1. Aposetolo Paulo ese hesiai taudia be ede e lalodia toma?

 KONGRIGEISIN lalonai hesiai taudia na mai anina bada ḡaukaradia e karamu. Aposetolo Paulo ese e hahedinaraia unu abidadama tadikakadia edia ḡaukara na e lalodia bada. Heḡereḡere, Filipi Kristen taudia e tore henidia neganai, ia ese elda bona hesiai taudia danu e hanamodia.—Fili. 1:1.

2. Tadikaka ladana Luis ese ena hesiai madunana e abia neganai, ena hemami be ede bamona?

² Bapatiso tadikakadia, herevana matamata o buruka, ese hesiai tauna ena maduna na e moalelaiamu. Heḡereḡere, tadikaka Devan na laḡanina18 ai hesiai tauna ai ela. Bona tadikaka ma ta, ladana Luis na laḡanina 50 ai hesiai tauna ai ela. Ia ese e abia hemamina na haida edia heḡereḡerena, e gwa: “Na moale badamu kongrigeisin ai hesiai ḡaukara na karaiamu, badina tadikaka taihu ese lau na e lalokau henigumu!”

3. Ina atikol ai, ededia henanadai haeredia baita herevalaimu?

³ Bema oi na bapatiso tadikakana ta bona hesiai tauna ai do sola, una be emu tahua ḡauna ai ba halaoa diba, a? Dahaka ese baine hagoadamu diba unu ba kara toma? Bona ededia Baibul ena haheḡani ba badinadia, bena ba heḡereḡere diba hesiai tauna ai baola? Ina atikol ai, ita ese unu henanadai haeredia baita herevalaimu. Mani hesiai taudia ese bae kara ḡaukaradia aita herevalaidia guna.

 HESIAI TAUNA ENA ḠAUKARA BE DAHAKA?

4. Hesiai tauna be dahaka ḡaukara e karamu? (Laulau danu ba itaia.)

⁴ Hesiai tauna na bapatiso tadikakana ta, ia na lauma helaḡa ena siahu amo e abia hidi elda baine durudia kongrigeisin ena ḡaukara idauidau baine kara. Hesiai taudia haida ese pablisa e durudiamu ededia teritori ai bae haroro bona haroro ai bae ḡaukaralai literature e henidiamu. Haida na Kingdom Hall ihaḡoevana bona ihanamona ḡaukaradia e durumu. Danu, kongrigeisin heboudia ai idia ese atenden ḡaukaradia e karamu, saon bona vidio ḡaudia e narimu. Unu e karamu ḡaukaradia iboudiai na ḡaukara namodia. To, ḡau badana na hesiai taudia na Iehova e lalokau heniamu bona ena taravatu maorodia e badinadiamu. Bona Kristen tadikaka taihu na e lalokau henidiamu. (Mat. 22:​37-39) Edena dala ai bapatiso tadikakana ese hesiai tauna ena ḡaukara baine abia?

5. Tadikaka ta be dahaka baine kara diba hesiai tauna ai bainela?

⁵ Baibul lalonai hesiai tauna ai bainela tauna ese baine kara ḡaudia na e herevalaidia. (1 Tim. 3:​8-10, 12, 13) Hesiai tauna ai e uramu bainela tauna ese unu Baibul siridia na baine stadilaidia namonamo bona baine ḡaukara goada baine badinadia. To ḡau ginigunana, namona na ia ese unu hahenamo baine abi badina na baine laloa namonamo guna.

DAHAKA ESE BE HAGOADAMUMU HESIAI MADUNANA BA TAHUA?

6. Tadikaka ta be dahaka badi dainai hesiai ḡaukara baine kara? (Mat. 20:28; laulau danu ba itaia.)

⁶ Iesu Keriso na eda haheitalai hereadaena. Ia na Tamana bona taunimanima e lalokau henidia dainai ena hesiai ḡaukara e karadia. Lalokau dainai e ḡaukara goada taunimanima ese asie urava bae kara ḡaukaradia na e kara. (Mataio 20:28 ba duahia; Ioa. 13: 5, 14, 15) Bema oi na lalokau dainai hesiai ḡaukara bo karamu, Iehova ese be hanamomumu bona be durumumu hesiai tauna namona ai bo laomu.—1 Kor. 16:14; 1 Pet. 5:5.

