaukara Iehova enai na e karaia kavava. Ia na e gwa: “Na haeroa ede baina dibaia toma negana ai, ita-itana egu ai na hekwarahi ḡauna.” (Sal. 73:​14, 16) Bona ma e gwa: “A lau be aegu mokona e hetutuhi, egu raka ai mokona na dedi.” (Sal. 73:2) Tadikaka ta ladana Alberto enai danu unu e vara toma.

8. Haida ese Tadikaka ta e hahemaoro henia kerere dainai, dahaka e vara?

⁸ Tadikaka haida ese Alberto e laloa kerere, e gwauva ia na kongrigeisin monina e henaoa. Una dainai, kongrigeisin ai e abi hahenamodia e haboio bona una sivarai e kamonai tadikaka taihu ese na asie matauraiava. Ia na e gwa, “Una neganai na badu bona na lalohisihisi.” Una hemami dikana dainai ena hetura karana Iehova ida na e dika, bona laḡani faiv lalodiai lauma dalana ai e manoka. Ina ekspiriens ese e hahedinaraiamu ita edai na unu be vara tomamu, bema ma haida edia kara dainai eda badu basita biaguamu.

 IESU ENA HAHEITALAI BA TOHOTOHOA

9. Iesu be ededia kara kereredia e haheaukalai? (Laulau danu ba itaia.)

⁹ Iesu na haheitalai namona e hahedinaraia. Mani iena ruma bese bona taunimanima ese ia e kara henia karadia haida aita lalo. Ia varavarana haida na e gwauva Iesu na e kavaia, dubu igunalaina taudia be e gwauva Iesu na demoni ida e ḡaukara hebouva, bona Roma tuari taudia be Iesu e kirikirilaia, e dadabaia, bena e alaia mase. (Mar. 3:​21, 22; 14: 55; 15:​16-20, 35-37) To, Iesu ese unu iboudiai e haheaukalai bona edia kerere davadia na se halou. Iena haheitalai amo dahaka ta dibamu?

10. Iesu ese ia se kara namo henia taudia edia kara be ede e haheaukalai toma? (1 Petro 2:​21-23)

¹⁰ Petro Ginigunana 2:​21-23 ba duahidia. a Haida ese dia dala maorona ai ita e kara henidamu neganai, Iesu ena haheitalai namona baita tohotohoa. Ia na mai dibana edena nega ai asi reḡereḡerena baine noho bona edena nega ai baine hereva. (Mat. 26:​62-64) Nega haida taunimanima ese e sivarailaia koikoiva neganai, Iesu na hereva ta se gwauraiava. (Mat. 11:19) To ia e herevava neganai, ia ese e daḡedaḡe heniava taudia na se hereva dika henidiava eiava ena hereva amo se hagaridiava. Iesu na nega iboudiai ena hereva e nari namonamova badina ia ese “Hahemaoro Diravana maoromaorona e abidadama henia.” Iesu na mai dibana ia enai e varava ḡaudia iboudiai na Iehova ese e itaiava. Bona e abidadama, Iehova ese nega korikori ai unu iboudiai be hamaoromaorodiamu.

11. Ededia dala ma haida ai eda hereva baita nari namonamo? (Laulau danu ba itadia.)

¹¹ Bema ta ese ita na dia dala maorona ai e  kara henidamu, namona na Iesu e kara bamona eda hereva nahuadia baita toho. Heḡereḡere, bema e vara ḡauna na dia kerere badana, reana hereva ta basita gwauraia. Eiava hereva ta basita gwauraia bema baita gwauraimu ḡaudia ese hekwakwanai be habadaiamu. (Koh. 3:7; Iak. 1:​19, 20) To bema ta itaiamu, ta na dia dala maorona ai eda tadikaka o taihu e kara heniamu, eiava hereva momokani ta uramu baita gimaia, namona na nega unu bamodia ai baita hereva lasi diba. (Apos. 6:​1, 2) To namona na mai manauda bona mai hematauraida ida baita hereva.—1 Pet. 3:15. b

12. Edena dala ai baita hahedinaraia “Hahemaoro Diravana maoromaorona” ta abidadama heniamu?

¹² Namona na ita ese Iesu baita tohotohoa bona “Hahemaoro Diravana maoromaorona” baita abidadama henia. Bema haida ese asie kara namo henidamu, namona na baita abidadama Iehova ese unu iboudiai e itamu. Una ese ita na be durudamu taunimanima edia koikoi karadia baita haheaukalai, badina ta dibamu kahirakahira Iehova ese hekwakwanai iboudiai be haorediamu. Namona na Iehova imana ai baita rakatania, unu amo mai moaleda ida baita nohomu bona haida basita inai henidiamu. Badina ma haida ibadu henidia karana ese dika be havaraiamu, eda moale be haoreamu, bona eda hetura karana Iehova ida be hadikaiamu.—Sal. 37:8.