7. Dahaka dainai tadikaka na sibona ladana iabi isina dainai hesiai ḡaukarana baine abia na kerere?

⁷ Tanobada ai, sibodia ladadia e abi isimu taudia na taunimanima ese e lalodia badamu. Iehova ena orea na dia unu bamona. Iesu  heḡereḡerena, lalokau dainai hesiai ḡaukara be karamu tadikakana na dia lada bona dagi badana dainai unu be kara tomamu. Bema unu bamona hekokoroku tauna ta na kongrigeisin ai be abi hidimu, ia na basine uramu Iehova ena mamoe totodia taunimanima ese asie uramu bae kara ḡaudia na baine kara. Ia na be laloamu unu na dia ia ese baine kara ḡaukaradia. (Ioa. 10:12) Iehova ese hekokoroku eiava sibona ladana e abia isimu tauna na basine hanamoa.—1 Kor. 10:​24, 33; 13:​4, 5.

8. Iesu ese ena aposetolo taudia be dahaka sisiba e henidia?

⁸ Nega haida, Iesu bamona namodia danu badi kereredia daidiai e urava hahenamo bae abi. Mani Iesu ena aposetolo taudia rarua—Iakobo bona Ioane ediai e vara ḡauna aita laloa. Idia ese Iesu e noia ena Basileia lalonai dagi badadia baine henidia. Iesu ese idia na se hanamodia. To ia ese aposetolo 12 e sisiba henidia, e gwa: “Ta baine lohia e tomamu, ia na isiaimui baine lao heni; bona ta baine herea e tomamu, ia na iboumui ai emui hesiai tauna ai bainela.” (Mar. 10:​35-37, 43, 44) Badi maorona dainai una maduna e abiamu tadikakadia na hahenamo ta kongrigeisin ai.—1 Tes. 2:8.

DAHAKA ESE UNA MADUNA BAVABIA URANA BAINE HAGOADAIA DIBA?

9. Edena dala ai hesiai tauna ai baola urana ba hagoadaia diba?

⁹ Iehova o lalokau heniamu dainai o uramu ma haida daidiai hesiai ḡaukara na ba karaia. To reana, hesiai taudia ese bae kara madunadia haida na basio uramu ba karadia. Dahaka ese una maduna ba huaia urana baine hagoadaia diba? Tadikaka taihu ihesiai henidia karana amo e maimu moalena be ede o laloa tomamu? Iesu na e gwa: “Ḡau ihenina be namo bada, ḡau iabina be namo maraḡi.” (Apos. 20:35) Ia ese una hahekau herevana na e badinaia. Iesu ese haida ihesiai henidia karana na e moalelaia bona oi ese danu bo moalelaiamu.

10. Edena dala ai Iesu ese e hahedinaraia haida ihesiai henidia karana na e moalelaia? (Mar. 6:​31-34)

¹⁰ Mani Iesu ese haida idurudia karana amo e abia moalena haheitalaina ta aita laloa. (Mareko 6:​31-34 ba duahidia.) Nega ta ai, Iesu bona ena aposetolo taudia na e hesiku bona bae laḡa-ani totona gabu asi tauna ta ela. To hutuma na una gabu ela guna, badina e urava Iesu ese baine hadibadia. Reana bema gwau, lasi, lau na baina laḡa-ani. Ena be ia bona bamona na asi edia nega bae laḡa-ani bona “bae aniani.” Eiava Iesu ese hereva momokani ta o rua mo bema hadibadia da bema siaidia. To lalokau dainai ḡau momo “e hadibadia” ela bona ‘dina e diho.’ (Mar. 6:35) Ia ese e “bogadia hisi” dainai unu e kara toma. E ura baine hadibadia badina e lalokau henidia. Haida ihesiai henidia karana ese Iesu na e hamoalea bada herea.

11. Edena dala ma ta ai Iesu ese hutuma e durudia? (Laulau danu ba itaia.)

¹¹ Iesu na dia hahediba ḡaukarana mo e karaia, to tauanina dalanai danu hutuma e durudia. Ia ese hoa dalanai aniani e havara bona ena hahediba e henidia bena idia ese hutuma e ubudia. (Mar. 6:41) Unu e kara toma neganai, ena hahediba na haida ihesiai henidia karana e hadibalaidia. Danu e hahedinaraia ḡaukara unu bamodia—hesiai taudia ese bae kara diba ḡaukaradia—na mai anidia bada. Una hoa karana amo Iesu ese aposetolo e ḡaukaralaidia hutuma e ubudia bona “bogadia e kunu.” Mani aposetolo ese e abia moalena a laloa! (Mar. 6:42) Una na dia nega ginigunana Iesu ese ma haida edia namo e atoa guna. Ena tanobada maurina ibounai lalonai, haida ihesiai henidia karana na e laloa bada.  (Mat. 4:23; 8:16) Iesu ese taunimanima e hadibadia bona mai manauna ida edia dabu ḡaudia e heni karana dainai e moale bada. Oi danu, bema mai emu ura ida hesiai tauna ena maduna bo tahuamu oi na bo moalemu.

12. Dahaka dainai tadikaka na basie laloa kongrigeisin iduruna ai edia diba na dia heḡereḡere?

¹² Bema o laloamu emu diba na dia heḡereḡere, basio lalo-manoka. Kongrigeisin ai oi na dounu bae ḡaukaralaimu diba. Paulo ese 1 Korinto 12:​12-30 ai, kongrigeisin lalonai ita iboudai eda ḡaukara e herevalaia karana bo duahiamu neganai, una ese be durumu badamu. Paulo ese e hahedinaraia ḡoevaḡoeva Iehova ena hesiai taudia ma haida heḡereḡeredia, oiemu ḡaukara kongrigeisin lalonai na mai anina bada. Bema hesiai tauna ese baine badina karadia na do so hahedinaraimu, basio hesiku. To namona na Iehova bona tadikakamu totodia ba kara diba ḡaudia ba kara. Ba helalotao elda ese oi ba kara diba ḡaudia na e lalodiamu, bona unu heḡereḡeredia ḡaukara be henimumu.—Roma 12:​4-8.

13. Hesiai tauna ai bainela tauna enai be dahaka ta dibamu?

¹³ Hesiai tauna ai baola diba badina ma ta aita laloa. Hesiai tauna ese baine kara diba ḡaudia momo na Kristen taudia iboudiai ese bae kara ḡaudia. Heḡereḡere, Kristen taudia iboudiai na Iehova bae hetura henia, henia karana amo bainema moalena bae mamia bona Kristen mauri dalana bae maurilaia. To, tadikaka be ma dahaka danu bae kara diba, hesiai maduna bae abi totona?

BA KARA DIBA ḠAUDIA

14. “Matau” anina be dahaka? (1 Tim. 3:​8-10, 12)

¹⁴ Mani 1 Timoteo 3:​8-10, 12 ai hesiai tauna ese baine kara diba karadia haida aita lalodia. (Ba duahidia.) Namona na hesiai tauna na baine “matau.” Una hereva anina na bae matauraia, ena ḡaukara baine lalodia bada bona basine gadaragadara. Ia be vada basine kiri o basine hevasea, a? Lasi, unu na baine kara diba. (Koh. 3:​1, 4) To, namona na ena maduna iboudiai baine lalodia bada. Bema ena maduna na be haḡuḡurudiamu bona be karadia namonamomu, kongrigeisin ese be matauraiamu.

15. “Basie udu mauri” bona “moni basie mata ḡaniḡani heni” anidia be dahaka?

¹⁵ “Basie udu mauri” anina na hereva momokani bae gwaurai, taunimanima ese edia hereva na bae abi dae, bona basie koikoi.  (Her. 3:32) “Moni basie mata ḡaniḡani heni” anina na bisnis dalanai basie koikoi bona moni bae ḡaukaralai namonamo. Danu, tadikaka basie ḡaukaralaidia moni bae kara totona.

16. (a) “Vine ranuna basie inu momo,” anina be dahaka? (b) “Mai lalodia ḡoevadia ida,” anina be dahaka?

¹⁶ “Vine ranuna basie inu momo” anina na alkahol basie inua kekero eiava taunimanima ese basie gwauraidia inuinu kekero taudia. “Mai lalodia ḡoevadia ida,” anina na Iehova ena taravatu heḡereḡerena bae mauri. Ena be oi na dia ḡoevadae, to Iehova ida emu hetura karana na namo dainai maino ai bo nohomu.