13. Dahaka ese baine duruda mai haheaukada ida haida edia kara kereredia baita haheaukalai?

¹³ Momokani, ita ese Iesu ena haheitalai na basita badinaia ḡoevaḡoeva diba. Nega haida, eda kara bona hereva kererena ta dainai baita lalo-hisihisimu. (Iak. 3:2) Bona haida ese dia dala maorona ai be kara henidamu neganai, basita moalemu bona eda mauri ai una lalohisihisi na be mia daudaumu. Bema oiemu ai na unu e vara tomamu, namona na ba diba Iehova na mai dibana oiemu ai e varamu ḡaudia iboudiai. Bona Iesu danu oiemu ai e varamu ḡaudia na e lalopararalaimu, badina ia danu taunimanima haida ese asie kara namo henia. (Heb. 4:​15, 16) Bema haida ese e kara auka henidamu, Iesu ena haheitalai namodia bona Iehova ese e heni hahekau herevadia ese be durudamu. Mani Roma bukana lalonai siri rua baita herevalai.

“DIKA BASIO HADAVAIA; BADU BAINE MIA”

14. “Dika basio hadavaia; badu baine mia” anina be dahaka? (Roma 12:19)

¹⁴ Roma 12:19 ba duahia. Aposetolo Paulo ese Kristen taudia e hagoadadia, eto “dika basio hadavaia; badu baine mia.” Iena hereva anina be dahaka? Una siri ena hereva heḡereḡerena, badu na Iehova ena, ia ese ena nega maorona ai bona ena dala heḡereḡerena ai hahemaoro baine karaia. Tadikaka ta ladana John na ini e gwau toma: “Lau ese egu badu baina biagua na namo unu amo ḡau kererena ta basina karaia; una na mai hekwarahina. Roma 12:19 ese e durugu baina haheauka bona Iehova enai baina tabekau.”

15. Dahaka dainai Iehova baita naria hekwakwanai baine hamaoromaorodia na dala hereadaena?

¹⁵ Ita ese Iehova ta nariamu hekwakwanai ta baine hamaoromaoroa na mai ena namo. Unu ta kara tomamu dainai, basita lalohisihisimu bona basita badumu. Iehova na e uramu ita baine duruda. Ia na e gwa: “Dava be lau imagu ai, lau ese baina karaia.” Bema Iehova ena gwauhamata baita abia daemu, ita ese eda hekwakwanai na Ia imana ai baita rakataniamu; badina dibada Iehova ese ita asie kara namo henidamu taudia na dalana maorona ai be hahemaoro henidiamu. Tame herevalaia tadikakana John enai, na unu e vara toma. Ia na  e gwa, “Iehova baina naria bona ia ese egu hekwakwanai baine hamaoromaoroa na namo, to dia lau sibogu ese baina hamaoromaoroa.”

“EMUI KARA NAMO AMO DIKA BA HADAREREA”

16-17. Edena dala ai ḡuriḡuri karana ese be durudamu ‘kara namo amo dika baita hadarerea’? (Roma 12:21)

¹⁶ Roma 12:21 ba duahia. Paulo ese Kristen taudia e hagoadadia, eto: “Emui kara namo amo dika ba hadarerea.” Iesu na ena Ororo Harorona ai, e gwa: “Inaimui ba lalokau henidia, bona bae daḡedaḡe henimui taudia daidiai ba ḡuriḡuri.” (Mat. 5:44) Momokani ia na unu e kara toma. Tame itaia tuari taudia ese Iesu bae hamasea neganai ia na unu iboudiai e haheaukalai, e daḡedaḡe henia, e kara auka henia bona hisihisi bada herea e haheaukalai. Iesu ese e haheaukalai hisihisidia na basita lalopararalaidia ḡuḡurumu.

¹⁷ Ena be Iesu na hisihisi idauidau e mami, to ena lalokau bona ena abidadama Iehova enai na ḡau ta ese se hadikaia. Ia ese Tamana bema noia diba, tuari taudia na edia kara davadia bema heni, to ia na unu se kara toma. E ḡuriḡuri, eto: “Tamagu e, ina e karaiamu karana na asi dibadia, davadia na basio henidia.” (Luka 23:34) Iehova ta noiamu e kara auka henidamu taudia baine durudia neganai, una kara ese ita na lalo-maino be henidamu bona eda badu na basine mia daudaumu.

18. Ḡuriḡuri ese Alberto bona John be ede e durudia toma?

¹⁸ Matamanai tame herevalai tadikakadia raruosi na ḡuriḡuri karana ese e durudia, taunimanima edia hahemaoro kereredia e haheaukalai. Alberto na e gwa: “Lau na dia dala maorona ai e kara henigu tadikakadia daidiai na ḡuriḡuri. Iehova na noia loulou baine durugu unu e vara ḡaudia daidiai basina badu noho badu noho.” Hari, Alberto na e moalemu badina mai momokanina ida Iehova e hesiai heniamu. John na e gwa: “Nega momo Iehova na noia e hahisigu tadikakana na baine durua bona lau danu baine durugu ena dika baina gwauatao. Momokani unu ḡuriḡuri ese lau na lalo-maino e henigu.”

19. Ina nega oromana dokona ta lao heniamu lalonai dahaka baita kara be namo? (1 Petro 3:​8, 9)

¹⁹ Ina nega oromana dokona ta lao heniamu lalonai, haida ese ita na doini be kara auka henidamu. Herevana dahaka baine vara ita edai, to namona na hanaihanai Iehova baita noia baine duruda. Hanaihanai, Iesu ese haida edia hahemaoro kererena e haheaukalaia dalana, baita tohotohoa. Bona Iehova ese Baibul amo e henida hahekau herevadia, na nega iboudiai baita badina. Unu baita kara tomamu neganai, momokani Iehova ese ita na be hanamodamu.—1 Petro 3:​8, 9 ba duahidia.