17. “Bae dibadia guna,” anina be dahaka? (1 Timoteo 3:10; laulau danu ba itaia.)

¹⁷ “Bae dibadia guna” anina na hesiai tauna ai e uramu bainela tauna ese baine hahedinaraia, ia na heḡereḡere maduna baine huadia diba. Una dainai, bema elda ese ḡaukara ta e henimumu, namona na e henimu hahekau herevadia bona orea ena dala ba badinadia. Danu, namona na e henimu ḡaukarana ba lalopararalaia bona ba haḡuḡuru negana ba diba. Bema emu ḡaukara na mai lalomu idoinai ida bo karaiamu, kongrigeisin ese emu kara na be itaiamu bona emu tubu lauma dalanai na be laloa badamu. Elda e, namona na de bapatiso tadikakadia na treinin ba henidia. (1 Timoteo 3:10 ba duahia.) Emu kongrigeisin ai de bapatiso tadikakadia haida edia mauri laḡanidia be 10 ela 14 eiava unu laḡani henudiai, a? Idia be sibodia edia stadi e karamu bona hebou totona e heḡaeḡae namonamomu, a? Hanaihanai e haeremu bona e haroromu, a? Bema oibe, edia mauri laḡanidia bona noho dalana heḡereḡerenai ḡaukara haida ba henidia. Una dala amo, unu tadikaka matamatadia na ba “dibadia guna,” bena gabeai edia mauri laḡanidia na 16 ela 20 neganai, bae heḡereḡere diba hesiai taudia ai baela.

18. “Ta basinema habadelaidia,” anina be dahaka?

¹⁸ “Ta basinema habadelaidia” anina na hesiai tauna ai e uramu bainela tauna na kerere badana ta dainai, ta ese basine habadelaia. To, nega haida Kristen taudia na be habadelaidia koikoimu. Iesu danu e hahebadelaia koikoi, bona ia na e gwa, ia murinai e rakamu taudia danu be hahebadelaidia koikoimu. (Ioa. 15:20) To, bema Iesu heḡereḡerena emu kara na namo, kongrigeisin ai lada namona bo abiamu.—Mat. 11:19.

19. “Basie hodara,” anina be dahaka?

 ¹⁹ “Basie hodara.” Bema do headava, namona na Iehova ese headava e hamatamaia dalana—tau tamona bona hahine tamona ba badinaia. (Mat. 19:​3-9) Kristen tauna na basine matabodaḡa. (Heb. 13:4) To dia una mo. Namona na adavana baine badinaia bona hahine idaudia na basine ḡahusidia.—Iobu 31:1.

20. Ena ruma bese baine “reḡudia namonamo,” anina be dahaka?

²⁰ “Natudia bona edia ruma taudia bae reḡudia namonamo.” Bema oi na ruma bese kwarana ta, emu maduna na ba lalodia bada. Ruma bese tomadihona na ba karaia hanaihanai. Emu ruma bese taudia ta ta ida hanaihanai ba haroro hebou. Bona natumu ba durudia edia hetura karana Iehova ida bae hanamoa. (Efe. 6:4) Ena ruma bese e reḡuamu tauna ese be hahedinaraiamu kongrigeisin na be naria dibamu.—1 Timoteo 3:5 ida ba haheḡereḡerea.

21. Bema oi na do dia hesiai tauna, dahaka ba kara diba?

²¹ Tadikaka e, bema oi na do dia hesiai tauna, mani emu kara ina atikol ai e ato herevadia na ba lalodia namonamo bona Iehova ba noia baine durumu ba badinadia. Hesiai tauna ese baine kara ḡaudia ba stadilai namonamo bona ba ḡaukara goada ba haḡuḡurudia. Emu lalokau ena bada Iehova bona tadikaka taihu ediai ba laloa. Idia ihesiai henidia urana ba habadaia. (1 Pet. 4:​8, 10) Tadikaka taihu ihesiai henidia karana amo e maimu moalena ba mamia. Hesiai tauna ai o uramu baola dainai, Iehova ese emu hekwarahi baine hanamoa!—Fili. 2:13.